Kitango 63

Wibafunjishe Jikwabo

YESU ne batumwa banji byo bakijinga mu Kapenama mu nzubo, besambile pa kintu kikwabo kununga pa kwipachika kwa batumwa pa mambo a wajinga mukulumpe pe abo. Kino kyo besambilepo kyafwainwa nakyo kyamwekele kimye kyo babwelele ku Kapenama, bino Yesu kechi wajingapo ne. Mutumwa Yoano waambile amba: “Twamwene muntu umo wapangilenga bandemona mu jizhina jenu kabiji twaesekele kumukanya mambo kechi wajinga wa mwi atweba ne.”

Yoano wamwenenga batumwa nobe jo jibumba jonka jiji na lūsa lwa kubuka. Onkao mambo, walangulukilenga amba awa muntu waubilenga mingilo ya kukumya mu jishinda jabula kufwainwa mambo kechi wajinga wa mu jibumba jabo ne.

Bino Yesu wibabujile’mba: “Kange mu mukanye ne, mambo kafwako ukoba mingilo ya kukumya mu jizhina jami ukapelawizha kwamba kintu kyatama pe amiwa ne, mambo awa ubula kwimulengulula uji ku lubaji lwenu. Mambo yense ukemupapo mema a kutoma na mambo a kuba amba mwi ba kwa Kilishitu, kine nemwambila namba, kechi akabule kutambula mfweto ne.”

Awa muntu kechi wafwainwe kwikala mu jibumba jaendanga ne Yesu pa kuba’mba amwitabile ne. Pa kyokya kimye kipwilo kya bwina Kilishitu kyajinga kikyangye kulengwa. Onkao mambo, byo abujile kwikala mu jibumba jabo, kechi kyalumbulwilenga amba wajinga wa mu kipwilo kingi ne. Awa muntu kine waitabijile mu jizhina ja Yesu kyo kyamulengejile kukonsha kupanga bandemona. Waubilenga kintu kyaesakene na kyaambilepo Yesu kyafwainwe muntu kutambwilapo mfweto. Yesu wamwesheshe amba na mambo a kuba kino, kechi ukabula kutambula mfweto ne.

Pano kyakonsheshe kwikala byepi umvwe awa muntu wituntwile na mambo a byambo ne byubilo bya batumwa? Umvwe kyatamine bingi! Yesu waambile’mba: “Pakuba yense ukatuntwisha bantu baji nobe baana babacheche baitabila, kyamufwainwa kumukashila mu nshingo jibwe jikatampe ja kupelelako jiji nabiji joja mbongolo jo azhokolosha kabiji ne kumwela najo mu kalunga ka mema.”

Yesu waambile’mba baana banji ba bwanga bafwainwe kwela kintu kyonse kyakonsheshe kwibatuntwisha mu bwikalo bwabo nabiji kuboko, kulu nangwa jiso. Kyawama kubula kwikala na bino bintu ne kutwela mu Bufumu bwa Lesa kukila kwibilama ne kutayiwa mu Ngehena (mpunzha ya mujilo mo basokanga biswaswa yajinga kwipi na Yelusalema), imenako lonaiko lwa myaka.

Kabiji Yesu wibajimwine amba: “Mwafwainwa kumona amba kechi mwalengulula bano bantu baji nobe baana babacheche ne, mambo nemubula kine namba, bamalaika babo ba mwiulu bamona kilungi kya Batata ba mwiulu.” Kepo aingijishe kyakumwenako kya kumwesha buneme buji na “bantu baji nobe baana babacheche” byo aambile pa muntu wajinga na mikooko kitoka kimo, bino waelelepo umo. Yesu walumbulwile amba awa muntu washile mikooko 99 ne kuya na kukeba mukooko waelekele, byo amutaine wasekejile bingi kukila pa yoya 99. Yesu wapezhezheko amba: “Ne Batata ba mwiulu kechi bakeba nangwa umotu wa mu bano bantu baji nobe baana babacheche konaika ne.”

