Lufunjisho lwa Baibolo lwa pa Bunke ne lwa Kisemi Byanema Bingi!

1. Jibumba Jitangijila jituta byepi muchima ano moba, kabiji mambo ka?

¹ Byonkatu byo kyajinga mu myaka kitota kitanshi, ne luno Jibumba Jitangijila jata bingi muchima bantu ba Yehoba. (Byubilo 15:6, 28) Malwa akatampe byo afwenya kala pepi, kyanema bingi kuba’mba basapwishi ba Bufumu bonse bekale na bulunda bwakosa ne Yehoba. Musakwingijishanga byepi kimye kyo mwapwilangamo kala Lufunjisho lwa Buku lwa Kipwilo? Bonse batundaikwa kwingijisha kino kimye kubilamo kupopwela kwa kisemi. Kwingijisha kino kimye kyetu bulongo, kuketulengela kufunda Mambo a Lesa bulongo ne kumwenamo bingi mu mafunjisho ajimo.—Sala. 1:1-3; Loma 11:33, 34.

2. Juba ja kupopwela kwetu kwa kisemi jakonsha kunengezhiwa byepi?

² Juba ja Kupopwela kwa Kisemi: Mitwe ya bisemi iji na mutembo mukatampe kwi Yehoba wa kumona’mba yanengezha mutanchi walumbuluka wa lufunjisho lwa Baibolo lwa kisemi ye bafwainwa kulondelanga kimye kyonse. (Mpitu. 6:6, 7) Balongo ne banyenga babula mu masongola kabiji babula mitembo ya kisemi bakonsha kwingijisha kino kimye kwikelamo na lufunjisho lwa Baibolo lwa pa bunke ne kupesapesa bishinka. Kyanema bingi atweba bonse ‘kupulusha bimye’ bya kufunjilamo Baibolo ne kulanguluka langulukapo kuba’mba tutwajijile kwikala bakosa ku mupashi, mambo ‘ano moba atama.’—Efi. 5:15, 16.

3, 4. Milanguluko ka yaambiwa pa mambo a byambo byo twakonsha kwingijisha, kabiji twafwainwa kulabijila ka?

³ Bintu bya Kufunda: Mwakonsha kwingijisha buku wa Watch Tower Publications Index nangwa selechi wa Watchtower Library CD-ROM inge muji na kompyuta kuba’mba mutane bintu byakonsha kulengela kisemi kyenu kwikala kya lusekelo pa kufunda lufunjisho lwa Baibolo. Bisemi byakonsha kwisamba pa mitwe itanwa mu Kyamba kya Usopa, nabiji bibaba bitanwamo kimye kyonse bya kuba’mba “Bintu Bilengela Kisemi Kwikala kya Lusekelo,” “Funjishainga Baana Benu,” ne “Kibaba kya Bakyanyike.” Kabiji mu Awake! namo munembwa mitwe yaamba’mba “Ifipusho Abacaice Bepusha” kabiji ne bibaba bikwabo byawama byaamba pa bilengwa.

⁴ Kutanga Baibolo kwa kubula kupitamotu kapambala, kwakonsha kukwasha bonse mu kisemi kubula kulubamo mafunde o bafunda. (Hebe. 4:12) Pa bimye bikwabo, mwakonsha kutamba ne kwisambapo pa mavidyo amo anengezhiwa na jibumba. Tukakonshanga kwikala na kimye kyabaya kya kupesapesa ne kuyuka mwakwibifunjila. Nga mambo ka a kubula kwipuzhizha ba mu kisemi kyenu bintu byo bakonsha kutemwa kufundapo?

5. Mambo ka lufunjisho lwa Baibolo lwa pa bunke ne lwa kisemi o lwanemena mu bwikalo bwetu ano moba?

⁵ Mambo ka o Kyanemena ano Moba: Kukosesha bulunda bwetu ne Yehoba kuketunengezha ‘kwimanatu nzo! ne kumona lupulukilo lwa Yehoba.’ (Lupu. 14:13) Bansemi bakebewa lutangijilo lwa Lesa pa kukomesha baana babo “mukachi ka kisemi kyatama ne kyaluwankana.” (Fili. 2:15) Bakyanyike bakebewa bukwasho bwa kwibakwasha kuchinuzhuka byubilo byatama ku masukulu ano moba. (Mana. 22:3, 6) Bamulume ne mukazhi bafwainwa kukosesha ‘lutambo wabo wa mizhinge isatu’ umvwe baketekela mwi Yehoba. (Sapwi. 4:12) Onkao mambo, twayai twingijishenga kimye kyetu kyashalako bulongo kuba’mba twikomeshenga atwe bene ‘mu lwitabilo lwetu lwazhila’!—Yuda 20.

Bya Kwamba pa Kusha Magazini

Kyamba kya Usopa Oct.–Dec.

“Atweba bonse kitukola bingi ku muchima umvwe mulongo wetu wafwa. Nanchi Baibolo wakonsha kwitukwasha pa bimye bya uno mutundu nyi? [Lekai akumbule. Apa bino mutange Salamo 55:22.] Ino magazini yaambapo bintu bimo biji mu Baibolo byakonsha kwitukwasha.”

Awake Oct.

Bantu ba mu mabupopweshi avula baji na milanguluko yapusana pusana pe Lesa byo aji. Nga mwana Lesa wamulumbulwile byepi? Monai byaambile Yesu mu Yoano 4:24. [Tangai.] Kino kibaba kyalondolola byaamba Baibolo pa mambo a bwipuzho bwa kuba’mba, “Nanchi Lesa uji byepi?” Mumweshai kibaba kiji pa peja 24 ne 25.

Kyamba kya Usopa Oct.–Dec.

“Nanchi ne anweba mwikimona’mba kumvwina uno mukambizho wa Yesu kwakonsha kulengela kisemi kwikala kya lusekelo nyi? [Tangai Yoano 13:34. Mulekai akumbule.] Kino kibaba kyaamba pa mafunjisho a Yesu ne kya kumwenako kyanji byo byakonsha kwingila ku yense wa mu kisemi.” Mumweshai kibaba kiji pa peja 16 ne 17.

Awake Nov.

“Javula bantu bamba’mba muntu waikala bulongo ke yewa waya nkuwa, washukwa, nangwa’mba wa bulume. Nga anweba mwakonsha kwamba’mba kwikala bulongo kulumbulula ka? [Mulekai akumbule.] Monai kintu kyaambiwapo mu Baibolo kilengela muntu kwikala bulongo. [Tangai Salamo 1:1-3.] Kino kibaba kyaamba pa bintu bitanu na kimo bilengela muntu kwikala bulongo.” Mumweshai kibaba kyatendekela pa peja 6.