Ikalai Bazhila mu Misango Yonse ya Bwikalo Bwenu
1. Mambo ka o kyanemeka kwikala bazhila mu misango yonse ya bwikalo bwetu?
1 Byo tuji bakalume ba Lesa wazhila, aye Yehoba, twibikishako bingi kwikala bazhila mu misango yonse ya bwikalo bwetu. (1 Pe. 1:15, 16) Kino kilumbulula’mba twesekesha kulama mikambizho ya Yehoba mu mbaji yonse ya bwikalo bwetu. Kupwila kwa nkambi kwa uno mwaka kuketupa kimye kya kumwesheshamo byubilo byazhila.
2. Twafwainwa kusunga byepi nsakwa mwa kupwila kwikala yabula biko?
2 Nsakwa Yetu Yafwainwa Kwikala Yabula Biko: Kwikala bingi kwingila na ngovu pa kunengezha nsakwa mwa kupwila ne kwiiwamisha bulongo kupwila saka kukyangye kutendeka. Twafwainwa kumona’mba byonse byo twaleta mukachi ka nsakwa twibisenda kuvwangakotu ne masaka abulamo bintu ne mabotolo. Umvwe twasendelamo bintu ne kuleta mu nsakwa, twafwainwa kabiji kwibisenda umvwe bintu byo twakusendelamo byapwa.
3. Ki ka kilengela ndochi, kabiji yakonsha kufumishiwa byepi pa mpunzha pa kupwila?
3 Pa kupwila kwa nkambi kumo kumo, bisemi bijiila kajo mukachi ka nsakwa kabiji kino kyawama bingi, bino kechi twafwainwa kusha bukuuku bwaponapona kufikila kimye kya kupwisha kupwila ne. Panyuma ya kuja kajo ka pachaile, kisemi kimo kimo kiji na mutembo wa kuwamisha po kyakujiilanga. Kechi twafwainwa kusha panshi mabotolo mwabula bintu, bizhiko, bukuuku, bipepala bya mapulasitiki, bipepala pa kunembela nangwatu mitanchi ya kupwila umvwe kipungu kya mute kyatendeka ne. Panyuma ya kajo ka pachaile twafwainwa kutolaula bintu byonse biji pa mpunzha po twaikala ne kwibitaya. Mwakonsha kusenda kipepala kya pulasitiki kuba’mba kisemi kiye kitayengamo ndochi, apa bino ne kuya na kwiitaya mu ngungulu nangwa mu kimbotela kiji pa mpunzha pa kupwila. Mwane kusha mabotolo muji bintu nangwa mwabula bintu saka alalazhama panshi ne, akonsha kuleta mapuso kabiji amwesha busaji. Umvwe tuji na nzubo nangwa musakuta pa mpunzha pa kupwila, monai’mba lubanza wenu mwamuwamisha bulongo. Mwakonsha kufunjisha baana kupyanga ne kuya na kwichila biswaswa ku mpunzha yanengezhiwa kutayako.
4. Ñanyi mizhilo yajinga mu bena Isalela yawamijile butuntulu bwabo bwa mubiji, kabiji lufunjisho ka bantu ba Yehoba lelo jino lo bakonsha kufunjilako ku kino?
4 Nanchi mumona’mba javula byolonyi kechi bisungwa bulongo na mambo a kwibingijisha kutama nenyi? Umvwe twasha twawamisha byolonyi bulongo panyuma ya kwibingijisha, kino kimwesha’mba ‘twibobila bantu bonse byawama.’ (Nga. 6:10) Muzhilo wa Lesa ye apele bena Isalela pa mambo a kutaya bifuma munda wayukanyikwa bulongo kabiji wapela bingi kumulondela. Buku wa Insansa sha Lupwa waamba’mba: “Muzhilo umo wajinga wa kutaya bifuma munda, abyo byafwainwe kuzhikwa bulongo kwalepa na kampu kuba’mba mpunzha kuji bantu ibule kwikala na biko.” (Tangai Mpitulukilo 23:12, 13.) Uno muzhilo wa kala wingila ne lelo jino kabiji tukekala bingi na butuntulu bwa mubiji bwawama umvwe twalondela mafunde ajimo. Kwikala bakishinka ku mizhilo ya Lesa yaamba pa kwikala ba butooto, kimye kyonse kuleta mfweto ne kwitupatulako ku ino ntanda.—Mpitu. 28:9, 10.
5, 6. Butemwe bwakonsha kwitutundaika byepi kwikala ba butooto?
5 Kutemwa balongo betu kuketutundaika kwibalangulukilako. ‘Butemwe . . . kechi buba bya bumvu ne. Kechi bwikebela bintu ne.’ (1 Ko. 13:4-5) Kechi kyawama kusha ndochi po twaikala ne, mambo bakwetu nabo baikala kipikipi ne atweba. Kechi kyawama kusha byolonyi na ndochi ne, mambo bakwetu nabo basakukeba kwibingijisha. Onkao mambo, twayai tumweshe butemwe ku bakwetu.—Yoa. 13:35.
6 Tutemwa bingi na mambo a mapunzha etu o tupopwelapo kabiji tusanchilwa bingi pa mwingilo wawama wingijiwa mu kuwamisha ano mapunzha. Twayai atweba bonse tutwajijile kwingila na ngovu “twitokeshe atwe bene ku bubipisho bonse bwa mubiji ne bwa muchima, kasa tulumbulula buzhile bwetu mu moyo wa kwakamwa Lesa.” (2 Ko. 7:1) Ikalai na muteeto wa kuwamisha pa mazubo enu ne kufunjisha baana nabo kuwamishanga pa nzubo. Ikalai ba butooto pa Mazubo etu a Bufumu, kabiji ne kyapelako umvwe twapwila pamo pa kupwila kukatampe, mwane lekai kupwila kwetu kutumbijikenga mizhilo yawama ya Lesa wetu Wazhila Yehoba.—Isa. 60:2.
7. Nga byubilo byetu pa kupwila kwa nkambi bitumbijika byepi Lesa?
7 Byubilo byetu bitulengela kupusanako na bantu bakwabo kabiji bitumbijika Lesa. (1 Pe. 2:12) Pa kupwila kwa nkambi, byubilo bya Bakamonyi ba kwa Yehoba bikamwekangatu ku uji yense. Onkao mambo, ibikishaiko kuba’mba mukekale ba butooto ku mubiji, kusunga bulongo mpunzha yetu, ne kwikala bazhila mu misango yonse ya bwikalo bwenu.
[Kitenguluzha pa peja 5]
Mweshai Byubilo Byazhila
◼ Ikalai ba Butooto
◼ Sopai baana benu bulongo
◼ Langulukilaiko bakwenu