Kyeya kya Lesa Kifumyapo Mfishi!

“Yehoba ye ukantokeshesha mfishi yami.”—2 SAMWELA 22:29.

1. Kyeya kyendela byepi pamo nabumi?

“PONKAPO Lesa waambile’mba: Kwikale kyeya, ne kyeya kyamwekele.” (Ntendekelo 1:3) Bino byambo byanema biji mu Ntendekelo bilumbulula Yehoba amba yensulo yakyeya, mambo kwakubula kyeya umvwe kafwapo bilengwa byumi pantanda. Kabiji Yehoba yensulo yakyeya kyakumupashi, kitutangijila mubwikalo bwetu. (Masalamo 43:3) Mfumu Davida watongwele kyeya kyakumupashi nebumi byobyendela pamo kimye anembele’mba: “Mambo ko muji anweba ko ko iji ne nsulo ya bumi: Mu kyeya kyenu mo mo tukamwena kyeya atweba.”—Masalamo 36:9.

2. Kwesakana nabyaambile Paulo, kyeya kyendela pamo naka?

² Byopapichile myaka 1,000 kufuma kimye kyajingako Davida, mutumwa Paulo naye watongwele byambo byakulengwa kwabintu. Byoanembejile kukipwilo kyabwina Kilishitu mu Kolinda waambile’mba: “Yenkaye Lesa waambile’mba, Kyeya kisamine mu mfishi.” Kepo Paulo alumbulwile amba kyeya kyakumupashi kyendela pamo namaana afuma kwi Yehoba, mambo wanembele’mba: ‘Ye wasamine mu michima yetu, mu kupana kyeya kya maana a kuyuka lukumo lwa Lesa lwa mu kilungi kya Yesu Kilishitu.’ (2 Kolinda 4:6) Akye kyeya kitusamina byepi?

Baibolo Isamisha Kyeya

3. Kyeyaka Yehoba kyoasamisha kupichila mu Baibolo?

³ Yehoba usamisha kyeya kyakumupashi kikatakata kupichila mu Byambo byanji byanembeshiwa namupashi, Baibolo. Byotufunda Baibolo nekubika maana afuma kwi Lesa mumilanguluko yetu, tuswisha kyeya kyanji kwitusamina. Mu Baibolo, Yehoba momoalumbulula byoakeba nekwitubula byotwakonsha kuba kyaswa muchima wanji. Kino kitukwasha kuyuka kyotwaikelako nekuta muchima kubyakumupashi. (Musapwishi 12:1; Mateo 5:3) Yesu waambishetu kuba’mba twafwainwa kuta muchima kubintu byakumupashi kimye aambile byambo byanembwa mu Mizhilo ya Mosesa amba: “Kyanembwa’mba, Muntu kechi akamwene bumi ku shinkwa yenka ne, poso ku byambo byonse bifuma mu kanwa ka Lesa.”—Mateo 4:4; Mpitulukilo ya mu mizhilo 8:3.

4. Muñanyi jishinda Yesu moaikela “kyeya kya panopantanda”?

⁴ Yesu wayukanyikwa’mba yekyeya kyakumupashi. Waambile peaye mwine’mba: “Amiwa ne kyeya kya panopantanda: awa undondela amiwa kechi ukenda mu mfishi ne, ukekala na kyeya kya bumi.” (Yoano 8:12) Bino byambo bitukwasha kuyuka mwingilo wanema Yesu yeaji nanji wakufunjisha bukine bwa Yehoba kubantu. Pakuba’mba tukane mfishi nekwenda mukyeya kya Lesa, twafwainwa kumvwina byambo byakwa Yesu byonse, kumwena koaji, nemafunjisho anji byonka byoanembwa mu Baibolo.

5. Ñanyi mwingilo wajinga nabaana babwanga bakwa Yesu panyuma yalufu lwanji?

⁵ Byokwashajiletu moba acheche lufu lwanji saka lukyangye kufika, nekwitongola mwine’mba yekyeya, wabujile baana banji babwanga jikwabo’mba: ‘Pa kiji pacheche po mukiji na kyeya. Pitañanai byo mukiji na kyeya, mwakeya kwijilwa na mfishi: ke pakuba upitañana mu mfishi kechi wayuka ne ko aya ne. Ponkapo po mukiji na kyeya kitabilai kyeya, mwikale baana ba kyeya.’ (Yoano 12:35, 36) Aba baikele kebaana bakyeya bafunjile “byambo byalumbuluka” byamu Baibolo. (2 Timoti 1:13, 14) Kepo nabo baingijishe bino byambo byalumbuluka kufunjishako bantu bakwabo bajinga namichima yakishinka kuba’mba bafume mumfishi nekwiya mukyeya kya Lesa.

