“Byambo Byenu Bikale . . . Byalungwa na Mukele”
1. Nga ‘kulunga byambo byetu na mukele’ kwalumbulula ka?
1 “Byambo byenu bikale na bupe moba onse, byalungwa na mukele, muyuke mwafwainwa kwibalondolwela bonse, pa muntu pa muntu.” (Kolo. 4:6) Kulunga byambo byetu na mukele kwalumbulula kusala byambo byawama ne kwibyambila mu jishinda jakonsha kulengela bantu bo tubena kwisamba nabo kwibitemwa. Kino kyanema bingi kimye kyo tuji mu mwingilo.
2. Nga Yesu wakonsheshe byepi kusapwila mwanamukazhi mwina Samaliya?
2 Byaubile Yesu: Byo akokolokelenga kwipi na mushima, Yesu watendekele kwisamba na mwanamukazhi mwina Samaliya waishile na kutapula mema. Kimye kyo besambilenga, uno mwanamukazhi waambile bingi pa mambo a mfika yabanjile pakachi ka Bayudea ne bena Samaliya. Waambile ne pa byo aketekejile kuba’mba bena Samaliya bafumine kwi Yakoba, nangwa kya kuba Bayudea balangulukilenga’mba bena Samaliya bajinga bantu bangitu. Mu kifulo kya kwipachika nanji, Yesu waambilengako bintu byawama bya kulengela mwisambo kuwama. Kyafuminemo, Yesu wasapwijile uno mwanamukazhi busapwishi bwa mukwashishe aye ne bantu ba mu yewa muzhi.—Yoano 4:7-15, 39.
3. Twakonsha kulondela byepi byaubile Yesu umvwe tuji mu mwingilo?
3 Pa kusapwila twafwainwa kulabijilanga kuba’mba kintu kine kitulengela kusapwila ke ‘kwamba mambo a lusekelo a bintu byawama.’ (Loma 10:15) Tukeba kwisamba na mwina nzubo bintu byawama kabiji bitundaika biji mu Baibolo, kechi kumulengela kulanguluka’mba twaiya na kumuzhachisha pa bintu byo aitabilamo ne. Umvwe waamba kintu kyabula kuyilamo, kechi twafwainwa kufikenatu ponkapo kwamba’mba mwaya mungi ne. Nanchi pajipo kintu kimo mu byo aamba kyo twakonsha kwitabizha nangwa kyo twakonsha kumutakaikilamo kya kine nyi? Apo kampe twakonsha kuletapo kinembelo kupichila mu kwamba’mba “Nanchi mwakilangulukapo kala pa kino nyi?”
4. Twafwainwa kuba byepi umvwe mwina nzubo ke ambe kutama?
4 Pano ibyepi umvwe kya kuba mwina nzubo ke ambe kutama, nangwa kyamweka’mba ubena kukebatu kupachika? Twafwainwa kutwajijila kwikala bakoka muchima ne bukimote mu mwekelo yetu ne mu byambo byetu. (2 Timo. 2:24, 25) Umvwe mwina nzubo wabula kumwesha lusekelo mu mambo a Bufumu, twafwainwa kufumapotu na mushingi.—Mat. 7:6; 10:11-14.
5. Nga nyenga umo wamwenejilemo byepi byawama pa kukumbula na jiwi jakoka?
5 Bintu Byawama Bifumamo: Nyenga umo byo aesekele kusapwila wa kinkalankulo, awo mwanamukazhi wazazukile na byambo bya mwenga. Na muchima wakoka, nyenga yetu waambile’mba: “Mwane bandekeleko mambo. Bashale mutende mwane.” Byo papichile milungu ibiji, awa mwanamukazhi wayile ku nzubo ya uno nyenga na kulomba lulekelo lwa mambo pa byo aubile kabiji ne kwamba’mba usa kumvwa ku byakebelenga kwamba uno nyenga. Kwamba na jiwi jakoka, javula mufuma bintu byawama!—Mana. 15:1; 25:15.
6. Mambo ka o kyanemena kwi atweba kwamba byambo byalungwa na mukele mu mwingilo?
6 Esekeshainga kwamba byambo byalungwa na mukele pa kusapwila mambo awama. Nangwatu kya kuba mwina nzubo kechi ubena kukeba kumvwa ku byo tubena kwamba ne, kampepo ukakeba kumvwa kimye kikwabo Bakamonyi ba kwa Yehoba kyo bakamufwakesha.