Nanchi ‘Mwatabilamo mu Butemwe ne Kushimikwa Ponka [pa Kitendekesho]’ Nyi?

NANCHI mwakimonapo kichi kikatampe byo bekisunkenya ku mwela mukatampe nyi? Pano bino, nangwa bekisunkenye bino, kikalatu monka kyakosela. Mambo ka? Mambo kyatwezha mizhazhi yakyo mu mushiji. Ne atweba twakonsha kwikala byonka biji kino kichi. Umvwe ketupite mu meseko akatampe mu bwikalo bwetu, twakonsha kukosa inge ‘twatabilamo mu butemwe ne kushimikwa ponka pa kitendekesho.’ (Efi. 3:14-17) Ñanyi kitendekesho kyonkakyo?

Mambo a Lesa aamba’mba “Kilishitu Yesu mwine jo jibwe jine ja jikonka” ja kipwilo kya bena Kilishitu. (Efi. 2:20; 1 Ko. 3:11) Atweba bena Kilishitu twatundaikwa ‘kwendelanga monka mwi aye, kasa twatabila mwi aye ne kushimikwa monka, kasa twakosela mu lwitabilo lwetu.’ Umvwe twauba bino, tukakonsha kukosa mu meseko a lwitabilo lwetu, kubikakotu ne oa a kwitujimbaika na “byambo bya mulambisha” afuma ku bantu ba “bujimbijimbi bwatu.”—Kolo. 2:4-8.

“Bula Bwabo ne Bwipi Bwabo ne Kimino Kyabo ne Kuzhika Kwabo”

Pano twakonsha byepi ‘kutabilamo’ ne ‘kukoselamo mu lwitabilo’? Mu ñambilo ya kifwanyikizho, jishinda jimo janema jo twafwainwa kutwezhezhamo mizhazhi mu mushiji ke kwikala na mukoyo wa kufunda Mambo a Lesa anembwa na mupashi. Yehoba ukeba atweba “kukwatakanya pamo ne bazhijikwa bonse mwayila bula bwabo ne bwipi bwabo ne kimino kyabo ne kuzhika kwabo.” (Efi. 3:18) Onkao mambo, kafwako mwina Kilishitu wafwainwatu kutondwa kya byonkabya kya kuba wayukatu bya “ntendekelo” ya Mambo a Lesa ne. (Hebe. 5:12; 6:1) Kupusanako na bino, atweba bonse pa muntu pa muntu twafwainwa kukebesha kumvwisha bukine bwa mu Baibolo. —Mana. 2:1-5.

Pano bino kino kechi kilumbulula amba twafwainwa kwikala na maana avula pa kuba’mba ‘tutabilemo ne kukoselamo’ mu lwitabilo ne. Mambo Satana naye wayuka bingi biji mu Baibolo. Kuji kintu kikwabo kikebewa. Twafwainwa ‘kwibuyuka butemwe bwa Kilishitu bwakila maana.’ (Efi. 3:19) Nangwa byonkabyo, inge twafunda na mambo a kutemwa Yehoba ne bukine, kitulengela kwikala na maana a kine avula a mu Mambo a Lesa ne kukosesha lwitabilo lwetu. —Kolo. 2:2.

Pimai Maana Enu

Nga mambo ka a kubujila kupima maana enu lonka luno, ne kumona inge mwayuka bukine bwanema bwa mu Baibolo? Kwipima mu jino jishinda kwakonsha kwimulengela kwikala na mukoyo wa kufunda Mambo a Lesa pa bunke bwenu. Kya kumwenako, tangai byepelo bitanshi biji mu nkalata yanembele mutumwa Paulo ku bena Efisesa. (Monai kakitenguluzha kaamba’mba, “Ku bena Efisesa.”) Inge mwapwisha kutanga bino byepelo, iipuzhai anweba bene amba, ‘Abya naumvwa mwatala bipelu biji mu kibaba kya mu Baibolo kyo natanga byo banemba kya kusendekela biji mu kakitenguluzha nyi?’ Twayai tumone bino byambo kimo kimo.

