Kitango 11

Bamalaika Ba Lesa Betukwasha

BANTU bamo bamba’mba betabilatu mu bintu byo bamona. Buno ke bumbulwamaana. Kuji bintu byavula bingi byo tukyangye kumonapo ne. Wakonsha kutongolapo kimo nyi?—

Ibyepi mwela ye tupema? Nanchi twakonsha kumukwata nyi?— Puyila mwela mu kuboko kobe. Waumvwapo kiji kyonse nyi?— Waumvwa mwela byo abena kupupa, pano kechi wakonsha kumukwata ne, ke ibyo nenyi?—

Twaambapo pa bilengwa bya mupashi byo tubula kumona. Twafunjile kuba’mba bimo byawama, bikwabo byatama. Tongolapo bilengwa bya mupashi bimo byo tubula kumona.— Ee, Yehoba Lesa, Yesu, ne bamalaika bawama. Nanchi kuji ne bamalaika batama nyi?— Baibolo waamba’mba kobaji. Mbule byo wayukapo pe abo.—

Twayuka kuba’mba bamalaika bonse bawama ne batama betukila bulume. Mufunjishi Wayukisha wibayuka bingi bamalaika. Wibayukisha mambo a kuba’mba wajinga malaika saka akyangye kusemwa mu bumwana panopantanda. Waikalanga na bamalaika bakwabo mwiulu. Wayukile bamalaika bavula bingi. Nanchi bano bamalaika bonse baji na mazhina nyi?—

Twafunjile kuba’mba Lesa watumbile tubangabanga mazhina. Onkao mambo ne bamalaika bonse nabo baji na mazhina. Kabiji twayuka’mba bakonsha kwambañana bene na bene mambo Baibolo waamba pa ‘lujimi lwa bamalaika.’ (1 Kolinda 13:1) Nga bintu ka byo bambapo bamalaika? Nanchi bamba pe atweba nyi?—

Twayuka’mba bandemona bakeba amba tubulenga kukokela Yehoba. Onkao mambo kyamweka bambapo pa byo bafwainwa kuba kino. Bakeba’mba twikale nobe abo pa kuba’mba Yehoba etushikwe. Nga ibyepi bamalaika ba Lesa bakishinka? Nanchi nabo bambapo pe atweba nyi?— Ee. Bakeba kwitukwasha. Leka nkubulepo bamalaika bamo ba Lesa byo bakwashishe bantu baingijilanga Yehoba mu butemwe.

Kya kumwenako, kwajinga muntu umo wa jizhina ja Danyela waikalanga mu Babilona. Bantu bavula mu yoya ntanda kechi batemenwe Yehoba ne. Balengele ne muzhilo wa kumanyika muntu yense wakonsheshe kulomba kwi Yehoba Lesa. Bino Danyela kechi walekele kulomba kwi Yehoba ne. Wayuka kyo bamubile Danyela nyi?—

Ee, bantu batama bamutayile Danyela mu jiyengo ja mabokwe. Danyela wajingatu bunke mu jiyengo mwajinga mabokwe aumvwine bingi nzala. Nanchi wayuka kyamwekele nyi?— Danyela waambile’mba: ‘Lesa watumine malaika wanji ne kushinka tunwa twa mabokwe.’ Kechi bamukozhezhe ne! Bamalaika bakonsha kubila boba bengijila Yehoba bintu byawama bingi.—Danyela 6:18-22.

Kabiji kwajingapo kimye kimo Petelo kyo ajinga mu kaleya. Petelo wajinga mulunda na Mufunjishi Wayukisha, aye Yesu Kilishitu. Bantu bamo kechi baumvwine bulongo Petelo byo ebabujile’mba Yesu mwana Lesa ne. Onkao mambo bamutayile mu kaleya. Bashilikale bamulaminenga Petelo kuchina’mba wakeya kunyemamo. Nanchi kwajingapo wakonsheshe kumukwasha nyi?—

Petelo walaajile pakachi ka bashilikale babiji, maboko anji sa afungwa na minyololo. Baibolo waamba’mba: ‘Ponkapo malaika wa Yehoba waishile, ne kyeya kyasamine momwa mu kaleya: ne aye wamukwachile Petelo mu mbavu, ne kumubusha, amba, Imana bukiji.’

