“Pano Po Pa Kimye Kyaitabilwa”

“Talai, pano po pa kimye kyaitabilwa; talai, jino jo juba ja lupulukilo.” —2 KO. 6:2.

1. Mambo ka o twafwainwa kuyukila jimo kintu kyakilamo kunema kikebewa kuba pa kyokyo kimye?

“BINTU byonsetu biji na myaka yabyo; kabiji ko kiji kimye kya mambo onse aji pano panshi.” (Sapwi. 3:1) Solomone wanembele ene mambo o kyanemena kuyuka kimye kyafwainwa kubilamo bintu byo tumona amba byanema nabiji kujima, lwendo, busulu nangwa kwisamba na bakwetu. Nangwa byonkabyo, tukebewa ne kuyuka mwingilo wakilamo kunema ye twafwainwa kuba pa kyokyo kimye. Mu jishinda jikwabo, twafwainwa kuyuka bikonkwanyi byetu.

2. Twayuka byepi kuba amba Yesu byo asapwijilenga, wayukile kimye kyo ajingamo?

² Byo ajinga panopantanda, Yesu wayukile kimye kyo ajingamo ne byo afwainwe kuba. Byo ayukile bikonkwanyi byanji, wayukile kuba amba bungauzhi bwavula bwa Bumesiasa bo bapembejilenga pa kimye kyalepa bwajinga pepi kufika. (1 Pe. 1:11; Lum. 19:10) Wafwainwe kwingila mwingilo mukatampe pa kuba amba eyukanyikishe amba ye Mesiasa walayilwe. Wafwainwe kusapwila mambo awama a bukine bwa Bufumu ne kukonkanya boba bakalama nanji mu Bufumu bwanji. Kabiji wafwainwe kwaala kitendekesho kya kipwilo kya bena Kilishitu, bafwainwe kutwajijila kwingila mwingilo wa kusapwila ne kulenga baana ba bwanga mwaya ntanda.—Mako 1:15.

3. Kuyuka kimye kyo ajingamo Yesu kwamulengejile kuba ka?

³ Kuyuka kimye kyo ajingamo kwamutundaikile Yesu kwikala na lupata lwa kuba kyaswa muchima wa Shanji. Waambijile baana banji ba bwanga amba: “Kine bujimi bwa kunowa bo bwabayisha, pakuba ba kunowabo bakepa: byonkabyo lombai kwi Mwina bujimi, atume ba kunowa mu bujimi bwanji.” (Luka 10:2; Mala. 4:5, 6) Yesu patanshi wasajile baana banji ba bwanga 12, kepo abwelele wasala 70, bano wibapele mikambizho ne kwibatuma na kusapwila mambo anema a kuba’mba: “Bufumu bwa mwiulu bwafwenya ke pepi.” Pa mambo a kwa Yesu, tutanga amba: ‘Byo apwishishe kwibakambizha baana banji ba bwanga jikumi na babiji, wafumineko, wayilenga na kufunjisha ne kusapwila mu mizhi yabo.’—Mat. 10:5-7; 11:1; Luka 10:1.

4. Paulo walondelanga Yesu Kilishitu mu ñanyi jishinda?

⁴ Yesu wajinga wakumwenako wawama ku baana banji ba bwanga mu kwikala na lupata ne kwipana. Kino kyo kyaambilepo ne mutumwa Paulo byo atundaikilenga bakwabo ba mu lwitabilo amba: “Ikalai ba kundondela amiwa, pamo byonka byo nji amiwa wa kumulondela Kilishitu.” (1 Ko. 11:1) Paulo walondelanga Kilishitu mu ñanyi jishinda? Waubanga bino kupichila mu kwingila papelejile ngovu yanji kusapwila mambo awama. Mu makalata Paulo o anembejile bipwilo, tutanamo byambo nabiji bya kuba amba: “Kange mube mukose pafwainwa kuba lupata ne,” “kasa mwingijila Nkambo,” “kasa mukelwa kwingijisha mwingilo wa Nkambo” ne kuba amba “byonse byo muba, nangwa ki ka, nangwa ki ka, ubai na muchima yense, nobe kwi Nkambo.” (Loma 12:11; 1 Ko. 15:58; Kolo. 3:23) Paulo kechi walubilemo kimye kyo asambakene ne Nkambo Yesu Kilishitu kimye kyo ayilenga ku Damasakasa ne, kabiji kechi walubilemo ne byambo bya kwa Yesu byamwambijile mwana wa bwanga Ananyasa bya kuba’mba: ‘Aye kyo kintu kyami kyo nasalulula, kya kutwala jizhina jami ku Bangetila, ne ku bamfumu, ne ku bena Isalela’ ne.—Byu. 9:15; Loma 1:1, 5; Nga. 1:16.