6. Ñanyi bukine buji mu 1 Yoano 1:5 bwaamba pamambo akyeya nemfishi?

⁶ Mutumwa Yoano wanembele’mba: “Lesa ye kyeya, ne mwi aye ka muji mfishi nangwa kachechetu ne.” (1 Yoano 1:5) Monai lupusano luji pano mwapusena kyeya nemfishi. Kyeya kyakumupashi kifuma kwi Yehoba, kwi aye kechi kuji mfishi yakumupashine. Pano ñanyi nsulo ya mfishi?

Nsulo ya Mfishi ya Kumupashi

7. Mfishi yakumupashi yakumbana ntanda yonse ifuma kwiñanyi, kabiji uji nangovuka?

⁷ Mutumwa Paulo waambilepo pe “lesa wa panopantanda.” Pakwamba bino byambo watongwelenga Satana Diabola. Waambile’mba “wiipofula michima ya babula kwitabila, kuchina’mba, bakamona kyeya kya mambo awama a lukumo lwa Kilishitu, ye kipasha kya Lesa.” (2 Kolinda 4:4) Bantu bavula bamba’mba baitabila mwi Lesa, bino kechi baitabila’mba Diabola koajine. Mamboka? Mambo akuba kechi bakeba kuswa amba kuji muntu mubi uji nangovu yakila yakonsha kuvundankanya ndangulukilo yabone. Pano bino byonka byaamba Paulo, Diabola koaji, kabiji ulabika bantu kuchina’mba bakamona kyeya kyabukine. Nangovu ya Satana yakuvundankanya milanguluko yabantu yalumbululwa mubyambo byabungauzhi’mba “mujimbijimbi wa panopantanda ponse.” (Lumwekesho 12:9) Bwikalo boaambijile jimo ngauzhi Isaya bwakuba’mba “Tala, mfishi yakumbana ntanda, ne mfishi ine yaikala pa mitundu ya bantu,” bobwafuma mumingilo yakwa Satana kabiji bobujimo nebantu bonse kufumyakotu boba babena kwingijila Yehoba.—Isaya 60:2.

8. Muñanyi mashinda aba baji mumfishi yakumupashi mobamweshesha’mba bapuputatu?

⁸ Mumfishi ine yakabwiji-bwiji muntu kuba wamonatu nangwa kimone. Uba kapuputetu kumona nepakunyantane. Byonkabyo, neboba baji mumfishi yakumupashi kechi bamonane kabiji bukiji-bukiji boba kebapuputetu kumupashi. Kechi bekala nabulume bwakuyuka bukine nebubela, nangwa kyawama nekyatamane. Ngauzhi Isaya waambile pabano baji mumfishi yauno mutundu amba: ‘Malwa abo, aba batela kyatama amba kyawama, ne kyawama amba kyatama; batela mfishi amba kyeya, ne kyeya’mba mfishi; batela byalula’mba byatobala ne byatobala’mba byalula.’ (Isaya 5:20) Bantu baji mumfishi yakumupashi balabikwa kwi lesa wa mfishi, aye Satana Diabola, kabiji bepatula kunsulo yakyeya nebumi.—Efisesa 4:17-19.

Lukatazho Muntu Loafwainwa Kushinda Pakufuma Mumfishi Nekwiya Mukyeya

9. Lumbululai mingilo yabangubabibi byoiji yamfishi monse mubiji, mumfishi nemfishi yakumupashi.

⁹ Yoba muntu wakishinka waambilepo pabyuba bangubabibi namingilo yabo yamumfishi amba: ‘Nkende upembela mabanga a bufuku, amba kafwako usakummona ne; kabiji uvweta ku meso.’ (Yoba 24:15) Bangubabibi nabo baji mumfishi yakumupashi, kabiji mfishi yauno mutundu yakonsha kukila muntu bulume. Mutumwa Paulo waambile’mba aba baji muino mfishi batapama mubyubilo byabulalelale, bwivi, lunkumbwa, kupendwapendwa, kutukana, nekuja byalunkanankana. Pano bino aba beya mukyeya kya Byambo bya Lesa bakonsha kupimpulwa. Paulo walumbulula bingi bulongo munkalata yanji kubena Kolinda amba bakonsha kupimpulwa. Bena Kilishitu bavula bena Kolinda baubilenga byubilo byamfishi, pano byobapimpwilwe Paulo wibabujile’mba: “Bino pano bemovwa, bino bemuzhijika, bino bemubingisha, monka mu jizhina ja Nkambo Yesu Kilishitu, ne mu Mupashi wa Lesa wetu.”—1 Kolinda 6:9-11.

