Kupwisha Makatazho Ekala na Bantu mu bya Busulu

Byonkatu byo kyanembwa mu 1 Kolinda 6:1-8, mutumwa Paulo waambile pa balongo batwalanga bakwabo ba mu lwitabilo ku bije. Kyamukolele bingi ku muchima, mambo bena Kilishitu bamo mu Kolinda batemwanga bingi kutwala bakwabo “ku kije kya bantu babula koloka.” (Kyepelo 1) Paulo waambile patoka ene mambo bena Kilishitu o bafwainwa kubujila kwitwalanga ku bije bya mambo. Bafwainwa kutwala makatazho abo ku kipwilo. Pano twayai tubalaule ene mambo bino byambo byanembwa na lutangijilo lwa mupashi o bebipaine ne kwisambako pacheche bintu bimo bibula kukebewa kwingijisha ino mikambizho.

Umvwe twapusenamo mu bya busulu na mukwetu wa mu lwitabilo, twafwainwa patanshi kweseka kwilupwisha kwingijisha maana a Yehoba kechi kwingijisha maana etu ne. (Byambo bya Maana 14:12) Byonkatu Yesu byo aambilepo, kyawama kupwisha lukatazho saka lukyangye kubaya. (Mateo 5:23-26) Kyatama bingi kuba’mba, bena Kilishitu bamo bekatazha bingi kya kuba bafika ne pa kwitwala ku bije bya mambo. Paulo waambile’mba: “Umvwe mwitwala ku bije, ko kuba’mba mwatamisha.” Mambo ka? Mambo kwitwala ku bije kuleta mwenga pa kipwilo ne Lesa ye tupopwela. Onkao mambo, twafwainwa kwipuzha bwipuzho bwaipwizhepo Paulo bwa kuba’mba: “Mambo ka o mubujilatu kuchinchika umvwe bemuba nshiji?”—Kyepelo 7.

Kabiji Paulo wayukile’mba Lesa wabika mu kipwilo lunengezho lwawama lwa kupwishishamo makatazho. Bakulumpe mu kipwilo ke banabalume bena Kilishitu baji na maana a bukine a mu Binembelo, kabiji Paulo waamba ne pa bano banabalume amba, ‘bakonsha kuchibila mambo balongo’ pa “bintu bya mu buno bwikalo.” (Byepelo 3-5) Yesu wamwesheshe bya kuba na mambo akatampe, nabiji luntepentepe ne kwijiila makusu pa mutwe amba mwafwainwa kwiapwishatu kwingijisha ano mashinda asatu: Jishinda jitanshi, kwisamba bubiji bwenu ku mbaji, ja bubiji, umvwe jishinda jitanshi jakankalwa kwingila, ichilaipo muntu umo nangwa mukwabo wa bubiji, ne ja busatu, umvwe mwakankalwa ja bubiji, buulai bakulumpe mu kipwilo.—Mateo 18:15-17.

Bakulumpe bena Kilishitu mu kipwilo kechi bashabyambo nangwa basulu bapana mikambizho ya bya busulu ne. Kabiji kechi babikako mikambizho ya kupwishishamo makatazho a mu bya busulu umvwe balongo bekatazha bene ne. Abo bakebako kukwasha bonse baji mu lolo lukatazho kwingijisha Binembelo pa kuba’mba belupwishe mu mutende. Umvwe bakankalwa kuyuka mwa kwiobila, bakonsha kubuula kalama wa mwanzo nangwa kunembela ofweshi wa musampi wa Bakamonyi ba kwa Yehoba. Nangwa byonkabyo, kuji mambo amo abula kwambiwapo mu luno lujimuno lwa kwa Paulo. Ñanyi mambo onkao amo?

Bimye bimo, mambo amo mwakonsha kwiatwala ku kije pa kuba’mba mwiapwishe mu mutende. Kuya ku kije ko kwakonshatu kukebewa pa kuba’mba mukatambule malishichi a kwikainapo, mali a kulaminamo baana umvwe bansemi bekana, kumvwañana mali a kupa muntu ye bakana ku mwina kwanji, kutambula mali a bintu byaonaika, kukenda mali enu ku banki ye bashinka ne kunemba bintu byo muji nabyo ne kumwesha byo bakebyabanya inge mwafwa. Kabiji kuji ne mambo akwabo akonsha kulengela mulongo kuya ku kije pa kuba’mba azhikijilwe.a

Umvwe ano mambo mwiatwala ku kije kwa kubula kupusenamo, kechi kwakonsha kuzhilulula lujimuno Paulo lo anembele na lutangijila lwa mupashi ne.b Nangwa byonkabyo, kintu kitanshi mwina Kilishitu kyo afwainwa kutalapo ke kuzhijika jizhina ja Yehoba, mutende ne kukwatankana mu kipwilo. Baana ba bwanga ba kwa Kilishitu patanshi bayukanyikilwa ku butemwe bwabo kabiji ‘butemwe kechi bukeba bintu bibuwamina abo bwine ne.’—1 Kolinda 13:4, 5; Yoano 13:34, 35.