Bafunjishiwa Kwikala Bafunjishi ba Mambo a Lesa
“Lesa . . . ye wituba tukonshe kwikala ke ba mingilo.”—2 KOLINDA 3:5, 6.
1, 2. Bantu bamo bobapo byepi pamwingilo wakusapwila, bino mamboka obakankelwa?
MWAKONSHA kumvwa byepi inge bemupa kwingila mwingilo yemwaluba? Fwanyikizhai kuba’mba bemupa byonse byakubila yewo mwingilo nebyela byakwingilako. Pano bino, uno mwingilo kechi mwayuka byakumwingilane. Lukatazho lukwabo, uno mwingilo ubena kukebewa kwingijiwa bukiji-bukiji. Bantu nabo mwane bakinka manungo mwi anweba. Byokifichishapo kumuchima!
2 Luno lukatazho kechi lwakufwanyikizhatune. Akimonai kyakumwenako. Bimye bimo machechi amo a Kilishitendomu eseka kwinengezha nekuya nakwingila mwingilo wakunzubo nenzubo. Javula bakankalwa kumwingila, papitatu milungu inyi kana bañondo bacheche bamusankilapo. Mamboka? Mambo akuba Kilishitendomu kechi ufunjisha bantu banji kuyuka byakumwingila uno mwingilone. Nebantangi babo nabo nangwa kyakuba baya nakufunda myaka yavula mumasukulu akumubiji neabya bupopweshi, kechi bayuka byakumwingila uno mwingilo wakusapwilane. Nga mamboka otwaambila kino?
3. Mu 2 Kolinda 3:5, 6 kyamboka kyaambiwamo jisatu, kabiji kilumbululaka?
3 Byambo bya Lesa, bilumbulula kine kintu kilengela muntu kwikala musapwishi wakine wamambo awama abwina Kilishitu. Mutumwa Paulo watangijilwe namupashi kunemba’mba: “Kechi mambo a kuba’mba, twakonsha atwe bene kwilangulukila kintu amba kyafuma mwi atwe bene ne; mambo kukonsha kwetu kufuma kwi Lesa; ye wituba tukonshe kwikala ke ba mingilo.” (2 Kolinda 3:5, 6) Kyambo kya “kukonsha” kyatongolwamo jisatu nanchi kilumbululaka? Buku wa Vine’s Expository Dictionary of Biblical Words waamba’mba: “Umvwe kutongola bintu [kyambo kya Kingiliki kwafuma kino kyambo] kilumbulula ‘kuvula’ . . . ; umvwe kutongola bantu, kilumbulula’mba ‘bayuka,’ nangwa’mba ‘bafwainwa.’” Mujino jishinda, muntu ‘wakonsha’ kwingila mwingilo keyewa wayuka kwingila yewo mwingilo. Ee, bamwingilo bakine bamambo awama bakonsha kwingila umo mwingilo wibafwainwa mambo bayuka byakumwingila.
4. (a) Paulo wamwesha byepi’mba kwikala muntu wingila mwingilo wabwina Kilishitu kechi kwabantutu bacheche basalululwane? (b) Ñanyi mashinda asatu Yehoba moetufunjishisha kwikala bamwingilo?
4 Pano, nga buno busendwe bwabo bufumapi? Mubulume bwakujimuka kwamuntu mwinenyi, inyi bufuma kumasukulu akatampe? Mutumwa Paulo kampe wajinga nabino byonse. (Byubilo 22:3; Filipai 3:4, 5) Bino mukwikepesha wayukile kuba’mba busendwe bwanji bwakwikala musapwishi, kechi bwafumine kumasukulu akatampene, bwafumine kwi Yehoba Lesa. Nanchi buno busendwe bwabantutu bacheche basalululwanyi? Paulo wanembejile kipwilo kyabena Kolinda pamambo a ‘kukonsha kwetu.’ Kino kilumbulula’mba Yehoba umona kuba’mba bakalume banji bonse bakishinka bayuka byakwingila mwingilo yeebapa. Yehoba ufunjisha byepi bena Kilishitu bakine lelo jino? Twayai twisambe paano mashinda asatu oengijisha: (1) Byambo byanji, (2) mupashi wanji wazhila, ne (3) jibumba janji japanopantanda.
Byambo bya Yehoba Bitufunjisha
5, 6. Binembelo Byazhila bibakwasha byepi bena Kilishitu bakine?
