Milombelo Yenu Imwesha ka pe Anweba?
“Anweba mumvwa milombelo, Kwi anweba ko bakeya bantu bonse.” —SALA. 65: 2.
1, 2. Mambo ka bakalume ba Yehoba o bakonshesha kulombela na luketekelo kwi aye?
YEHOBA umvwa milombelo ya bakalume banji bakishinka kimye kyonse. Twakonsha kuketekela kuba’mba witumvwa. Nangwatu Bakamonyi ba kwa Yehoba inge bauba amba balombe kwi Lesa pa kimye kimo, Yehoba wakonsha kumvwa milombelo yabo bonse pa muntu pa muntu.
2 Byo ayukile kuba’mba Lesa waumvwa misashijilo yanji, nyimbi wa masalamo aye Davida waimbile’mba: “Anweba mumvwa milombelo, Kwi anweba ko bakeya bantu bonse.” (Sala. 65: 2) Milombelo ya kwa Davida yakumbwilwe mambo a kuba wajinga mupopweshi wa Yehoba wakishinka. Twafwainwa kwishikisha atweba bene amba: ‘Nanchi milombelo yami imwesha kuba’mba naketekela mwi Yehoba kabiji ne kuba’mba mpopwelo yawama kyo kintu kyakilamo kunema kwi amiwa nyi? Nga milombelo yami imwesha ka pe amiwa?’
Lombainga kwi Yehoba na Kwipelula
3, 4. (a) Twafwainwa kwikala na ñanyi kyubilo pa kulomba kwi Lesa? (b) Twafwainwa kuba byepi umvwe twakatazhiwa na “milanguluko” panyuma ya kulenga mambo akatampe?
3 Umvwe tusaka milombelo yetu kukumbulwa, twafwainwa kulomba kwi Lesa na kwipelula. (Sala. 138: 6) Twafwainwa kulomba Yehoba kuba amba etutaletale, byonka byaubile Davida byo aambile’mba: “Muntaletale, anweba Lesa, muyuke muchima wami: Ngesekai, muyuke milanguluko yami: Mumone kana muji jishinda ja bubi mwi amiwa, Ne kuntangijila mu jishinda ja myaka.” (Sala. 139: 23, 24) Kechi twafwainwatu kulomba kwapwa ne, bino twafwainwa ne kukokela Lesa kuba’mba etweseke ne kwitujimunako mu Mambo anji. Yehoba wakonsha kwitukwasha kwikala “mu jishinda ja myaka,” pa kuba amba tukatambule bumi bwa myaka.
4 Twafwainwa kuba byepi umvwe twakatazhiwa na “milanguluko” panyuma ya kulenga mambo akatampe? (Tangai Salamo 32: 1-5.) Kutwajijila na jiwi ja mu muchima jazhatwa kwakonsha kwimupwishisha bulume byonkatu mute wazonga byo alelesha mabula kimye kya kisalo. Mambo o alengele Davida amupwishijile lusekelo ne kumulengela kukolwa. Kwisolola kwi Lesa kwamukwashishe bingi. Fwanyikizhai lusekelo lo ajinga nalo Davida byo ayukile kuba’mba Yehoba ‘wamulekelako mambo.’ Kusolola mambo kwi Lesa kwakonsha kukwashañana, kabiji bukwasho bwa bakulumpe mu kipwilo kya bena Kilishitu nabo bulengela ndengamambo kwikala jibiji mulunda na Yehoba. —Mana. 28:13; Yako. 5: 13-16.
Musashijilainga Lesa ne Kumusanchila
5. Kusashijila Yehoba kulumbulula ka?
5 Umvwe twikala na kijikila na mambo a bintu bimo, twafwainwa kulondela lujimuno lwa kwa Paulo lwa kuba’mba: “Kechi mubambishe michima yenu nangwa mu kintu kimo ne; kabiji mu bintu byonse kasa musolola kwi Lesa byo musaka monka mu lulombelo ne lusashijilo ne kuba sante pamo.” (Fili. 4: 6) ‘Kusashijila’ ke ‘kulomba na kwipelula.’ Kikatakata kimye kya bizumba ne lumanamo twafwainwa kulomba kwi Yehoba kuba’mba etukwashe ne kwitutangijila.