Ponkapo minyololo yaponeneko ku maboko a kwa Petelo! Kabiji aye malaika wamwambile’mba: ‘Inyinge, uvwale ne makwabilo obe, undondelenga.’ Bashilikale kechi bakonsheshe kwibakanya ne, mambo Petelo bamukwashishenga kwi malaika. Ku kibelo kya kyela kwamwekele kintu kya kukumya. Kibelo kishinkukijiletu akyo kine! Awa malaika wapokolwele Petelo kuba’mba atwajijile na kusapwila.—Byubilo 12:3-11.

Nanchi netuwa bamalaika ba Lesa bakonsha kwitukwasha nyi?— Ee, bakonsha. Nanchi kino kilumbulula’mba kechi twakonsha kupita mu makatazho nenyi?— Ine, umvwe ke tube bintu byabula kufwainwa, bamalaika kechi betuzhikijila ne. Bino twakonsha kupita mu makatazho, nangwa kechi twauba bintu byatama ne. Bamalaika kechi bakambizhiwa kulekesha kino ne. Pano bino, Lesa wibapa mwingilo wanema bingi.

Baibolo waamba pa malaika umo wambila bantu mwaya ntanda yonse kupopwela Lesa. (Lumwekesho 14:6, 7) Uno malaika wibabula byepi bano bantu? Nanchi ubijika kufuma mwiulu kuba’mba bantu bonse bamumvwe nyi?— Ine, mu kifulo kya kuba bino, baana ba bwanga ba kwa Yesu panopantanda bamba ku bakwabo pe Lesa, kabiji bamalaika bo bebatangijila mu uno mwingilo. Bamalaika bo bebatangijila ku boba bonse bakeba kuyuka Lesa. Netuwa twakonsha kwingilako uno mwingilo wa kusapwila, kabiji bamalaika bakonsha kwitukwasha.

Pano ibyepi umvwe bantu babula kuyuka Lesa ke betukatazhe? Kyakonsha kwikala byepi umvwe betutaya mu kaleya? Nanchi bamalaika bakonsha kwitufumyamo nyi?— Bakonsha. Pano bino, kechi byo boba kimye kyonse ne.

Paulo, mwana wa bwanga wa kwa Yesu kimye kimo wajinga kaili. Wajinga mu bwato kimye kyo kwaishile kipupu kikatampe kyakatazha. Bino bamalaika kechi bamupokolwele ponkapotu ne. Kyajinga bino mambo a kuba’mba kwajinga bantu bakwabo bakebewenga kuyuka Lesa. Malaika waambile’mba: “Paulo, kuchina ne; kyafwainwa obewa kukemana ku meso a Kesala.” Ee, Paulo bamutwajile kwi Kesala, ndamakyalo kuba’mba akamusapwile. Bamalaika bayukile konse konse kwajinga Paulo, kabiji bamukwashishenga. Netuwa baketukwasha umvwe ke twingijile Lesa.—Byubilo 27:23-25.

Kabiji bukumotu bamalaika bakengile mwingilo mukwabo wanema bingi. Kimye kya Lesa kya konauna bantu batama kyafwenya kala pepi. Aba bonse babula kupopwela Lesa wa kine bakonaunwa. Bonse bakana’mba bamalaika bafwako mambo a kuba’mba kechi bebamona ne, kikebatamina.—2 Tesalonika 1:6-8.

Pano nga kwi atweba kikekala byepi?— Bamalaika ba Lesa baketukwasha umvwe ke twingijile nabo pamo. Nanchi twingijila pamo na bamalaika nyi?— Ee, twingila nabo umvwe ke twingijile Yehoba. Kabiji umvwe ke twingijile Yehoba, tukabulangako ne bakwetu nabo kuba’mba bamwingijilenga.

Pa kuba’mba ufunjilepo byavula bamalaika byo bakwasha bantu, tanga Salamo 34:7; Mateo 4:11; 18:10; Luka 22:43; ne Byubilo 8:26-31.

[Kipikichala pa jipa 63]

Lesa waubile byepi pa kumupokolola Danyela?

[Kipikichala pa jipa 64]

Malaika wakwashishe byepi Petelo kufuma mu kaleya?

[Kipikichala pa jipa 66]

Malaika ubena kubula Paulo amba ka?