Kupwila kwa Kijiiji Kubena Kwiya

Bapanopantanda bakeba atweba kuketekela’mba buno bwikalo bujipo kechi bukapita ne. Bino Mambo a Lesa etubula kintu kyapusanako. (1 Yoa. 2:15-17) Etukwasha kuyuka’mba kwibikila ‘nsabo panopantanda’ kutayatu kimye. Pa kuba’mba bantu ba Lesa bakoseshiwe, mutanchi wa kupwila kwa kijiiji kwa mwaka wa mwingilo wa 2007 ukalumbulula bingi bulongo kishina kya kuba’mba “Ibikilai Nsabo Mwiulu”—Mat. 6:20.

Ndangulukilo ya kutemwisha bintu bya ku mubiji yavwangiwa mu kintu kyatongolwa mu Efisesa 2:2 amba “mfumu wa ba lūsa lwa mu mwela, ye mupashi wingila ne pano mu bantu ba milengulwila.” Byonka mwela byo ajitu konse konse wa kukonsha kupema bantu, ne “mupashi wa panopantanda” wakumbanatu konse konse mu buno bwikalo. (1 Ko. 2:12) Byo kiji kuba’mba bulume bwa uno mupashi bwabaya, o ene mambo o kyaambiwa’mba uji na “lūsa.” Majashi a kupwila kwa kijiiji kubena kwiya aketukwasha kuchinuzhuka ndangulukilo ya bapanopantanda ya kutemwisha bintu bya ku mubiji ne kutesha muchima ku bintu byanemesha. (Mat. 6:33) Kabiji majashi a kuno kupwila aketukwasha kukinka manungo mwi Yehoba byo tubena kwingila mwingilo wetu kechi na mambo a makatazho nangwa meseko o tupitamo ne.

Monai kuba’mba mukatanweko moba onse abiji kabiji ne kuba’mba ‘mukakilemo kuteshako muchima.’ (Hebe. 2:1) Mukanembengapo bishinka bipi byo mukakonsha kwingijisha mu bwikalo bwenu ne mu mwingilo wenu. Kupichila mu kutanwako kufuma ku ntendekelo kufika ne ku mpelo ya uno mutanchi wawama wa ku mupashi, mukatundaikwa ne kukoseshiwa kutwajijila na ‘kwibikila nsabo mwiulu’!