10, 11. Yesu wamumvwijile byepi lusa awa mwanamulume wajinga mpofu? (b) Mamboka bantu bavula kyobabujila kukeba kyeya?

¹⁰ Umvwe muntu wafuma mumfishi yafita bwii nekumona kyeya, pakebewa kupitapo kakimye pakuba’mba meso anji ebijile bulongo. Mu Beteseda, Yesu wabukile mwanamulume wajinga mpofu, bino pakuba kino waubilenga kimo kimo. “Wamukwachile mpofu pa kuboko ne kumutwala pangye ya muzhi; kabiji byo amushipile mate mu meso anji, ne kumubika maboko, wamwipwizhe’mba, Wamona kintunyi? Ponkapo wainwine meso, amba Namona bantu; pakuba nebamona pamo nobe bichi, kasa byenda. Kabiji wamubikile maboko pa meso anji jibiji; ne aye katajishe ne kutajisha, ne meso abwelele ke awama, kamone ne byonse bulongo.” (Mako 8:23-25) Kimweka nobe, Yesu wamulabishenga uno muntu pachepache pakuba’mba meso anji ebijile bulongo kyeya kyajuba. Akilangulukaipo lusekelo lwajinga nayewa muntu byoatatwile kumona.

¹¹ Pano bino, lusekelo lwaboba bakwashiwa pachepache kufuma mumfishi yakumupashi nekumona kyeya kyabukine lwakila lolwa lwajingapo nayewa shetu. Inge twatala lusekelo lwabo byoluji, ke kyakukumyatu pakumona bavula byobabula kumona kyeya. Yesu waamba kine kintu kibalengela amba: “Kuzhatwa ko ko kuno, amba kyeya kyaiya panopantanda, kabiji bantu batemwako mfishi, kutemwa kyeya ne; mambo byubilo byabo byatama. Byonkabi bonse boba byatama bashikwa kyeya, ne kwiya ku kyeya ne, kuchina’mba, byubilo byabo byakalengululwa.” (Yoano 3:19, 20) Ee, bavula batemwa kuba bintu “byatama” nabiji bulalelale, kumanyika bantu, bubela, bujimbijimbi, nebwivi, kabiji mumfishi yakwa Satana yakumupashi momonka mobobila bino bintu byobakeba.

Kukomenangako Mukyeya

12. Kwiya mukyeya kwitukwasha muñanyi mashinda?

¹² Kufuma kimye kyotwayukile bukine bwakyeya, lupimpuka lotwamona mwi atweba bene? Kimye kimo kyawama kutala kunyuma nekumona byotwakomenako kumupashi. Byubilo byatamaka byotwasankilapo? Ñanyi makatazho mubwikalo bwetu otwapwisha? Milanguluko yetu yakulutwe yakingya byepi? Mubulume bwa Yehoba nena bukwasho bwamupashi wazhila, twakonsha kutwajijila kukingya mubumuntu bwetu nendangulukilo yetu keimweshe’mba tubena kukokela kyeya. (Efisesa 4:23, 24) Paulo wanembele’mba: ‘Mambo kala mwajinga mfishi, pakuba pano mwi kyeya mwi Nkambo: endainga mwafwainwa baana ba kyeya mambo bipangwa bya kyeya biji mu buwame bonse ne bololoke ne bukine.’ (Efisesa 5:8, 9) Kwiswisha atweba bene amba tutangijilwenga nakyeya kya Yehoba kwitupa luketekelo nenkebelo, kabiji kusangajika bakwetu botuji nabo. Luno lupimpu byolusangajikapo muchima wa Yehoba!—Byambo bya Mana 27:11.