5 Kitanshi, Byambo bya Lesa bitufunjisha byepi kwikala bamwingilo? Paulo wanembele’mba: “Binembelo byonse byanembeshiwa kwi Lesa, kabiji byo byawamina mu kwibafunjisha bantu, ne mu kwibalengulula ne mu kwibolola, ne mu kwibafunda mu bololoke: amba muntu wa Lesa ekale walumbuluka, wawaina byonse bya kwingilako mingilo yonse yawama.” (2 Timoti 3:16, 17) Onkao mambo, Binembelo Byazhila byobitufunjisha kwikala ‘balumbuluka, bawaina byonse bya kwingilako’ “mingilo yonse yawama” yakufunjisha bantu Byambo bya Lesa. Ibyepi kuboba bamu machechi a Kilishitendomu? Nabo batanga Baibolo. Pano nga mamboka okyaikela’mba Baibolo imotu yafunjishako bamo kwikala bamwingilo bakwabone? Mukumbu wajino jipuzho uji mubyotwiimona Baibolo?
6 Kekyabulanda bingi kumona’mba bavula baya kumachechi kechi beaswa mawi amu Baibolo ‘byonka byo aji amba kine mambo a Lesa’ ne. (1 Tesalonika. 2:13) Bantu bamu Kilishitendomu beletela bingi bumvu abo bene pakino. Panyuma yakuya nakufunda myaka yavula kumasukulu abo abya bupopweshi, abya bantangi babo bekala bafunjishi ba Byambo bya Lesa nyi? Ine kechi bafikishapotune. Bamo baya kuano masukulu batatulatu bulongo kufunda sabaji nalwitabilo mu Baibolo, bino byobapwishatu bekala naluzhinauko mumafunde abupopweshi obafunda. Kepo mukifulo kyakusapwila mambo a Lesa, ao bamo mwi abo obasula kala—batendeka kuba bintu byobakeba bene, kwichapankanya mumapata abya bumulwila ntanda, kutundaika tubungwe twabena Lesa twamba pabyakyalo, nangwa kufunjisha byabutemwamaana bwabantu mumajashi abo. (2 Timoti 4:3) Kupusanako nabo, bena Kilishitu bakine balondela byaubanga Yesu Kilishitu.
7, 8. Ndangulukilo yakwa Yesu pamambo a Byambo bya Lesa yapusene byepi nayoya yabantangi babupopweshi bajingako mumoba anji?
7 Yesu kechi walondejilenga byaubilenga bantangi babupopweshi kwalulula ndangulukilo yanjine. Pakufunjisha kajibumba kacheche nabiji batumwa banji, nangwa jibumba jikatampe, Yesu wafunjishanga biji mu binembelo byazhila. (Mateo 13:10-17; 15:1-11) Ino nfunjishisho yamupusenyeko nabantangi babupopweshi bajingako mu oa moba. Abo bakanyanga bantu balanda kuyuka bintu byazhika bya Lesa. Kwesakana nakisho kyabo, bafunjishi bamu oa moba bamonanga’mba binembelo byamu Baibolo bimo byazhijisha kechi wafwainwa kwibifunjisha kumuntu ungine kanatu yewa yeayuka bulongo. Kabiji umvwe keebifunjishe kuyewo yeayuka, wamufunjishanga najiwi jamunshi-munshi saka avwala kisapi kumutwe. Aba bantangi babupopweshi bachinanga bingi kwisamba byambo bimo byamu Baibolo byonka byobachinanga kutongola jizhina ja Lesa!
8 Kilishitu kechi byobyo aubangane. Wayukile kuba’mba, bantu bonse bafwainwa kufunda ‘byambo byonse bifuma mu kanwa ka Lesa.’ Yesu kechi wafunjishangatu bantu basalululwa bafundane. Wabujile baana banji babwanga’mba: “Kyo nemubula mu mfishi mwikyambe pa mute; kabiji kyo mumvwa mu kutwi, mwikitayile mbila pa mitenge ya mazubo.” (Mateo 4:4; 10:27) Yesu wajinga nakizaku kyakufunjisha bantu bavula kuyuka Lesa.
9. Bena Kilishitu bakine bengijisha byepi Baibolo?
9 Byambo bya Lesa byobyafwainwa kwikala kintu kikatampe mumfunjishisho yetu. Kyakumwenako, pakwamba jashi mu Nzubo ya Bufumu ya Bakamonyi bakwa Yehoba kechi kyawana kutangatu mavesi mu Baibolo amo akutolaulamotune. Twafwainwa kulumbulula, kwamba byakumwenako, nekumwesha bulongo kinembelo byokibena kwingila mubyobyo byambo. Kikonkwanyi kyetu kekya kumona kuba’mba twafumya byambo byanembwa mu Baibolo nekwibijimba mu michima yababena kwituteleka. (Nehemiya 8:8, 12) Kabiji pakufunda nangwa kololako muntu, twafwainwa kwingijisha Baibolo. Nangwa kyakuba bantu ba Yehoba bamba milaka yapusana-pusana kabiji bakomena mubisho byapusana-pusana, bonse banemeka Baibolo—Buku wakila mabuku onse.