“Kimye Kyaitabilwa”

5. Ki ka kyatundaikile Paulo kwingila mwingilo wanji na lupata?

⁵ Inge twatanga buku wa Byubilo, tumona Paulo byo achinchikile ne lupata lo amwesheshe mu mwingilo wanji. (Byu. 13:9, 10; 17:16, 17; 18:5) Paulo wayukile buneme bwa mu oa moba o ajingamo. Waambile amba: “Talai, pano po pa kimye kyaitabilwa; talai, jino jo juba ja lupulukilo.” (2 Ko. 6:2) Mu mwaka wa 537 B.C.E., ye wajinga mwaka bazha bajinga mu Babilona ye bafwainwe kubwela ku ntanda yabo. (Isa. 49:8, 9) Pano Paulo watazhizhe mwepi pa kwamba bino byambo? Byepelo mo byalondakena bitukwasha kuyuka mo atazhizhe.

6, 7. Ñanyi munema mukatampe wapanwa ku bena Kilishitu bashingwa lelo jino, kabiji bañanyi babena kwingila na bano bashingwa?

⁶ Mu nkalata yanji itanshi, Paulo waambile pa munema mukatampe ye bamupele pamo na bakwabo bena Kilishitu bashingwa. (Tangai 2 Kolinda 5:18-20.) Walondolwele amba Lesa wibechile na nkebelo ya kwingila “mwingilo wa lupwaino” ne kusashijila bantu kuba’mba ‘bapwane ne Lesa.’ Kino kyalumbulwilenga kukosesha bulunda ne Lesa nangwa amba kumvwañana ne aye.

⁷ Kufumatu kimye kya bunsatuki mu Edena, bantu bonse bepatula kwi Yehoba. (Loma 3:10, 23) Kuno kwipatula kwalengela bantu kubula kuyuka Lesa ne nkebelo yanji, kabiji mwafuma buyanji ne lufu. Paulo wanembele amba: “Twayuka namba bilengwa byonsetu bibenakubinza ne kumvwa misongo pamotu ne buji lelo.” (Loma 8:22) Pano bino Lesa ‘wasashijila’ bantu kubwela kwi aye nangwa amba kupwana nanji. Uno ye mwingilo wapainwe kwi Paulo ne ku bakwabo bena Kilishitu bashingwa. Ku boba baitabijile mwi Yesu, akya ‘kimye kyaitabijilwe’ kyaikele ke “juba ja lupulukilo.” Bena Kilishitu bashingwa bonse pamo ne balunda nabo ba ‘mikooko ikwabo’ mo babena kwingijila, batwajijila kwita bantu kuba’mba bamwenemo mu kino “kimye kyaitabilwa.”—Yoa. 10:16.

8. Ki ka kilengela lwito lwa kupwana kuwama?

⁸ Lwito lwa bantu kuba’mba bapwane ne Lesa lwawama bingi mambo nangwa kya kuba bantu bene bo baonawine bulunda bwabo ne Lesa na mambo a bunsatuki bwaubiwe mu Edena, Lesa witendekejileko mwine kuwamisha buno bulunda. (1 Yoa. 4:10, 19) Waubile ka? Paulo wakumbula amba: “Lesa waji mwi Kilishitu kasa ebapwanya ba panopantanda ne aye mwine, ne kwibatelela mizhilulwila yabo ne, kabiji wafikizhizhe kuji atweba byambo bya lupwaino.”—2 Ko. 5:19; Isa. 55:6.

