Nkalata Kufuma Ku Jibumba Jitangijila
Atweba Bakamonyi ba kwa Yehoba byo twatokwapo! Kechi twatokwa pa kuyukatu Yehoba, Lesa yenka wa kine mumi, Mulenga wa kulengwa konse ne, bino twatokwa ne pa kwitwa jizhina janji ne kumwingijila. Kafwako mapesho akwabo akila pa ano ne!—Isa. 43:12; Hebe. 8:11.
Tuji na luketekelo lwa lupulukilo ne mwingilo wa kusapwila mambo awama a Bufumu ku bakwetu kuba’mba nabo bamupopwelenga Yehoba ne kwikala na luketekelo. (Mat. 24:14; Loma 10:13, 14; 1 Tesa. 5:8) Kabiji twasekela pa kwikala mu bulongo bwa ntanda yonse bwa bapopweshi betemwa ne kwikwasha bene na bene. Kino kintu byo kibena kusangajikapo!
Baibolo itubula’mba: “Ingijilai Yehoba na lusekelo: ... Twelai mu bibelo byanji na kupika sante, Kabiji ne mu bipango byanji na kutota: Musanchilai, ne kutakaika jizhina janji. Mambo Yehoba ye wawama; ne lusa lwanji lo lwayayaya, Ne bukishinka bwanji bukafika ne ku bisemi byonse.” (Sala. 100:2-5) Kwingijila Yehoba na lusekelo, kwalamata pa kwikala na bulunda bwetu bwakosa ne aye. Wituswisha kwisampa nanji bulunda bwa uno mutundu, kabiji twatokwa bingi pa kwikala na jishuko ja kwibukomesha. Inge twaikala na buno bulunda, tuyuka’mba Yehoba uketukwasha ne kwitukosesha mu bimye byo twakajilwa. Twaketekela’mba uketukosesha ku mupashi ne kwitupa mikambizho ya kushinjilamo makatazho o twikala nao mu ano moba apelako a buno bwikalo. Kechi mambo na makatazho o twikala nao ne, tusangalala bingi mu mwingilo wetu, kabiji tusanchila Yehoba moba onse mambo byambo byanji bituvululako’mba, ‘aye wituta muchima.’—1 Pe. 5:7.
Mwaka wapwa, Yehoba witubijile bintu byavula bingi. Pa Kupwila kwa Nkambi kwa “Ba Kuba Kyambo kya kwa Lesa,” twasangalele bingi kupwañena pamo na bakwetu biumbi ne biumbi baji na lwitabilo lwanema lo tujipo nalo, kasa twimbila ne kujiila nabo pamo pa tebulu wa Yehoba wa ku mupashi. Pa Kupwila kwa Lufunjisho lwa Buku, twasangalele pa kufunjila pamo buku wa Angweniko ku Kusesema kwa kwa Daniele! witukosesha mu lwitabilo. Kabiji kununga pa bino, byo twasekejile pa kutambwila volyumu 1 wa Ukusesema kwa kwa Esaya—Ulubuuto lwa Bantu Bonse! ‘Kitomeno kyetu kyayula, [bulongo].’—Sala. 23:5.
Byo kitusangajikapo pa kuyuka’mba atweba bavula, balongo ne banyenga ba ku mupashi twakwatankana pamo mu kwingijila Yehoba! Byo kibena kwitutundaikapo pa kutanga bibelengelo bikatampe bya katataka bya bantu babena kwingila mwingilo wa mu bujimi! Kabiji tusangalala bingi pa kumona bantu bavula batainwe ku Kivuluko kya lufu lwa Nkambo yetu, kabiji baubile byo byo kechi na mambo na byubilo biji mu ntanda ne. Byo tubena kutala pa bujimi bwa ntanda yonse, kibena kumwekeshatu patoka’mba bujimi bwa ‘kunowa bwabayisha.’ (Luka 10:2) Mwaka wapwa, inge twaabanya mu milungu, mu mulungu umo bafunda Baibolo 5,555 banungulukilenga ne kumwesha kwipana kwabo mu lubatizhilo lwa mu mema. Nangwa kya kuba kunowa kwabayisha mu mapunzha amo kukila akwabo, bonse tusekela pa bibena kuba Yehoba. Tubena kumona kiyukilo kya kine kuba’mba ubena kukwasha bakalume banji bakwatankana mu kwingijila pamo.
Buntungi bwa Mazubo a Bufumu apya nabo ke kintu kikwabo kibena kwituletela lusekelo lukatampe! Twasekela bingi pa kumona balongo ne banyenga baji mu byalo biyanji byo babena kutundaika uno mwingilo na muchima yense. Mazubo a Bufumu avula ashimikwa na Mabumba a Bantungi ba Mazubo a Bufumu abo bafunjishiwa uno mwingilo. Bano balongo baya ku bipwilo byapusana-pusana mukachi ka kyalo kyabo ne kutangijila mwingilo wa kushimika Mazubo a Bufumu. Pa kuba’mba Mazubo a Bufumu avula ashimikwe, tubena kukeba bakukwasha bavula kwipana kwingila uno mwingilo mu byalo biyanji. Umvwe mwikala mu kyalo kya uno mutundu, abya mwakonsha kwipana kwingilako uno mwingilo nyi? Balongo ne banyenga yetu byo basantapo pa kwikala na Nzubo yabo ya Bufumu mo bapwila na kupopwela Lesa! Kabiji byo basanchilapo bulongo bwa ntanda yonse pa bukwasho bwa mali bubena kukwasha mu kushimika ano mazubo!
Masawakya a kushinda mu bije bya mambo etusangajika bingi. Nangwatu, mu mapunzha avula muji bantu bamo bakeba kwitulekesha kupopwela Yehoba. Byo tubena kupita mu makatazho a uno mutundu, twaketekela amba Yehoba uketukwasha nangwa balwanyi bavule byepi kabiji nangwa kya kuba bakalume banji babena kumweka nobe kechi bavimbilwa ne. (2 Moba. 14:11) Twimusanchila bingi anweba balongo ne banyenga bonse mubena kutwajijila kwimana bakosa mu bupopweshi bwa kine.
Twajijilai kukosesha lwitabilo lwenu ne kuketekela Yehoba kwimutangijila byo mubena kwingila mingilo ya bwina Kilishitu na lusekelo. (Mana. 3:5, 6) Kange mulefulwe na byakonsha kuba mulwanyi ne. Vulukai Elisha byo akoseshe kalume wanji waubile moyo’mba: “Kuchina ne, mambo bo tuji nabo atweba bakila boba bo baji nabo abo.” (2 Mfu. 6:15-17) Lelo jino, nzhita ya Yehoba ya mwiulu inengezhezha jimo kuzhikijila mingilo ya bupopweshi bwa kine byonka byo kyajinga mu moba a kwa Elisha. Twaketekela namba kulutwe na lwendo tukamona byawama. Yehoba ubena kwitulama. Bantu kechi bakonsha kulwa nanji ne. Wabika mwananji pa bukalama. “Bo bene ba lusekelo bonse bamuketekela.”—Sala. 2:1-6, 12.
Anweba bonse Balongo ne banyenga batemwe vulukai’mba kimye kyonse twimuvuluka. Lulombelo lwetu ke lwa kuba’mba anweba bonse “mwikale balumbuluka ne bakosatu mu lwitabilo monse mwaswila muchima wa Lesa.”—Kolo. 4:12.
Atweba balongo benu,
Jibumba Jitangijila ja Bakamonyi ba kwa Yehoba