10. Byambo biji mu Baibolo byanembeshiwa namupashi byakonsha kwitwalula byepi?
10 Baibolo iji nabulume, inge kyakuba twiinemeka. (Bahebelu 4:12) lIengela bantu kupimpula bwikalo bwabo, nekwibalamuna kubyubilo byakanyiwa mubinembelo nabiji bulalelale, bukende, kupopwela bankishi, kupendwapendwa, nebwivi. Yakwasha bingi bantu bavula kuvula bumuntu bwakala nekuvwala bumuntu bupya. (Efisesa. 4:20-24) Ee, umvwe Baibolo twiinemeka kukila maana abantu nangwa mizhilo yabuntunshi nekwiingijisha mubukishinka, iketufunjisha nekwitulengela kwikala bafunjishi bayuka kufunjisha Byambo bya Lesa.
Mupashi wa Yehoba Witufunjisha
11. Mamboka mupashi wazhila wa Yehoba kyoatelelwa’mba “Nkwasho”?
11 Kyabubiji, twayai twisambe pañiñijilo yamupashi wazhila wa Yehoba nangwa’mba ngovu yanji, byoitukwasha kwikala bafunda. Kechi twafwainwa kuvulama kinone, kafwako ngovu yakila mupashi wa Yehoba ne. Yehoba wapa mwananji yeatemwisha ngovu ikatampe yakukwasha bena Kilishitu bonse bakine. Oene mambo Yesu kyoatongwejile mupashi wazhila amba “Nkwasho.” (Yoano 16:7) Wabujile baana banji babwanga kulomba mupashi kwi Yehoba, nekwibakosesha amba Yehoba ukebapaye.—Luka 11:10-13; Yakoba 1:17.
12, 13. (a) Mamboka okyanemena kulomba mupashi wazhila kwitukwasha mumwingilo wetu? (b) Bafaliseo bamwesheshe byepi’mba mumingilo yabo kechi mwajinga mupashi wazhilane?
12 Twafwainwa kulombanga mupashi wazhila kimye kyonse, kikatakata amba etukwashenga mumwingilo wetu. Nanchi ino ngovu yakonsha kwitukwasha byepi? Yakonsha kwalula milanguluko nemichima yetu, kwitukwasha kwaluluka, kukoma kumupashi kabiji nekuvula bumuntu bwakala nekuvwala bupya. (Kolose 3:9, 10) Yakonsha kwitukwasha kwikala nabyubilo byawama bijipo na Kilishitu. Atweba bavula twakonsha kuvuluka byambo biji mu Ngalatiya 5:22, 23 mukachi kamichima yetu. Ano mavesi atanchika bipangwa byamupashi wa Lesa. Kitanshi butemwe. Kino kyubilo kyanema bingi mumwingilo wetu. Mamboka?
13 Butemwe kyokintu kikatampe kitutundaika. Butemwe bwakutemwa Yehoba nebantu bakwetu butundaika bena Kilishitu bakine kusapwila mambo awama. (Mako 12:28-31) Kwakubula buno butemwe, kechi twakonsha kwikala bafunjishi ba Mambo a Lesa ne. Akimonai lupusano lwajinga na Yesu ne Bafaliseo. Mateo 9:36 waamba pe Yesu amba: ‘Pa kwiamona mabumba, wiobile lusa, mambo asubakene ne kupelelwa, pamo no mikooko ya kubula kafunga.’ Bafaliseo bamonanga byepi bantu balanda? Bebambijilenga’mba: ‘Jino jibumba jabula kuyuka Mizhilo jafingwa.’ (Yoano 7:49) Aba Bafaliseo kechi batemenwe bantune, banaine misula. Kine, mupashi wa Lesa kechi waingijilenga mobajine.
