Funjishainga Bukine pe Yesu
1 Bena Kilishitu bashingwa, bakwashiwa nabalunda nabo bamikooko ikwabo, “kukwachisha bukamonyi bwa Yesu.” (Lum. 12:17) Uno kemwingilo wanema bingi, mambo lupulukilo lwishila mwi aye.—Yoa. 17:3; Byu. 4:12.
2 ‘Jishinda, Bukine, ne Bumi’: Yesu waambile’mba “Amiwa ne jishinda, ne bukine, ne bumi: ka paji wiya kwi Batata ne, poso pe amiwa.” (Yoa. 14:6) Mwi Yesu, aye “jishinda,” momonka motwakonsha kusolomokela Lesa mululombelo nekwikala nabulunda bwaitabilwa ne Aye. (Yoa. 15:16) Yesu ye “bukine” mambo aye yewafikizhe bungauzhi nebimvule biji Mubinembelo bya Kihebelu. (Yoa. 1:17; Kolo. 2:16, 17) Ee kine, nkebelo ine yabungauzhi bwakine kekusolola patoka kuba’mba Yesu kyokishina kyamingilo yonse ya Lesa. (Lum. 19:10) Kabiji, Yesu ye “bumi.” Bonse twafwainwa kwitabila mukitapisho kyankuulo yanji pakuba’mba tukekale namapesho abumi bwamyaka nemyaka.—Yoa. 3:16, 36; Hebe. 2:9.
3 Mutwe Kabiji Mfumu Ubena Kulama: Kabiji bantu bafwainwa nekuyuka lūsa lukatampe Yehoba loapa Mwananji. Yesu ye Mfumu wamu Bufumu bwa Lesa, ne “mikoka ya bantu ikamukokelanga.” (Nte. 49:10) Kabiji Yehoba wamutongola kwikala Mutwe wakipwilo. (Efi. 1:22, 23) Twafwainwa kukwasha botufunjisha Baibolo kuyuka Yesu byoatangijila kipwilo nebyoengijisha ‘kalume wa kishinka ne wa maana’ kwitunengezhezha “kajo [kakumupashi] pa kimye pafwainwa.”—Mat. 24:45-47.
4 Ñanga Mukatampe Walusa: Mambo Yesu byoaesekelwe nekumanama loajinga mubumuntu, “wakonsha kwibakwasha baesekwa.” (Hebe. 2:17, 18) Byokisangajikapo bantu bambulwakoloka kuyuka kuba’mba Yesu wibobila lusa banekena nekwibalombela yewibalombela! (Loma 8:34) Namambo akitapisho kyakwa Yesu nemwingilo wanji wakwikala Ñanga Mukatampe twakonsha ‘kufwenya kwipi kasa tuchinchika konka’ kwi Yehoba namba tutambule bukwasho “bwa kwitukwasha mu kimye kyakupelelwa kwetu.”—Hebe. 4:15, 16.
5 Twayai twibikeko kufunjisha bakwetu bukine pe Yesu, kwibalengele kumukokela nekumwingijila pamo neatweba.—Yoa. 14:15, 21.