Langulukishainga pa Bintu byo Emubila Yehoba
PANYUMATU ya kusangulwa kwa kwa Yesu, baana banji ba bwanga babiji bafuminenga mu Yelusalema kuya ku Emasa. Jishimikila ja kwa Luka jashimuna amba: “Byo besambilenga ne kwiipanguzha [kwiipuzha] bene na bene, Yesu mwine wafwenyenye kwipi, kaye ne nabo pamo. Bino meso abo ashinkilwe’mba, bakamuyuka.” Kepo Yesu ebambijile amba: “Lelo ñanyi byambo bino byo muya na kwisamba? Kepo baimene, saka bapopomenwa.” Mambo ka o bapopomejilwe? Baana ba bwanga bajinga na mulanguluko wa kuba’mba Yesu pa kyokya kimye wafwainwe kupokolola bena Isalela ku Bangetila bajinga na bulume pe abo, bino kuno kupokololwa kechi kwaubiwe ne. Kyalengejile ke kya kuba amba Yesu bamwipayile. O ene mambo o bapopomejilwe.—Luka 24:15-21; Byu. 1:6.
Yesu watendekele kwisamba na baana banji ba bwanga. “Kutatwila kwi Mosesa ne ku bangauzhi ba Lesa bonse, aye wibalumbulwijilenga mu binembelo byonse bintu bya aye mwine.” Kya kine, bintu byavula byanema kabiji bikosesha lwitabilo byaubiwe mu mwingilo wa kwa Yesu! Baana ba bwanga byo batelekele kwi Yesu byo ebalondolwejilenga, balekele kupopomenwa ne kwikala na lusekelo. Palutwe kacheche jonkaja juba bufuku, baambile amba: “Michima yetu ke ibatemenga bulongo munda byo ajikwisambanga ne atweba pa jishinda, ne byo ajikwitulumbulwilanga binembelo nenyi?” (Luka 24:27, 32) Twakonsha kufunjilako ka ku byaubile baana ba bwanga ba kwa Yesu?
Twiumvwa Byepi inge kya Kuba Bintu byo Twaketekejilenga Byabula Kubiwa?
Baana ba bwanga babiji bayilenga ku Emasa bapopomejilwe mambo bintu byo baketekejilenga kechi byaubiwe ne. Baumvwine byonka byo kyalondololwa mu Byambo bya Mana 13:12 amba: “Akya kyo baketekela inge kyabanda kumweka kikozha muchima.” Byo byo kiji ne kwi atweba bamo baingijila Yehoba mu bukishinka pa myaka yavula, twakilangulukapo kala amba “malwa akatampe” afwainwe kubiwa kala ne kupita inge apita. (Mat. 24:21; Lum. 7:14) Kyayukanyikwa kuba amba inge bintu bibena kuketekelwa byabula kubiwa, bilengela bantu kupopomenwa.
Nangwa byonkabyo, vulukainga amba aba baana ba bwanga babiji baikele jibiji na lusekelo Yesu byo ebakwashishe kuta muchima pa bungauzhi bwafikizhiwe mu kimye kya bwikalo bwabo. Ne atweba twakonsha kutwajijila kwikala na lusekelo ne kuyuka mwakubila na bintu bitulefula. Mukulumpe mu kipwilo umo waingila mu bukishinka wa jizhina ja Michael waambile amba: “Kange mutenga muchima ku bintu byo akyangye kuba Yehoba ne. Anweba taingatu muchima ku bintu byo auba kala.” Bino byambo byawama byo bitutundaikapo!
Bintu byo Auba Yehoba
Akimonai bintu bimo byanema byo auba kala Yehoba. Yesu waambile amba: “Awa wangitabila amiwa, mingilo yo nguba amiwa naye ukeyuba; ne yakila yo ino ukeyuba.” (Yoa. 14:12) Lelo jino, bantu ba Lesa babena kwingila mingilo ikatampe ya bwina Kilishitu ikyangye kwingijiwapo kyabaya ne. Bantu kukila mamilyonyi atanu ne abiji babena kutonga bingi kupuluka malwa akatampe. Akilangulukaipotu, bantu ba Yehoba bavula bakishinka babena kwingila bingi na ngovu mu byalo byavula mwaya ntanda kukila ne byo kyajinga kala! Yehoba walengela byambo bya kwa Yesu bya bungauzhi byaamba pa ‘mingilo yakila yo ino’ kufikizhiwa.
Bintu ka bikwabo byo etubila Yehoba? Walengela bantu ba michima ya kishinka kufuma mu ntanda yatama mu bukifwanyikizho, ne kwiya mu paladisa wa ku mupashi ye abikako. (2 Ko. 12:1-4) Ikalaingako na kimye kya kulanguluka pa bintu bimo biji mu uno paladisa byo tuji nabyo. Kyakumwenako, akitalai pa butala bwenu bwa mabuku nangwa butala bwa mabuku aji mu Nzubo ya Bufumu. Balaulai mu buku wa Watch Tower Publications Index, nangwa mu Watchtower Library. Telekai ku kifwanyikizho kya mu Baibolo kyalekodewa. Vulukai bintu byo mwafunjile ne kumona pa kushonkena kwa nkambi kwafumineko. Kabiji kunungapo, langulukai ne pa kupwanañana kwawama ko twikala nako na balongo ne banyenga yetu bena Kilishitu. Yehoba kine witupa kajo ka ku mupashi kavula bingi kubikakotu ne balongo betu ba butemwe mwaya ntanda—uno kine ye paladisa wa ku mupashi!
Nyimbi wa masalamo Davida waambile amba: “Anweba Yehoba Lesa wami, mingilo ya kukumya yo mwaingila yo yavula, ne milanguluko yenu yo mwitulanguluka nayo pamo.” (Sala. 40:5) Kya kine, umvwe ketute muchima ku bintu byawama byo etubila kala Yehoba ne kuvulukanga milanguluko yanji yawama yo aji nayo pe atweba, kiketulengela kwikala jibiji na bulume bwa kuchinchika mu bukishinka mu mwingilo wetu ye twingijila Shetu wa mwiulu Yehoba na muchima wetu yense.—Mat. 24:13.
[Kipikichala pa peja 31]
Yesu wakwashishe baana banji ba bwanga kulanguluka pa bintu byo ebobijile Yehoba
[Kipikichala pa peja 32]
Vulukai bintu byo mwafunjile ne kumona pa kushonkena kwa nkambi kwafumineko