Kitango 46

Mwanamukazhi Wakwachile ku Kivwalo kya kwa Yesu

BANTU ba mu Kapenama byo baumvwine amba Yesu wabwela kufuma ku Ndekapoli, jibumba jikatampe jakonkene ku kalunga ka mema kuba’mba jimutambwile. Baumvwine amba wakainye luvula kabiji wabukile ne muntu ye bakatazhanga ku ndemona. Byo atuntukijile ku kitulu, bantu bamubungile ne kukebesha kuteleka.

Umo wakebeshe bingi kumona Yesu wajinga Yelusa mukulumpe wa nshinagoga. Wafukamine kwi Yesu ne kumusashijila bimye byavula amba: “Mwanami wamukazhi wakolwa bingi. Kine twayai mukamukwate maboko enu kuba amba abukwe.” Wajingatu na mwana wamukazhi umo wajinga na myaka ya kusemwa 12, uno mwana wanemene bingi kwi Yelusa.

Yesu waswile kuya ne jibumba jamulondejilenga ku nzubo ya kwa Yelusa. Twakonsha kufwanyikizha bantu byo batemenwe na mambo a kutengela kumona kya kukumya kikwabo. Pakuba mwanamukazhi umo mu luonde aye wateletu muchima pa lukatazho lwanji.

Uno mwanamukazhi wakolelwe kikola kya mukunko wa mashi pa myaka 12. Wayilenga ku bashayuka ba michi bapusana pusana kabiji waingijishe mali anji onse kuba’mba abukwe. Bino kafwako bukwasho bo atambwijile ne, pakuba kikola kyanji kyaswezhezhetu.

Byonka byo mwakonsha kufwanyikizha, kino kikola kechi kyamulengelangatu kukoka konka ne, bino kyamulengeshanga ne bumvu. Javula muntu uji na kikola kya uno mutundu kechi waambanga ku bantu pa mambo a kumanama kwanji ne. Kabiji mwayijile Mizhilo ya Mosesa, mwanamukazhi uji na kikola kya mukunko wa mashi waikalanga wa muzhilo, muntu yense wamukwatanga nangwa kukwata ku kivwalo kyanji kiji na mashi bamukambizhanga kowa ne kwikala wazhila kufikatu ne mabanga.

Uno mwanamukazhi waumvwine pa bya kukumya byaubile Yesu, kabiji wakebeshe bingi kumumona. Na mambo a kwikala wa muzhilo, waishile kunyuma mu jibumba saka amba’mba: “Umvwe nkwatetu ku kivwalo kyanji kya peulu, nsakubukwa.” Byo akwachileko, ponkapotu waumvwine’mba mashi achibika.

“Ñanyi waji kunkwata?” Buno bwipuzho bwashikishe Yesu bwafwainwe bwalengejile uno mwanamukazhi kuba moyo! Pano wafwainwe kuyuka byepi wamukwachile? Petelo waambile’mba: ‘Mufunjishi, jibumba jimubunga kabiji jibena kwimufina ne anweba kemushikishe amba “Ñanyi wankwata?”’

Byo aalulukile’mba amone uno mwanamukazhi, Yesu waambile amba: “Kuji waji kunkwata, mambo naumvwa bulume bwaji kulupukamo mwi amiwa.” Kine kuno kumukwata kechi kwajingatu konkakwe ne, mambo uno mwanamukazhi wabukilwe na mambo a bulume bwa kwa Yesu.

Uno mwanamukazhi byo amwene’mba kechi wafyama ne, waishile saka azakama ne kufukama kwi Yesu. Ponkapotu waambile ku meso a bantu bonse pa mambo a kikola kyanji ne byo abukilwe.

Uno mwanamukazhi byo esolwele, Yesu wamutekeneshe amba: “Mwanami, lwitabilo lobe lwa kulengela kubukwa; yanga mu mutende, kikola kyobe kyapwa.” Kyanema bingi kuyuka’mba muntu Lesa ye asala kulama ino ntanda wakasuluka bingi, uji na lusa ne kuta muchima bantu, kabiji uji na bulume bwa kwibakwasha. Mateo 9:18-22; Mako 5:21-34; Luka 8:40-48; Bena Levi 15:25-27.

