Abya Mubena Kunowa Byawamanyi?
(Mamini. 4) Njimi ulondela mashinda awama akujiminamo wikala naluketekelo lwakunowa kajo kavula. (Sapwi. 11:4, 6; 2 Ko. 9:6) Nangwa byonkabyo, banjimi kechi bakusatu nkunwa kikusekuse nepoyakonsha kubula kumenane. Milangwe yauno mutundu yoyotwafwainwa kwikala nayo pakutambika mabuku etu mubujimi. Mulanguluko wetu kewakusha mabuku kuboba baji nalusekelo lwakine kine lwakukeba kufunda. Tukeba kupa bantu bafwainwa, jishuko jakufunda bupe bwakushukilwa bwa Yehoba nekuketekela Bufumu bwanji. Nanchi twakonsha kumwesha byepi maana nemilangwe paano mambo?
(Mamini. 3) Utangijila mwingilo wamubujimi akonkomwene pabuneme bwakunengezhezha jimo pakuba’mba tutambikenga mabuku nekutambula bupe mujishinda jafwainwa kabiji jawama. Koseshai kipwilo kumvwisha bulongo bimwesho bisatu byalondelapo nekunemba bishinka.
(Mamini. 5) Musapwishi nangwa painiya atambike buku wa Kuyuka kumuntu wamwesha lusekelo lwakine kine lwakukeba kufunda. Musapwishi ambe’mba: “Bakamonyi bakwa Yehoba kebamingilo bepana balanguluka’mba kyanema bingi kubantu baji namoyo wakwakamwa Lesa kuteleka kuano mambo awama. Bumpanyi bwakwitemenwa bwa Bakamonyi bakwa Yehoba nebwa bantutu bakwabo bamona buneme bwamwingilo wakufunjisha Baibolo lelo jino bukwasha kutundaika uno mwingilo nekwitulengela kutambika uno buku kwakubula mutengo kubantu baji nalusekelo lwakine kine lwakukeba kufunda Lesa kyoasungila bantu.” Mwinanzubo ashikishe’mba: “Nanchi mubena kwamba’mba nakonsha kutambula uno bukunyi?” Musapwishi akumbule’mba: “Ee mwakonsha, umvwe kine muji nalusekelo lwakukeba kufunda mambo awama amu Baibolo ajimo. Nakonsha kwiya kimye kikwabo nakwisamba nenu jibiji pabino byambo. Umvwe mukeba kupanako bupe bucheche kuuno mwingilo wakufunjisha Baibolo, mwakonsha kuba byonkabyo. Bupe bwenu busanchilwa bingi kabiji bwingijishiwa kutwala palutwe mambo awama a Bufumu.” Mwinanzubo apane bupe nekumubula’mba ebubike muenivulupu mubikwa bupe bwamwingilo wantanda yonse.
(Mamini. 5) Ingijishai kyonkakye kimwesho, kibena kumwesha musapwishi byoafwainwa kutambika buku wa Kuyuka, amupane kumwinanzubo, apa bino amushikishe umvwe ukeba kupana bupe bwakukwasha mwingilo wantanda yonse. Pakino kimye mwinanzubo akane’mba, “Mfwakyo kimye kyakutanga uno buku.” Musapwishi atambule buku kumwinanzubo nekwamba’mba: “Kyawama, nsakumupana uno buku kumuntu ungi usakukeba kumutanga. Bino, kampe mwakonsha kwikalako nakimye kyakutanga kano katalakiti.”
(Mamini. 3) Musapwishi nangwa painiya amweshe byakutambika magazini akatataka. “Mutende mwane. Jizhina jami ne ______. Naiya nakwimubulako byambo bimo byawama bingi [tongolai mutwe]. Naumvwine bingi bulongo kino kishinka. [Mweshai kishinka kimo nangwa lumbululai kyakumwenako.] Kyankwashishe bingi [shimikizhai byokimukwashishe], kabiji mbena kulanguluka namba nenuwa musakwikitemwa. Umvwe mwakonsha kutanga ino magazini, mbena kwimushilayo.” Mwinanzubo ashikishe’mba, “Nanchi mubena kuba inga ano magazini?” Musapwishi nangwa painiya akumbule’mba, “Ano mabuku etu afwaye mutengo, bino umvwe mukeba kupanako kacheche kumwingilo wetu wantanda yonse wakufunjisha Baibolo tusakwikatambula namaboko abiji.” Mwinanzubo apane bupe nemusapwishi nangwa painiya amubule kwibubika muenivulupu mubikwa bupe bwamwingilo wantanda yonse.
(Mamini. 5) Utangijila mwingilo wamubujimi avululemo basapwishi kwingijisha bulongo mabuku nekulumbulula bulongo lunengezho lwabupe kubantu bamwesha lusekelo lwakine kine lwakukeba kufunda kabiji batambula mabuku. Pakuba’mba mufumenga mfweto, twafwainwa kupana mabuku etu kubantu bakeba-keba bukine, kokuba’mba, aba baji nalusekelo lwakine kine lwakukeba kufunda mambo a mwingilo wetu. Kino kyakonsha kuyukanyikwa pakufwakasha kutanshi. Basapwishi kechi bafwainwa kuchinanga kutambika mabukune. (Mat. 10:11) Bino lubaji lukwabo, kechi twafwainwa kupanangatu mabuku kipane-pane kuboba babula kumwesha lusanchilo lwakine lwamambo awama amu Baibolo ne. Kikonkwanyi kyetu kitanshi kekyakutana nekujisha mikooko ya Nkambo nekwiikwasha’mba ifunde byoyakonsha kupuluka nekutwela muntanda ipya ya Yehoba.
Kechi twafwainwa kuleka kukusa nkunwa ya Bufumu namambo akuba tukankazhama kutongola mwingilo wetu byoalipililwane. Pakimye kimotu, twafwainwa kujimuka kuchina kusha mabuku etu pa “kibangabwe.” (Mako 4:5, 6, 16, 17) Aba banemeka mambo awama otwibatwajila basekela bingi pakwikala najishuko jakupana bukwasho bwakwiakwasha.—Esakanyaiko Mateo 10:42.