Lekai Mambo A Lesa Atangijilenga Mashinda Enu
“Byambo byenu ye lampi wa maulu ami, kyo kyeya kya mu jishinda jami.”—SALAMO 119:105.
1, 2. Mambo ka bantu bavula o bakankelwa kwikala mutende ne lusekelo?
ABYA mwakonsha kuvulukapo kimye kimo kyo mwaipwizhepo muntu kuba’mba emubule jishinda ja kuyamo nyi? Apo kampe kwashajiletu pacheche kuba’mba mufike ko mwayilenga, pano bino byo mwafikile pa mansanga kechi mwayukile jishinda ja kuyamo ne. Nangwa kimo kimye mwalubijilemo. Monse mo kyakonsha kwikela, nanchi kechi kyawama kulondela bimubula muntu wayuka bulongo yoyo mpunzha nenyi? Muntu wa uno mutundu wakonsha kwimukwasha kufika ko mubena kuya.
2 Pa myaka yavula yapitapo, bantu mukimvwange baeseka eseka kukeba mashinda a kwikelamo bulongo kwa kubula bukwasho bwa Lesa. Na mambo a kubula bukwasho bwa Lesa, bantu bambulwakoloka balubilamo. Bakankalwa kutana jishinda ja kwikelamo mutende ne lusekelo. Mambo ka o bakankelwa kwikala mutende ne lusekelo? Kukilaila pa myaka 2,500 yapitapo, ngauzhi Yelemiya waambile’mba: ‘Muntu mwine na maana anji kechi wakonsha kusalulula jishinda jawama kuyamo ne.’ (Yelemiya 10:23) Muntu yense wisalulwila jishinda kwakubula kutambwila bukwasho bwawama wakonsha kupita mu makatazho. Ee kine, bantu bakebewa bingi bukwasho!
3. Mambo ka Yehoba Lesa bunke bwanji kyo afwainwa kubujila bantu mwakuya, kabiji walaya ka?
3 Yehoba Lesa ye yenkatu wafwainwa kwitubula mwakuya. Mambo ka? Mambo ye wituyuka bulongo byo twalengwa kukila muntu uji yense. Wayukishatu bulongo kyalengejile amba bantu basenduke mu jishinda ne kulubilamo. Kabiji ye wayuka byo bafwainwa kuba pa kuba’mba babwele mu jishinda jawama. Kabiji kunungapo, Mulenga wetu aye Yehoba kimye kyonse wayuka bituwamina. (Isaya 48:17) Onkao mambo, twakonsha kuketekela mu milaye yanji yanembwa pa Salamo 32:8 amba: ‘Amiwa nkakubula ne kukufunjisha jishinda jo ukayamo: Nkakubulanga maana ne jiso jami saka jikutala.’ Kwa kubula nangwa kuzhinaukatu ne, Yehoba ye wayuka bya kwitutangijila bulongo. Pano witutangijila byepi?
4, 5. Byambo bya Lesa byakonsha kwitutangijila byepi?
4 Nyimbi wa masalamo waambile mu lulombelo kwi Yehoba amba: “Byambo byenu ye lampi wa maulu ami, kyo kyeya kya mu jishinda jami.” (Salamo 119:105) Byambo bya Lesa ne milaye yanji biji mu Baibolo, kabiji byakonsha kwitukwasha kushinda mikiika ya mu bwikalo bwetu. Umvwe twatanga Baibolo ne kuleka amba etutangijilenga, ko kuba’mba tubena kumvwina byambo biji pa Isaya 30:21 bya kuba’mba: “Mukomvwa jiwi kunyuma yenu amba; Jishinda jino jo mwafwainwa kuyamo.”
