Kitango 49

Lwendo Lukwabo lwa Kusapwila mu Ngalilea

NANCHI byo papichile pepi myaka ibiji ya kusapwila, Yesu watatwile kwingila uno mwingilo na mulele nyi? Kechi byo byo aubile ne, aye waingijilenga na mukoyo mwingilo wanji wa kusapwila byo aimene lwendo lukwabo lwa busatu lwa kuya ku Ngalilea. Wapitañenenga mu mizhi yonse ikatampe ne icheche saka afunjisha mu mashinagoga ne kusapwila mambo awama a Bufumu. Bintu byo amwene pa luno lwendo byamulengejile kwingila na mukoyo mwingilo wa kusapwila.

Konse Yesu ko ayilenga, wamwenenga jibumba jakebewenga kubukwa ku mupashi ne lutekenesho. Jino jibumba jajinga nobe mikooko yabula kafunga, jasubakenenga ne kupelelwa kabiji wijubile lusa. Wabujile baana banji ba bwanga amba: “Bujimi kine bwabaya, pakuba bamingilo bakepa. Onkao mambo, lombai Mwine mwina bujimi atume bamingilo mu bujimi bwanji.”

Yesu wafuukwilepo bya kuba na uno mwingilo. Waichile batumwa 12 bo asalulwile saka papita kala mwaka umo. Wibabenye babiji babiji kulenga mabumba atanu na jimo a basapwishi ne kwibapa mikambizho. Wibabujile amba: “Kange muye ku bantu babula Bayudea nangwa kutwela mu muzhi wa bena Samaliya ne, pakuba anweba yainga ku mikooko yalubilamo ya bena Isalela. Kabiji pa kuya saka musapwila amba: ‘Bufumu bwa mwiulu bwafwenya pepi.’”

Buno Bufumu bo basapwijilenga ke bobwa Yesu bo ebafunjishe kulombapo mu lulombelo lwa kumwenako. Bufumu bwafwenyenye pepi mambo Mfumu Lesa ye atongola aye Yesu Kilishitu wajinga ponka. Pa kumwesha’mba baana banji ba bwanga bajinga bantomesha ba mu kafulumende wakila wa bantu, Yesu wibapele bulume bwa kubuka bakolwa ne kusangula bafu. Kabiji wibakambizhe kwingila ino mingilo kyatutu.

Kabiji wabujile baana banji ba bwanga kubula kusenda bintu pa lwendo lwabo lwa kusapwila. Wibabujile amba: “Kange musende mali a ngolode nangwa a siliva nangwa a mukuba mu bikwama byenu ne, nangwa kusenda mukoolo wa kajo nangwa bivwalo bibiji nangwa nkwabilo nangwa nkonto ne, mambo yense wamwingilo bakamupa kajo.” Aba baumvwinenga byo bebasapwijilenga bo bakonsheshe kwibanengezhezha kajo ne mwa kulaala. Monka mwambijile Yesu amba: “Mu muzhi yense mukatampe ne mucheche ye mukatwelamo, mukakebemo muntu wafwainwa ne kwikala monka poso mwafumamo.”

Kepo Yesu ebapele mikambizho pa bya kusolomoka bena mazubo pa mambo a Bufumu. Wibakambizhe amba: “Umvwe mwatwela mu nzubo, imunai mwina nzubo. Umvwe nzubo yafwainwa, mutende ekalemo, kabiji inge kechi yafwainwa ne, mutende wenu emubwelele. Yense ukabula kwimutambwila nangwa kuteleka ku byambo byenu, pa kufumako ku yoyo nzubo nangwa muzhi, mukakunte lukungu ku maulu enu.”

Muzhi yense mo bakaine mambo a Bufumu, Yesu waambile’mba awo muzhi bakamuzhachisha bingi. Walumbulwile amba: “Kine nemwambila namba: Kikapelela bingi mizhi ya Sodoma ne Gomola mu Juba ja Kije kukila yewo muzhi.” Mateo 9:35–10:15; Mako 6:6-12; Luka 9:1-5.

▪ Ñanyi kimye Yesu kyo atatwile lwendo lwanji lwa busatu lwa kusapwila mu Ngalilea, kabiji lwamulengejile kushiinwa ka?

▪ Byo atuminenga batumwa 12 na kusapwila, mikambizho ka yo ebapele?

▪ Mambo ka o kyayijilemo baana ba bwanga kufunjisha amba Bufumu bwafwenya pepi?

Kitango 50

Winengezhezhe Kupita mu Lumanamo

PANYUMA ya kubula batumwa banji mashinda mwa kwingijila mwingilo wa kusapwila, Yesu wibajimwineko pa mambo a bantu bamilengulwila. Waambile’mba: “Mbena kwimutuma nobe mikooko mukachi ka misuka; . . . Jimukai na bantu; mambo bakemutwala mu bije ne kwimututaula mu mashinagoga abo. Bakemutwala ku ba bitumbafumu ne ku bamfumu na mambo a amiwa.”

Nangwa kya kuba baana banji ba bwanga bapichile mu lumanamo lwabaya bingi, Yesu wibalayile amba: “Kabiji byo bakemufikizha kokwa, kange mukakamwe byo mukamba ne, mambo bakemubula byo mukamba mu kyokya kimye, mambo akya kikambanga kechi anweba ne, bino mupashi wa Shenu ye ukemukwasha kwamba.”