6, 7. Mambo ka o twafwainwa kuvwangilamo byambo bya lusanchilo mu milombelo yetu
6 Nangwa byonkabyo, umvwe twalombatu kimye kyo tubena kukeba bintu bimo, kino kimwesha ka pa mambo a bulunda bwetu ne Yehoba? Paulo waambile’mba twafwainwa kusolola misashijilo yetu kwi Lesa ne “kuba sante pamo.” Tuji na bishinka bitulengela kusanta byonka byaubile Davida awo waambile’mba: “Bukata, ne bulume, ne lukumo, ne lushinjilo, ne buneme, byo byenu anweba Yehoba; mambo byonse biji mwiulu ne biji pano pa ntanda byo byenu; bufumu nabo bo bwenu, anweba Yehoba, kabiji anweba mwatumbijikwa ke mwine, peulu ya byonse... . Anweba Lesa wetu, twimusanchila, ne kwijitota jizhina jenu ja lukumo.” —1 Moba. 29: 11-13.
7 Yesu wasanchijile Lesa pa kajo, shinkwa ne katomeno ka pa Kijiilo kya Nkambo kya Mabanga. (Mat. 15:36; Mako 14: 22, 23) Kununga pa kumwesha bino byubilo, twafwainwa ‘kumutota Yehoba,’ na “mambo a mingilo yanji ya kukumya yo ebengijila bantu,” ne ‘mafunde anji aoloka,’ kabiji ne pa byambo byanji biji mu Baibolo. —Sala. 107:15; 119: 62, 105.
Lombelaingako Bakwenu
8, 9. Mambo ka o twafwainwa kulombelako bakwetu bena Kilishitu?
8 Kwa kubula nangwa kuzhinauka ne, tulomba atweba bene, bino twafwainwa kulombelako ne bakwetu, nangwatu bena Kilishitu bo twabula kuyuka mazhina. Nangwa kya kuba mutumwa Paulo kechi wayukile bena Kilishitu bonse mu Kolose ne, wanembele’mba: “Tusanta kwi Lesa, Shanja Nkambo yetu Yesu Kilishitu, moba onse pa kwimulombela anweba, mambo twaumvwa mambo a lwitabilo lwenu lwa mwi Kilishitu Yesu, ne mambo a butemwe bo muji nabo ku bazhijikwa bonse.” (Kolo. 1: 3, 4) Paulo walombele ne pa mambo a bena Kilishitu mu Tesalonika. (2 Tesa. 1: 11, 12) Milombelo ya uno mutundu imwesha byo tuji kabiji ne byo tumona balongo ne banyenga yetu ba mu lwitabilo.
9 Kulombelako bena Kilishitu bashingwa ne balunda nabo ba ‘mikooko ikwabo’ kumwesha kuba’mba twata muchima jibumba ja Lesa. (Yoa. 10:16) Paulo waambijile bena Kilishitu bakwabo kulomba pa kuba’mba ‘byambo bipewe kwi aye mu kwibabula akya kyafyamika kya mambo awama.’ (Efi. 6: 17-20) Nanchi ne atweba twibalombelako bakwetu bena Kilishitu mu jino jishinda nyi?
10. Kulombelako bakwetu kwitulengela kuba ka?
10 Kulombelako bakwetu kwakonsha kwitulengela kwalula jishinda jo twibamwenamo. Umvwe twalombelako muntu ye twashikwa, kitulengela kupimpula jishinda jo tumumwenamo. (1 Yoa. 4: 20, 21) Milombelo ya uno mutundu itukosesha ne kwitukwatankenya pamo na bakwetu bena Kilishitu. Kabiji ino milombelo imwesha kuba’mba tuji na butemwe bwa Kilishitu. (Yoa. 13: 34, 35) Kino kyubilo ke lubaji lwa kipangwa kya mupashi wa Lesa. Nanchi ne atweba pa muntu pa muntu tulomba mupashi wazhila wa Yehoba kuba’mba etukwashe kumwesha mbaji ya kipangwa kya mupashi, ko kuba amba butemwe, lusekelo, mutende, kukoka muchima, lusa, buwame, bukishinka, bukimote, ne kwikanya nyi? (Luka 11:13; Nga. 5: 22, 23) Umvwe byo byo tuba, byambo ne byubilo byetu bikamwesha kuba’mba tubena kwenda ne kutangijilwa na mupashi. —Tangai Ngalatiya 5: 16, 25.