5 Yukai kuba’mba apano, Salamo 119:105 waamba pa bishinka bibiji byo twakonsha kumwenamo mu Byambo bya Lesa. Kishinka kitanshi ke kya kuba’mba, Byambo bya Lesa ye lampi wa maulu etu. Umvwe ke tupite mu makatazho pa juba ne juba, mafunde aji mu Baibolo etukwasha kuba’mba tufuukulenga bulongo bya kuba ne kuchinuzhuka mikiika ya ino ntanda. Kishinka kya bubiji ke kya kuba’mba, milaye ya Lesa kyo kyeya kya mu jishinda jetu, itukwasha kufuukula bintu monka mwayila luketekelo lwetu lwa kwikala myaka ne myaka mu Paladisa yalaya Lesa. Umvwe kyeya kyatokesha mu jishinda mo tubena kuya, kino kitulengela kumona byawama ne byatama bijimo. (Loma 14:21; 1 Timoti 6:9; Lumwekesho 22:12) Twayai pano tusabaule ne kumona byambo bya Lesa biji mu Baibolo kyo byaikela lampi wa maulu etu ne kyeya kya mu jishinda jetu.
“Ye Lampi wa Maulu Ami”
6. Mu ñanyi mashinda byambo bya Lesa mo byakonsha kwikela lampi wa maulu etu?
6 Moba onse monka twafuukwila bya kuba. Bintu bimo byo tufuukula bimwekana kukepa, pano bino kimo kimye twakonsha kupita mu makatazho akonsha kweseka byubilo byetu byawama, bukishinka, ne kubula kutolamo lubaji mu bya ino ntanda. Pa kuba’mba tushinde ano meseko, twafwainwa kwikala na ‘maana alumbuluka a kupima ne kuyuka byawama ne byatama.’ (Bahebelu 5:14) Umvwe twaikala na maana alumbuluka aji mu Byambo bya Lesa ne kumvwisha mwatala mafunde ajimo, twikala na jiwi ja mu muchima jawama jitulengela kufuukula bintu bitokesha Yehoba ku muchima.—Byambo bya Mana 3:21.
7. Londololaipo kya kumwenako kimo mwina Kilishitu mo akonsha kukeba kupwanañena pamo na bantu babula mu lwitabilo bo engila nabo.
7 Monai kya kumwenako. Abya mwi bakulumpe babena kwibikako kya kine kutokesha Yehoba ku muchima nyi? (Byambo bya Mana 27:11) Umvwe byo byo mubena kuba, kyawama bingi. Pano akifwanyikizhaiko pacheche kuba’mba bakwenu mo mwingijila bemupotela jichikichi kuba’mba muye nabo na kukaya kuji bisela. Mumvwañana bingi pa nkito kabiji babena kukeba amba muye na kukaila pamo ku mpunzha ingi. Mwakonsha kuba ke mulanguluke’mba bano bantu kechi batama ne. Bakonsha kwikala ne na byubilo byawama. Mwakonsha kubapo ka? Abya kyakonsha kutama umvwe mwaswa kuya nabo nyi? Nga Byambo bya Lesa byakonsha kwimukwasha byepi kufuukula bulongo mu bino bintu?
8. Ñanyi mafunde a mu Binembelo etukwasha kulangulukapo pa byo twafwainwa kupwanañana na bantu?
8 Akimonai mafunde amo a mu Binembelo. Jifunde jitanshi jakonsha kwiya mu milanguluko ke joja jiji mu 1 Kolinda 15:33 jaamba’mba: ‘Kwendañana na babi, ko kuvulañanya bisela byawama.’ Nanchi kulondela jino jifunde kilumbulula’mba muleketu kikupu kwenda na bantu babula mu lwitabilo nyi? Mukumbu wa mu Binembelo ku buno bwipuzho ke wa kuba’mba ine. Nangwatu ye mutumwa Paulo naye watemenwe “bantu bonse,” kubikakotu ne babujile mu lwitabilo. (1 Kolinda 9:22) Kwikala mwina Kilishitu kikebewa kutemwa bantu, kubikakotu ne boba bo tubula kupwila nabo. (Loma 10:13-15) Pano bino twakonsha kulondela byepi lujimuno lwaamba’mba, “twibobile bantu bonse byawama” umvwe twipatula ku bantu bo twakonsha kukwasha?—Ngalatiya 6:10.
