Bwikalo Bwenu Bubena Kuya Pi?

• Bantu bavula basendwa bingi na bya kutabataba bya kimye kyonse bya mu bwikalo kya kuba kechi bateshako maana ne ko babena kuya ne.

• Baibolo witubujila jimo bintu bya kukumya biji kulutwe. Kabiji wajimunako kuba’mba kukekala kamvundumvundu mu bipamo bya bantu kuzhokoloka ntanda yonse. Pa kuba’mba tumwenemo mu byaambila jimo Baibolo ne kuchinuzhuka bya malwa, kubena kukebewa kubapo kimo lonka luno.

• Kuji bantu bamo bayuka byamba Baibolo ne kweseka kwibingijisha, bino baleka bya kutabataba bya mu bwikalo kwibatwala mungi.

• Nanchi mwatemwa byo mubena kuba mu bwikalo bwenu nyi? Kimye kyo mufuukula bya kuba, nanchi mulangulukapo bulongo ne kumona byo byakonsha kulengela bwikalo bwenu bwa kulutwe byo bukekala nyi?

[Kitenguluzha/Bipikichala pa peja 9]

Ki ka Kyakilamo Kunema kwi Anweba?

Mwakonsha kumona byepi mwanemena bino bintu? Bitanchikai.

Byavula byanema bingi mu bwikalo, pano bino inge mukeba kusala, kyepi kyo mutendekelapo? Kya bubiji? ne bikwabotu.

․․․ Bya kisangajimbwe/bya kukayakaya

․․․ Nkito yami nangwa nkito yonkeba’mba nkengilenga

․․․ Butuntulu bwami bwa mubiji

․․․ Lusekelo

․․․ Bena kwami

․․․ Bansemi bami

․․․ Baana bami

․․․ Nzubo yanengela, bivwalo byakipale

․․․ Kwikala mutanshi mu byonse byo nguba

․․․ Kupopwela Lesa

[Kitenguluzha pa peja 10, 11]

Nanchi Bintu byo Mwasalapo Kuba Kine Bibena Kwimutangijila ko Mukeba Kuya Nyi?

AKILANGULUKAI PA ANO MEPUZHO

BYA KISANGAJIMBWE/BYA KUKAYAKAYA: Nanchi bya kukayakaya byo nsala bindengela kwikala wakasuluka nyi? Nanchi bindengela kukizhamo kusangalala ako kwakonsha konauna butuntulu bwami bwa mubiji nangwa kwikala kilema nyi? Nanchi ano makayo aji mu “bukisela” kileta lusekelo kampe lwa pa ka kimye kacheche, bino lwakonsha kusha muchima na kukola pa kimye kyabaya nyi? Nangwa kya kuba bya kisangajimbwe byo nasala byawama, nanchi mbena kubatu monka natayilapo kimye kya kuba kambule ne kwikalako na kimye kya kubilamo bintu byanemesha nyi?

NKITO YAMI NANGWA NKITO YONKEBA’MBA NKENGILENGA: Nanchi yaikala ya kunkwashishamo ku bintu byonakajilwa nyi, inyi naikala ke muzha wayo? Nanchi nkito yami inkebela kimye kyabaya kya kwiingila kya kuba yansha mu malwa nyi? Abya nafwainwa kuba ñingilengatu nyi, inyi kwikalako na kimye na bena kwami nangwa baana bami? Umvwe bakulumpe bami ba mingilo bampa kinto yakonsha kuvulañanya jiwi jami ja mu muchima nangwa yankosha kundengela kuvulama bintu bya ku mupashi, nanchi nakonsha kwingila yoyo mingilo pa kuba’mba ntwajijile pa nkito yami nyi?

BUTUNTULU BWAMI BWA MUBIJI: Nanchi mubiji wami namumona nobe kintu kya kukaishakaishatu nyi, inyi namulamawizha? Nanchi kyo kintu kyoñambapo mu mwisambo wami nyi? Abya jishinda jo na mulaminamo jimwesha kuba’mba nata maana kisemi kyami nyi?

LUSEKELO: Nanchi kino kyo kintu kitanshi kyo ndangulukapo nyi? Nanchi nelutangizhako kulutwe ya mwina kwami nangwa lwa kisemi kyami nyi? Nga jishinda monkebela lusekelo jayila monka mwafwainwa kwikela mupopweshi wa Lesa wa kine nyi?

BENA KWAMI: Nanchi mmona bena kwami nobe mulundatu wa pa kimyetu kyo namona namba kyangwamina nyi? Abya nebanemeka byo baji muntu wafwainwa kupewa mushingi nyi? Kwitabila mwi Lesa kunkwasha ku byommona bena kwami nyi?

BANSEMI BAMI: Umvwe ne mwanyike, abya nkokela bansemi yami—kukumbula na mushingi, kwingila mingilo yo bampa, kubwela pa nzubo pa kimye kyonka kyobakeba, kuchinuzhuka kwendañana na bakwetu ne bisela byo bankanyapo nyi? Inge nakoma, nanchi nteleka ku bansemi yami na mushingi, ne kwibapa bukwasho bwafwainwa inge kino kyakebewa nyi? Nanchi jishinda jo ñingijilamo nabo jayila monka mo kyangwamina nyi, inyi jayila mwaambila Byambo bya Lesa?

