Twikala Balusekelo pa Kwingila na Ngovu mu Mwingilo wa Yehoba!
1 Mutumwa Paulo wasekejile bingi ‘kwitaya aye mwine’ kuba’mba afikizhe mwingilo wanji wa bwina Kilishitu. (2 Ko. 12:15) Po pamotu ne lelo jino, bena Kilishitu bavula bengila bingi na ngovu mwingilo wa bupainiya. Bakwabo baji na mitembo yavula mu kisemi, bengilako mu mwingilo mulungu ne mulungu nangwa kya kuba bekala batabankana. Kabiji bakwabo nabo bendatu na kubelabela, bengila kwesakana na papelela ngovu yabo kutundaika mwingilo wa Bufumu. Kitundaika bingi kumona bantu ba Yehoba ba mafumbi ne bwikalo bwapusana pusana byo babena kwingila na ngovu mu mwingilo wa Yehoba.
2 Kutemwa Bantu: Kwibikako kwetu kwa kumwingijila Yehoba, kumutemwa ne kutemwa bantu, kwitulengela kwikala na jiwi ja mu muchima jawama. Na mambo a kuba Paulo wipaine aye mwine mu kusapwila mambo awama, waambile na lusekelo amba: ‘Nemubujisha lelo, namba amiwa nabinga ku mashi enu anweba bonse.’ (Byubilo 20:24, 26; 1 Tesa. 2:8) Kwingilako mu mwingilo kwesakana na bwikalo bwetu byo buji, kuketulengela kubula kwikala na mambo a mashi.—Ezi. 3:18-21.
3 Kwibikishako kwetu kwa kukwasha bantu kwitulengela kwikala balusekelo. (Byubilo 20:35) Mulongo umo waambile’mba: “Kya kine, ñumvwa bingi kukoka umvwe nabwela ku nzubo mabanga panyuma ya kwingila jojo juba mu mwingilo wa Yehoba. Pano bino, ngikala na lusekelo kabiji namusanchila bingi Yehoba pa mambo a kundengela kwikala na luno lusekelo alo muntu lo akonsha kukankalwa kumvutulalo.”
4 Kutemwa Lesa: Kine kintu kikatampe kitulengela kwingila na ngovu mu mwingilo wa Yehoba, ke kya kuba’mba, uno mwingilo utokesha pa muchima Shetu wa mwiulu. Kutemwa Lesa kwitulengela kukokela mikambizho yanji yavwangamo kusapwila ne kulenga baana ba bwanga. (1 Yoa. 5:3) Nangwatu umvwe kya kuba bantu kebakane kumvwa nangwa kwitukanya, tutwajijila na lusekelo kwingijila Yehoba pakatampe.
5 Na mambo a kimye kyo tujimo, kechi twafwainwa kubwela munyuma ne. Tubena kwikala mu kimye kya kunowa. (Mat. 9:37) Umvwe kimye kya kunowa kyafika, njimi javula wingila kimye kyabaya bingi mambo ushala na kimye kyakepa kya kunowelamo kajo saka kakyangye konaika. Kimye kyo twashala nakyo kya kunowelamo ku mupashi kyakepa bingi. Kupichila mu kuyuka bulongo kimye kyo tujimo, twayai bonse tutwajijile kwingila na ngovu mu mwingilo.—Luka 13:24; 1 Ko. 7:29-31.