14. Yesu byoamwesheshenga butemwe mumwingilo wanji kyafwainwa kwitutundaika kubaka?
14 Yesu waubilanga bantu lusa. Wayukile byobakajiilwe. Wayukile kuba’mba bamanyikilwenga, kusubakana, nekupelelwa, pamo nobe mikooko yabula kafunga. Yoano 2:25 witubula’mba Yesu “wayukile jimo biji mu muntu.” Byoajinga Sendwe Wamingilo ya Yehoba kimye kyakulengwa kwabintu, Yesu wayukishe bingi bantu byobaji. (Byambo bya Mana 8:30, 31) Kuno kuyuka kwanji bantu kwalengejile butemwe bwanji kubaya. Lekai butemwe bwauno mutundu netuwa bwikale bwakwitutundaika mumwingilo wetu wakusapwila! Umvwe twiumvwa kuba’mba butemwe tufwabo, twayai tulombe mupashi wazhila wa Yehoba tubenga nebintu mwayila lulombelo lwetu. Yehoba uketukumbula. Ukatuma ngovu yanji ibula kukankalwa kwiya nakwitukwasha kwingila nobe Kilishitu, wayukile kusapwila mambo awama kukila bonse.
15. Byambo byamu Isaya 61:1-3 byamufwainwe byepi Yesu nekusolola bujimbijimbi bwa Bafaliseo?
15 Busendwe bwa Kilishitu bwafuminepi? Waambile’mba “Mupashi wa Nkambo uji pe amiwa.” (Luka 4:17-21) Ee kine, Yehoba mwine yewatongwele Yesu namupashi wazhila. Yesu kechi wakebewenga lufunjisho lukwabone. Nga bantangi babupopweshi bajingako mumoba anji batongwelwe namupashi wazhilanyi? Ine. Kabiji kechi bafikizhe byambo byanembwa mu Isaya 61:1-3, Yesu byoatangile najiwi jasansuka nekwamba’mba byafikizhiwa peayene. Mwane itangilai ano mavesi mwimwene anwe bene banembeshi ne Bafaliseo babujimbijimbi byoabujile kwibafwainwa. Kechi bajinga namambo awama akusapwila kubalandane. Kabiji bafwainwe byepi kusapwila mambo abupokolweshi kubobakasa neakumona meso kubampofu? Mumulanguluko wakumupashi, abo bene bajinga bampofu kabiji bajinga mumfungwa yamizhilo yabantu! Atweba twapusanako nabano bantu mambo twayuka kufunjisha bantu.
16. Luketekeloka bantu ba Yehoba lobafwainwa kwikala nalo lelo pamambo akwikala bamwingilo?
16 Kyakine, kechi twakiyapo kala nakufunda kumasukulu akatampe a Kilishitendomu ne. Kechi betutongolapo kwikala bafunjishi kufuma kumasukulu abya bupopweshine. Abya twaluba kufunjishanyi? Ine! Kutongolwa kwetu kwikala Bakamonyi banji kufuma kwi Yehoba. (Isaya 43:10-12) Umvwe twalomba mupashi wanji nekuba bintu mwayila lulombelo lwetu, twikala bafunjishi bakila bonse. Ee ibyo twibambulwakoloka, tukankalwa kufunjisha byonka byafunjishenga Yesu, Mufunjishi Mukatampe. Pano bino, tusanchila Yehoba pakwingijisha mupashi wanji kwitufunjisha kwikala bafunjishi bayuka kufunjisha Mambo anji.
Jibumba ja Yehoba Jitufunjisha
17-19. Kupwila kutanu kubiwa mulungu nemulungu kunengezhewa najibumba ja Yehoba kwitukwasha byepi kwikala bamwingilo bafunda byakumwingila?
17 Pano twayai twisambe pajishinda jabusatu Yehoba joetufunjishishamo kwikala bafunjishi bayuka kufunjisha Byambo byanji. Jino kejibumba janji japanopantanda jitufunjisha kwikala bamingilo. Muñanyi jishinda? Akilangulukaipotu mikambizho yotufunda! Mumulungu umo, tutanwa kukupwila kwabwina Kilishitu kutanu. (Bahebelu 10:24, 25) Tupwila pamo mutumabumba tucheche pa Lufunjisho lwa Buku Pakipwilo nakufunda byavujilako mu Baibolo kupichila mubuku wakokozhewa najibumba ja Yehoba. Byotuteleka nekukumbulapo tufunjila kubakwetu nekwikosesha atwe bene nabene. Kabiji utangijila lufunjisho lwabuku witufunjisha nekwitumwesha butemwe. Pakupwila kwamvula-bantu nekwa Lufunjisho lwa Kyamba kya Usopa, napo tuja kajo kavula kakumupashi.
18 Sukulu yetu ya Mwingilo wa Teokalasi itufunjisha mikambizho mwakufunjishila bantu. Byotunengezhezha jimo majashi amusukulu, tufunda byotwakonsha kufunjisha Mambo a Lesa pamitwe yapusana-pusana. (1 Petelo 3:15) Abya bemupapo kala jashi jomwamwene nobe mwapilwa najo nekutana’mba mwafunjilapo kintu kimo kyomwabujile kuyukanyi? Akyo kyubiwa kubavula. Kufunjisha bakwetu kwitukwasha bingi kuyuka bulongo mambo aji payewo mutwe. Nangwatu kyakuba kechi twapewa kwamba jashine, twakonsha kufunda kwikala bafunjishi bayuka bulongo. Kuuji musukulu yense, tufunjilako byubilo byawama, nekulangulukapo byotwakonsha kwibingijisha.
