“Lusanguko Lutanshi”—lubena Kubiwa Mu Kino Kimye Kyetu!
“Bafu ba mwi Kilishitu bakasanguka patanshi.”—1 TESALONIKA 4:16.
1, 2. (a) Ñanyi luketekelo lujiko pa mambo a bafu? (b) Ki ka kimulengela kwitabila mu lusanguko? (Monai tubyambo twa munshi)
“BOMI bayuka’mba tukafwa.” Kino byo byo kiji kufumatu kimye Adama kyo alengele mambo. Monse mwapita bwikalo bwa bantu, yense wasemwa wayuka kuba’mba juba jimo ukafwa, kabiji wafwainwa wishikishapo ne kala amba: ‘Ki ka kilondelapo? Bafu baji byepi?’ Baibolo wakumbula’mba: “Bino bafu kafwako kyo bayuka ne.”—Musapwishi 9:5.
2 Abya kyakonsheka kuketekela kuba’mba bafu bakasangulwa nyi? Ee. Kino kikobiwa pa kuba’mba nkebelo ya Lesa itanshi ku bantu ikafikizhiwe. Myaka yavula yapitapo, bakalume ba Lesa bakishinka baitabila mu mulaye wa Yehoba wa Lukunwa awo ukonauna Satana ne kufumyapo bubi bo aleta. (Ntendekelo 3:15) Bavula bafwa. Pa kuba’mba bakamone kufikizhiwa kwa uno mulaye ne milaye ikwabo yalaya Yehoba, bafwainwa kusangulwa kufuma ku bafu. (Bahebelu 11:13) Nanchi kino kyakonsheka nyi? Ee, kyakonsheka. Mutumwa Paulo waambile’mba: “Kukekala lusanguko lwa baoloka ne babula koloka.” (Byubilo 24:15) Paulo wasangwile nsongwalume wa jizhina ja Yutikusa ye ‘bashikwilepo sa afwa,’ byo aponene panshi kufuma pa kipenze kya nzubo ya busatu peulu. Ye wapeleleko kusangulwa pa bantu bonse basangwilwe batanu na bana banembwa mu Baibolo.—Byubilo 20:7-12.a
3. Byambo bya kwa Yesu byanembwa pa Yoano 5:28, 29 bimutekenesha byepi, kabiji mambo ka?
3 Aba batanu na bana bo basangwile balengela kwitabila mu byambo bya kwa Paulo. Betulengela kuketekela byambo bya kwa Yesu bya kuba’mba: “Juba jibenakwiya, jo bakomvwa bonse baji mu bilende jiwi janji, kepo bakafumamo.” (Yoano 5:28, 29) Bino byambo byo bitutekeneshapo! Kabiji byo bitekeneshapo bantu bavula baji na batemwe babo baponena mu tulo twa lufu!
4, 5. Ñanyi lusanguko lwapusana pusana lwatongolwa mu Baibolo, kabiji lwepi lo twaya twisambepo mu uno mutwe?
4 Bavula bakasangulwa bakekala panopantanda ikalulwa ke ntanda ya mutende mu Bufumu bwa Lesa. (Masalamo 37:10, 11, 29; Isaya 11:6-9; 35:5, 6; 65:21-23) Bino, bano saka bakyangye kusangulwa ne, bakwabo bafwainwa kukisangulwa patanshi. Patanshitu Yesu wafwainwe kusangulwa ne kwitupainako buneme bwa kitapisho kyanji kwi Lesa. Yesu wafwile ne kusangulwa mu 33 C.E.
5 “Bena Isalela ba Lesa” bashingwa bafwainwa kulondelapo ne kwinunga kwi Nkambo Yesu Kilishitu mu lukumo lwa mwiulu, mo bakekala na “Nkambo myaka ne myaka.” (Ngalatiya 6:16; 1 Tesalonika 4:17) Luno lusanguko lutelwa’mba “lusanguko lwa mu bafu” nangwa’mba “lusanguko lutanshi.” (Filipai 3:10, 11; Lumwekesho 20:6) Inge luno lusanguko lwapwa, po kukekala kusangula bantu bavula baji na luketekelo lwa kwikala myaka ne myaka mu Paladisa panopantanda. Byonkabyo, kikale twaketekela kuya mwiulu nangwa kwikala panopantanda, twafwainwa kwiluyuka luno “lusanguko lutanshi.” Luno ke lusanguko lwa mutundu ka? Kabiji lubiwa kimye ka?