9. Ñanyi lujimuno lwa mu Baibolo lwitukwasha kuyuka pa kupelela mu byo tuba na bantu bo twingila nabo?
9 Nangwa byonkabyo, kwiyuka na muntu ye wingila nanji kwapusana na kwisampa nanji bulunda. Kino nakyo kikebewa kulondela jifunde ja mu Binembelo. Mutumwa Paulo wajimwine bena Kilishitu amba: “Kechi mwikase ku kikonkoji kimo ne babula kwitabila ne.” (2 Kolinda 6:14) Nga byambo bya kuba’mba “kechi mwikase ku kikonkoji kimo ne,” byatala mu ka? Ma Baibolo amo atuntulula bino byambo amba “kupwanañenanga pamo ne,” “kwingijilanga pamo nobe mwiumo ne,” nangwa amba “kwisampanga bulunda bwabula kufwainwa ne.” Kimye ka bulunda na muntu ye mwingila nanji po bwikala bwabula kufwainwa ne kwikasa ku kikonkoji kimo? Mu kino namo Mambo a Lesa, Baibolo, akonsha kwimutangijila.
10. (a) Yesu wasalanga byepi balunda nanji? (b) Ñanyi mepuzho akonsha kukwasha muntu kusala bulongo balunda nanji?
10 Monai kya kumwenako kya kwa Yesu watemenwe bantu kufumatu kimye kyo balengelwe. (Byambo bya Mana 8:31) Byo ajinga panopantanda, watwajijile kutemwa bingi baana banji ba bwanga. (Yoano 13:1) ‘Watemenwe’ ne muntu wafunjile mafunjisho a bubela mu bupopweshi bungi. (Mako 10:17-22) Bino Yesu wayukile bantu bo afwainwe kwisampa nabo bulunda bwa pa muchima. Kechi wisampanga bulunda na bantu babulanga kukeba kuba kyaswa muchima wa Shanji ne. Kimye kimo Yesu waambile’mba: “Anweba mwi balunda nami, umvwe mwauba byo nemukambizha.” (Yoano 15:14) Ne anweba mwafwainwa kwiyuka na bo mwingila nabo. Bino iipuzhai’mba: ‘Nanchi uno muntu waswa kulondela byakambizha Yesu nyi? Abya ukeba kufunda pe Yehoba, Yesu ye aambilepo amba ye twafwainwa kupopwela nyi? Nanchi uji na byubilo byawama byonka byo njipo nabyo nyi?’ (Mateo 4:10) Kimye kyo mubena kwisamba na bo mwingila nabo ne kwingijisha mafunde a mu Baibolo, akemukwasha kuyuka mikumbu ya ano mepuzho.
11. Ambaipo bintu bimo mwafwainwa kwitutangijila byambo bya Lesa.
11 Kuji ne bintu bikwabo byambo bya Lesa mo byafwainwa kwikala nobe lampi wa maulu etu. Kya kumwenako, mwina Kilishitu ubula kwingila nkito bakonsha kumutwezha nkito ibena kukebewa bukiji bukiji. Pano bino ino nkito ikakebewanga kwingijiwa kimye kyabaya, kabiji umvwe watwela ino nkito ikamulengelanga kushala ku kupwila kwa bwina Kilishitu ne kubulatu kwingilako mingilo ikwabo yalamata ku mpopwelo ya kine. (Salamo 37:25) Mwina Kilishitu mukwabo naye wakonsha kwesekwa kupichila mu kutamba bintu bya kisangajimbwe bilala mafunde a mu Baibolo. (Efisesa 4:17-19) Mukwabo naye bakonsha kumutuntwisha pa kumona bintu bibena kuba bakwabo ba mu lwitabilo. (Kolose 3:13) Mu bino byonse, twafwainwa kuleka Mambo a Lesa kwikala ke lampi wa maulu etu. Ee kine, umvwe saka tulondela mafunde a mu Baibolo, twakonsha kuchinchika lukatazho luji lonse mu bwikalo. Byambo bya Lesa “byo byawamina mu kwibafunjisha bantu, ne mu kwibalengulula, ne mu kwibolola, ne mu kwibafunda mu bololoke.”—2 Timoti 3:16.
