Kitango 38

Nanchi Yoano Kechi Wajinga na Lwitabilo Nenyi?

YOANO Mubatizhi, saka apwishamo kala mwaka umo mu kaleya, watambwijile sawakya wa kusangulwa kwa mwana wamulume wa mwanamukazhi wafwijilwe mu muzhi wa Naina. Pano bino, Yoano wasakile kumvwa ku mwine Yesu pa mambo a mwatajile kino kintu. Onkao mambo, watumineko baana banji ba bwanga babiji na kumushikisha amba: “Nanchi yenu twatengejilenga nyi, inyi kukeya muntu ungi?”

Buno bwipuzho bwakonsha kumwesha luzhinauko, mambo Yoano wamwene mupashi wa Lesa saka ekila pe Yesu ne kumvwa jiwi ja Lesa ja kumwesha’mba waitabilwa kimye Yesu kyo abatizhiwe saka papita kala myaka ibiji. Bwipuzho bwaipwizhe Yoano bwakonsha kulengela bamo kulanguluka amba kechi wajinga na lwitabilo lwakosa ne. Pano bino, lwitabilo lwanji lwakosele. Umvwe kya kuba Yoano kechi wajinga na lwitabilo lwakosa ne, Yesu inge kechi waambilepo pe aye pa kyokya kimye ne. Pano mambo ka Yoano o ashikishe buno bwipuzho?

Kampe Yoano wakebelenga Yesu kumulumbulwila amba ye Mesiasa. Kino kyamukoseshe bingi Yoano byo ajinga mu kaleya. Bino kyamweka kuji bintu byavula byalengejile Yoano kushikisha buno bwipuzho. Wakebelenga kuyuka umvwe kwajinga muntu mukwabo ukeya kuswana pe aye, ukafikizha bintu byonse byaambijilwe jimo amba Mesiasa ye ukebyuba.

Kwesakana na bungauzhi bwa mu Baibolo Yoano bo ayukile, Mushingwa wa Lesa ye ukekala mfumu, mupokolweshi. Nangwa byonkabyo, Yoano wakijinga mu kaleya pa bañondo bavula kufuma Yesu po abatizhiwe. Onkao mambo, kyamweka Yoano washikishe Yesu amba: ‘Nanchi yenu mukekajika Bufumu bwa Lesa na bulume nangwa kukeya ungi, nswanyi, ye twafwainwa kutengela kufikizha bungauzhi bonse bubena kwamba pa lukumo lwa kwa Mesiasa nyi?’

Mu kifulo kya kubula baana ba bwanga ba kwa Yoano amba, ‘Ee yami iye waambijilwe jimo kwiya!’ Pa kyonkakya kimye Yesu wabukile bantu bavula bingi, kwibabuka bikola byapusana pusana. Kepo abujile aba baana ba bwanga amba: “Bwelai mukamubule Yoano bintu byonse byo mwaumvwa ne kumona: Bampofu babena kumona, bilema bibena kwenda, bambumba nabo babena kubukwa, bashinka matwi babena kumvwa, bafu nabo babena kusangulwa, kabiji bayanji nabo babena kusapwilwa mambo awama.”

Mu jishinda jikwabo, bwipuzho bwaipwizhe Yoano bwakonsheshe kumwesha’mba Yesu ukoba bintu byakila pa byo aubilenga kampe ne kumukasulula Yoano mu kaleya. Nangwa byonkabyo, Yesu kechi wabujile Yoano kutengela bya kukumya byakijile pa byaubilenga Yesu ne.

Baana ba bwanga ba kwa Yoano byo bayile, Yesu waalukijile ku jibumba ne kwibabula’mba Yoano ye “muluwe” wa Yehoba waambijilwe jimo mu Malakai 3:1 kabiji ye ngauzhi Elaija waambijilwe jimo mu Malakai 4:5, 6. Onkao mambo, watumbijikile Yoano kupichila mu kumwesakanya ku ngauzhi yense wajingako aye saka akyangye kwikalako, ne kwamba’mba: “Pa bonse basemwa ku banabakazhi, kafwako nangwa umo wakila Yoano Mubatizhi ne, bino awa mucheche mu Bufumu bwa mwiulu ye wamukila. Kufumatu mu moba a Yoano Mubatizhi kufika ne lelo, bantu babena kukeba na mukoyo Bufumu bwa mwiulu.”

Yesu kechi watazhizhenga mu kuba’mba Yoano ukaya mwiulu ne, mambo awa mucheche ye wakila Yoano. Yoano wanengezhezhe Yesu jishinda. Bino aye wafwile Kilishitu saka akyangye kubika katetesho ka lulayañano nangwa’mba lumvwañano na baana banji ba bwanga pa kuba’mba bakalamine nanji pamo mu Bufumu bwanji. O ene mambo Yesu o aambijile’mba Yoano kechi ukaya mu Bufumu bwa mwiulu ne. Yoano ukekala ngikazhi mu Bufumu bwa Lesa pano pa ntanda. Luka 7:18-30; Mateo 11:2-15.

▪ Mambo ka Yoano o ashikishe umvwe Yesu ye yewa waambijilwe jimo kwiya nangwa kutengela muntu ungi?

▪ Ñanyi bungauzhi bwafikizhe Yoano Yesu bo aambilepo?