Yesu watwajijile kwamba’mba: “Kolo ukasolola nkasa kuba amba bamwipaye, nkasa naye ukasolola kolo amba bamwipaye, kabiji shanji ukasolola mwananji amba bamwipaye, baana nabo bakalukilamo bansemi babo ne kwibasolola amba bebepaye.” Kabiji wanungilepo amba: “Bantu bonse bakemushikwa na mambo a jizhina jami, pakuba yense ukachinchika kufika ne ku mpelo ye ukapuluka.”

Mwingilo wa kusapwila wanema bingi. Na mambo a kino, Yesu waambishepo bingi pa kwikala na milangwe pa kuba’mba mwingilo engijiwe bulongo kwa kubula lukatazho. Waambile’mba: “Umvwe bemumanyika mu muzhi umo, nyemenai mu muzhi mukwabo, mambo kine nemwambila namba: Kechi mukapwisha kusapwila mu mizhi yonse ya Isalela ne, poso Mwana muntu akafike.”

Ibyo kuba’mba Yesu wapaine ino mikambizho, lujimuno ne lutundaiko ku batumwa banji 12, pano bino byavwangilemotu ne bonse bakengilanga mwingilo wa kusapwila ntanda yonse panyuma ya lufu ne lusanguko lwanji. Kino kyamwekela mu byambo byo aambile’mba baana banji ba bwanga ‘bakebashikwa ku bantu bonse’ kechi ku bena Isalela bonkatu batumwa ko bebatumine na kusapwila ne. Kabiji batumwa kechi bebatwajile ku ba bitumbafumu ne ku bamfumu kimye Yesu kyo ebatumine na kusapwila ne. Kabiji aba baitabijile kechi bebasolwele ku ba mu kisemi kyabo amba bebepaye ne.

Onkao mambo, byo aambile’mba baana banji ba bwanga kechi bakapwisha kusapwila mizhi yonse ne, “poso Mwana muntu akafike,” Yesu witubujilenga mu bungauzhi amba baana banji ba bwanga kechi bakapwisha kusapwila ntanda yonse pa mambo a Bufumu bwa Lesa bwaikajikwa, Mfumu watumbijikwa aye Yesu Kilishitu saka akyangye kufika byo aji muntu Yehoba ye akengijisha konauna bantu pa Amagedonyi ne.

Byo atwajijile kwibabula mikambizho pa bya kusapwila, Yesu waambile’mba: “Mwana wa bwanga kechi wakila mufunjishi wanji ne, nangwa muzha kechi wakila nkambo yanji ne.” Onkao mambo, baana ba bwanga ba kwa Yesu bafwainwa kuketekela kwibamanyika byonka byo bamubile aye byo asapwijilenga Bufumu bwa Lesa. Pano bino, wajimwineko amba: “Kabiji kange muchine aba bepayatu mubiji ne kukankalwa kwipaya mweo ne, pakuba chinai yewa wakonsha kwipaya byonse, mweo ne mubiji mu Ngehena.”

Yesu naye wapichilemo mu bino bintu. Wachinchikile kufikatu ne ku lufu kwa kubula moyo kabiji kechi wasankijilepo bukishinka bwanji kwi aye wa bulume bonse Yehoba Lesa ne. Yehoba ye yenka wakonsha kwipaya “mweo” (ko kuba’mba bwikalo bwa kulutwe bwa mweo mumi) nangwa ye wakonsha kusangula muntu kuba’mba ekale na bumi bwa myaka ne myaka. Kine, Yehoba ke Shetu wa mwiulu uji na lusa.

Kabiji Yesu watundaikile baana banji ba bwanga kupichila mu kwingijisha kyakumwenako kyamwesheshenga Yehoba byo ebata muchima. Wibashikishe’mba: “Nanchi tubwalula tubiji kechi tupotwa na kajali kamo nenyi? Pakuba kafwako nangwa kamo kaponena panshi kwa kubula Shenu kuyuka ne. Kabiji nsuki ya ku mutwe wenu yonse beibala. Onkao mambo, kwakamwa ne: Mambo mwanema kukila bisamba bya bwalula.”

Mambo a Bufumu Yesu o akambizhe baana banji ba bwanga kusapwila akabanya ba mu nzubo, mambo bamo ba mu kisemi bakeaswa bakwabo bakeakana. Walumbulwile’mba: “Kange mulanguluke amba naishile kuleta mutende pano pa ntanda ne; pakuba naishile kuleta mpoko kechi mutende ne.” Onkao mambo, pa kuba’mba ba mu kisemi batambwile bukine bwa mu Baibolo kikebewa kuchinchika. Yesu waambile’mba: “Yense watemwisha bashanji nangwa bainanji kukila amiwa kechi wafwainwa kwikala mwanami wa bwanga ne, kabiji yense watemwisha mwananji wamulume nangwa wamukazhi kukila amiwa kechi wafwainwa kwikala mwanami wa bwanga ne.”

Byo apwishishe kwibapa mikambizho, Yesu walumbulwile’mba aba bakatambwila baana banji ba bwanga, bakatambwila ne aye. Waambile’mba: “Muntu yense ukapapo tuno twana twatucheche mema a kutoma na mambo a kuba amba ye mwana wa bwanga, kine nemubula namba: Kechi ukabula kutambula mfweto yanji ne.” Mateo 10:16-42.

▪ Yesu wajimwineko byepi baana banjiba bwanga?

▪ Yesu watundaikile ne kutekenesha byepi baana banji ba bwanga?

▪ Mambo ka mikambizho ya kwa Yesu o ingijila ne ku bena Kilishitu lelo jino?

▪ Mu ñanyi jishinda mwana wa bwanga wa kwa Yesu mo abujila kukijila mufunjishi wanji?