Mutumwa Paulo wanembejile bena Kilishitu batanshi Bahebelu amba: “Kukokoloka kwa Sabado kwibashajila bantu ba Lesa. Mambo aye watwela kala mwakukokolokela mwanji ye wakokoloka ku mingilo yanji mwine, monka mo akokolokele Lesa ku yanji. Onkao mambo, tuteshekotu muchima tutwele monkamwa mwakukokolokela.”—Bahebelu 4:9-11.

Umvwe twabwela jibiji ku byambo byakwa Paulo mu Bahebelu, monai waambile kuba’mba “Kukokoloka kwa Sabado kwibashajila bantu ba Lesa,” kabiji wasashijile nebakwabo bena Kilishitu kwibikako pakuba’mba bakatwele “monkamwa mwakukokolokela.” Kino kibena kumwesha kuba’mba Paulo byoanembelenga bino byambo bya “juba ja butanu na bubiji” jakokolokejilemo Lesa, jatatwile kala myaka 4,000 jakijinga ponka. Kechi jikapwa ne, poso nkebelo ya Lesa yoalengejile bantu nentanda ikafikizhiwe kumpelo ya Myaka Kiumbi Kimo kyabukalama bwakwa Yesu Kilishitu, mwine ‘mwina Sabado.’—Mateo 12:8; Lumwekesho 20:1-6; 21:1-4.

Mulanguluko wakwa Paulo wakutwela mwakukokolokela mwa Lesa nemuntu byoakonsha kutwelamo, watundaikilenga bingi bena Kilishitu Bahebelu mu Yelusalema bachinchikile kulumanamo lwavula nekwibalengulula namambo alwitabilo lwabo. (Byubilo 8:1; 12:1-5) Byonkabyo, byambo byakwa Paulo byakonsha nekukosesha bena Kilishitu lelo jino. Byo twayuka kuba’mba kufikizhiwa kwamulaye wa Lesa wakuleta ntanda ya paladisa ikekala mubukalama bwa Bufumu bwanji bwaoloka, yafwenya kala kepepi, ne atweba twafwainwa kukokoloka kumingilo yetu atweba bene nekwibikako kyakine pakuba’mba tukatwele momwa mwakukokolokela.—Mateo 6:10, 33; 2 Petelo 3:13.