13. Twakonsha kumwesha byepi lusanchilo lwetu pamambo akyeya kya Yehoba, kabiji kika kikebewa pakuba kino?

¹³ Tumwesha lusanchilo pamambo abwikalo bwalusekelo botuji nabo byotumwesha kyeya kya Yehoba—kubulako balongo betu mukisemi, balunda netu, nebakwetu mukimasamasa byotwafunda mu Baibolo. (Mateo 5:12-16; 24:14) Aba bakana kumvwa byotusapwila, bwikalo bwetu bwawama bwabwina Kilishitu pamo nebusapwishi bwetu bibashiina’mba byubilo byabo byatama. Paulo walumbulula’mba: ‘Yukainga bimutokesha ku muchima aye Nkambo; kabiji kechi mumvwañane nayo mingilo yatu ya mfishi ne, poso konka kwibilengulula.’ (Efisesa 5:10, 11) Twafwainwa kuchinchika pakukwasha bantu kusha mfishi nekumona kyeya. Kikatakata kikebewa kwikala namuchima wabutemwe nekifyele nekusakisha kwibafunjishako namuchima wetu yense bukine bwakonsha kwibakwasha kukamona mfweto yamyaka nemyaka.—Mateo 28:19, 20.

Jimukai Nabyeya Byabujimbijimbi!

14. Ñanyi lujimuno lotwafwainwa kulondela pamambo akyeya?

¹⁴ Bantu baji pakalunga kamema bufuku batemwa bingi inge bamonapo kyeya kiji kyonse. Mumoba akunyuma, kubitulu byakalunga mu England baambulanga mujilo pamabwe pakuba’mba aba baji mulwendo bamone pakunyemena namambo a kipupu. Bantu baendanga mu maato batemwanga bingi kumona bino byeya byasamishanga pabiito pobafwainwe kunyemena umvwe bintu byatama pakalunga. Pano bino, mijilo imo yajingatu yabujimbijimbi. Baubilengatu’mba baye paji yewo mujilo abo’mba popa kiito, nanchi mwane mumabwetu mwaketuchilenga mato avula mobaibijilega bipe byabo kubangivi. Muino ntanda yabujimbijimbi twafwainwa kujimuka kuchina kongolokela kubyeya byabujimbijimbi byakonsha kwitulobesha kumupashi. Twayuka kuba’mba; ‘Satana wialula nobe malaika wakyeya.’ Nebantu banji nabo kuvwangakotu neboba basenduka mulwitabilo, “bo ba mingilo ya bujimbijimbi” ‘bealula nobe ba mingilo ya bololoke.’ Umvwe keumvwine milanguluko yabubela yabantu bauno mutundu, luketekelo lwetu mu Byambo bya Yehoba bya bukine Baibolo lwakonsha konaika kabiji nelwitabilo lwetu lwakonsha kufwa.—2 Kolinda 11:13-15; 1 Timoti 1:19.

15. Kika kiketukwasha kutwajijila kwenda mujishinda jiya ku bumi?

¹⁵ Nyimbi wamasalamo wanembele’mba: “Byambo byenu ye lampi wa maulu ami, Kyo kyeya kya mu jishinda jami.” (Masalamo 119:105) Ee kine, ‘jishinda jakatazha jiya ku bumi’ mwasamina kyeya kya Lesa wetu wabutemwe Yehoba, “wasaka’mba, bantu bonse bapuluke, bakayukishe bya bukine.” (Mateo 7:14; 1 Timoti 2:4) Kuba mikambizho ya Baibolo kuketukwasha kuchina kusenduka mujoja jishinda jakatazha nekuya mumashinda amfishi. Paulo wanembele’mba: “Binembelo byonse byanembeshiwa kwi Lesa, kabiji byo byawamina mukwibafunjisha bantu, ne mu kwibalengulula ne mu kwibolola, ne mu kwibafunda mu bololoke.” (2 Timoti 3:16) Byambo bya Lesa byobitufunjisha kukoma kumupashi. Mukyeya kya Byambo bya Lesa twakonsha kwilengulula atwe bene nangwa inge kyakebewa, bakafunga bamukipwilo bakonsha kwitukajipila. Byonkabyo, twakonsha nekuba bintu mubololoke nekutambwila lujimuno nakwikepesha pakuba’mba tutwajijile kwenda mujishinda jiya kubumi.

