Mwana Lesa Ye ‘Kyeya Kya Pano Pa Ntanda’

Pa juba japeleleko ja Kijiilo kya Matente, ko kuba’mba juba ja butanu na bubiji, Yesu wafunjishenga mu nzubo ya Lesa mu “kibamba mwajinga bilambwilo.” (Yoano 8:20; Luka 21:1) Kino kibamba kyamweka kyajinga pa mpunzha patelwanga amba Lubanza wa Banabakazhi mwajinga tubilambwilo bantu mo babikanga bupe.

Kimye kya kijiilo bufuku, mu uno lubanza wa nzubo ya Lesa mwaikalanga kyeya kikatampe. Mwajinga bitulwapo malampi bina bikatampe, byonse byajinga na bintu bikatampe mwajinga manyi. Kyeya kyafumanga ku ano malampi kyabayile bingi kya kuba kyatokeshanga mpunzha yonse bufuku. Byaambile Yesu byavulwilemo bamutelekelenga pa mambo a kino amba: “Amiwa nekyeya kya pano pa ntanda. Yense undondela kechi ukenda mu mfishi ne, bino ukekala mu kyeya kya bumi.”—Yoano 8:12.

Bafaliseo bakaine byaambilenga Yesu ne kwamba’mba: “Ubena kwishimuna obe mwine; ne kushimuna kobe kechi kwa kine ne.” Yesu wibakumbwile’mba: “Nangwa neshimuna ami mwine, kushimuna kwami kwa kine, mambo nayuka ko nafumine ne ko mbena kuya. Bino anweba kechi mwayuka ko nafumine ne ko mbena kuya ne.” Wanungilepo ne kuba’mba: “Mu Mizhilo yenu mwanembwa’mba: ‘Kushimuna kwa bantu babiji ko kwa kine.’ Amiwa neshimuna ami mwine, ne Batata bantumine nabo banshimuna.”—Yoano 8:13-18.

Na mambo a kukana byaambilenga Yesu, Bafaliseo bamwipwizhe’mba: “Nanchi Bashobe bekala pi?” Yesu wibakumbwile’mba: “Anweba kechi mwangyuka amiwa nangwa Batata ne. Mambo umvwe mwangyuka inge mwayuka ne Batata.” (Yoano 8:19) Nangwa Bafaliseo bakebelenga’mba kanatu bakwate Yesu, kafwako wayile na kumukwata ne.

Yesu wabwezhezhepo byambo byo aambile bya kuba’mba: “Amiwa mbena kuya kabiji mukankeba, bino anweba mukafwilatu mu bundengamambo bwenu. Akwa ko mbena kuya kechi mwakonsha kwiyako ne.” Na mambo a kubula kumvwisha byaambile Yesu, Bayudea batendekele kwiipuzha’mba: “Nanchi ukeba kwiipaya aye mwine nyi? Mambo ubena kwamba’mba, ‘Akwa ko mbena kuya kechi mwakonsha kwiyako ne.’” Na mambo a kuba kechi bayukile Yesu ko afumine ne, kechi bayukile byo aambilenga ne. Aye wibalumbulwijile’mba: “Anweba mwi ba pano panshi; pakuba amiwa nafuma mwiulu. Anweba mwi ba pano pa ntanda; pakuba amiwa kechi ne wa pano pa ntanda ne.”—Yoano 8:21-23.

Yesu waambilenga pa byo ajinga saka akyangye kwiya pano pa ntanda ne byo ajinga Mesiasa walayilwe nangwa’mba Kilishitu watengejilenga bano bantangi ba bupopweshi. Nangwa byonkabyo, bamushikishe na mukeyu amba: “Nanchi yobe ñanyi?”—Yoano 8:25.

Na mambo a kumukana, Yesu wibakumbwile’mba: “Mambo ka o mbena kutayila ne kimye na kwisamba ne anweba?” Nangwa byonkabyo, watwajijile na kunemeka Shanji ne kulumbulula ene mambo Bayudea o bafwainwe kumvwina Mwana amba: “Wantumine ye wa kine, ne bintu byonka byo naumvwine kwi aye byo byo ñamba ku ba pano pa ntanda.”—Yoano 8:25, 26.

Kepo Yesu amwesheshe’mba waketekela Shanji kukila bano Bayudea. Waambile’mba: “Byo mukamwimika Mwana muntu, po po mukayuka’mba yami iye, ne kuba’mba kechi neubila bintu ami mwine ne; pakuba monka mwamfunjishishe Batata, mo mo ñambila bino bintu. Kabiji awa wantumine uji ne amiwa; kechi wanshile bunke ne, mambo nguba bintu bimutokesha ku muchima.”—Yoano 8:28, 29.

Bayudea bamo bamwitabijile Yesu, kabiji wibambijile’mba: “Umvwe saka mulama byambo byami, ko kuba’mba mwi baana bami ba bwanga, kabiji mukayuka bukine, ne bukine bukemukasulula.”—Yoano 8:31, 32.

Ku bamo byambo bya kuba’mba bakebakasulula byajinga byenyi kwi abo. Onkao mambo, bakaine’mba: “Atweba twi baana ba kwa Abalahama kabiji tukyangye kwikalapo bazha ku muntu nangwa umo ne. Pano waamba byepi amba, ‘Mukakasuluka’?” Bayudea bayukile kuba’mba bimye bimo bebalamanga ku bantu bangi, pano bino, bakaine kutelwa’mba bazha. Bino Yesu wibalumbulwijile kuba’mba bakijinga bazha. Waambile’mba: “Kinetu nemwambila namba, yense ulenga mambo ye muzha wa bundengamambo.”—Yoano 8:33, 34.

Bayudea byo bakainenga’mba kechi bazha ba bundengamambo ne, bebikilenga bene mu kizumba. Yesu walumbulwile’mba: “Muzha kechi wikala myaka ne myaka mu nzubo ya nkambo yanji ne; mwana ye wikalamo myaka ne myaka.” (Yoano 8:35) Byo kyajinga kuba’mba muzha kechi wajinga na luusa lwa kutambula bya buswanyi ne, bakonshanga kumupanga kyonse kimye. Kanatu mwana wasemwa nangwa wa kushinda ye waikalanga “myaka” mu nzubo, ko kuba’mba kimye kyonse kyo ajinga mumi.

Onkao mambo, bukine bwaamba pa Mwana bo bukine bukasulula bantu myaka ne myaka ku bundengamambo butwala ku lufu. Yesu waambile’mba: “Inge Mwana wimukasulula, kine mukakasuluka.” —Yoano 8:36.