11. Mambo ka o mwakonsha kwambila’mba kyawama kwambila bakwetu kwitulombelako?
11 Umvwe twayuka kuba’mba baana betu babena kwingijisha mashinda atama pa kunemba lweseko ku sukulu, twafwainwa kwibalombelako kabiji ne kwingijisha Binembelo pa kwibakwasha kuba’mba bobenga bintu mu bukishinka ne kubula kuba kyonse kyatama. Paulo waambijile bena Kilishitu mu Kolinda amba: “Twalomba kwi Lesa namba kechi mube kyatama nangwa kimo ne.” (2 Ko. 13: 7) Milombelo ya uno mutundu ya kwikepesha isangajika Yehoba kabiji imwesha kuba’mba tuji na byubilo byawama. (Tangai Byambo bya Mana 15: 8.) Twakonsha kwambila bakwetu kwitulombelako byonka byaubile mutumwa Paulo. Wanembele’mba: “Tulombelai: mambo twaketekela kine namba, tuji na jiwi ja mu muchima jibula kwituzhachisha, kasa tusaka kuba bulongotu mu bintu byonse.” —Hebe. 13: 18.
Milombelo Yetu Imwesha ne Bintu Bikwabo Byavula pe Atweba
12. Bintu ka byanema byo twafwainwa kulombangapo?
12 Nanchi milombelo yetu imwesha kuba’mba twi balusekelo kabiji twi Bakamonyi ba kwa Yehoba babambakana nyi? Nanchi milombelo yetu imena kikatakata pa kuba kyaswa muchima wa Lesa, kusapwilwa kwa mambo a Bufumu, kutumbijikwa kwa bumfumu bwa Yehoba kabiji ne pa kuzhijikwa kwa jizhina janji nyi? Bino byafwainwa kwikala bintu byanema mu milombelo yetu, byonka byo byaambiwa mu lulombelo lwa kumwenako lwa kwa Yesu, alo lwatendeka na byambo bya kuba’mba: “Tata wetu wa mwiulu, Jizhina jenu jizhile. Bufumu bwenu bufike. Kyaswa muchima wenu kyubiwe pano panshi, byonka byo kyubiwa mwiulu.” —Mat. 6: 9, 10.
13, 14. Milombelo yetu imwesha ka pe atweba?
13 Milombelo yetu kwi Lesa imwesha byubilo byetu, bintu byo twatemwa ne byo tukeba kuba. Yehoba wituyuka byo tuji. Byambo bya Mana 17:3 byaamba’mba: “Siliva bamweseka mu mpoto, ne ngolode mu kisha kya mujilo, pakuba Yehoba ye weseka [utalatala] michima ya bantu.” Lesa umona biji mu muchima wetu. (1 Sam. 16: 7) Wayuka byo twiumvwa pa mambo a kupwila kwetu, mwingilo, kabiji ne pa mambo a balongo ne banyenga yetu ba ku mupashi. Yehoba wayuka byo tulanguluka pa “balongo” ba kwa Kilishitu. (Mat. 25:40) Uyuka kana kya kine tubena kukeba byo tubena kulomba nyi, inyi kana tubena kubwezhapotu byambo bimo. Yesu waambile’mba: ‘Pa kulomba, ke kulomba kilombelombe byo boba Bangetila ne: mambo balanguluka’mba, Tusakumvwanyika pa kuvuzha byambo.’ —Mat. 6: 7.
