• “Watokeshe Lesa ku Muchima”
    Kyamba (Kya bena kengi)—2017 | No. 1

    • ENOKA “BO AAWILEPO”

      Enoka wafwainwa waumvwanga mukose mambo wajingatu bunke mu ntanda mwajinga bantu babulanga kwakamwa Lesa. Nanchi Lesa wanji aye Yehoba, wamunemekele nyi? Wamunemekele bingi. Kimye kimo Yehoba wisambile na uno kalume wanji wa kishinka. Wamubujile byambo bya kuya na kubuula bantu bajingako mu o a moba. Wamupele mwingilo wa bungauzhi. Enoka ye ngauzhi mutanshi ye baambapo mu Baibolo. Twayuka bino, mambo Yuda, nkasanji Yesu bamutangijile ku mupashi kunemba bungauzhi bwaawile Enoka saka papita myaka yavula bingi.a

      Ñanyi bungauzhi bwaawile Enoka? Waawile’mba: “Talai! Yehoba waishile na mabumba a bamalaika banji bazhila, na kwibachibila mambo ne kuzhachisha bonse babula kumwakamwa na mambo a byubilo byabo byatama byo baubilenga mu jishinda jibula kumwesha kwakamwa Lesa, ne na bintu byonse bya bumvu byo bamwambijilenga bandengamambo babula kwakamwa Lesa.” (Yuda 14, 15) Mu bino byepelo, Enoka waambilenga uba nobe Lesa wauba kala byaamba buno bungauzhi. Bungauzhi bwavula bwalondela yonka ino nembelo. Ene mambo o banembele bino ke a kuba’mba: Bangauzhi bashiinwe kuba’mba byo baambilenga kine bikamweka. O ene mambo, o baambilanga nobe byamweka kala.—Isaya 46:10.

      Enoka wasapwila bantu babulanga kwakamwa Lesa

      Enoka wasapwilanga kwa kubula moyo byambo byamubujile Lesa mu ntanda mwajinga bantu bakanamine michima

      Nanchi kyapelele Enoka kusapwila bino byambo ku bantu bonse nyi? Bino byambo bya bungauzhi byanemene bingi. Buno bungauzhi bwaamba’mba “babula kwakamwa Lesa” pa kwamba pa bantu bajinga na byubilo byatama. Buno bungauzhi bwajimwinengako bantu kuba’mba bwikalo bo baikelenga kufuma kimye Adama kyo bamupangile mu bujimi bwa Edena bwatamine bingi. Onkao mambo, Yehoba wafukwilepo kutuma “mabumba a bamalaika banji bazhila” kwiya na kwibonauna. Enoka wachinchikile byo asapwijilenga bino byambo byamubujile Lesa nangwa kya kuba wajingatu bunke bwanji. Kampe Lameki kyo kyamulengejile kwikala na lwitabilo mambo wamonanga bankambo yanji byo bachinchikile.

      Lwitabilo lwa kwa Enoka lwakonsha kwitulengela kwishikisha kuba’mba, nanchi mmona ino ntanda byonka Lesa byo eimona nyi? Byambo bya luzhachisho byasapwijilenga Enoka byanema bingi ne mu ano moba byonkatu byo byajinga pa kyo kya kimye. Bungauzhi bwaawile Enoka bwafikile Yehoba byo aletele Muyulo waonawine bantu babulanga kwakamwa Lesa mu moba ajingako Nowa. Lesa byo aonawine bantu pa kyo kya kimye kimwesha lonaiko lukatampe luji kulutwe. (Mateo 24:38, 39; 2 Petelo 2:4-6) Byonkatu byo kyajinga mu oa moba, ne mu ano moba Lesa ukengijisha bamalaika konauna bantu babula kwakamwa Lesa. Atweba bonse twafwainwa kumvwina lujimuno lwaambile Enoka ne kubulako bakwetu. Ba mu kisemi ne balunda netu bakonsha kwitukana, kabiji twakonsha ne kumvwa mukose. Pano bino Yehoba kechi uketukana ne, byonkatu byo abujile kukana Enoka. Nangwatu mu ano moba kechi ulekelela bapopweshi banji bakishinka ne.

  • “Watokeshe Lesa ku Muchima”
    Kyamba (Kya bena kengi)—2017 | No. 1

    • a Bashayuka ba Baibolo bamo bamba’mba, Yuda wafuminye bino byambo mu buku wabula wa mu Baibolo utelwa’mba Buku wa kwa Enoka. Uno buku wa mashimikila kechi wayukanyikwa bulongo ko afumine ne, bino utelwa’mba wa kwa Enoka. Byaamba uno buku pa bungauzhi bwaawile Enoka bya kine. Kyamweka bino byambo bebifuminye mu mabuku akala kene abulako mu ano moba, nangwa mu mashimikila ambangatu bantu. Kampe mu ano mabuku Yuda momo afuminye bino byambo, nangwa kampe wibyumvwine kwi Yesu. Mambo Yesu kimye kyo ajinga mwiulu wamonanga Enoka.