BAANA BAMI: Nanchi neumvwa kwikala na mutembo wa kufunjisha baana bami byubilo byawama nyi, inyi nketekela kuba’mba bakafunda konka ku masukulu ko baya? Abya ngikalako na kimye na baana bami, inyi nketekela kuba’mba tubintu twakukayisha, TV, nangwa kompyuta byobyo basa kwikalanga nabyo? Nanchi ne bafunjisha baana bami kimye kyonse kyo balubako milaye ya Lesa nyi, inyi ngubatu kino inge banzhingijisha?

NZUBO YANENGELA, BIVWALO BYAKIPALE: Ki ka kindengela kuteshako maana ku mwekanyikilo ne bintu byonji nabyo, nanchi kukeba kutokesha bakwetu pa muchima nyi? buwame bwa kisemi nyi? inyi kishinka kya kuba’mba ne mupopweshi wa Lesa?

KWIKALA MUTANSHI MU BYONSE BYO NGUBA: Nanchi neumvwa kuba’mba kyanema kwingila bintu byonse mu jishinda jawama nyi? Abya nkeba kwikala mutanshi nyi? Abya kimpya ku muchima umvwe mukwetu waingila bulongo kukila amiwa nyi?

KUPOPWELA LESA: Nanchi kwitabilwa kwi Lesa ko kwakilamo kunema kwi amiwa kukila kwitabilwa ku bena kwami, baana bami, bansemi yami, nangwa bakulumpe bami bankito? Pa kuba’mba ntwajijile na bwikalo bwawama, nanchi nakonsha kumonanga mwingilo wami wa kwingijila Lesa nobe kintu kyabula kunema kukila bwikalo bwawama nyi?

TESHAIKO MAANA KU KUFUNDAÑANA KWA MU BAIBOLO

Nga kupopwela Lesa kwanema byepi mu bwikalo bwenu?

Musapwishi 12:13 waamba’mba: “Akamwai Lesa ne kulama mikambizho yanji; mambo kyo kyonka kyafwainwa kuba bantu.”

ISHIKISHAI ANWE BENE AMBA: Nanchi bwikalo bwami bumwesha kuba’mba mmona bintu mu jojo jishinda nyi? Nanchi kukokela mikambizho ya Lesa kumwesha byo ñingila mingilo pa nzubo, ku nkito, nangwa ku sukulu nyi? Inyi bintu bikwabo nangwa makatazho a mu bwikalo amwesha kana ngikalako na mutanchi wa kufunda pe Lesa?

Bulunda bwa mutundu ka bo muji nabo ne Lesa?

Byambo bya Mana 3:5, 6 byaamba’mba: “Ketekela mwi Yehoba na muchima wobe yense, ne kuta muchima ku milangwe yobe obe mwine ne. Umuvulukenga konse konse ko uya ne aye ukakolwela mashinda obe.”

Mateo 4:10 waamba’mba: “Ukamupopwela Nkambo Lesa wobe ne kumwingijila aye yenka.”

ISHIKISHAI ANWE BENE AMBA: Nanchi byaambiwa mu mavesi aji peulu po byobyo neumvwa pe Lesa nyi? Nanchi bintu bya pa juba pa juba, kubikapotu ne byo nguba na makatazho o mpitamo, bimwesha luketekelo ne munema wa mutundu yenkao nyi?

Nga kutanga ne kufunda Baibolo kwanema byepi kwi anweba?

Yoano 17:3 waamba’mba: “Buno bo bumi bwa myaka, namba bemuyuke [bafundenga maana a kwimuyuka, NW] anweba, Lesa yenka wa kine, ne Yesu Kilishitu ye mwatumine.”

ISHIKISHAI ANWE BENE AMBA: Nanchi byo ntanga Byambo bya Lesa ne kulangulukishapo mmwesha’mba kine ne bitabila?

Nga kupwila kwa kipwilo kwa bwina Kilishitu kwanema byepi kwi anweba?

Bahebelu 10:24, 25 baamba’mba: “Twilanguluke atwe bene na bene mu kwiubisha butemwe ne mingilo yawama; ne kuleka kupwila pamo ne, . . . poso kwibikishakotu byo mumona aja juba kasa jibenakufwenya pepi.”

Masalamo 122:1 aamba’mba: “Nasekejile byo bañambijile’mba, Tuyenga ku nzubo ya Yehoba.”

ISHIKISHAI ANWE BENE AMBA: Nanchi bwikalo bwami bumwesha lusanchilo lwa kuyuka luno lutangijilo lutanwa mu Byambo bya Lesa nyi? Ñondo wapwa, nanchi nashajilepo pa kupwila kumo kwa bwina Kilishitu na mambo a kuleka bintu bimo kundengela kubula kutanwako?

Nanchi muji na mukoyo wa kubulako bakwenu pe Lesa ne nkebelo yanji nyi?

Mateo 24:14 waamba’mba: “Ano mambo awama akasapwilwa panopantanda ponse mwa kwibashimwina . . . bino ke ku mpelo.”

Mateo 28:19, 20 waamba’mba: “Onkao mambo yainga na kwibasambisha ba mu mikoka yonse ya bantu, . . . ne kwibafunjisha balamenga byonse byo nemukambizhe.”

Masalamo 96:2 aamba’mba: “Imbai kwi Yehoba, takaikai jizhina janji, sapwilai mambo a lupulukilo lwanji pa juba, pa juba.”

ISHIKISHAI ANWE BENE AMBA: Nanchi uno mwingilo namunemeka mu bwikalo bwami nyi? Nanchi byo na mwingila umpa kishiino kya kuba’mba ano moba o tubena kwikalamo atama nyi?