Mutumwa Paulo wanembejile bena Kilishitu batanshi Bahebelu amba: “Kukokoloka kwa Sabado kwibashajila bantu ba Lesa. Mambo aye watwela kala mwakukokolokela mwanji ye wakokoloka ku mingilo yanji mwine, monka mo akokolokele Lesa ku yanji. Onkao mambo, tuteshekotu muchima tutwele monkamwa mwakukokolokela.”—Bahebelu 4:9-11.

Kyamwekeshatu kuba’mba kimye Paulo kyoaambile byambo byakuba’mba Lesa wakokolokele mumingilo Yanji, watongwelenga byobya byanembwa mu Ntendekelo 2:2 motutanga’mba: “Pa juba ja butanu na bubiji Lesa wapwishishe mwingilo wanji ye aubilenga, kabiji pa juba ja butanu na bubiji aye [wakokolokele mu, NW] mingilo yanji yonse yo aubilenga.” Mamboka Yehoba ‘kyoakokolokejile pa juba ja butanu na bubiji’? Kechi wakebelenga’mba akokolokepo pakuba’mba ekale jibiji nangovu mu “mingilo yanji yonse yo aubilenga” ne. Vesi yalondelapo yalumbulula kyalengejile, amba: ‘Lesa wapesheshe juba ja butanu na bubiji ne kwijizhijika, mambo mu joja juba mo moakokolokejile Lesa ku mingilo yonse yo aubilenga pa kulenga bintu.’—Ntendekelo 2:3; Isaya 40:26, 28.

Jino “juba ja butanu na bubiji” japuseneko na akwabo atanu najimo, mambo jojuba Lesa joapesheshe nekwijizhijika kwingijilamo mwingilo wiikajila. Ñanyi mwingilo wiikajila? Kunyuma, Lesa wabulañenejile jimo kyoalengejile bantu nentanda. Lesa wapesheshe mwanamulume nemwanamukazhi mutanshi amba: “Semainga ne kusemununa, muvule ne kukumbana ponse pa ntanda ne kwiikokesha; mwikale na bunkambo bwa pa masabi a mu mema, ne bwa pa bañonyi bapita mwiulu, ne bwa pa byumi byonsetu byenda pano pa ntanda.” (Ntendekelo 1:28) Nangwa kyakuba Lesa walengele ntanda nebantu kasa yalumbuluka, kyafwainwe kupitapo kimye kyabaya pakuba’mba ntanda yonse beikokeshe nekwiyalula ke paladisa mwayula bantu balumbuluka, byonka byajinga mulanguluko wa Lesa muntendekelo. Onkao mambo, mu “juba ja butanu na bubiji” Lesa wakokolokele mumingilo yanji yakulenga bya panopantanda, kuba’mba bikome kwesakana nabyoakebelenga. Pakupwa kwa joja “juba” byonse byoakebele Lesa byafwainwe kwikalako. Pano kuno kukokoloka kwalepa byepi?

Saka aji na luno luketekelo mumilanguluko, Paulo walumbulwile byotwafwainwa kutwela mwakukokolokela mwa Lesa. Wanembele’mba: “[Muntu] watwela kala mwakukokolokela mwanji ye wakokoloka ku mingilo yanji mwine, monka mo akokolokele Lesa ku yanji.” Kino kitubula kuba’mba nangwa kyakuba bantu bajinga na ntendekelo yalumbuluka, kechi bonse batwelele mwakukokolokela mwa Lesa ne. Kyajinga bino mambo akuba’mba ba Adama ne Evwa kechi baikelemo kimye kyabaya mwakukokolokela mwa Lesa mu “juba ja butanu na bubiji” ne. Mukifulo kyakutwajijila nakwikala monka, bamusatukijile Lesa nekukeba kwiikela abo bene. Bakokejile bintu byabujimuku bwakwa Satana nekukana mizhilo ya Lesa yabutemwe. (Ntendekelo 2:15-17) Kyafuminemo bataile jishuko jabo jakwikala myaka nemyaka mupaladisa panopantanda. Kufumatu kyokya kimye, bantu bonse banonkwa buzha kubundengamambo nelufu.—Loma 5:12, 14.

Lusatuko lwa bantu kechi lwapwishishe nkebelo ya Lesa ne. Juba ja kukokoloka kwanji jikitwajijila. Onkao mambo, Yehoba mubutemwe bwanji wapaine nkuulo ya Mwananji, Yesu Kilishitu, yakuba’mba aba bonse beitabila baketekele kukasululwa nekukokoloshiwa kumutembo wa bundengamambo nelufu. (Loma 6:23) Paulo kyo kyoasashijile bena Kilishitu bakwabo ‘kukokoloka ku mingilo yabo abo bene.’ Bafwainwa kutambwila lunengezho lwa Lesa lwa kupulukilamo, nekubula kwiubila bintu abo bene byakwimwena bwikalo bwakulutwe byonka byaubile ba Adama ne Evwa. Kabiji bafwainwa kuchinuzhuka mingilo yabo abo bene yakwibingisha.

Muntu ubula kuta muchima kubintu bya ino ntanda namambo akuba kyaswa muchima wa Lesa uba bingi bulongo. Yesu waichile luno lwito amba: ‘Iyai konji, anweba bonse basulwila na mingilo ne kunemenwa, ne amiwa nkemukokolosha. Tambulai kikonkoji kyami ne kufunda kwi amiwa; mambo amiwa ne kimote ne kukoka muchima: ne anweba mukamona kukokoloka kwa michima yenu. Mambo kikonkoji kyami kyawama, ne kisendwa kyami kyapela.’—Mateo 11:28-30.

Mulanguluko wakwa Paulo wakutwela mwakukokolokela mwa Lesa nemuntu byoakonsha kutwelamo, watundaikilenga bingi bena Kilishitu Bahebelu mu Yelusalema bachinchikile kulumanamo lwavula nekwibalengulula namambo alwitabilo lwabo. (Byubilo 8:1; 12:1-5) Byonkabyo, byambo byakwa Paulo byakonsha nekukosesha bena Kilishitu lelo jino. Byo twayuka kuba’mba kufikizhiwa kwamulaye wa Lesa wakuleta ntanda ya paladisa ikekala mubukalama bwa Bufumu bwanji bwaoloka, yafwenya kala kepepi, ne atweba twafwainwa kukokoloka kumingilo yetu atweba bene nekwibikako kyakine pakuba’mba tukatwele momwa mwakukokolokela.—Mateo 6:10, 33; 2 Petelo 3:13.