Tukwashenga Bakwetu Kuba’mba Nabo Bamupenga Yehoba Lukumo
1 Byambo byanema bibena kusapwilwa kubantu mwaya ntanda yonse kuba’mba: “Akamwai Lesa, mumupe lukumo; mambo kimye kya kije kyanji kyafika: mupopwelai aye walengele mwiulu ne ntanda ne kalunga ne masulo a mema atupauka.” (Lum. 14:6, 7) Kejishuko jetu jakusapwila bino byambo. Bantu bafwainwa kuyukaka pamambo a Yehoba kuba’mba bamwakamwe nekumupopwela?
2 Jizhina Janji: Bantu bafwainwa kumutela pajizhina aye Lesa yenka wakine kumupusanya kubalesa bavula babubela babena kupopwelwa ano moba. (Mpitu. 4:35; 1 Ko. 8:5, 6) Banembi ba Baibolo baingijishe jizhina ja Yehoba jayukanyikwa kukila pabimye 7,000. Nangwa kyakuba tuyuka potwafwainwa kutongola jizhina ja Lesa, bino kechi twafwainwa kwijifya nangwa kuchina kwijingijishane. Lesa ukeba’mba bantu bonse bayuke jizhina janji.—Sala. 83:18.
3 Byubilo Byanji: Pakuba’mba bamutumbijike Yehoba, patanshi bantu bafwainwa kumuyuka byoaji. Twafwainwa kwibabula byubilo byanji bikatampe nabiji butemwe, maana anji akila, bololoke bwanji bonse, nebulume bwanji bonse, pamo nelusa, kifyele, nebyubilotu bikwabo byanengela. (Lupu. 34:6, 7) Kabiji bafwainwa nekufunda kwikala namoyo wakwakamwa Lesa, kumukinjikisha, kuyuka kuba’mba bwikalo bwabo bwaimena pakwitabilwa kwi Yehoba.—Sala. 89:7.
4 Kufwenya Kwipi ne Lesa: Pakuba’mba bantu bakapuluke luzhachisho lukaleta Lesa, bafwainwa kwita pe Yehoba nalwitabilo. (Loma 10:13, 14; 2 Tesa. 1:8) Kino kechi kibena kulumbululatu kuyuka jizhina nebyubilo byanjine. Twafwainwa kukwasha bantu kwikala balunda ne Yehoba, nekuketekela mwiaye namuchima wabo yense. (Mana. 3:5, 6) Umvwe kebengijishe bintu byobafunda, kulomba kwi Lesa namukoyo, nekumona bukwasho bwanji mubwikalo bwabo, lwitabilo lwabo lukakomenako, nekwibakwasha kufwenya kwipi ne Yehoba.—Sala. 34:8.
5 Twayai twikale namukoyo wakusapwila jizhina ja Lesa nekukwasha bakwetu kuketekela mwiaye nekumwakamwa. Twakonsha kukwasha bantu bakwabo bavula kumuyuka Yehoba nekumupa lukumo byoaji “Lesa wa lupulukilo” lwabo.—Sala. 25:5.