Kitango 29

Kuba Mingilo Yawama pa Juba ja Sabado

KYAJINGA kimye kya mwela wa mebele mu 31 C.E. Saka papita kala bañondo bacheche kufuma pesambijile Yesu na mwanamukazhi ku mushima mu Samaliya kimye kyo afuminenga ku Yudea kuya ku Ngalilea.

Panyuma ya kufunjisha mu Ngalilea pa kimye kyabaya, Yesu wabwelele jibiji ku Yudea ko asapwijilenga mu mashinagoga. Kwesakana na bitubula Baibolo pa mwingilo wanji mu Ngalilea, waambapotu bintu bicheche pa mwingilo wa kwa Yesu ye aingijile mu Yudea byo abweleleko jibiji ne mu bañondo bo aikeleko panyuma ya Kijiilo kya Lupitailo kyajingako. Bantu bavula kechi bateleko muchima ku mwingilo wanji mu Yudea byonka byo kyajinga mu Ngalilea ne.

Ponkapo Yesu wayile mu muzhi mukatampe wa Yudea, Yelusalema pa kimye kya Kijiilo kya Lupitailo mu 31 C.E. Monka muno mu Yelusalema kwipi na Kibelo kya Mikooko kwajinga kizhiba kyo batelanga’mba Beteseda kwaiyanga bantu bavula bakolelwenga, bampofu ne bilema. Bano bantu baketekejile amba bakonsha kubukwa kupichila mu kowa mu kizhiba umvwe mema beasunkenya.

Pajinga pa juba ja Sabado ne Yesu wamwene mwanamulume ku kizhiba wakolelwe pa myaka 38. Yesu byo ayukile’mba uno muntu wakolelwe pa myaka yavula wamushikishe’mba: “Nanchi ubena kukeba kubukwa nyi?”

Uno muntu wamukumbwile Yesu amba: “Mwane, kafwako muntu wakungibizha mu kizhiba umvwe mema beasunkenya ne; bino amiwa umvwe kankebe kutwelamo, mukwabo upichila kulutwe yami.”

Yesu wamwambijile’mba: “Imana, shikula musengele wobe wende.” Ponkapo uno muntu wakosele kabiji washikwile musengele wanji watatula ne kwenda!

Bino Bayudea byo bamwene uno muntu baambile’mba: “Jino juba ke juba ja Sabado, kabiji kechi wafwainwa kusenda musengele wobe ne.”

Bamushikishe’mba: “Nanchi ñanyi muntu waji kukwambila amba, ‘Shikula musengele wende’?” Yesu wafumineko mambo kwajinga bantu bavula kabiji uno muntu ye abukile kechi wamuyukile Yesu ne. Nangwa byonkabyo, Yesu ne uno muntu basambakene mu nzubo ya Lesa ne aye wayukile muntu wamubukile.

Onkao mambo, uno muntu ye babukile wataine Bayudea ne kwibabula’mba Yesu ye wambuka. Bayudea byo bayukile kino, bayile kwi Yesu. Mambo ka o bayijile? Nanchi bayile’mba bakayuke jishinda jo engijisha kubilamo bino bintu bya kukumya nyi? Ine. Bino bakebelenga mwakumutaina na mambo, mambo waubilenga bino bintu byawama pa juba ja Sabado. Kabiji batatwile kumukatazha! Luka 4:44; Yoano 5:1-16.

▪ Myaka inga yapichilepo kufuma Yesu po afwakashijile Yudea?

▪ Mambo ka kizhiba kya Beteseda o kyayukanyikilwe?

▪ Ñanyi kya kukumya Yesu kyo aubile ku kizhiba, kabiji Bayudea beumvwine byepi?

Kitango 30

Wakumbwile Bamupelemo Mambo

BANTANGI ba bupopweshi bwa Bayudea byo bamupelemo mambo Yesu a kuzhilulula juba ja Sabado, aye wibakumbwile’mba: “Batata ne luno bakingila, ne amiwa nkingila.”

