Kikoloto kyo Tuji Nakyo ku Bantu
1 Mutumwa Paulo wiumvwinenga’mba uji na kikoloto kya kusapwila bantu. Wayukile’mba Yehoba wanengezha jishinda ja kupulwishamo bantu bonse kupichila mu mashi a Mwananji. (1 Timo. 2:3-6) Onkao mambo, Paulo waambile’mba: ‘Amiwa ne wa kikoloto ku Bangiliki ne ku bantutu, kabiji ne ku ba maana ne ku babulao.’ Waingijilenga na ngovu pa kuba’mba akonshe kubwezha kikoloto kyanji ku bantu kupichila mu kwibabulako mambo awama.—Loma 1:14, 15.
2 Byonka byajinga Paulo, bena Kilishitu lelo jino nabo babulako bakwabo mambo awama pa kimye kiji kyonse. “Malwa akatampe” byo afwenya kala pepi, mwingilo wetu wa kukeba bantu ba bukishinka wafwainwa kwingijiwa bukiji bukiji. Lekai butemwe bwetu bwa kine bo twatemwa bantu bwitulengelenga kukosako mu mwingilo wetu wa kupulusha bantu.—Mat. 24:21; Ezi. 33:8.
3 Kulipila Kikoloto Kyetu: Jishinda jikatampe jo tutainamo bantu ke kupichila mu kusapwila ku nzubo ne nzubo. Mu manyaunda bantu bavula mo babulwa kutanwa pa mazubo, kunemba oo mazubo po twabula kutana bantu kabiji ne kubwelako pa kimye kikwabo, kuketulengela kwisamba na bantu bavula. (1 Ko. 10:33) Kabiji twafwainwa kutana bantu kupichila mu kusapwila mu manyaunda a busulu, mu mikwakwa, mu mapaka, mu mapunzha mwa kwimikila myotoka kabiji ne kusapwila pa lamya. Twafwainwa kwishikisha atwe bene’mba, ‘Abya mbena kwingila na ngovu mu mashinda onse a kusapwilamo kuba’mba nsapwile byambo bipana bumi nyi?’—Mat. 10:1.
4 Painiya umo wiumvwinenga’mba uji na kikoloto kikatampe kya kusapwila bantu bonse baji mu nyaunda yanji. Pa nzubo imo, bipembe bya pa bipenze byaikalangatu monka bebishinkila kabiji kechi patanwangapo muntu ne. Bino juba jimo painiya jo abujile kuya mu mwingilo, wamwene motoka sa bamwimika kulutwe ya nzubo ya yewo muntu wabulanga kutanwa pa nzubo. Byo akebelenga kubula kutaya jino jishuko, wajizhizhe kagengele ka pa kibelo. Uno mwanamulume wakumbwile, kabiji ne mwisambo mutanshi ye besambile walengejile uno nyenga ne mwina kwanji kubwela bwelako javula ku uno muntu. Ko kyakayanga, uno mwanamulume waswile lufunjisho lwa Baibolo, kabiji kino kimye ke mulongo wabatizwa. Uno mulongo usanchila bingi kuba’mba uno nyenga wiumvwinenga’mba wajinga na kikoloto kya kusapwila bantu.
5 Mpelo byo ibena kunangijila pepi, kino kyo kimye kya kulipila bikoloto byetu ku bakwetu kupichila mu kukosakanako mu mwingilo wa busapwishi.—2 Ko. 6:1, 2.