‘Bito Bya Mulunda Nobe’

MUTUMWA Paulo wamwene buwame bwa kufundako bena Kilishitu ba mu kitota-myaka kitanshi mu kipwilo kya mu Ngalatiya. Pa kuba’mba afumyepo bukaji, waipwizhe’mba: “Nanchi pano naaluka ke mulwanyi wenu pa kwimubula bya bukinenyi?”—Ngalatiya 4:16.

Paulo kechi waalukile ke mulwanyi wabo pa ‘kwibabulako bya bukine’ ne. Walondejilenga jifunde ja mu Baibolo jamba kuba’mba: “Bito byo akwasa mulunda nobe byo bya kishinka.” (Byambo bya Mana 27:6) Wayukile’mba kufunda muntu walenga mambo kumulengela kumvwa bibi ku muchima. Pano bino, wayukishetu kuba’mba kubula kufunda muntu walenga mambo kilumbulula’mba mwakankalwa kumumwesha butemwe bwa Lesa. (Bahebelu 12:5-7) Onkao mambo, Paulo byo ajinga mulunda wakishinka watemenwe kipwilo, kechi walekele kwibafunda ne.

Lelo jino, Bakamonyi ba kwa Yehoba babena kwingila mwingilo wabo wa ‘kusambisha ba mu mikoka yonse ya bantu kwaluka ke baana ba bwanga . . . ne kwibafunjisha kulama byonse [byakambizhe Yesu].’ Byo bengila uno mwingilo, bano bena Kilishitu bakishinka kechi bafya bukine bwa Baibolo buzhachisha mafunjisho a bubela ne byubilo byabula bya bwina Kilishitu ne. (Mateo 15:9; 23:9; 28:19, 20; 1 Kolinda 6:9, 10) Kulengulula mafunjisho a bubela ne byubilo byabula bya bwina Kilishitu kechi kwalula bena Kilishitu bakishinka ke balwanyi bo bafwainwa kukana ku bantu ne. Bamwesha butemwe bwa bulunda bwa kine.

Nyimbi wa masalamo watangijilwe na mupashi wa Lesa wanemba’mba: “Muleke waoloka ampume, kikekala ke kya lusa; Kabiji andengulule, kikoba nobe manyi pa mutwe; o akabula kukana mutwe wami.”—Masalamo 141:5.