9. Paulo waubilepo ka pa kuba’mba amweshe lusanchilo pa lusa lwa Lesa?

⁹ Kupichila mu kupana kitapisho kya bukuzhi, Yehoba walengela boba baji na lwitabilo kulekelwa mambo abo ne kwikala na bulunda bwawama nangwa amba kumvwañana ne aye. Kabiji watumine baluwe na kusashijila bantu konse konse kuba’mba bekale mu mutende ne aye. (Tangai 1 Timoti 2:3-6.) Kuyuka kyaswa muchima wa Lesa kabiji ne kuyuka kimye kyo ajingamo kwalengejile Paulo kwingila na ngovu “mwingilo wa lupwaino.” Ne lelo jino nkebelo ya Yehoba kechi yapimpulwa ne. Ukisashijila bantu kupwana ne aye. Byambo bya kwa Paulo bya kuba amba, “pano po pa kimye kyaitabilwa,” kabiji ne bya kuba’mba, “jino jo juba ja lupulukilo” bikingila. Yehoba Lesa byo aikalapo wa lusa ne kifyele!—Lupu. 34:6, 7.

Kechi Mwafwainwa ‘Kupeezha Bupe’ Ne

10. “Juba ja lupulukilo” jalumbulwilenga ka ku bena Kilishitu bashingwa ba kukala ne bajiko lelo jino?

¹⁰ Bantu batanshi kumwenamo mu luno lusa lukatampe ke boba ‘baji mwi Kilishitu.’ (2 Ko. 5:17, 18) Kwi abo, “juba ja lupulukilo” jatendekele pa Pentekosita mu 33 C.E. Kufumatu kyokya kimye, bano bebapa mwingilo wa kwamba “byambo bya lupwaino.” Ne lelo jino, bena Kilishitu bashingwa babena kwingila uno yenka “mwingilo wa lupwaino.” Bayuka amba bamalaika bana bo amwene mutumwa Yoano mu kimwesho kya bungauzhi “bakwata luvula luna lwa panopantanda, amba kafwako luvula nangwa lumo lupupe panopantanda” ne. Onkao mambo, ne lunotu jikiji “juba ja lupulukilo” kabiji kyo “kimye kyaitabilwa.” (Lum. 7:1-3) Na mambo a kino, kufumatu ku ntendekelo ya myaka kitota kya bu 20, bashingwa bashalapo batwajijila kwingila “mwingilo wa lupwaino” mwaya ntanda yonse.

11, 12. Ku ntendekelo ya myaka kitota kya bu 20, bena Kilishitu bashingwa bamwesheshe byepi amba bayukile moba o bajingamo? (Monai kipikichala kiji pa jipa 15.)

¹¹ Kyakumwenako, byonka byo kyaambiwa mu buku wa Jehovah’s Witnesses—Proclaimers of God’s Kingdom, ku ntendekelo ya myaka kitota kya bu 20, “C. T. Russell ne bakwabo luketekelo lwabo lwakosele bingi lwa kuba amba bajinga mu kimye kya kunowa kabiji ne kuba amba bantu bafwainwe kumvwa bukine ne kwiya mu kyeya.” Pano baubilepo ka? Byo bayukile kuba’mba bajinga mu kimye kya kunowa, ko kuba’mba mu “kimye kyaitabilwa,” bano balongo kechi bapelejiletu mu kwita bantu kwiya na kutanwa ku kupwila kwa bupopweshi ne. Mambo ne bantangi ba mu Kilishitendomu byo byo baubilenga byonka bino pa kimye kyabaya. Pano bano bena Kilishitu bashingwa baingijishe mashinda akwabo a kusampenyamo mambo awama. Pa kuba’mba basapwile, baingijishenga ne biñambañamba byakatataka kutwajilamo mwingilo wabo palutwe.