Kampe Yesu byo alangulukilenga pa bipachikilenga batumwa banji, wibakambizhe amba: “Ikalai na mukele mukachi kenu ne kwikala mu mutende anwe bene na bene.” Mukele ye ulengela kajo kuwama. Onkao mambo, mukele wa kifwanyikizho ulengela kuswa byaamba muntu. Kwikala na mukele wa uno mutundu kukwasha kulamawizha mutende.

Bino na mambo a bumbulwakulumbuluka, bimye bimo pakonsha kubuka lutobo. Yesu waambile pa bya kuba umvwe pabuka lutobo. Waambile’mba: “Umvwe mulongo wobe wa kulenga mambo, ya ukamubule mambo o a kulenga. Umvwe wakumvwa, ko kuba amba wamubwezha mu jishinda jawama.” Umvwe wakana kumvwa, Yesu waambile’mba, “yapo na muntu umo nangwa babiji kuba amba mu kanwa ka batumonyi babiji nangwa basatu mambo alumbuluke.”

Kintu kyafwainwa kupelako kuba ke kyokya kyaambile Yesu amba, “bula kipwilo,” ko kuba’mba bakalama mu kipwilo bakonsha kuchiba oo mambo. Umvwe ndengamambo wakana kumvwa, Yesu wapezhezheko amba, “ekale kwi obewa nobe wa mu bisaka bikwabo nangwa nobe musonkeshi.”

Pa kuchiba mambo, bakalama bafwainwa kulondela bulongo mikambizho iji mu Mambo a Yehoba. Onkao mambo, umvwe batana muntu amba wazhatwa kabiji wafwainwa kumanyikwa, ko kuba’mba bunchibamambo ‘bebukasa kala mwiulu.’ Kabiji umvwe ‘bakasulula pano pa ntanda’ ko kuba’mba batana muntu amba mambo ufwao, ‘bamukasulula kala mwiulu.’ Pa kuchiba mambo, Yesu waambile’mba, “ponse paji babiji nangwa basatu bapwila mu jizhina jami, ne amiwa nji nabo.” Mateo 18:6-20; Mako 9:38-50; Luka 9:49, 50.

▪ Mu moba a kwa Yesu, mambo ka bantu o bamwitabilanga nangwa kya kuba kechi bajinga mu jibumba jamulondelanga ne?

▪ Mambo ka o kyatamina kutuntwisha bantu baji nobe baana babacheche, kabiji kyakumwenako ka Yesu kyo aingijishe kumwesha buneme buji na bantu baji nobe baana babacheche?

▪ Ñanyi kintu kyalengejile Yesu kutundaika baana banji ba bwanga kwikala na mukele mukachi kabo?

▪ ‘Kukasa’ ne ‘kukasulula’ kulumbulula ka?

Kitango 64

Lufunjisho pa Mambo a Kwilekelako Mambo

KYAMWEKA Yesu wakijinga mu Kapenama mu nzubo na baana banji ba bwanga. Wisambilenga nabo pa bya kuba na makatazho ekala pakachi ka balongo. Onkao mambo, Petelo wamushikishe’mba: “Nkambo, bimye binga byo nafwainwa kulekelako mukwetu wandenga mambo?” Byo kiji kuba’mba bafunjishi ba bupopweshi bwa Bayudea baambanga’mba kulekelako mambo bimye bisatu, Petelo kampe wamwenenga amba kulekela mambo “jitanu na jibiji” kumwesha amba muntu uji na muchima wawama.

Bino kechi kyaijilemo kwikala na uno mulanguluko ne. Yesu waolweleko Petelo amba: “Nakubula namba, kechi bimye bitanu na bibiji ne, kana makumi atanu na abiji ne jitanu na jibiji.” Wamwesheshenga amba Petelo kechi wafwainwe kubala bimye bya kulekelako mambo mulongo wanji ne.