19 Kupwila Kwamwingilo nako kwitufunjisha kwikala bafunjishi ba Mambo a Lesa. Mulungu nemulungu tufunda majashi akaba, misambo, nebimwesho byabyotwakonsha kuba mumwingilo wetu. Ñambiloka yotukamba? Twakonsha kuba byepi inge twatanwa nalukatazho mumwingilo wetu? Ñanyi mashinda akwabo akusapwilamo otwayuka otwakonsha kupitulukamo jibiji? Ikika kiketukwasha kwikala bafunjishi bayuka kufunjisha pakubwelako nepakutangijila mafunjisho a Baibolo? (1 Kolinda 9:19-22) Mepuzho auno mutundu epuzhiwa nekwisambapo pa Kupwila Kwamwingilo. Majashi avula akuno kupwila afuma mu Mwingilo wetu wa Bufumu, kyakwingijisha kikwabo kyotuji nakyo kyakwitufunjisha byakwingila mwingilo wetu mukatampe.
20. Twakonsha kumwenamo byepi mukupwila kwakipwilo nekupwila kukatampe?
20 Kupichila mukunengezhezha jimo byotufunda pakupwila nekutanwa kukipwilo, apa bino nekwingijisha byotwafunda mumwingilo wetu wabufunjishi, tuyuka byavula bingi. Bino kuji nelufunjisho lukwabo. Twikala nena Kupwila kukatampe—kupwila kwakijiiji, kupwila kwiikajila nekupwila kwankambi—kotufunda kwikala bafunjishi ba Mambo a Lesa. Byotwikokozhapo kutelekesha nekwingijisha mafunde otufunda!—Luka 8:18.
21. Kiyukiloka kimwesha’mba lufunjisho lwetu lukwasha, kabiji lukumo luya kwiñanyi?
21 Nanchi lufunjisho Yehoba loapana lukwashanyi? Lekai bishinka bine biambile. Pamwaka pamwaka, bantu bavula bakwashiwa kufunda mafunjisho atanshi amu Baibolo nekwikala mwayila bikeba Lesa. Kibelengelo kyetu kibena kuya nakubailako, bino kafwako nangwa umo mwiatweba utumbijikwa pakinone. Twafwainwa kumona bintu byonka Yesu byoebimwenenga. Waambile’mba “kafwako wakonsha kwiya kwi amiwa ne, poso abo Batata bantuma bamukoka.” Byonka byajinga batumwa kala, lubaji lukatampe kechi twafundane kabiji twibantutu. (Yoano 6:44; Byubilo 4:13) Lufunjisho lwetu lwaimena pe Yehoba mwine ukokela bantu bamichima yakishinka kubukine. Paulo waambile bingi bulongo amba “Amiwa nabyajile, Apolosa watekezhepo; pakuba Lesa ye wiikomeshenga.”—1 Kolinda 3:6.
22. Mamboka otwafwainwa kubula kulefulwa pamambo akwingila mumwingilo wabwina Kilishitu?
22 Ee, Yehoba Lesa yewitutangijila mumwingilo wakufunjisha Mambo anji. Kimo kimye twiumvwa nobe ketwibafunjishi bayukane. Bino vulukai kuba’mba Yehoba yeukokela bantu koaji mwine neku Mwananji. Yehoba yewitufunjisha kusapwila kubantu kupichila mu Mambo anji, mupashi wanji wazhila, nejibumba janji japanopantanda. Onkao mambo, twayai tuteko muchima kulufunjisho lwa Yehoba twingijishenga bintu byawama byoabena kwitufunjishishamo kwikala byotuji bafunjishi ba Mambo anji!
Musakukumbula’mbaka?
• Baibolo itufunjisha byepi mwingilo wakusapwila?
• Mupashi wazhila wingila byepi mukwitufunjisha kwikala bamwingilo?
• Muñanyi mashinda jibumba ja Yehoba japanopantanda mojimufunjishisha kwikala basapwishi bamambo awama?
• Mamboka otwafwainwa kwikela naluketekelo pakuya mumwingilo?
[Kipikichala pa peja 19]
Byoajinga mufunjishi wa Mambo a Lesa, Yesu wamwesheshe byoatemwa bantu