Nangwa kya kuba Bafaliseo bamupelengamo mambo, mwingilo wa kwa Yesu kechi wazhijikilwe na muzhilo wa juba ja Sabado ne. Mwingilo wanji wa kusapwila ne kubuka wafumine kwi Lesa kabiji pa kulondela byaubanga Lesa, wamwingijilenga pa juba pa juba. Nangwa byonkabyo, mukumbu wanji walengejile Bayudea kuzhingila bingi kabiji basakilenga kumwipaya. Mambo ka?

Basakilenga kumwipaya kechi na mambo a kuyukatu’mba Yesu wazhilulwilenga juba ja Sabado ne, bino ne na mambo a kuba’mba Yesu waambile mwenga pa kwitela mwine amba Mwana Lesa. Nangwa byonkabyo, Yesu kechi wachiine ne, kabiji wibabujile bulunda bwawama bo ajinga nabo ne Lesa. Waambile’mba: “Shanji watemwa Mwana kabiji umumwesha bintu byonse aye byo oba.”

Yesu watwajijile kwamba’mba: “Byonkatu Shanji byo asangula bafu ne kwibapa bumi, ne Mwana naye upana bumi ku boba bo akeba kupa.” Kine, Mwana ubena kusangula bafu ku mupashi! Yesu waambile’mba: “Yense umvwa byambo byami ne kwitabila yewa wantumine, . . . wafumamo mu lufu ne kwikala na bumi.” Watwajijile kwamba’mba: “Kimye kibena kwiya kabiji kyafika, bafu kyo bakomvwa jiwi ja Mwana Lesa ne boba bamumvwijile bakekala na bumi.”

Nangwa kya kuba kechi pajipo jishimikila jibena kumwesha’mba pa kyokya kimye kyo aambile bino byambo wasangwilepo kala muntu kufuma ku bafu ne, wabujile aba bamupelengamo mambo amba kukekala lusanguko lwa bafu. Waambile’mba: “Kange mukumye kino ne, mambo kimye kibena kwiya aba bonse baji mu bilende kyo bakomvwa jiwi janji ne kufumamo.”

Pa kyonkakya kimye, Yesu po po esolwele patoka amba ye uji na mwingilo wanema mu nkebelo ya Lesa. Bino aba bamupelengamo mambo Yesu bajinga na bishinka byavula kukila ne pa byo ebabubijile pa mambo a bino bintu. Yesu wibavulwilemo’mba: “Anweba mwatuma bantu kwi Yoano, ne aye washimuna bukine.”

Pa myakatu ibiji yapichilepo, Yoano Mubatizhi wabujile bano bantangi ba bupopweshi bwa Bayudea pa muntu ukeya kulutwe yanji. Yesu byo ebavulwilengamo pa mambo a muntu ye banemekele bingi aye Yoano ye bakashile, waambile’mba: “Mu kakimye kacheche anweba mwaswile kusangalela mu kyeya kyanji.” Yesu wibavulwilemo bino amba ebakwashe bayuke’mba aye ye ukebapulusha. Bino Yesu kechi waketekejile pa kushimuna kwa kwa Yoano ne.

“Mingilo . . . yo mbena kwingila [kuvwangakotu ne kya kukumya kyo aubile], yo ibena kumwesha amba Batata bantumine.” Kununga pa kino, Yesu watwajijile kwamba’mba: “Batata bantumine nabo banshimuna.” Kyakumwenako, Lesa washimwine pe Yesu kimye kyo abatizhiwenga amba: “Uno ye Mwanami ye natemwa.”

Kine, aba bamupelengamo mambo Yesu kechi bajingapo na bishinka bya kumukainapo ne. Binembelo byonka byo batanganga byo byaambile pe aye! Yesu wapezhezheko kwamba’mba: “Inge mwaitabijile Mosesa, ne amiwa umvwe mwangitabila mambo aye wanembele pe amiwa. Bino umvwe mwabula kwitabila bintu byo anembele, muketabila byepi byambo byami?” Yoano 5:17-47; 1:19-27; Mateo 3:17.

▪ Mambo ka mwingilo waingijile Yesu o abujile kuzhilulula juba ja Sabado?

▪ Yesu walumbulwile byepi mwingilo wanji wanema mu nkebelo ya Lesa?

▪ Pa kumwesha’mba Mwana Lesa, kushimuna kwa kwa ñanyi Yesu ko aambilepo?