BYAMBAPO BAIBOLO
Lesa Byo Aji
Nanchi Lesa uji na mubiji wa mutundu ka?
“Lesa Mupashi.” —Yoano 4:24.
BYAMBA BAIBOLO Baibolo ulumbulula Lesa kuba’mba mupashi. (2 Kolinda 3:17) Byo aji mupashi, ko kuba’mba witukila mu byonse. 1 Timoti 1:17 waamba kuba’mba “Aye Mfumu wa myaka ubula kubola, ubula kumweka.” Kabiji Baibolo waamba kuba’mba: “Kafwako muntu nangwa umo wakimonapo kala Lesa ne.”—1 Yoano 4:12.
Mulenga wetu witukila kyakuba kechi twafwainwa ne kufwanyikizha ne byo aji ne. Isaya 40:18 waamba’mba: “Nanchi Lesa mukamupashañanya ne ñanyi? mukamufwanyikizha na ñanyi kintu? Na nkishi nyi?” Nangwatu meulu kechi twafwainwa kwiesakanya na wa Bulume bonse ne.—Isaya 40:22, 26.
Bino nangwa byonkabyo, kuji bilengwa bimo bimona Lesa ne kwamba nanji. Mu ñanyi jishinda? Mambo a kuba’mba nabo mipashi kabiji bekala mwiulu. (1 Bamfumu 22:21; Bahebelu 1:7) Pa kwamba pa bino bilengwa bya mupashi, kabiji batelwa’mba bamalaika, Yesu Kilishitu waambile’mba: “bamalaika babo ba mwiulu bamona kilungi kya Batata ba mwiulu.”—Mateo 18:10.
Nanchi Lesa ujitu konse konse nyi?
“Byonkabyo sa mulomba byonka bino amba, Tata wetu wa mwiulu.”—Mateo 6:9.
BYAMBA BAIBOLO Baibolo kechi ufunjisha kuba’mba Lesa ujitu konse konse ne, nangwa konse konse pa kimye kiji kyonse nangwa bulume bujitu konse konse ne. Bino byambo byaambile Yesu pa Mateo 6:9 ne 18:10, bimwesha kuba’mba Lesa muntu “Tata” kabiji ‘mwiulu mo ekala’—1 Bamfumu 8:43.
Saka akyangye kufwa ne, Yesu waambile’mba: “Pano nkamfumepo ne kubwela kwi Batata.” (Yoano 16:28) Panyuma ya kufwa ne kusangulwa na mubiji wa mupashi, Kilishitu “watwelele mwiulu ne kumweka kwi Lesa na mambo a atweba”—Bahebelu 9:24.
Kuyuka bino bishinka pe Lesa kwanema bingi. Mambo ka? Kitanshi ke na mambo a kuba Lesa muntu, mwakonsha kufunda pe aye ne kufwenya kwipi ne aye. (Yakoba 4:8) Kikwabo, kuyuka bukine pe Lesa kwituzhikijila ku bupopweshi bwa bubela, nabiji kupopwela bipashañano bibula kupeema ne bintutu bikwabo. 1 Yoano 5:21 waamba’mba “Anweba twana, ilamai ku bankishi.”
Nga bantu balengelwe byepi mu kipasha kya Lesa?
“Byonkabyo Lesa walengele bantu mu kipasha kyanji, monka mu kipasha kyanji mwine momo ebalengejile. Wibalengele mwanamulume ne mwanamukazhi.”—Ntendekelo 1:27.
BYAMBA BAIBOLO Byo tuji bantu, tuji na bulume bwakumwesha byubilo bya Lesa nabiji butemwe, bunchibamambo ne maana. Baibolo waamba’mba: “Onkao mambo, ikalai bakulondela Lesa byo muji baana bo atemwa. Kabiji endainga mu butemwe.”—Efisesa 5:1, 2.
Lesa witupeele lūsa lwa kwifuukwila bintu bwitulengela kusala byatama ne byawama ne kumwesha butemwe ku bakwetu mu mashinda apusana pusana. (1 Kolinda 13:4-7) Tuji ne na bulume bwa kulenga bintu, kumvwa bulongo pa kumona byawama ne kukumya pa bilengwa bya mu ntanda. Ne kyakilapo kunema, witupa bulume bwa kukeba kufunda pa Mulenga wetu ne byo akeba kwitubila.—Mateo 5:3.
Bukine bwa mu Baibolo byo bwakonsha kwimukwasha. Umvwe ke tufunde pe Lesa ne kumulondela, tukekalanga bwikalo byonka byo akebelenga amba twikalenga. Kino kyalengela kwikala na lusekelo mu bwikalo bwetu, mutende ne kusekela na byo tuji nabyo. (Isaya 48:17, 18) Lesa wayuka kuba’mba byubilo byanji bilengela bantu kumutemwa, kulengela bantu baji na michima ya kishinka kufwenya kwipi kwi aye ne kwibalengela kwenda mu jishinda jaya ku bumi bwa myaka.—Yoano 6:44; 17:3.