Kitango 33

Wafikizhe Bungauzhi bwa Isaya

YESU byo ayukile’mba Bafaliseo ne baana ba bwanga ba kwa Heloda bakeba kumwipaya, aye ne baana banji ba bwanga bafumineko ne kuya ku Kalunga ka Ngalilea. Jibumba jikatampe kufuma monse mu Pelisitina ne monse mwapela mipaka ya Pelisitina jakonkene kwi aye. Wabukile bantu bavula kya kuba ne bonse bajinga na bikola byakatazha baishilenga koaji na kumukwata.

Na mambo a kuba jibumba jakijishemo kubaya, Yesu wabujile baana banji ba bwanga kumuletela bwato kuba’mba akanjilemo. Byo ebushinjikile kufuma ku kitulu, jibumba jalekele kumubunga. Wakonsheshe kwibafunjisha saka aikala mu bwato nangwa kuya ku mpunzha ikwabo yajinga kwipi na kitulu kuba’mba akwashe bantu konkakwa.

Mwana wa bwanga aye Mateo wamwene’mba mingilo ya kwa Yesu yafikizhe “akya kyaambilwe mwi ngauzhi Isaya.” Kepo Mateo atongwele bungauzhi bwafikizhe Yesu amba:

“Talai! Kalume wami ye nasala, ye natemwa, kabiji mo mmwena lusekelo! Nkamupa mupashi wami, ne aye ukabula bantu bonse jishinda jaoloka ja kubilamo bintu. Aye kechi ukatoboka nangwa kutatauka ne; kabiji kafwako ukomvwa jiwi janji mu mikwakwa ne. Kabiji jitete jafyotoka kechi ukejichimuna ne, nangwa muzhinge ufutumuka kechi ukamuzhima ne, poso akafikizhe bunchibamambo bwaoloka. Kine, bantu bakaketekela mu jizhina janji.”

Yesu ye kalume ye batemwa kabiji Lesa mo amwena lusekelo. Kabiji Yesu wayukanyikishe bunchibamambo bwaoloka bwakine byo buji bo bafile na mambo a mafunjisho a bupopweshi bwa bubela. Na mambo a kubula kwingijisha bulongo mizhilo ya Lesa, Bafaliseo kechi bakwashanga muntu wakolwa pa juba ja Sabado ne. Byo ayukanyikishe bunchibamambo bwa Lesa bwaoloka, Yesu wakasulwile bantu ku bisendwa bya mafunjisho a bantu. Kino kyo kyalengejile bantangi ba bupopweshi kukeba kumwipaya.

Nanchi byambo bya kuba’mba ‘aye kechi ukatoboka nangwa kutatauka kuba’mba bakamumvwe mu mikwakwa ne,’ byatala mu ka? Byo abukilenga bantu, Yesu “wibakambizhenga kyakosa kubula kumusolola.” Kechi wakebelenga kwiyukisha aye mwine mu mikwakwa kupichila mu kutaya mbila nangwa bantu kwamba masawakya a bubela pe aye ne.

Kabiji Yesu wasapwijilenga byambo bya lutekenesho ku bantu bo bafyotwele nobe jitete, kwibachimuna ne kwibanyantaula. Bajinga nobe muzhinge ufutumuka wajinga pepi kuzhima. Yesu kechi wachimwine jitete jo bafyotwele nangwa kuzhimya muzhinge wafutumukilenga ne. Bino na mambo a lusa ne butemwe, aye wainwinenga bulongo bakimote. Kine, Yesu ye muntu bantu ye bafwainwa kuketekela! Mateo 12:15-21; Mako 3:7-12; Isaya 42:1-4.

▪ Yesu wayukanyikishe byepi bunchibamambo bwaoloka kwa kubula kutoboka nangwa kutatauka mu mikwakwa?

▪ Bañanyi baji nobe jitete jo bafyotola kabiji nobe muzhinge ufutumuka kabiji Yesu wibalama byepi?

