Lufunjisho 18

Ikalai Balunda Ba Kwa Lesa Myaka Ne Myaka!

Kikebewa Kwikala na mukoyo pa kusampa mulunda; kabiji neapotu kikebewa kwikala na mukoyo pa kusungijila mulunda. Mukapeshewa bingi pa kwikala na mukoyo ne kutwajijila kwikala balunda na Lesa. Yesu waambile ku bamuketekejile amba: “Bukine bukemukasulula ke bana ba bene.” (Yoano 8:32) Nanchi kino kyayila mwepi?

Pa kino kimye mwakonsha kwiyowa bwana bwa bene. Mwakonsha kukasuluka ku mafunjisho a bubela ne bubela Satana bo akumbanya. Mwakonsha kukasululwa ku kupelelwa kuji mu bantu bavula babula kuyuka Yehoba. (Loma 8:22) Balunda na Lesa bakasuluka nangwatu ku “kuchina lufu.”—Bahebelu 2:14,15.

Mwakonsha kwiyowa bwana bwa bene mu ntanda ipya ya kwa Lesa. Bwana bwa bene bo mwakonsha kwiyowa mu kimye kya kulutwe byo bwawamapo! Mu ntanda ya Paladisa, mukekala kukasuluka ku nkondo, bikola, ne ku bumbanzhi. Kukasuluka ku buyanji ne ku nzala. Kukasuluka ku bukote ne lufu. Kukekala ne kukasuluka ku moyo, lumanamo, ne ku bumbulwakoloka. Baibolo ishimuna’mba: “Muvungulula kuboko kwenu, Ne kwikusha michima ya byonse.”—Masalamo 145:16.

Balunda na Lesa bakekala bomi myaka ne myaka. Bumi bwa myaka ne myaka kyo kya bupe Lesa kyo akapana ku bonse basaka bulunda ne aye. (Loma 6:23) Akilangulukai bumi bwa myaka ne myaka kyo bukalumbulula kwi anweba!

Mukekala na kimye kya kuba bintu byavula. Kampe mukakeba kufunda bya kwimba pa kya kwimbako nyimbo. Nangwa kampepo mukakeba kufunda bya kulenga bipikichala nangwa kwikala kalipentala. Nangwa apo kampe mukakeba kufunda pa banyama ne bijimwa. Kabiji kampe mukakeba kufwakesha mapunzha apusana-pusana ne bantu ba mitundu ne mitundu. Kwikala na bumi bwa myaka ne myaka kukalengela byonse bye kufikizhiwa!

Mukekala ne na kimye kya kusampilamo balunda bavula. Kwikala na bumi myaka ne myaka kukalengela kuyuka bantu bakwabo bavula baalulwa ke balunda na Lesa. Mukayuka bisemwa ne byubilo byabo byawama, kabiji nabo bakekala ke balunda nenu. Mukebatemwa, ne abo bakemutemwa. (1 Kolinda 13:8) Kwikala na bumi bwa myaka ne myaka kukemupa kimye kya kwisampa bulunda na bonse pano pa ntanda! Kyakilapo kuwama, bulunda bwenu ne Yehoba bukakomenangako mu kupita kwa myaka yavula. Shenu ikalai balunda na Lesa myaka ne myaka!