Na “Mubiji wa musango Ka?”
6, 7. (a) Ki ka kyafwainwa kubiwa ku bena Kilishitu bashingwa saka bakyangye kuya mwiulu? (b) Basangulwa na mubiji wa musango ka?
6 Mu nkalata yanji itanshi yo anembejile bena Kolinda, Paulo washikishe pa mambo a lusanguko lutanshi amba: “Bafu bakasangulwa byepi? Bakeya na mubiji wa musango ka?” Kepo akumbwile’mba: “Akya kyo wabyala obe mwine kechi kimene ne poso kyafwa: . . . kabiji Lesa umupa mubiji ye asaka mwine, . . . lukumo lwa wa mwiulu lo lumo, ne lukumo lwa wa panshi lo lukwabo.”—1 Kolinda 15:35-40.
7 Byambo bya kwa Paulo bimwesha kuba’mba bena Kilishitu bashingwa na mupashi wazhila bafwainwa kufwa pa kutambula mfweto yabo ya kuya mwiulu. Inge bafwa mubiji wabo wa pano panshi ubwela ku mushiji. (Ntendekelo 3:19) Mu kimye kyatongola Lesa, basangulwa na mubiji wa musango wa bilengwa bya mwiulu. (1 Yoano 3:2) Kabiji Lesa wibapa bumbulwa kufwa. Kino kechi bekala nakyo pa kusemwa kwabo ne. Paulo waambile’mba: “Uno wa lufu wafwainwa kuvwala ubula kufwa.” Bumbulwa kufwa ke bupe bufuma kwi Lesa ‘buvwala’ boba basangulwa mu lusanguko lutanshi.—1 Kolinda 15:50, 53; Ntendekelo 2:7; 2 Kolinda 5:1, 2, 8.
8. Twayuka byepi kuba’mba Lesa kechi usala ba 144,000 kufuma mu bupopweshi bwapusana pusana ne?
8 Ba 144,000 bo bonkatu batambula lusanguko lutanshi. Yehoba watatwile kwibasala pa Pentekosta mu 33 C.E., panyumatu ya kuba wamusangula Yesu. Bonse baji na “jizhina [ja Yesu] ne jizhina ja Shanji, anembwa pa bilungi byabo.” (Lumwekesho 14:1, 3) Onkao mambo, kechi basalululwa mu bupopweshi bwapusana pusana ne. Bonse ke baana ba bwanga ba kwa Kilishitu, kabiji batelwa na mushingi pa jizhina ja Shanji—Yehoba. Inge basangulwa batambula mwingilo mwiulu. Luketekelo lwa kwingijila Lesa mu jino jishinda lwibaletela bingi lusekelo.
Nanchi Lubena Kubiwa Nyi?
9. Nga Lumwekesho 12:7 ne 17:14 witukwasha byepi kuyuka kimye kyatendekele lusanguko lutanshi?
9 Nanchi lusanguko lutanshi lwatendekele ñanyi kimye? Kishinka po kiji kibena kumwesha kuba’mba luno lusanguko lubena kubiwa. Kya kumwenako, esakanyai bitango bibiji bya mu Lumwekesho. Patanshi talai mu Lumwekesho kitango 12. Muno tutangamo kuba’mba Yesu Kilishitu Mfumu mupya pamo na bamalaika bazhila babena kulwa nkondo na Satana ne bandemona banji. (Lumwekesho 12:7-9) Byonka byo kyamweshiwa javula na ino magazini, ino nkondo yatatwile mu 1914.b Inge mwauba’mba mumone pano kechi batongolapo baana ba bwanga ba kwa Kilishitu bashingwa kuba’mba babena kulwako nkondo pamo na Yesu mwiulu ne. Pano talai mu Lumwekesho kitango 17. Muno tutangamo kuba’mba panyuma ya kumonauna “Babilona Mukatampe,” Mwana mukooko ukashinda mikoka ya bantu. Kabiji wanungapo ne kuba’mba: “Ne abo bo aji nabo pamo bo bantu baitwa, basalululwa, bakishinka.” (Lumwekesho 17:5, 14) Aba “baitwa, basalululwa, bakishinka” umvwe bakashinda ino ntanda ya kwa Satana pamo ne Yesu, bakekala sa basangulwa kala. Ko kuba’mba, bashingwa bafwa Amagedonyi saka ikyangye kwiya, basangulwa pakachi ka 1914 ne Amagedonyi.
