666 Kechi Nambala Yashupishatu Kuyuka mo Yatala Ne

‘Kafwako muntu nangwa umo ayuke kupota nangwa kupotolola ne, poso bonka baji na kayukilo, jo jizhina ja awa lukinyama, nangwa nambala ya jizhina janji. Ponka pano po paji maana. Aye uji na maana, abale nambala ya lukinyama; mambo yo nambala ya muntu: ne nambala yanji ke bitota bitanu na kimo ne makumi atanu na jimo, ne bitanu na kimo.’—Lumwekesho 13:17, 18.

MAFUNJISHO a mu Baibolo amo aletela bantu kizaku ne muchima wa kukeba kwiayuka nabiji bungauzhi bwa kayukilo nangwa’mba jizhina ja “lukinyama”—nambala 666, kechi avujishatu ne. Kayukilo ka lukinyama bekalumbulwila mwavula bingi pa televizhonyi ne pa Intaneti, kubikapotu ne mu mafilimu, mabuku ne mu magazini.

Bamo baitabila kuba’mba 666 ke kayukilo ka bantu ba mu Baibolo bebepekezhanga kwikala ba Kilishitu. Bakwabo nabo bamba kuba’mba ke kintu kimo kimwekanyika ku bantu, nabiji lunembo nangwa nambala yanembwa pa mubiji kuyukanyikisha muntu amba wingijila lukinyama. Bakwabo baitabila kuba’mba 666 ke kayukilo ka bupapa bwa mu Katolika. Bamba amba inge bapingizhapo manambala a kina Loma pa bisopelo biji pa munchinya wa kwa papa bya kuba’mba Vicarius Filii Dei, (mu kwibilumbulula ko kuba’mba, Ye apa Bukulumpe Mwana Lesa) ne kweseka kwalulako manambala pacheche, batana’mba 666 ke nambala ya bupapa. Kabiji kyambiwa kuba’mba nambala intutu imo yakonsha kubalwa ne mu jizhina ja ki Latin ja Mfumu mwina Loma aye Diocletian ne mu byambo bya Kihebelu bya jizhina ja Nero Caesar.a

Bino ino ndumbulwilo ya kusombatu, yapusana na byamba Baibolo pa kayukilo ka lukinyama, byonka byo twaya tumone mu mutwe walondelapo. Baibolo isolola kuba’mba aba baji na kano kayukilo bakamona bukaji bwa Lesa kimye akaleta buno bwikalo ku mpelo. (Lumwekesho 14:9-11; 19:20) Onkao mambo, kumvwisha mwatala 666 kwakila pa kuyukatu mo yatala. Lusekelo ke lwa kuba’mba Yehoba Lesa wa kumwenako wakila mu butemwe kabiji Nsulo ya kyeya kya ku mupashi, kechi waleka bantu banji mu mfishi kwa kubula kwibasolwela ano mambo anema ne.—2 Timoti 3:16; 1 Yoano 1:5; 4:8.

[Tubyambo twa mushi]