Kika Kyotufunjishisha Mafunjisho a Baibolo?
1 Mamboka otufunjishisha mafunjisho a Baibolo? Nanchi tufunjishatu bantu maana nyi, inyi kuwamisha bwikalo bwabo nangwa kwibafunjisha’mba bayuke byavula pamambo abwikalo bwabo bwakulutwe? Ine. Kintu kikatampe kyotubila kino kekulenga baana babwanga bakwa Yesu Kilishitu! (Mat. 28:19; Byu. 14:21) O ene mambo bantu botufunjisha obafwainwa kupwañenanga pamo nakipwilo. Kuya kwabo palutwe kumupashi kwaimana pakumvwisha jibumba jabwina Kilishitu byojiji.
2 Byomwakonsha Kuba: Pakutatulatu ponka, tundaikai muntu yemubena kufunjisha kutanwanga kukupwila. (Hebe. 10:24, 25) Mulumbulwilai kino byokikakosesha lwitabilo lwanji, mukwashai kuba kyaswa muchima wa Lesa nekumulengela kupwañena pamo nabakwabo batota Yehoba. (Sala. 27:13; 32:8; 35:18) Ñambilo yenu yabutemwe nebyomusanchila kipwilo nebyomufunda bikamutundaikanga kusakisha kutanwangako.
3 Bantu bakatataka bafwainwa kuyuka kuba’mba jibumba ja Yehoba kejibumba jabalongo mwaya ntanda yonse. Bamweshai mavidyo a Jehovah’s Witnesses—The Organization Behind the Name ne Our Whole Association of Brothers. Inge ano mavidyo mufwao, mwakonsha kwingijisha buloshuwa wa Inte sha kwa Yehova Mu Kwikatana Shicito Kufwaya kwa kwa Lesa mu Kusalala kwa Calo. Bakwashai kuyuka kuba’mba Yehoba ubena kwingijisha bantu bavula bepana kwingila kyaswa muchima wanji mwaya ntanda yonse. Lekai bano bantu bakatataka bayuke kuba’mba nabo babena kwitwa kwiya nakwingijila Lesa.—Isa. 2:2, 3.
4 Kitusangajika bingi pakumona yetubena kufunjisha Baibolo waaluka ke mwana wabwanga wakine wakwa Yesu. Kino kyokyo tufunjishisha mafunjisho a Baibolo!—3 Yoa. 4.