“Kyo Kyeya kya mu Jishinda Jami”
12. Byambo bya Lesa byaikala byepi kyeya kya mu jishinda jetu?
12 Kabiji Salamo 119:105 waamba’mba byambo bya Lesa byakonsha kutokesha mu jishinda jetu kuba’mba tumonenga mo tubena kuya. Kechi twashala mu bwilube pa mambo a kimye kya kulutwe ne, mambo Baibolo walondolola bintu byatama bibena kubiwa panopantanda kabiji ne kikafumamo. Ee, twayuka kuba’mba tubena kwikala mu ‘moba apelako’ a buno bwikalo bwatama. (2 Timoti 3:1-5) Kuyuka bikobiwa kulutwe kwafwainwa kwitulengela kumona bwikalo bwetu byo buji luno. Mutumwa Petelo wanembele’mba: “Bino bintu, byo bikasunguluka byonse, mwafwainwa kwikala bantu ba byepi mu bwikalo bwazhila ne bwa kunemeka Lesa, byo mwikutengela ne kwikusakisha kwiya kwa juba ja Lesa.”—2 Petelo 3:11, 12.
13. Bimye byo tubena kwikalamo byafwainwa kwitulengela kulangulukanga kabiji ne kuba ka mu bwikalo bwetu?
13 Ndangulukilo yetu ne bwikalo bwetu byafwainwa kumwesha amba kine twasumininwa’mba “Panopantanda pakapita ne lwiso lwapo.” (1 Yoano 2:17) Umvwe saka twingijisha mafunde a mu Baibolo, etukwasha kufuukula bulongo pa mambo a bintu bya kulutwe. Kya kumwenako, Yesu waambile’mba: “Sambilai kukebesha bufumu bwanji, ne bololoke bwanji; ne bino bintu byonse bikemubikilwapo.” (Mateo 6:33) Bakyanyike bavula babena kusanchilwa bingi pa kulondela byambo bya kwa Yesu kupichila mu kwingilako mwingilo wa kimye kyonse. Bakwabo nabo kubikakotu ne bisemi bafuukulapo bene kuvilukila ku mapunzha kuji kukajilwa kukatampe kwa bataya mbila ya Bufumu.
14. Kisemi kimo kya bwina Kilishitu kyaingijileko byepi pabaya mu mwingilo wa busapwishi?
14 Akimonai kya kumwenako kya kisemi kimo kyafumine ku kyalo kya United States ne kuya ku kyalo kya Dominican Republic na kwingijila ku kipwilo kyajinga mu muzhi umo mwajinga bantu 50,000. Kino kipwilo kiji na basapwishi nobe 130. Pano bino pa April 12, 2006, batainwe ku Kivuluko kya lufu lwa kwa Yesu bajinga nobe 1,300. Majimi a kusapwilamo mu yoya mpunzha ‘atoka kala afwainwa kunowa,’ kya kuba’mba mu bañondotu batanu, kisemi kyonse kyatendekele kufunjisha mafunjisho a Baibolo 30. (Yoano 4:35) Nsemi wa mulume washimuna’mba: “Kuji balongo ne banyenga 30 bavilukila ku kino kipwilo na kukwasha. Ko kuba’mba 20 bafuma ku kyalo kya United States, abe bashala bafuma ku Bahamas, Canada, Italy, New Zealand, ne ku Spain. Baiya bingi na kizaku kya kwingila mwingilo wa busapwishi kabiji batundaika bingi balongo ba mu kino kipwilo.”
15. Ñanyi mfweto yo mwamwenamo na mambo a kusambila kukebesha Bufumu mu bwikalo bwenu?