10, 11. (a) Bakulumpe 24 bo bañanyi, kabiji ñanyi byambo umo wa mu bano byo abujile Yoano? (b) Twakonsha kwambapo’mba ka pa kino?
10 Nanchi twakonsha kishinkamika juba kuba’mba aje jo juba lusanguko lutanshi po lwatatwile nyi? Kishinka kikwabo kyawama kitanyiwa pa Lumwekesho 7:9-15, mutumwa Yoano po alondolola kimwesho kyanji kyo amwene “jibumba jikatampe, jo babula kukonsha kubala nangwa ku umo ne.” Kuyukanyikwa kwa jibumba jikatampe kwasololwa na umo wa mu bakulumpe 24, kabiji bano bakulumpe bemenako ba 144,000 bakulama pamo ne Kilishitu mu lukumo mwiulu.c (Luka 22:28-30; Lumwekesho 4:4) Yoano aye mwine wajinga na luketekelo lwa kuya mwiulu; pano bino kimye mukulumpe kyo amubujile wakijinga panopantanda, mu kimwesho Yoano wafwainwa wimenako bashingwa panopantanda abo bakyangye kutambula mfweto yabo ya kuya mwiulu.
11 Nanchi twakonsha kulangulukapo’mba ka pa yewa mukulumpe wa mu bakulumpe 24 wayukanyikishe jibumba jikatampe kwi Yoano? Kyamweka kuba’mba bakulumpe basangulwa ba mu jibumba ja bakulumpe 24 bafwainwa babulañanako bukine bwa Lesa lelo jino. Mambo ka o kyanemena? Mambo kuyukanyikwa kwa kine kwa jibumba jikatampe kwasolwelwe ku bakalume bashingwa ba Lesa panopantanda mu 1935. Umvwe umo mu jibumba ja bakulumpe 24 waingijishiwe kubulañana buno bukine bwanema, wafwainwa wasangwilwe ne kuya mwiulu 1935 saka akyangye kufika ne. Kino kibena kumwesha kuba’mba lusanguko lutanshi lwafwainwa lwatatwile pakachi ka 1914 ne 1935. Nanchi kyakonsheka kutongolatu mwine mwaka nyi?
12. Londololai ene mambo o kyakonsheka kwambiwa’mba 1918 wafwainwa ye mwaka watendekele kubiwa lusanguko lutanshi.
12 Kyakonsha kukwashako kumona bimo byamwekele byanembwa mu Baibolo. Ku mpelo ya 29 C.E, Yesu Kilishitu washingilwe kwikala Mfumu wa mu Bufumu bwa Lesa kulutwe na lwendo. Byo papichile myaka isatu ne kichika kufuma kyokya kimye, mu kimye kya mwela mu 33 C.E., wasangwilwe kwikala kilengwa kya mupashi kya bulume. Nanchi kuba kyaikalatu bulongo kulanguluka’mba Yesu byo aikazhiwe pa bufumu ku mpelo ya 1914, pafwainwa papichile myaka isatu ne kichika kuba’mba lusanguko lwa baana banji ba bwanga bashingwa lutendeke mu 1918 kimye kya mwela nenyi? Kino kishinka kyawama bingi. Nangwa kya kuba kino kechi kyaambiwapo mu kushinkamika mu Baibolo ne, kyaswañana na binembelo bikwabo bimwesha kuba’mba lusanguko lutanshi lwatendekele kala panyumatu ya kuba Kilishitu waikala pa bufumu.
13. Mu ñanyi jishinda 1 Tesalonika 4:15-17 mo aambila kuba’mba lusanguko lutanshi lwatatwile panyumatu ya kwikalapo kwa Kilishitu?
13 Kya kumwenako, Paulo wanembele’mba: “Atweba tukatanwa bomi [mu kimye kya kwikalapo, NW] kwa Nkambo [kechi ku mpelo ya kwikalapo kwanji ne], kechi tukatangilapo ne aba baponene mu tulo bashala panyuma ne. Mambo Nkambo mwine ukekila mwiulu na mbila, na jiwi ja malaika mwine mukatampe, ne na ntolompita ya Lesa: ne bafu ba mwi Kilishitu bakasanguka patanshi; ponkapo ne atweba tukatanwa bomi, tukashikulwa nabo pamo mu makumbi, mu kusambakana nanji Nkambo mwiulu: byonkabyo tukekala ne Nkambo myaka ne myaka.” (1 Tesalonika 4:15-17) Onkao mambo, bena Kilishitu bashingwa bafwile kimye kya kwikalapo kwa Kilishitu saka kikyangye kufika bo batanshi basangwilwe ne kuya mwiulu, kechi boba bakijinga bomi mu kimye kya kwikalapo kwa kwa Kilishitu ne. Kino kibena kulumbulula kuba’mba lusanguko lutanshi lwafwainwa lwatatwile ku ntendekelo ya kwikalapo kwa kwa Kilishitu, kabiji kwatwajijila ne mu “kimye kya kwikalapo kwanji.” (1 Kolinda 15:23, NW) Mu kifulo kya kusangulwa pa kimyetu kimo bonse, lusanguko lutanshi lwatwajijila pa kimye kyabaya.
