“Lusanguko Ne Bumi”

Byo afuminenga ku Pelia, Yesu wafikile kwipi na Betani, muzhi waikejile makilomita asatu ku musela wa Yelusalema. Lazalasa wafwile kabiji banyenga yanji ba Maliya ne Mata bamujijilenga. Bantu bavula baishile na kwibatekenesha.

Muntu umo wabuujile Mata amba Yesu ubena kwiya. Ponkapotu, wayile na kumutundaila. Mata wabuujile Yesu byo besambilengapo na nkasanji pa moba ana amba: “Nkambo, umvwe mwajinga kuno, nkasami inge kechi wafwa ne.” Nangwa byonkabyo, kino kechi kyamwesheshe’mba Mata ufwalo luketekelo ne. Aye waambile’mba: “Nayuka namba byonse byo musakulomba kwi Lesa, usakwimupabyo.” (Yoano 11:21, 22) Wayukile’mba Yesu wakonsheshe kusangula nkasanji.

Yesu wamubuujile Mata amba: “Nkasobe usakusanguka.” Mata walangulukilenga’mba Yesu waambilenga pa lusanguko lwa kulutwe lukekalako pano pa ntanda, lwatengejilenga Abalahama ne bakalume bakwabo ba Lesa. Onkao mambo, Mata wakumbwile’mba: “Nayuka namba ukasanguka mu juba jikapelako.”—Yoano 11:23, 24.

Nanchi kino kyalumbulwile’mba Yesu wakonsheshe kubapo kimo nyi? Wavulwilemo Mata amba Lesa wamupa bulume bwa kushinda lufu byo aambile’mba: “Awa wangitabila, nangwa wafwa, ukasanguka; kabiji yense uji na bumi ne kungitabila kechi ukafwa ne.”—Yoano 11:25, 26.

Yesu kechi wabujilenga Mata amba bantu ba kishinka bakiji na bumi kechi bakafwa ne. Mambo naye wayukile’mba ukafwa byonka byo abuujile batumwa banji. (Mateo 16:21; 17:22, 23) Yesu wakoseshenga kishinka kya kuba’mba yense wamwitabila ukekala na bumi bwa myaka ne myaka. Bantu bavula bakeyowa buno bumi inge basangulwa. Nangwa byonkabyo, bantu ba kishinka bakapuluka mpelo ya buno bwikalo kechi bakafwa ne. Monse mo kikekela, yense waitabila mwi Yesu wafwainwa kuketekela’mba inge wafwa ukasangulwa.

Nanchi Yesu byo aambile’mba “Amiwa yami lusanguko ne bumi” wakonsheshe kusangula Lazalasa wafwile saka papita kala ne moba nyi? Yesu waipwizhe Mata amba: “Nanchi waitabila kino nyi?” Aye wakumbwile’mba: “Ee, Nkambo, amiwa naitabila kuba’mba yenu Kilishitu, Mwana Lesa, yenka wafwainwe kwiya pano pa ntanda.” Na mambo a kwitabila kuba’mba Yesu usakubapo kimo jo ja juba, Mata wayile lubilo na kubuula nkasanji ku mbaji amba: “Mufunjishi waiya kabiji ubena kukwita.” (Yoano 11:25-28) Ponkapo Maliya walupukilemo mu nzubo, kabiji bakwabo bamulondejile mambo balangulukilenga’mba ubena kuya ku kilende kya kwa Lazalasa.

Pano bino, Maliya wayile kwi Yesu kabiji waponejile ku maulu a kwa Yesu saka ajila, kabiji waambile byambo byonka byaambile kolojanji amba: “Nkambo, umvwe mwajinga kuno, nkasami inge kechi wafwa ne.” Yesu byo amwene Maliya ne jibumba jo aishile najo saka bajila, waumvwine bingi bulanda kabiji kyamukolele bingi ku muchima, kabiji wajijile ne mipolo. Kino kyatundaikile bingi bantu. Bamo baipwizhenga’mba: ‘Inge kya kuba Yesu wakonsheshe kulabisha meso a yewa mwanamulume wajinga mpofu, kechi wafwainwe kuzhikijila uno muntu kuba’mba abule kufwa nenyi?’—Yoano 11:32, 37.