Yesu waelele kishimpi baana banji ba bwanga kya kwibakwasha kuyuka mutembo ye bajinga nanji wa kwilekelako mambo. Kino kishimpi ke kya mfumu wakebele bakalume banji kubwezha bikoloto byabo. Kalume umo wajinga na kikoloto kya mandenali 60,000,000 bamuletele kwi aye. Kechi wakonsheshe kwiabwezha ne. Onkao mambo, byonka byalumbulwile Yesu, mfumu wakambizhe amba aye, mukazhanji ne baana banji bebapoteshe ne kubwezha kikoloto.

Na mambo a kino, awa kalume wafukamine kwi nkambo yanji ne kumusashijila amba: “Akintekenyai, nkemubwezhezha kikoloto kyenu.”

Nkambo yanji byo amubijile lusa, wamulekejileko kikoloto kyanji. Yesu watwajijile kwamba’mba, aku bamulekelakotu kikoloto kyanji, ponkapo wayile ne kutana mukwabo kalume wajinga na kikoloto kyanji kya mandenali 100. Uno muntu wafiine mukwabo pa nshingo ne kumwambila’mba: “Mbwezhezhe kikoloto kyami.”

Bino mukwabo kalume kechi wajinga na mali ne. Onkao mambo, wafukamine kwi kalume ye ajinga nanji na kikoloto ne kumusashijila amba: “Akintekenye, nkakubwezhezha kikoloto kyobe.” Kupusanako na nkambo yanji, awa kalume kechi wajinga na lusa ne, watwajile mukwabo kalume mu kaleya.

Yesu wanungilepo amba bakalume bakwabo byo bamwene kyo aubile, bayile ne kukabula nkambo yabo. Kepo nkambo yanji azhingijile ne kumwita awa kalume. Wamwambijile amba: “Obewa kalume mubi, amiwa na kulekejileko kikoloto kyami byo wansashijile. Nanchi kechi wafwainwe kumubila lusa kalume mukwenu byonka byo nakubijile lusa nenyi?” Na mambo a bukaji, nkambo wamupaine uno kalume wabula lusa ku baota amba poso akabwezhe kikoloto kyonse.

Kepo Yesu apezhezheko amba: “Ne Batata ba mwiulu byo byo bakemuba ne anweba, umvwe mwabula kulekelako mambo balongo benu kufuma mu michima yenu.”

Luno lufunjisho pa mambo a kwilekelako mambo, lwawama bingi. Umvwe twaesakanya kikoloto kikatampe kya bundengamambo Lesa kyo etulekelako ku mambo akonsha kwitulenga mulongo wetu mwina Kilishitu, akepa bingi. Kabiji Yehoba Lesa witulekelako mambo bimye byavula bingi. Kimye kimo kechi tuyuka’mba twamulenga mambo ne. Onkao mambo, nanchi kechi twafwainwa kulekelako mambo mulongo wetu bimye byavula nangwa kya kuba paji kine kintu kya kwijizhañenyapo nenyi? Vulukai amba byonka Yesu byo afunjishe mu Jashi ja pa Mutumba, Lesa ‘uketulekelako bikoloto byetu byonka byo twibalekelako mambo baji na bikoloto byetu.’ Mateo 18:21-35; 6:12; Kolose 3:13.

▪ Ki ka kyalengejile Petelo kushikisha pa mambo a kulekelako mambo mulongo wanji, kabiji mambo ka o amwenejile mulanguluko wanji wa kulekelako muntu bimye bitanu na bibiji amba umwesha’mba muntu uji na muchima wawama?

▪ Byaubile mfumu byo bamusashijile kwi kalume wanji kumumwesha lusa byapusene byepi na byaubile kalume byo bamusashijile ku mukwabo?

▪ Ñanyi kintu kyo tufunjilako ku kishimpi kya kwa Yesu?