FWENYAI KWIPI NE LESA
Nanchi Yehoba Wimuta Muchima Nyi?
“Kwilengulula lo lukatazho lo nji nalo kabiji lundengela kubula kufwenya kwipi ne Lesa.” Bino byo byaambile mwanamukazhi wamwenenga kuba’mba Yehoba kechi wamuta muchima ne. Nanchi ne anweba byobyo mwiumvwa nyi? Inge byobyo kiji, mwakonsha kulanguluka’mba, ‘Nanchi Yehoba wata muchima bapopweshi banji pa muntu pa muntu nyi?’ Mukumbu ke ee. Byambo byaambile Yesu bimwesha kuba’mba Yehoba uta muchima muntu umo umo.—Tangai Yoano 6:44.
Nga Yesu wayuka bulongo Yehoba ne kyaswa muchima wanji kukila muntu uji yense waambapo amba ka? (Luka 10:22) Yesu waambile’mba: “Kafwako muntu wakonsha kwiya kwi amiwa ne, poso Batata bantumine bamukokela ko nji.” Onkao mambo kechi twakonsha kwikala mwana wa bwanga wa kwa Kilishitu nangwa mupopweshi wa Shetu wa mwiulu aye Yehoba atweba benetu ne, kanatu Yehoba mwine witukokela ko aji. (2 Tesalonika 2:13) Inge twaumvwisha byambo byaambile Yesu, twakonsha kuyuka Lesa byo ata muchima bantu banji.
Byambo bya kuba’mba Yehoba ye witukoka byalumbulula ka? Kyambo kya Kingiliki kyatuntululwa amba “kukoka” bekingijisha ne kutazha ku kukoka bukonde bwa masabi. (Yoano 21:6, 11) Nanchi Yehoba witukoka kya kwitukanjikizhatu pa kuba’mba tumwingijilenga nyi? Ine. Yehoba witupa bwanabwabene, onkao mambo kechi witukanjikizha ne. (Mpitulukilo ya mu mizhilo 30:19, 20) Yehoba upesapesa mu michima ya bantu mu ntanda yonse, kukeba baji na michima ya kishinka. (1 Byambo bya Moba 28:9) Umvwe watana muntu wa uno mutundu, umukwasha. Mu ñanyi jishinda?
Yehoba ukoka muntu uji na ‘muchima wa bukishinka.’ (Byubilo 13:48) Yehoba uba bino mu mashinda abiji, kupichila mu byambo bya mambo a awama a mu Baibolo ne mu mupashi wanji wazhila pa kuba’mba bukine bufike kwi atweba. Yehoba inge wamona muchima ubena kukeba kufunda bukine bwa mu Baibolo, wingijisha mupashi wanji wazhila kukwasha uno muntu kumvwisha ne kwibilondela mu bumi bwanji. (1 Kolinda 2:11, 12) Kwa kubula bukwasho bwa Lesa kechi twakonsha kwikala baana ba bwanga ba kwa Yesu nangwa bapopweshi bepana ba Yehoba ne.
Nga byambo bya kwa Yesu byanembwa pa Yoano 6:44, bitufunjishapo ka pe Yehoba? Yehoba ukoka bantu na mambo a kuba’mba umonamo byawama mu michima yabo kabiji wibata muchima pa muntu pa muntu. Kumvwisha mwatala bino byambo bya bukine, byatekeneshe mwanamukazhi watongolwa ku ntendekelo. Waambile’mba: “Kwikala wa mwingilo wa Yehoba ke kintu kyanema bingi kukila pa byonse. Kabiji inge Yehoba wansajile kwikala wa mwingilo wanji ko kuba’mba wannemeka bingi.” Nga anweba? Nanchi kuyuka kuba’mba Yehoba wata muchima bapopweshi banji pa muntu pa muntu kwimulengela kufwenya kwipi kwi aye nyi?
Kutanga Baibolo mu May
[Mepuzho a Lufunjisho pa peja 14]
“Yehoba upesapesa mu michima ya bantu mu ntanda yonse, kukeba baji na michima ya kishinka”