“Bebapele Bonse Bivwalo Bitoka, au Kyanji, au Kyanji”
14. (a) Bimwesho byanembwa mu Lumwekesho kitango 6 byafikizhiwe ñanyi kimye? (b) Ki ka kyamweshiwa pa Lumwekesho 6:9?
14 Monai ne bishinka bikwabo biji mu Lumwekesho kitango 6. Pano batongolapo Mfumu Yesu waikala pa mbili ubena kuya na kushinda. (Lumwekesho 6:2) Mikoka ya bantu bavula babena kufwa mu makondo. (Lumwekesho 6:4) Bipowe bya nzala nabyo byauba ne woo. (Lumwekesho 6:5, 6) Myalo nayo yabika bantu mu bufinda bwa kine kine. (Lumwekesho 6:8) Buno bonse bungauzhi bubena kumwesha patoka bwikalo buji mu ntanda kutatula mu 1914. Bino kuji ne kintu kikwabo kyamweka. Twayai twambe pa kyakusokelapo bitapisho. Munshi yakyo muji “myeo ya boba bo baipayile na mambo a mambo a Lesa, ne na mambo a bukamonyi bo balamine.” (Lumwekesho 6:9) Byo kiji kuba’mba “bumi bwa mubiji buji mu mashi,” ano aji munshi ya kyakusokelapo ke mashi a bakalume bakishinka ba kwa Yesu bo baipaile na mambo a kuchinchika ne kusapwila na mukoyo.—Bena Levi 17:11.
15, 16. Londololai ene mambo byambo biji mu Lumwekesho 6:10, 11 kyo byatongwela lusanguko lutanshi.
15 Byonka byajinga mashi a mololoke Abela, mashi a bano bena Kilishitu bo baipaya kyanshiji nao abena kujijila kuchibilwa mambo mo aolokela. (Ntendekelo 4:10) “Babijikile na jiwi jikatampe amba, Anweba Nkambo, wazhila ne wa kine, myaka inga yo mukabula kwituchibila mambo ne kwitushinkenya mashi etu ne abo bekala panopantanda?” Ki ka kikwabo kyamweka? “Bebapele bonse bivwalo bitoka, au kyanji, au kyanji; kabiji kibambijilwe’mba, Mukikokoloke kakimye, poso bakwenu ba mu mwingilo ne balongo benu bakepayiwe pamo ne anweba, bafikile.”—Lumwekesho 6:10, 11.
16 Nanchi bino bivwalo bitoka byapainwe ku mashi ajinga munshi ya kyakusokelapo nyi? Ine! Mu bukifwanyikizho, bino bivwalo byapainwe ku bantu bonka bena mashi aichikile pa kyakusokelapo. Bapaine bumi bwabo bukitapisho mu jizhina ja Yesu kabiji luno basangulwa ke bilengwa bya mupashi. Twayuka byepi kino? Tutanga mu Lumwekesho kuba’mba: “Aye ushinda ukavwala bivwalo bitoka; ne amiwa kechi nkazhimañanya jizhina janji mu buku wa bumi ne.” Kabiji vulukai kuba’mba bakulumpe 24 ‘bavwajile bivwalo bitoka; ne pa mitwe yabo pajinga minchinya ya ngolode.’ (Lumwekesho 3:5; 4:4) Onkao mambo, panyuma ya kuba nkondo, nzala, ne myalo byatendeka kumweka panopantanda, jibumba ja ba 144,000 bafwile kala baimenejilwengako na mashi aji munshi ya kyakusokelapo, basangwilwe ne kuya mwiulu kabiji bavwikwa bivwalo bya kifwanyikizho bitoka.