15 Bavula kechi kyakonsheka kuba’mba bavilukile ku mapunzha kuji kukajilwa kukatampe ne. Bino aba bakonsha kupimpulako bwikalo bwabo ne kuvilukila ku oo mapunzha bakamwenamo mfweto mu kwingilako uno mwingilo wa busapwishi. Konse konse ko mubena kwingijila mwakonsha kumwenamo mu kwingijila Yehoba kwesakana na papelela bulume bwenu. Umvwe mwasambila kukebesha Bufumu mu bwikalo bwenu, Yehoba walaya “kwimwitulwila bibusa, kya kuba’mba kechi mukamona mwa kwibilonga ne.”—Malakai 3:10.
Mwenaimo mu Lutangijilo lwa Yehoba
16. Tumwenamo ka umvwe twaleka byambo bya Lesa kwitutangijila?
16 Byonka byo twafunda kala, byambo bya Yehoba bitutangijila mu mashinda abiji. Bikala nobe lampi wa maulu etu, ne kwitukwasha kwenda mu jishinda jawama ne kwitutangijila umvwe ke tufuukule bya kuba. Kabiji bitokesha jishinda jetu, ne kwitulengela kumona bulongo bintu biji kulutwe. Kino kitulengela kulondela byambo byaambile Petelo bya kuba’mba: ‘Nyingishai mu kifuka kya michima yenu ya maana, mutekanye, mwiluteshe bulongo luketekelo lwenu ku abwa bupe bo mukaletelwa pa lumwekesho lwa Yesu Kilishitu.’—1 Petelo 1:13.
17. Kufunda Baibolo kwakonsha kwimukwasha byepi kulondela lutangijilo lwa Lesa?
17 Kwa kubula nangwa kuzhinaukatu ne, Yehoba ye ubena kwitutangijila. Pano bwipuzho ke bwa kuba’mba, Mubena kulondela luno lutangijilo nyi? Pa kuba’mba muyuke lutangijilo lwa Yehoba, ibikilai kikonkwanyi kya kutanganga Baibolo pa juba pa juba. Languluka langulukainga pa byo mutanga, monai kyaswa muchima wa Yehoba mu byo mwatanga, ne kulanguluka mashinda akwabo mo mwafwainwa kwingijisha byobyo byambo mu bwikalo bwenu. (1 Timoti 4:15) Apa bino mwingijishe “muchima” wenu pa kufuukula bya kuba.—Loma 12:1.
18. Umvwe twaleka byambo bya Lesa saka bitutangijila, mfweto ka yo tumwenamo?
18 Umvwe twalondela ano mafunde aji mu Byambo bya Lesa, etukwasha ne kwitutangijila pa kufuukula bulongo bya kuba mu bwikalo. Twayukishatu kuba’mba byambo bya Yehoba byanembwa ‘bipana maana ku bantutu.’ (Salamo 19:7) Umvwe twaswisha Baibolo kwitutangijila, twikala na jiwi ja mu muchima jatokatu to ne kwikala balusekelo na mambo a kutokesha Yehoba ku muchima. (1 Timoti 1:18, 19) Umvwe twaleka byambo bya Lesa saka bitutangijila pa juba pa juba, Yehoba uketupa mfweto ya bumi bwa myaka ne myaka.—Yoano 17:3.
Mubena Kukivuluka Nyi?
• Mambo ka o kyanemena kuleka Yehoba Lesa amba etutangijilenga?
• Mu ñanyi jishinda byambo bya Lesa mo byaikela ke lampi wa maulu etu?
• Byambo bya Lesa byakonsha kutokesha byepi jishinda jetu?
• Lufunjisho lwa Baibolo lwitukwasha byepi kulondela lutangijilo lwa Lesa?
[Kipikichala pa peja 19]
Kimye ka bulunda na muntu wabula mu lwitabilo po bwikala bwabula kufwainwa?
[Kipikichala pa peja 20]
Balunda nanji Yesu bajinga boba baubanga kyaswa muchima wa Yehoba
[Bipikichala pa peja 21]
Nanchi bwikalo bwetu bumwesha’mba tubena kusambila kukebesha Bufumu nyi?