Kufuukwila Jimo “Panopantanda Kasa Pakyangye Kulengwa”

Paulo wanembejile bakwabo ba mu lwitabilo amba: ‘[Lesa] witutongwejile jimo amba nkebalule ke baana bami ami mwine mwi Yesu Kilishitu.’ Yehoba wayukile kuba’mba bantu bamo bakekala lubaji lwa kisemi kyanji kya mwiulu kyalumbuluka. Bano baana ba Lesa bakekala bamfumu ne bañanga bakalamanga pamo ne Kilishitu. (Loma 8:19-23; Lum. 5:9, 10) Kimye kitanshi Satana kyo alengulwile bumfumu bwa Yehoba, walumbulwilenga kuba’mba bantu bo alengele Lesa kechi bajinga bakishinka ne. Pano Yehoba waingijisha bano bonka bantu kwingila mwingilo wa kufumyapo bubi bonse mwaya ntanda kubikakotu ne mwine mwina buno bubi, Satana Diabola! Pano bino Yehoba kechi wasalulwijile jimo bano bantu umo umo kuba’mba bakekale baana banji ne. Pa kuba Lesa wayukiletu kuba’mba kukekala jibumba ja bantu bakalamanga pamo ne Kilishitu mwiulu. —Lum. 14:3, 4.

‘Ntanda’ ka Paulo yo aambilengapo byo anembejile bena Kilishitu bakwabo kuba’mba bebasajile jibumba jonse “panopantanda kasa pakyangye kulengwa”? Kechi waambilenga pa kimye kyajingako Lesa saka akyangye kulenga ntanda ne bantu ne. Kino kyakonsheshe kuzhilulula mizhilo ya bololoke bwanji. Ba Adama ne Evwa bakonsheshe kwibapamo byepi mambo pa byo baubile umvwe kya kuba Lesa wayukijile jimo kuba’mba bakalenga mambo saka bakyangye kulengwa? Pano kimye ka Lesa kyo afuukwijile jimo bya kupwisha lukatazho lwaubiwe kimye ba Adama ne Evwa ne Satana kyo basatukijile bumfumu bwa Lesa? Yehoba wafuukwile bino panyuma ya kuba bansemi betu batanshi basatuka, bino bantu bambulwa kulumbuluka saka bakyangye kwikalako, abo luno bakulwa.

“Monka Mwayila Bunonshi bwa Bupe Bwanji”

Mambo ka Paulo o aambijile kuba’mba lunengezho lwanembwa mu byepelo bitanshi bya mu Efisesa lwaikeleko na mambo a “monka mwayila bunonshi bwa bupe [bwa Lesa]”? Waubile bino pa kuba’mba amweshe kuba’mba Yehoba kechi wafwainwe kukuula bantu bambulwa kulumbuluka ne.

Kwambatu kine, kafwako nangwa umo wa mwi atweba wafikizha bikebewa pa kuba’mba akuulwe ne. Pano na mambo a butemwe bwanji bukatampe bo atemwa bantu, Yehoba wanengezhezhe bulongo kwitupokolola. Kwesakana na bumbulwa kulumbuluka ne bundengamambo bwetu, Paulo waambile’mba kukuulwa kwetu ke bupetu.

Kyafyamika Kyazhila kya Nkebelo ya Lesa

Patanshitu, Lesa kechi wasolwele byo afwainwe kupwisha lukatazho lwaletele Satana ne. Kino kyajinga ‘kyafyamika kyazhila.’ (Efi. 3:4, 5) Palutwe kacheche, byo kwaikele kipwilo kya bena Kilishitu, Yehoba wasolwele bishinka byaambile pa byo afwainwe kufikizha nkebelo yanji itanshi ku bantu ne ntanda. Paulo walumbulwile amba “ponka pa kukafikila myaka yo atongola” Lesa waikajikile “bukalama,” ko kuba’mba jishinda ja kukwatankenyamo bilengwa byanji byonse.