14 Milombelo yetu imwesha ne byo twaketekela mwi Lesa. Davida waambile’mba: “Anweba [Yehoba] mwaji kyami kya kufyamamo, Mwaji kyamba kyakosa kya kunyemenamo ku balwanyi. Byonkabyo nkekalanga mu tente wenu myaka: Nkafyama mukachi ka byapi byenu.” (Sala. 61: 3, 4) Umvwe mu bukifwanyikizho Lesa ‘wituvweta na tente wanji,’ tuzhikijilwa ne aye. (Lum. 7:15) Byo kitekeneshapo kufwenya kwipi ne Yehoba mu lulombelo na luketekelo lwa kuba’mba ‘uji ne atweba’ kimye kya meseko aji onse a lwitabilo lwetu! —Tangai Salamo 118: 5-9.
15, 16. Milombelo yakonsha kwitukwasha kuyuka ka pa mambo a kukeba kukanamina mingilo mu kipwilo?
15 Lulombelo lwa kishinka kwi Yehoba pa mambo a kintu kyo tukeba kuba lwakonsha kwitukwasha kuyuka bukine pe aye. Kya kumwenako, nanchi kusaka kwikala kalama mu bantu ba Lesa ke kusaka kwingila papelela bulume bwetu mu kwikepesha kutwala mwingilo wa Bufumu palutwe nyi? Inyi tusakatu kwikala na “bukulumpe” nangwa ‘kwibobila bunkambo’ bantu? Kechi byo kyafwainwa kwikala mu bantu ba Yehoba ne. (Tangai 3 Yoano 9, 10; Luka 22: 24-27.) Umvwe tuji na milanguluko yatama, kulomba kwi Yehoba Lesa mu bukishinka kwakonsha kwiisolola ne kwitukwasha kupimpula saka ikyangye kujimba mizhazhi.
16 Banabakazhi ba bwina Kilishitu bakonsha kusaka kuba’mba bamwata wabo bekale bankwasho, kampe kulutwe na lwendo baikala ke bakalama nangwa amba bakulumpe mu kipwilo. Bano banyenga bakonsha kuba bintu monka mwayila milombelo yabo ya ku mbaji kupichila mu kwikala na kya kumwenako kyawama. Kino kyanema bingi, mambo bintu byamba ne kuba kisemi kya muntu byakonsha kumwesha byo bamumona mu kipwilo.
Kwimenako Bakwetu mu Milombelo ya pa Mvula Bantu
17. Mambo ka kwikala kwa bunke o kwanemena kimye kyo tubena kulomba?
17 Yesu javula wafumanga pa mabumba a bantu ne kuya na kulomba kwi Shanji kumbaji. (Mat. 14:13; Luka 5:16; 6:12) Ne atweba tukebewa bimye bya kwikala kwa bunke. Umvwe ketulombele ku mpunzha kwabula bintu byakonsha kwitulabika, kitulengela kufuukula bintu bisangajika Yehoba ne kwitukwasha kwikala bakosa ku mupashi. Nangwa byonkabyo, Yesu naye walombanga pa mvula bantu, kabiji kyawama bingi kulanguluka pa byo twakonsha kulomba mu jino jishinda monka mo kyafwainwa.
18. Pa kwimenako kipwilo mu milombelo, bishinka ka bimo balongo byo bafwainwa kuvulukanga?
18 Pa kupwila, banabalume ba kishinka bemenako kipwilo mu milombelo. (1 Timo. 2: 8) Bakwabo ba mu lwitabilo bafwainwa kwamba’mba “amena” panyuma ya lulombelo, kulumbulula amba “kikale byonkabyo.” Nangwa byonkabyo, pa kuba’mba bambe bino bafwainwa kwitabizha byajikwambiwanga. Lulombelo lwa kumwenako lwa kwa Yesu kechi lwakatezhe kumvwa ne. (Luka 11: 2-4) Kabiji kechi watongawile bintu byonse bantu byo bakebelenga nangwa makatazho a bantu bo aambilengako pa muntu pa muntu ne. Bintu byo tukeba pa muntu pa muntu twafwainwa kwibilombela kwa bunke, kechi pa mvula bantu ne. Kabiji kimye kyo tubena kwimenako jibumba mu lulombelo, twafwainwa kuchinuzhuka kuvwangamo bintu bya bufyamfya.
