Bukine byo Bwitukasulula
1 Pa kimye kimo, Yesu waambijile Bayudea bamwitabijile’mba: ‘Anweba mukebuyuka bukine, ne abo bukine bukemukasulula ke baana ba bene.’ (Yoa. 8:32) Waambilenga pa kukasuluka kukatampe kwakonsha kwikala ku bantu bonse kikale munonshi nangwa muyanji, wafunda nangwa wabula kufunda. Yesu wafunjishe bukine bwakukasulula bantu mu buzha bwa bundengamambo ne lufu. Byonkatu byalumbulwile Yesu amba: “Bonse balenga mambo bo bazha ba bundengamambo.” (Yoa. 8:34) Kine byotukebeshapo kimye bantu bonse balukokelo kyo ‘bakapokololwa ku buzha bwa bubole, kwikala na bwana bwa bene bwa lukumo bwa baana ba Lesa.’!—Loma 8:21.
2 Bukine bwa kuyuka Yesu ne mwingilo wanji mu kufikizha nkebelo ya Lesa bo bukasulula bantu. Kuyuka bukine kuvwangamo ne kuyuka kitapisho kya bukuzhi kyatapishiwe pa mambo a atweba. (Loma 3:24) Nangwatu lelo jino, kuswa ne kukokela bukine bwa mu Baibolo kwitukwasha kukasuluka ne kubula moyo, kubula kijikila, ne kuchinuzhuka byubilo byatama byonse.
3 Kukasuluka ku Moyo ne ku Bijikila: Bintu bimweka mu ino ntanda kechi byafwainwa kwituletela kijikila ne, mambo twayuka kine kintu bubi kyobwaikelako ne kuba’mba katatakatu bukafumishiwepo pano pa ntanda ponse. (Sala. 37:10, 11; 2 Timo. 3:1; Lum. 12:12) Kabiji bukine bwitwamuna ku mafunjisho a bubela aamba pa bikala muntu umvwe wafwa. Twayuka namba bafu kechi bakonsha kwitukozha ne, kabiji twayuka namba kechi bamanyikwa mu mujilo myaka ne myaka ne, kabiji Lesa kechi wipaya bantu amba ekalenga nabo mwiulu ne.—Sapwi. 9:5; Byu. 24:15.
4 Buno bukine bwakoseshe bamulume ne mukazhi kimye kyafwile mwanabo mu mapuso. Bainanji baambile kuba’mba: “Tuji na kijikila kikatampe bingi mu bwikalo bwetu kibula kupwa, poso tukamone mwanetu jibiji kimye kya lusanguko. Bino twayuka namba kijikila kyetu kikapwa.”
5 Kukasululwa ku Byubilo Byatama: Bukine bwa mu Baibolo bwakonsha kwalula milanguluko ya muntu ne byubilo byanji, akyo kyakonsha kumukasulula ku makatazho. (Efi. 4:20-24) Kwikala wa bukishinka ne kwingila na ngovu kukepeshako buyanji. (Mana. 13:4) Kutemwa bakwenu kukakosesha bulunda bwenu ne abo. (Kolo. 3:13, 14) Kunemeka bumutwe bwa bwina Kilishitu kukepeshako makatazho mu kisemi. (Efi. 5:33–6:1) Kuchinuzhuka kupendwa pendwa, bulalelale, kupeepa fwanka, ne kwingijisha bizhima kulengela kwikala na bumi butuntulu.—Mana. 7:21-23; 23:29, 30; 2 Ko. 7:1.
6 Kyamukatezhe bingi nsongwalume umo kuleka muteeto wanji yeeibijishe wakwingijisha bizhima pa myaka itanu na ina. Juba jimo wasambakene musapwishi wasapwijilenga mu mukwakwa. Watambwile buku kabiji balayañene ne kuba’mba ukamufwakashisha pa nzubo yanji. Lufunjisho lwa Baibolo lwatatwile. Byopapichile bañondo babiji awa nsongwalume walekele kwingijisha bizhima, kabiji pa kupitapo bañondo batanu na basatu, wabatizwe. Kolojanji wamulume ne bukwe yanji byobamwene kuba’mba waamuka ku muteeto wanji wakwingijisha bizhima nabo batatwile kufunda Baibolo.
7 Kwashai Bakwenu Kukasuluka: Aba bonse bakomena mu mafunjisho a bubela, kyakonsha kwibakatazha bingi kumvwisha kukasuluka kwatongolwa mu Byambo bya Lesa. Kikebewa mufunjishi ufunjisha kunengezha bulongo pa kuba’mba afike bantu pa muchima. (2 Timo. 4:2, 5) Kino kechi kyo kimye kya kubwela panyuma mu “kusapwila ku bo bakwata mambo a kupokololwa” ne. (Isa. 61:1) Kukasuluka kwa bwina Kilishitu kwanema bingi kabiji kuleta bumi bwa myaka ne myaka.—1 Timo. 4:16.