Kukwatankana kutanshi kwatendekele pa Pentekosita mu 33 C.E. kimye Yehoba kyo atendekele kukonkanya boba bakalama pamo ne Kilishitu mwiulu. (Byu. 1:13-15; 2:1-4) Kwa bubiji kukekala kukonkanya pamo boba bakekala mu paladisa panopantanda mu Bufumu bwa kwa Kilishitu bwa Bumesiasa. (Lum. 7:14-17; 21:1-5) Kyambo kya kuba amba “bukalama” kechi kibena kwamba pa Bufumu bwa Bumesiasa ne, mambo abwa Bufumu bwaikajikilwe mu 1914. Pa kuba kino kyambo kya bukalama kilumbulula jishinda Lesa jo obilamo bintu pa kuba’mba engile nkebelo yanji ya kukwatankanya bilengwa byanji byonse.

‘Mwikale Bakoma mu Maana’

Kwa kubula nangwa kuzhinaukatu ne, kwikala na lufunjisho lwa pa bunke bwenu lwawama kukemukwasha kumvwisha “bula bwabo ne bwipi bwabo ne kimino kyabo ne kuzhika kwabo” bukine. Pano bino bwikalo bwa kupayankana bwa muntu bulengela Satana konauna bino byubilo byanji. Kechi mwafwainwa kumuleka kuba’mba emube bino ne. Ingijishainga ‘maana a kumuyuka’ Lesa o emupa pa kuba’mba ‘mwikale bakoma mu maana.’ (1 Yoa. 5:20; 1 Ko. 14:20) Monai kuba’mba mwaumvwisha ene mambo o mwaitabila mu byobyo bintu byo mwafunda kabiji ne kuba’mba kimye kyonse mwakumbula pa “mambo a luketekelo lo muji nalo.”—1 Pe. 3:15.

Fwanyikizhai kuba’mba ne anweba mwajingako mu Efisesa kimye kitanshi kyatangilwe nkalata ya kwa Paulo. Nanchi byambo byanji kechi byakonsheshe kwimulengela kukoma ‘mu maana a kuyukisha Mwana Lesa’ nenyi? (Efi. 4:13, 14) Ee, byakonsheshe kwimulengela kuba bino! Onkao mambo, lekai byambo bya kwa Paulo byanembwa na mupashi bimutundaikenga ne lelo jino kuba byonkabye. Kutemwa Yehoba kya kine ne kuyuka maana alumbuluka a mu Mambo anji kukemukwasha ‘kutabilamo ne kushimikwa ponka [pa kitendekesho]’ kya Kilishitu. Ne mu jino jishinda mukekala bakosa pa kupita mu meseko akonsha kuleta Satana po muji mpelo ya ino ntanda ibi saka ikyangye kufika. —Sala. 1:1-3; Yele. 17:7, 8.

[Kitenguluzha/Kipikichala pa peja 27]

“Ku Bena Efisesa”

‘Atotwe Lesa, Shanja Nkambo yetu Yesu Kilishitu, ye witubijile bibusa byonse bya bumupashi bya mwi Kilishitu mwiulu: monka mo etusalulwijile mwi aye panopantanda kasa pakyangye kulengwa, amba twikale bazhila, babula bulema ku meso anji mu butemwe: mambo witutongwejile jimo amba nkebalule ke baana bami ami mwine mwi Yesu Kilishitu, monka mwatokelwa muchima wanji, mu kuleta lutotelo lwa kutota lukumo lwa bupe bwanji, bo etupejishetu mwi aye Mutemwe: mwi aye mo muji bukuzhi bwetu bwa mu mashi anji, lo lulekelo lwa mizhilulwila yetu, monka mwayila bunonshi bwa bupe bwanji, bo etuvuzhizhe atweba na maana onse ne na kutekanya konse, byo etusolwejile akya kyafyamika kya ku muchima wanji, monka mwayila akya kyamutokela ku muchima kyo afukwijile jimo mwi Kilishitu amba, nkekajike bukalama bwa pa byonse ponka pa kukafikila myaka yo atongola, ne kwibikonkenya bintu byonse mwi Kilishitu, ne biji mwiulu, ne biji panopantanda.’—Efi. 1:3-10.