¹² Pakuba amba basampanye mambo awama a Bufumu, jino jibumba jicheche ja ba mwingilo batendekele kwingijisha matalakiti, magazini ne mabuku. Kabiji banembele majashi ne bibaba ne kwibisampanya kuba’mba bebipulinte mu mapepala a byambo avula. Basampenye majashi a mu Binembelo kwingijisha mawaileshi a mu kyalo mo bajinga ne a ntanda yonse. Balengele bipikichala bya mawi byo batambishanga pa kusapwila, nangwa kya kuba pa kyokya kimye kechi kwajingapo mafilimu a bipikichala bya mawi atambanga bantu ne. Ki ka kyafuminemo mu luno lupata lwa kwingila mwingilo lo bajinga nalo? Lelo jino, bantu nobe 7 milyonyi bafunda bukine kabiji babena kusapwila mambo awama a kuba’mba: “Pwanai ne Lesa.” Kya kine, aba bakalume ba Yehoba bajingako kala bajinga bakumwenako bawama bingi mu kwingila na lupata nangwa kya kuba bapitanga mu makatazho.

13. Nkebelo ka ya Lesa yo twafwainwa kuvulukanga?

¹³ Byambo byaambile Paulo bya kuba’mba “pano po pa kimye kyaitabilwa” bikingila ne lelo jino. Atweba bo bamwesha lusa lukatampe kwi Yehoba tusanta bingi pa kwikala na jino jishuko ja kumvwa ne kutambwila byambo bya lupwaino. Mu kifulo kya kukosesha michima, tumvwina byambo byaambile Paulo bya kuba’mba: “Twimusashijila namba, kechi mutambule bupe bwa Lesa ke bwatu ne.” (2 Ko. 6:1) Nkebelo ya lusa lukatampe lwa Lesa ke ‘yakupwanya ba panopantanda ne aye mwine,’ kupichila mwi Kilishitu.—2 Ko. 5:19.

14. Mu byalo byavula muji ñanyi mashuko?

¹⁴ Bantu bavula bo baongola michima kwi Satana bepatula kwi Lesa kabiji kechi bayuka nkebelo ya lusa lukatampe lwa Lesa ne. (2 Ko. 4:3, 4; 1 Yoa. 5:19) Nangwa byonkabyo, kutaminako kwa bintu kwalengela bavula kuswa kuba amba kwipatula kwi Lesa kwaleta bubi ne buyanji ku bantu. Nangwatu mu byalo byavula mo bakananga kutambwila mambo awama o tusapwila, lelo jino bavula babena kutambwila mambo awama kabiji ne kupwana ne Lesa. Pano nanchi twayuka amba kino kyo kimye kyo twafwainwa kukizhamo kwikala na lupata lwa kwamba lusashijilo lwa kuba’mba: “Pwanai ne Lesa” nyi?

15. Mu kifulo kya kusapwilangatu kuba amba bantu bomvwe bulongo, atweba tukeba bantu mwaya ntanda kuyuka ka?

¹⁵ Kikonkwanyi kyetu kechi kya kubulatu bantu amba inge balomba kwi Lesa, aye ukapwisha makatazho abo onse kabiji bakekala bulongo ne. Bavula kyo kyo bakeba umvwe baya ku chechi, kabiji machechi akeba kuba bino. (2 Timo. 4:3, 4) Ino kechi yo nkebelo ya mwingilo wetu ne. Mambo awama o tusapwila ke a kuba’mba, Yehoba mu butemwe bwanji witulekelako mambo etu kupichila mwi Kilishitu. Onkao mambo, bantu bakonsha kuleka kwitolwela ne kubwela na kupwana ne Lesa. (Loma 5:10; 8:32) Nangwa byonkabyo, “kimye kyaitabilwa” kibena kupelawizha kufika ku mpelo.