Endainga Nalusanchilo Mukyeya

16. Twakonsha kusanchila byepi kyabupe kyawama kyakyeya kitupa Yehoba?

¹⁶ Twakonsha kumwesha byepi lusanchilo lwetu pakyeya kyabupetu kitupa Yehoba? Yoano kyapitala 9 witubula’mba, Yesu byoalabishe meso a mwanamulume wasemekelwe mpofu, uno muntu wasanchile bingi. Nga wasanchile byepi? Waikele nalwitabilo mwi Yesu amba Mwana Lesa nekumulumbulula kubantu amba “ngauzhi.” Kabiji wibabujile kwakubula moyo aba balengulwilenga byakukumya byaubilenga Yesu. (Yoano 9:17, 30-34) Mutumwa Petelo watongwele bashingwa mukipwilo kyabwina Kilishitu amba ‘bantu banonkwa.’ Mamboka? Kenamambo akuba’mba nabo baji namuchima walusanchilo byonka byajinga yewa mwanamulume wasemekelwe mpofu yebalabishe meso. Basanchila Yehoba Nkwasho yabo, kupichila mu ‘kulondolola byanji byawamisha, yenka wibechile byo bajinga mumfishi, bekale mu kyeya kyanji kya kukumya.’ (1 Petelo 2:9; Kolose 1:13) Aba baji naluketekelo lwakwikala panopantanda nabo baji namuchima walusanchilo, kabiji bakwasha balongo babo bashingwa mukusapwila “byawamisha” bya Yehoba kubantu. Kejishuko jikatampe bingi Lesa joapa bantu bambulwakoloka!

17, 18. (a) Kika kyotwakonsha kuba atweba bonse pamuntu pamuntu? (b) Mwina Kilishitu yense watundaikwa kuchinuzhukaka mukulonda byajinga Timoti?

¹⁷ Kyanema bingi kusanchila kyeya kyabukine. Vulukai’mba kafwako nangwa muntu umo mwiatweba usemwa saka ayukila jimo bukinene. Bamo bebufunda sabakoma kala, kabiji nekuyuka bukiji-bukiji buwame bwakyeya byobwabula kwesakana namfishi. Bakwabo bashukwa bingi kukoma nabansemi baji namoyo wakwakamwa Lesa. Kubano kyakonsha kupela bingi kulama bukine namuleele. Kamonyi umo wajinga nabansemi yanji baingijilanga Yehoba saka akyangye nekusemwa, waitabile kuba’mba papichileko kimye kyabaya nekwibikako pakuba’mba omvwishe buneme bwabukine boafunjilenga kufuma kubulukeke. (2 Timoti 3:15) Kikale twibanyike nangwa bakulumpe, atweba bonse twafwainwa kusanchila pakatampe bukine bwitupa Yehoba.

¹⁸ Nsongwalume Timoti bamufunjishe “binembelo byazhila” kufuma kubulukeke, pano kwibikako kwanji kokwamukwashishe kwikala mwina Kilishitu wafikapo. (2 Timoti 3:15) Kokuba’mba pano wafikijilemo kukwasha mutumwa Paulo wamutundaikile’mba: “Kasa uteshakotu muchima ukefikizhe obe mwine kwi Lesa, sa walumbuluka, muntu wa mwingilo wabula ne kya kubilako bumvu, kasa utwalatu bulongo mambo a bukine.” Twayai atweba bonse tuchinuzhukenga kuba bintu byakonsha kwituletela bumvu, nangwa kulengesha Yehoba bumvu, byonka byajinga Timoti!—2 Timoti 2: 15.

19. (a) Byonka byaubilepo Davida, atweba bonse twafwainwa kwamba’mbaka? (b) Mumutwe walondelapo tukafundamoka?

¹⁹ Tuji nabishinka byakumusanchila Yehoba witupa kyeya kyabukine. Neatweba twambenga byonka byaambile Mfumu Davida amba: “Anweba yenu lampi wami, anweba Yehoba; Yehoba ye ukantokeshesha mfishi yami.” (2 Samwela 22:29) Nangwa byonkabyo, kechi twafwainwa kwiketekelane, mambo kino kyakonsha kwitubwezha jibiji kumfishi yotwafumishiwamo. Mutwe walondelapo uketukwasha kumona nekuyuka byotwanemeka bukine bwa Lesa mubwikalo bwetu.

Mwafundamoka?

• Yehoba upana byepi kyeya kyakumupashi?

• Lukatazhoka lwiya namfishi yakumupashi ituzhokoloka?

• Bintuka byotwafwainwa kuchinuzhuka?

• Twakonsha kumwesha byepi lusanchilo lwetu lwakusanchila kyeya kyabukine?

[Kipikichala pa peja 23]

Yehoba yensulo yakyeya kyotumona, nekyeya kyakumupashi

[Kipikichala pa peja 25]

Yesu byonka byoalabishe meso amwanamulume wajinga mpofu pachepache, byobyoetukwasha kufuma mumfishi yakumupashi