19. Byubilo byetu byafwainwa kwikala byepi kimye kya milombelo ya pa mvula bantu?
19 Pa kimye kya kwitwimenako mu lulombelo lwa pa mvula bantu, twafwainwa kumwesha moyo wa ‘kwakamwa Lesa.’ (1 Pe. 2:17) Kwakonsha kwikala bimye ne mpunzha ya kubilamo bintu bimo byakonsha kubula kufwainwa kwibyubila pa kupwila kwa bwina Kilishitu. (Sapwi. 3: 1) Kya kumwenako, fwanyikizhai kuba’mba muntu waambila bantu bonse mu jibumba kwikwata ku maboko kimye kya lulombelo. Kino kyakonsha kutuntwisha nangwa kulabika bamo, kubikakotu ne bantu bakwabo babula ba mu lwitabilo lumo ne atweba. Bamulume ne mukazhi bamo kampe bakonsha kwikwata ku maboko mu bufyamfya, pano inge kya kuba bekumbata kimye kya lulombelo lwa pa mvula bantu kabiji bamo bebamona saka bekumbata, kino kyakonsha kwibatuntwisha. Bakonsha kulanguluka kuba’mba bano bamulume ne mukazhi bajikutatu muchima ku bulunda bwabo bwa kwifwalama mu kifulo kya kwakamwa Yehoba. Onkao mambo, ‘byonse kasa twibyubila lukumo lwa Lesa’ kupichila mu kupana munema kwi aye kabiji ne kuchinuzhuka byubilo byakonsha kulabika, kukumisha, nangwa kutuntwisha uji yense. —1 Ko. 10: 31, 32; 2 Ko. 6: 3.
Bintu ka byo Twafwainwa Kulombapo?
20. Mwakonsha kulondolola byepi byambo bya mu Loma 8: 26, 27?
20 Kimye kimo, kechi twakonsha kuyuka bya kwamba mu milombelo ya pa bunke ne. Paulo wanembele’mba: ‘Kechi twayuka mwa kulombela mwafwainwa ne; kabiji aye mwine mupashi [wazhila] witulombela na mibinzo ya kubula kukonsha kwamba. Kabiji aye [Lesa] mwine ukebakeba mu michima ya bantu ye wayuka ne mo ayila muchima wa mupashi.’ (Loma 8: 26, 27) Yehoba ye walengejile kuba’mba milombelo yavula inembwe mu Binembelo. Umona ino milombelo yanembwa na mupashi yo twingijisha nobe yafuma kwi atweba kabiji wiikumbula. Lesa wituyuka kabiji wayuka ne mwatala bintu byo alengejile kuba’mba binembwe na mupashi kupichila mu banembi ba Baibolo. Yehoba ukumbula milombelo yetu umvwe mupashi “witulombela,” nangwa kwitusashijilako. Bino umvwe twayukisha bulongo Mambo a Lesa, twakonsha kuvuluka bintu byo tubena kukeba kulomba.
21. Mu mutwe walondelapo tukafundamo ka?
21 Byonka byo twafunda, milombelo imwesha byavula pe atweba. Kya kumwenako, yakonsha kumwesha byo twafwenya kwipi ne Yehoba ne po twafika mu kuyuka Mambo anji. (Yako. 4: 8) Mu mutwe walondelapo, tukafundamo milombelo imo ne byambo bimo bya mu milombelo yanembwa mu Baibolo. Kufunda bino Binembelo kukakonsha kwitukwasha byepi kuyuka bya kuba pa kusolomoka Lesa mu milombelo yetu?
Musakukumbula’mba Ka?
• Twakonsha kwikala na ñanyi byubilo kimye kyo tubena kulomba kwi Yehoba?
• Mambo ka o twafwainwa kulombelako bakwetu ba mu lwitabilo?
• Milombelo yetu yakonsha kumwesha ka pe atweba ne pa mambo a byo tukeba kuba?
• Byubilo byetu byafwainwa kwikala byepi kimye kya lulombelo lwa pa mvula bantu?
[Kipikichala pa peja 4]
Nanchi mutota ne kumusanchila Yehoba kimye kyonse nyi?
[Kipikichala pa peja 6]
Byubilo byetu pa kimye kya milombelo ya pa mvula bantu kimye kyonse yafwainwa kupana munema kwi Yehoba