“Mwikale na Muchima wa Lupata”

16. Ki ka kyakwashishe Paulo kutwajijila kuchinchika ne kwikala na lupata?

¹⁶ Pano twakonsha kwikala byepi na lupata ne kutwajijila kwilumwesha mu mpopwelo ya kine? Bamo baji na kisemwa kya kumvwa bumvu nangwa kubula kwambaamba kabiji kino kyakonsha kwibalengela kubula kukasuluka kwamba. Nangwa byonkabyo, kyawama kuvulukanga amba lupata kechi lumwekelatu ku kubambakana nangwa kusangalala kwa muntu nangwa byubilo byanji ne. Paulo wamwesheshe byo twafwainwa kwikala na lupata ne kutwajijila kwilumwesha byo atundaikile bena Kilishitu bakwabo amba: “Mwikale na muchima wa lupata.” (Loma 12:11) Mupashi wa kwa Yehoba wamukoseshe bingi uno mutumwa ne kumupa bulume bwa kwingila mwingilo wa kusapwila. Kufuma kimye kyo bamwichile kwi Yesu kufika ne kimye kyo bamukashile japeleleko kabiji ne kumwipaya na mambo a lwitabilo lwanji mu Loma, pa myaka 30 yo aingijile, Paulo watwajijile kwikala na lupata mu uno mwingilo. Kimye kyonse Paulo waketekejilenga mwi Lesa wamupele bulume kupichila mu mupashi wanji. Paulo waambile amba: “Nakonsha kuba byonse mwi aye unkosesha.” (Fili. 4:13) Byo twakonsha kumwenamo umvwe twafunda kwi aye byo aubilenga!

17. Mu ñanyi jishinda mo twakonsha ‘kwikela na muchima wa lupata’?

¹⁷ Kyambo kyatuntululwa amba “lupata” kilumbulula “kuselauka.” (Kingdom Interlinear) Pa kuba’mba mema aji mu ketulu atwajijile na kuselauka, twafwainwa kutwajijila na kusonsela ku mujilo. Kyo kimotu ne atweba pa kuba’mba ‘twikale na muchima wa lupata,’ twafwainwa kutwajijila kwikala na mupashi wa Lesa. Pa kuba’mba twikale na uno mupashi, twafwainwa kwingijishanga bintu byonse Yehoba byo etupa kuba’mba tukose ku mupashi. Kino kibena kulumbulula amba twafwainwa kutesha muchima ku kupopwela kwetu kwa kisemi ne kwa kipwilo, ko kuba’mba kwikala na lufunjisho lwa pa bunke ne lwa kisemi kimye kyonse, kulomba ne kupwila pamo na bakwetu bena Kilishitu. Kino kiketukwasha kwikala nobe “mujilo” ulengela “mema kuselauka” pa kuba’mba ‘twikale na muchima wa lupata.’—Tangai Byubilo 4:20; 18:25.

18. Byo tuji bena Kilishitu bepana, kintu ka kyo twafwainwa kutapo muchima?

¹⁸ Mwina Kilishitu wipana ke yewa watesha muchima ku mwingilo kabiji kechi ulabikwa nangwa kufikenatu kulefulwa ne kuleka kwingila mwingilo ne. Byo tuji bena Kilishitu bepana, tukebesha kuba bintu byonse Yehoba byo akeba amba tube, byonka byaubile Yesu. (Hebe. 10:7) Lelo jino, kyaswa muchima wa Yehoba ke kya kuba’mba bavula bapwane ne aye. Onkao mambo, twayai twikale na lupata byonka byajinga Yesu ne Paulo ku uno mwingilo wakilamo kunema ubena kukebewa kwingijiwa mu kupelawizha lelo jino.

Mubena Kukivuluka Nyi?

• Ñanyi “mwingilo wa lupwaino” ye bapele Paulo ne bakwabo bena Kilishitu bashingwa?

• Bashingwa bashalapo bengijisha byepi bulongo “kimye kyaitabilwa”?

• Bena Kilishitu bakonsha byepi ‘kwikala na muchima wa lupata’?

[Kipikichala pa peja 12]

Paulo kechi walubilemo kimye kyo asambakene ne Nkambo Yesu Kilishitu ne