▪ Mambo ka Yoano Mubatizhi o akabujila kwikala ne Yesu mwiulu?

Kitango 39

Betumbijikile ne Bepelwile

PANYUMA ya kwamba pa byubilo bya kwa Yoano Mubatizhi, Yesu watatwile kwamba pa bantu betumbijikilenga bene kabiji bakamfutumfutu bamuzhokolokele. Waambile’mba: “Kino kisemi kiji nobe baana babacheche baji pa kisankanyi na kubijika bakwabo, amba: ‘Twaji kwimwimbila mimpempe, pakuba anweba kechi mwaji kuzha ne; twaji kujila mabingo, bino anweba kechi mwaji kumvwa bulanda ne.’”

Yesu watazhizhe mu ka pa kwamba bino? Walumbululwile amba: “Yoano kechi waishile na kuja ne kutoma ne, bino bantu bamwambijilenga amba, ‘Uji na ndemona’; Mwana muntu waishile na kuja ne kutoma, bino bantu bamwambijilenga amba, ‘Talai! Uno muntu kiji kabiji kitomi, mulunda wa basonkeshi ne bandengamambo.’”

Kyakatazha bingi kutokesha bantu ku muchima. Kafwako kyakonsha kwibasangajika ne. Yoano waikajile bwikalo bwapela bwa kwikana bwa Munazili, kulondela byaambile malaika amba “kechi wafwainwa kutoma binyu” ne. Pano bino, bantu bamwambijilenga amba uji na ndemona. Kabiji Yesu waikelenga byonka byajinga bantutu bakwabo, kechi waikele bwikalo bwa kwikana ne, bino bamupelengamo mambo a kukizhamo kuba bintu.

Kyakatazha bingi kutokesha bantu ku muchima! Baji nobe banyike babena kukaya, bamo bakana kuzha umvwe bakwabo banyike babena kwimba mimpempe nangwa kuba bulanda umvwe bakwabo babena kujila. Nangwa byonkabyo, Yesu waambile’mba: “Bintu byaoloka byuba muntu byo bimumwesha amba uji na maana.” Biyukilo ko kuba’mba mingilo, yamwesheshe patoka amba mambo o bapelengamo Yoano ne Yesu ajinga a bubela.

Yesu waambile pa mizhi isatu yo afingile. Ino mizhi yajinga Kolazeni, Beteseda ne Kapenama mo aubijile mingilo ya kukumya. Yesu waambile’mba umvwe waubile ino mingilo mu mizhi ya Fenesya ya mu Tila ne Shidona, ba mu ino mizhi umvwe balapijile mu bivwalo bya majila ne kwipukula mu buto. Pa kuzhachisha ba mu Kapenama, kyamweka muzhi mo aingijile mwingilo wanji, Yesu waambile’mba: “Kikapelela bingi ba mu muzhi wa Sodoma mu Juba ja Kije kukila anweba.”

Kabiji Yesu watumbijikile Shanji wa mwiulu patoka. Waubile kino mambo Lesa wafile bukine bwanema bwa ku mupashi ku bamaana ne bamilangwe ne kusolola buno bukine ku bantu bepelwile baji nobe baana babacheche.

Yesu wapezhezheko na byambo byawama bya lwito bya kuba’mba: “Iyai konji, anweba bonse basulwila ne kunemenwa, ne amiwa nkemulengela kukokoloka. Sendai kikonkoji kyami ne kufunda kwi amiwa, mambo ne kimote kabiji nakoka muchima, ne michima yenu ikakokoloka. Mambo kikonkoji kyami kyapela ne byo nemwambila kusenda kechi byakatazha ne.”

Yesu wakokolweshe byepi bantu? Waubile kino kupichila mu kwibakasulula ku buzha bo bajingamo bwa bisho bantangi ba bupopweshi bo batwikanga bantu. Kino kyavwangilemo ne mizhilo yakosa ya kulama juba ja Sabado. Kabiji wamwesheshe ne jishinda ja kukasulukilamo aba bo bakatazhanga ku bakulumpe ba mu kafulumende ne ku boba banemejilwe na bundengamambo bwabo na mambo a kwibakatazha ku jiwi jabo ja mu muchima. Wasolwejile aba bamanaminenga byo bakonsheshe kulekelwa mambo pa bundengamambo bwabo ne byo bakonsheshe kwikala na bulunda bwawama ne Lesa.

Kikonkoji kyapela Yesu kyo apaine ke kwipana kwi Lesa kwingijila Shetu wa mwiulu wa lusa kabiji wa kifyele. Kabiji kisendwa kyapela Yesu kyo apaine ku boba beya kwi aye ke kukokela bikebewa bya Lesa biketulengela kwikala na bumi, ko kuba’mba mikambizho yanji yanembwa mu Baibolo. Kukokela ino mikambizho kechi kwakatazha ne. Mateo 11:16-30; Luka 1:15; 7:31-35; 1 Yoano 5:3.

▪ Nga kisemi kyaambilepo Yesu kya bantu betumbijikilenga bene kabiji bakamfutumfutu kyajinga byepi nobe baana babacheche?

▪ Mambo ka Yesu o atumbijikile Shanji wa mwiulu?

▪ Mu ñanyi mashinda bantu mo banemenwa kabiji Yesu waambile kwibakokolosha byepi?