Twakonsha Kukwasha Byepi Bantu Batanwa ku Kivuluko?

1. Busapwishi ka bukasapwilwa pa 22 March, 2008?

¹ Pa 22 March, 2008, bantu bavula kuzhokoloka mwaya ntanda yonse bakasapwilwa busapwishi bukatampe bingi. Aba bakatanwa ku Kivuluko bakeumvwina pa mambo a butemwe bukatampe bwa Yehoba bo auba pa kunengezhezha bantu bukuzhi. (Yoano 3:16) Bakafunda pa mambo a Bufumu byo buji kabiji ne Yehoba byo akebwingijisha kufikizha kyaswa muchima wanji panopantanda. (Mat. 6:9) Bakemwena bene butemwe ne lukwatankano luji pakachi ka bantu ba Lesa kabiji ne byo tutambwila bantu.—Sala. 133:1.

2. Twakonsha kukwasha byepi bantu bafunda Baibolo bakatanwa ku Kivuluko?

² Bafunda Baibolo: Pa bantu bakatanwako pakekala ne boba bo twatendekatu nabo kufunda Baibolo. Bayukanyikishai ku balongo ne banyenga. Balumbulwilai kupwila ko twikala nako mulungu ne mulungu, kabiji ne kwibapishako pacheche pa nzubo ya Bufumu. Jashi byo jikambiwanga, ñambi ukatundaika bantu ba uno mutundu kutwajijila kukomenako ku mupashi. Mwakonsha kwingijisha bishinka byaambiwapo mu jashi kutundaikilamo bantu bo mufunjisha Baibolo.

3. Twakonsha kutundaika byepi basapwishi bakoka bakatanwa ku Kivuluko?

³ Bakoka: Basapwishi bamo bakoka nabo bakatanwako. Bemunai. Kechi kyawama kwibashikisha nangwa kwamba bintu byakonsha kwibalengesha bumvu ne. Panyuma ya Kivuluko, bakulumpe bakafwakesha basapwishi bonse bakoka bakatanwako, kwibasanchila kabiji ne kwibatundaika kukeya ku kupwila kukwabo kwa kipwilo.

4. Nga atweba bonse pa muntu pa muntu twakonsha kukwasha byepi benyi?

⁴ Benyi: Bamo bakatanwako bakonsha kwikala balunda netu nangwa balongo betu ba mu kisemi bo twaichile. Bakwabo bakonsha kwikala boba baichilwe mu mukwekele wiikajila. Umvwe mwamona bantu bo mwabula kuyuka, batambwilai ne kwibemuna. Kampe kyo kimye kitanshi kutanwako ku kupwila kwetu. Byo mubena kwisamba nabo mwakonsha kwibepuzha ko mwafwainwa kwibatana. Umvwe mwibafwakesha nangwa mwibatumina foni panyuma ya Kivuluko, mwakonsha kwibatundaika kufunjilapo byavula ne kwibambila’mba mufundenga nabo Baibolo.

5. Twakonsha kwamba’mba ka pa kutendeka lufunjisho lwa Baibolo?

⁵ Bishinka biji mu jashi ja Kivuluko byakonsha kwingijishiwa kushilamo buku wa Baibolo Ufunjisha pa kukabwelako. Kya kumwenako, ñambi ukamba jashi ja Kivuluko ukatanga nangwa kwambapo byambo biji mu Isaya 65:21-23. Pa kukabwelako, mwakonsha kwamba’mba, “Ubai nemumweshepo bintu byawama bikwabo byo tukamwenamo mu bukuzhi.” Apa bino mwaingijisha peja 4 ne 5 mu buku wa Baibolo Ufunjisha. Nangwa mwakonsha kwamba’mba, “Bantu bavula balanguluka’mba bungauzhi bwa kwa Isaya kana bukafikizhiwa ñanyi kimye.” Apa bino mwisamba palagalafu 1 kufika ku 3 mu kitango 9. Jishinda jikwabo ke kutongolapotu bishinka bimo byaambile ñambi, apa bino mwamumwesha muntu buku wa Baibolo Ufunjisha ne kumubula bya kufunda lufunjisho.

6. Mashuko ka atweba bonse o tuji nao byo tubena kukokela mukambizho wa Yesu wa kuvuluka lufu lwanji?

⁶ Twayai atweba bonse tukamonepo mashinda a kukwashishamo bantu bafunda Baibolo, basapwishi bakoka ne benyi bakatanwako ku Kivuluko. (Luka 22:19) Kine Yehoba uketupesha bingi byo tukengilangako pakatampe mu uno mwingilo wa Bufumu.

Bya Kwamba pa Kusha Magazini

Kyamba kya Usopa Jan.–Mar.

“Mbena kukeba kuyuka mulanguluko wenu pa byaambiwa pano. [Tangai Bahebelu 13:7.] Baibolo pano itukambizha kumona byaubanga bakalume ba Lesa bakishinka ne “kulonda lwitabilo lwabo.” Abya mwakilangulukapo pa byo twafwainwa kuba kino mu ano moba etu nyi? [Lekai akumbule.] Ino magazini yaamba pa lwitabilo lwa kwa Elaija kabiji ne byo twakonsha kufunjilako ku byajinga bwikalo bwanji.”

Awake Mar.

“Nanchi kwingijisha bingelekezha kwawama nyi, kwatama? [Lekai akumbule.] Akimonai byaamba Baibolo pa mambo a kino. [Tangai Isaya 65:11.] Kino kibaba kyamwesha kana kwingijisha bingelekezha kwayilamo na bifunjisha Baibolo nyi, nangwa ne.” Mumweshai kibaba kiji pa peja 10.

Kyamba kya Usopa Jan.–Mar.

“Bantu bavula balanguluka’mba byubilo byabo byatama bingi, kabiji bimye bimo bazhinauka amba kana Lesa wakonsha kwibalekelako mambo nyi, nangwa ne. Nanchi mwalanguluka’mba kujipo luketekelo lwa bano bantu nyi? [Lekai akumbule.] Monai Yesu byo etulaya’mba bantu ba uno mutundu bakonsha kukasululwa ne kwitabilwa kwi Lesa. [Tangai Yoano 8:32.] Kino kibaba kyamwesha bukine byo bwakonsha kupimpula bwikalo bwa muntu kwikala bwawama.”

Awake Apr.

“Abya tubena kwikala mu kimye kyaambiwapo papo nyi? [Tangai 2 Timoti 3:1-4, apa bino, muleke akumbule.] Kuji bishinka byakonsha kwitulengela kukeba kuyuka ano moba apelako, mambo bintu bibena kubiwa bibena kumwesha’mba katatakatu tukamone bintu byawama panopantanda. Ino magazini yalumbulula kino.”