Ñanyi Bintu Byo Twafwainwa Kulangulukila Jimo?
1 Atweba bonse tulangulukila jimo byo tukoba kimye kya kulutwe. Baji na luketekelo lwa kwikala pano pa ntanda babena kupembelela kwikala na bumi bwa myaka ne myaka mu ntanda ipya yaoloka ya Lesa. Bino kuji byubilo bimo byakonsha konauna luketekelo lwetu lotuji nalo. Twafwainwa kwingila na mukoyo ne kutesha muchima ku bintu bya Bufumu kechi kutemwa bya lwiso lwa mubiji ne.—1 Yoa. 2:15-17.
2 Bantu ba ku kyalo kechi bayuka bikonkwanyi byo bebikila bantu batesha michima yabo ku bintu bya ku mupashi ne. (1 Ko. 2:14) Nangwa kya kuba bantu bamo babena kulukuta na kukeba kutumbalala, buntangi ne bunonshi, atweba tubena kwitujila nsabo ya ku mupashi. (Mat. 6:19-21) Umvwe ketulukute na kulanguluka bilanguluka bantu ba ku kyalo pa bya kimye kya kulutwe, abya twakonsha kufikizha bikonkwanyi byetu bya ku mupashi nyi? Bintu bya mu kyalo byakonsha kwitongola. Pano, twakonsha kwizhijika byepi?
3 “Vwalai Nkambo Yesu Kilishitu”: Jishinda jimo ja kupiminamo inge tubena kutesha muchima ku bintu bya Bufumu ke misambo yetu. Nanchi kimye kyonse twambatu pa bintu bya ku mubiji ne bya ku kyalo nyi? Umvwe ibyo, twafwainwa kumona inge tubena kufuma ku bintu byanema bya ku mupashi. Twafwainwa kutesha muchima pa ‘kuvwala Nkambo Yesu Kilishitu, kechi kwimwena jimo nangwa mucheche mwa kubila bya lwiso lwa buntunshi’ ne.—Loma 13:14.
4 Bakyanyike bakonsha ‘kuvwala Kilishitu’ inge sabalangulukila jimo juba jo bakatendeka mwingilo wa kimye kyonse. Wakyanyike umo wakebelenga bupainiya bwa kimye kyonse wakomejile mu kisho kitundaika bakyanyike kuketekela mu mali. Onkao mambo, witumpile mu busulu kya kuba kupwila ne mwingilo wa busapwishi byaalukiletu ke kisela koaji. Pano byo atatwile kuketekela byambo bya kwa Yesu biji pa Mateo 6:33 ne kuleka kutaya kimye kyabaya mu busulu, watendekele mwingilo wa kimye kyonse. Pa kino kimye, ubena kwingijila Yehoba na jiwi ja muchima jatoka to, ‘papelela ngovu yanji.’
5 Baibolo yamba’mba muntu wa maana ulangulukila jimo kimye kya kulutwe. (Mana. 21:5) Ne atweba bonse twayai twibikeko kuba byonkabyo na kutangizhako kyaswa muchima wa Lesa.—Efi. 5:15-17.