Kitango 34

Wasalulwile Batumwa Banji

PAPICHILE mwaka umo ne kichika kufuma kimye Yoano Mubatizhi po aambile pe Yesu amba Mwana Mukooko wa Lesa ne kimye Yesu kyo atatwile mwingilo wanji wa kusapwila. Pa kyokya kimye, Andeleo, Shimona Petelo, Yoano kampe ne Yakoba (kolojanji Yoano), Filipa ne Natanela (watelwanga’mba Batolomo) bo bajinga baana banji ba bwanga batanshi. Mu kuya kwa kimye, bavula benungileko kwi abo kulondela Kilishitu.

Byonkabyo, Yesu winengezhezhe kusalulula batumwa banji. Bano bo baikele balunda nanji bo afunjishe bya kwingila mwingilo. Bino saka akyangye kwibasalulula, Yesu wayile ku mutumba ne kulomba bufuku bonse, kyamweka walombelenga maana ne kuba’mba Lesa amubile bibusa. Byo bwakile, waichile baana banji ba bwanga kabiji mwi abo wasalulwilemo batumwa 12. Nangwa byonkabyo, byo bakitwajijile kufunda kwi Yesu, batelelwenga amba baana ba bwanga.

Aba batanu na umo Yesu bo asalulwile batongolwa peulupo, ke boba baikele baana banji ba bwanga batanshi. Yesu wasalulwile ne Mateo waingilanga mwingilo wa busonkeshi. Bakwabo batanu bo asalulwile bajinga, Yudasa (watelwanga’mba Tadeusa), Yudasa Isakaliota, Shimona watelwanga’mba wa mukoyo, Tomase ne Yakoba mwana Alefesa. Uno Yakoba watelwanga ne jikwabo amba Mucheche, kampe na mambo a kukepa mubiji nangwa kwikala mwanyike mu myaka na mutumwa mukwabo aye Yakoba.

Pa kikye kimye bano batumwa 12 baikajile ne Yesu pa kimye kyabaya kabiji wibayukile bingi bulongo. Bavula ba mu bano bajinga balongo banji. Yakoba ne nkasanji Yoano bajinga bankasa ne kolo ne Yesu mu jivumo jikwabo. Kabiji kampe Alefesa wajinga nkasa ne kolo ne Yosefwa, bashanji Yesu bakushinda. Onkao mambo, mwana wa kwa Alefesa aye mutumwa Yakoba wajinga nkasa ne kolo ne Yesu mu jivumo jikwabo.

Yesu kechi kyamukatazhanga kuvuluka mazhina a batumwa banji ne. Nanchi mwakonsha kwiavuluka nyi? Abino byo byo bajinga: Ba Shimona babiji, ba Yakoba babiji, ne ba Yudasa babiji. Kabiji Shimona wajinga nkasa ne kolo ne Andeleo, Yakoba naye wajinga na nkasanji aye Yoano. Abino byo byo mwakonsha kuvuluka mazhina a batumwa batanu na basatu. Kabiji bakwabo bana bajinga musonkeshi (Mateo), awa wazhinaukile (Tomase), wajinga munshi ya kichi ye baichile (Natanela) ne mulunda nanji aye Filipa.

Batumwa jikumi na umo bafumine ku Ngalilea, nyaunda mwajinga muzhi mwaikalanga Yesu. Natanela wafumine ku Kena. Filipa, Petelo ne Andeleo bafumine ku Beteseda, kabiji palutwe kacheche Petelo ne Andeleo bavilukijile ku Kapenama kyamweka akwa ko kwaikalanga Mateo. Yakoba ne Yoano bakwatanga masabi kabiji kyamweka nabo baikalanga mu Kapenama nangwa kwipi na Kapenama. Kyamweka Yudasa Isakaliota wasolwele Yesu, ye wajingatu mutumwa wafumine ku Yudea. Mako 3:13-19; Luka 6:12-16.

▪ Bañanyi batumwa bajinga balongo ba kwa Yesu?

▪ Bañanyi bajinga batumwa ba kwa Yesu kabiji mwakonsha kuvuluka byepi mazhina abo?

▪ Ñanyi manyaunda mwafumine batumwa?