▪ Yelusa wajinga ñanyi, kabiji mambo ka o aishijile kwi Yesu?

▪ Ñanyi lukatazho lwajinga na mwanamukazhi umo, kabiji mambo ka o kyamukatezhe kwiya kwi Yesu na kukeba bukwasho?

▪ Uno mwanamukazhi wabukilwe byepi, kabiji Yesu wamutekeneshe byepi?

Kitango 47

Mipolo Yaalukile ke Lusekelo Lukatampe

YELUSA byo amwene yewa mwanamukazhi wajinga na kikola kya mukunko wa mashi wabukwa, luketekelo lwanji mu bulume bwa kwa Yesu bwa kuba bya kukumya lwabayijileko. Pa kyokya kimye, Yelusa saka aita kala Yesu kwiya na kubuka mwananji wamukazhi wa myaka ya kusemwa 12 wajinga pepi kufwa. Nangwa byonkabyo, kintu Yelusa kyo achiinenga kyo kyamwekele. Yesu byo akyambilenga na uno mwanamukazhi, banabalume bamo baishile ne kunongotwela Yelusa amba: “Mwanenu wamukazhi wafwa. Kange mukatazhe Mufunjishi ne.”

Uno sawakya watamine bingi! Akifwanyikizhaitu byo kyajinga: Uno mwanamulume ye banemekele bingi mu nyaunda mo aikalanga, byo bamubujile’mba mwananji wamukazhi wafwa, bulume bwamupwile. Bino Yesu waumvwine saka bamba bino byambo. Ponkapo byo aalulukijile kwi Yelusa, Yesu wamutekeneshe amba: “Kwakamwa ne; ikalaitu na lwitabilo.”

Yesu wayijile pamo na uno mwanamulume wajinga na bulanda ku nzubo yanji. Byo bafikile, wataine bantu bajijilenga mabingo ne kuwowakana. Bantu bavula bakonkene saka bajila ne kwipumpaula na mambo a bulanda. Yesu byo atwelele, wibashikishe amba: “Mambo ka o mubena kubila kiwowo ne kujila mabingo? Uno mwana kechi wafwa ne, walaala tulo.”

Bantu byo baumvwine kino, batatwile kumuseka ne kumwendeleka Yesu mambo bayukile’mba kashimbi wafwa. Bino Yesu wibabujile’mba uno mwana walaala tulo. Byo aingijishe bulume bwamupele Lesa, wamwesheshe bantu kuba’mba wakonsha kusangula bantu byonkatu muntu byo akonsha kubusha mukwabo walaala.

Yesu wibalupwilemo bonse kushamotu Petelo, Yakoba, Yoano, ba inanja mwana ne shanji. Wayile na bano batanu palaajile kashimbi. Yesu byo amukwachile mwana pa kuboko, wamwambijile’mba: “Talifa kumi,” kulumbulula amba: “Kashimbi, nakwambila namba, ‘Imana!” Ponkapotu uno kashimbi waimene ne kutatula kwenda. Kino kintu kyamwekele kyalengejile bansemi banji kwikala na lusekelo lukatampe.

Byo akambizhe’mba uno mwana bamupe kajo aje, Yesu wakambizhe kyakosa bingi Yelusa ne mukazhanji amba kange babulepo muntu nangwa umo pa kyokya kyamwekele ne. Nangwa kya kuba Yesu wibabujile bino, nkuwa ya bintu byo aubile yakumbene mu yoya mpunzha yonse. Luno lo lwajinga lusanguko lwa bubiji Yesu lo aubile. Mateo 9:18-26; Mako 5:35-43; Luka 8:41-56.

▪ Yelusa watambwijile ñanyi sawakya, kabiji Yesu wamutekeneshe byepi?

▪ Bintu byajinga byepi byo bafikile ku nzubo ya kwa Yelusa?

▪ Mambo ka Yesu o aambijile’mba awa mwana wafwile walaala tulo?

▪ Bañanyi bantu batanu bashinkilwepo kimye Yesu kyo asangwile mwana?