17. Mu ñanyi jishinda mo ‘bakokolokela’ aba batambula bivwalo bitoka?
17 Bano basangulwa kala bafwainwa ‘kukokoloka.’ Bafwainwa kupembelela mu butekanye juba ja Lesa ja kushinkanya. ‘Bakwabo ba mu mwingilo,’ bena Kilishitu bashingwa bakiji panopantanda, bafwainwa kulama bulumbuluke bwabo mu kimye kya lweseko lwabo. Kimye Lesa kyo akebachibila mambo, kyo kimye kikapwa ‘kukokoloka.’ (Lumwekesho 7:3) Pa kyokya kimye, aba basangulwa bakengijila pamo na Nkambo Yesu Kilishitu mu konauna babi, kuvwangakotu ne boba bepaya bena Kilishitu babulapotu ne mambo ne.—2 Tesalonika 1:7-10.
Byo Kilumbulula kwi Atweba
18, 19. (a) Ñanyi bishinka byakonsha kwimulengela kwitaba amba lusanguko lutanshi lubena kubiwa mu kino kimye kyetu? (b) Kumvwisha lusanguko lutanshi kwimulengela kwiumvwa byepi?
18 Mambo a Lesa kechi atongola mwaka mwine mwatendekejile lusanguko lutanshi ne, bino amwesha kuba’mba lubiwa pa kupitapo kimye mu kimye kya kwikalapo kwa Kilishitu. Batanshi kusangulwa ke bena Kilishitu bashingwa bafwile kimye kya kwikalapo kwa Kilishitu saka kikyangye kufika ne. Mu kino kimye kya kwikalapo kwa kwa Kilishitu, bena Kilishitu bashingwa bapwisha bwikalo bwabo bwa panopantanda mu bukishinka balulwa pamo nobe mu “kukopa kwa jiso,” kwikala bilengwa bya mupashi biji na bulume. (1 Kolinda 15:52) Nanchi bonse bashingwa bakatambula mfweto yabo ya kuya mwiulu Amagedonyi saka ikyangye kufika nyi? Kechi twayuka ne. Bino twayukatu kuba’mba mu kimye kya Lesa mwine, bonse ba 144,000 bakemana ku meso a Lesa pa Mutumba wa Ziona mwiulu.
19 Kabiji twayuka ne kuba’mba bavula ba mu jibumba ja 144,000 benunga kala kwi Kilishitu. Bachechetu bo bakiji panopantanda. Kino byo kibena kumweshapo kuba’mba juba ja kushinkanya kwa Lesa jafwenya kala pepi! Katatakatu ntanda yonse ya kwa Satana ikonaunwe. Satana aye bakamutaya mu kalengwa. Kepo lusanguko lwa bonse lukatendeke, ne bantu bakishinka kupichila mu kitapisho kya kwa Yesu bakasangulwa ne kwikala balumbuluka nobe byonka byajinga Adama ku ntendekelo. Bungauzhi bwa Yehoba bwanembwa mu Ntendekelo 3:15 bubena kufikizhiwa bingi bulongo. Byo kituwaminapo kwikala mu bino bimye!
[Tubyambo twa mushi]
a Bakwabo batanu na basatu, monai 1 Bamfumu 17:21-23; 2 Bamfumu 4:32-37; 13:21; Mako 5:35, 41-43; Luka 7:11-17; 24:34; Yoano 11:43-45; Byubilo 9:36-42.
b Pa kuba’mba muyuke Binembelo byo byalondolola kwikalapo kwa kwa Kilishitu amba kwatatwile mu 1914, monai buku wa Nanchi Baibolo Kine Ufunjisha’mba Ka? pa mapeja 215-18, wanembwa na Bakamonyi ba kwa Yehoba.
c Umvwe mukeba kuyuka byambo bikwabo bitukwasha kuyuka’mba bakulumpe 24 bemenako bena Kilishitu bashingwa mu bifulo byabo bya mwiulu, monai buku wa kuba’mba Ukusokolola—Akalume ka Kuko Kakalamba Nakapalama! pa peja 77, wanembwa na Bakamonyi ba kwa Yehoba.
Mwakonsha Kulumbulula Nyi?
Bino binembelo byalondelapo bitukwasha byepi kuyuka kimye kyatendekele “lusanguko lutanshi”?
• 1 Kolinda 15:23; 1 Tesalonika 4:15-17
Pictures on page 31]
Kusangulwa kwa bañanyi kubena kubiwa lusanguko lwa bonse saka lukyangye kutendeka ne?
[Kipikichala pa peja 32]
Mu ñanyi jishinda bamo balaajile mu tulo twa lufu mo bapewa bivwalo bitoka?