Nanchi Mubena ‘Kupulusha Bimye’ Nyi?

MUTUMWA Paulo wajimwine bena Kilishitu batanshi mu Efisesa amba: ‘Tajijishai bulongo byo mwenda, kechi pamo na babula maana ne, kana pamo na ba maana; kasa mupulusha bimye, mambo ano moba atama.’ (Efisesa 5:15, 16) Mambo ka luno lujimuno kyo lwajinga lwafwainwa? Pa kukumbula jino jipuzho, kikebewa patanshi kuyuka byubilo byatalañenenga na bena Kilishitu mu yewa muzhi wa kala.

Muzhi wa Efisesa watumbalele bingi na mambo a bunonshi bwanji bukatampe, bulalelale, bumbanzhi ne kupopwela bademona. Kikwabo, bena Kilishitu bafwainwe kushinda mafunjisho a butemwamaana pa mambo a kimye. Bangiliki babujile kwikala bena Kilishitu mu Efisesa kechi baitabijile kuba’mba kimye kyendela mumo ne. Butemwamaana bwa Kingiliki bwibafunjishe amba lufu kechi yo mpelo ya muntu ne. Umvwe muntu waonauna kimye mu bwikalo bwanji, akyo kimye kyo aonauna ukekitana jibiji kulutwe na lwendo mu bwikalo bukwabo. Ino milanguluko yafwainwe kongola bena Kilishitu ba mu Efisesa mu kubula kuta muchima ku kimye Yehoba kyo obilamo bintu, kuvwangakotu ne kimye kya kuletelamo lonaiko. Onkao mambo, lujimuno lwa kwa Paulo lwa ‘kupulusha bimye’ lwaingijile mwingilo wabaya bingi.

Paulo kechi waambiletu kimye kyonse po kyapela ne. Kyambo kya Kingiliki kyo aingijishe kilumbulula kimye kyatongolwa, kyafwainwa kubilamo bintu. Paulo wajimwinenga bena Kilishitu ba mu kitota-myaka kitanshi kwingijisha bulongo kimye kyabo, bibusa bya Lesa ne jishuko ja lupulukilo saka jikyangye kwibamuka.—Loma 13:11-13; 1 Tesalonika 5:6-11.

Ne atweba tubena kwikala mu kimye kya byonkabyo. Kukila konauna kino kimye kya bibusa kikabula kubwelapo na kukeba bintu bya ino ntanda bya ka kimye kacheche, bena Kilishitu bafwainwa kwikala na maana a kwingijisha kimye kyo baji nakyo “mu bwikalo bwazhila ne bwa kunemeka Lesa.” Kino kyakonsha kukosesha bulunda na Mulenga wabo, Yehoba Lesa.—2 Petelo 3:11; Masalamo 73:28; Filipai 1:10.