Kitango 109

Yesu Wibakajipijile Balwanyi Banji

YESU wibashinkishe bulaka balwanyi banji ba mu bupopweshi kya kuba bachiine ne kumushikisha jikwabo. Onkao mambo, wasolwele bulubi bwabo. Washikishe amba: “Nanchi mulangulukapo amba ka pe Kilishitu? Ye mwana ñanyi?”

Bafaliseo bakumbwile amba: “Mwana Davida.”

Nangwa kya kuba Yesu kechi wakaine amba Davida ye mushakulu wa kwa Kilishitu nangwa amba Mesiasa ne, washikishe amba: “Mambo ka Davida byo atangijilwe na mupashi wazhila [pa Salamo 110], o amutelela amba Nkambo, ne kwamba amba, ‘Yehoba waambijile Nkambo yami amba: “Ikala ku kuboko kwa kilujo kyami, poso nkabike balwanyi bobe munshi ya maulu obe”’? Pano umvwe Davida umutela amba, Nkambo, waikala byepi mwananji?”

Bafaliseo baubiletu nzoo mambo kechi bamuyukile Kilishitu nangwa amba mushingwa ne. Mesiasa kechi wajingatu muntu wafumine mu kisemi kya kwa Davida byonka Bafaliseo byo baitabijile ne, bino aye wajingako mwiulu kabiji wajinga mukulumpe pe Davida nangwa amba wajinga Nkambo yanji.

Yesu byo atajile jibumba ne baana banji ba bwanga, wibajimwineko pa mambo a banembeshi ne Bafaliseo. Na mambo a kuba bafunjishanga Mizhilo ya Lesa ne ‘kwipa bene kifulo kya kwa Mosesa,’ Yesu wibakambizhe amba: “Bintu byonse byo bemubula, byubai ne kwibilama.” Bino wanungilepo amba: “Kange mulondelenga byo boba abo ne, mambo abo bambatu kwa kubula kwibyuba.”

Abo bajinga bakamfutumfutu kabiji Yesu wibakajipijile kwingijisha byambo bintutu bimo byo aambile kimye kyo ajiilenga na Mufaliseo. Waambile’mba: “Mingilo yonse yo boba, beyuba amba bantu bebatote.” Kabiji waambile byakumwenako amba:

“Babayisha tufuma to bavwala mo babika binembelo kuba amba twibazhikijile.” Tuno tufuma twakepa, to bavwalanga pa bilungi nangwa ku kuboko twajinga na mbaji ina ya Mizhilo: Kulupuka 13:1-10, 11-16; ne Mpitulukilo ya mu mizhilo 6:4-9; 11:13-21. Pano bino, Bafaliseo betubaishanga tuno tufuma kuba’mba bantu bebamone amba baji bingi na mukoyo wa Mizhilo.

Yesu watwajijile kwamba’mba ‘kabiji balepesha minyumbwe ya bivwalo byabo.’ Pa Kubala 15:38-40 bena Isalela bebakambizhe kulenga minyumbwe ku bivwalo byabo, bino Bafaliseo balepeshenga minyumbwe yabo kukila bonse. Abino byonse bebyubilanga amba bantu bebatote! Yesu waambile’mba: “Batemwa bingi kwikala pa bipona byo balamina benyi.”

Kyataminekotu ke kya kuba’mba, baana banji ba bwanga nabo bajinga na muchima wa kukeba bifulo. Onkao mambo, Yesu wibafunjileko amba: “Bino anweba kechi mwafwainwa kutelwa amba Bafunjishi ne, mambo mujitu na Mufunjishi umo, pakuba anweba bonse mwi balongo na balongo. Kabiji kechi mwafwainwa kwita yense pano pa ntanda amba tata ne, mambo kwi anweba kujitu Shenu umo, yenka uji mwiulu. Nangwa kwitela amba bantangi ne, mambo mujitu na Ntangi umo, aye Kilishitu.” Baana banji ba bwanga bafwainwe kukana mulanguluko wa kukeba kwikala mutanshi! Yesu wibajimwineko amba: “Mukulumpe mukachi kenu wafwainwa kwikala wamwingilo.”

Kabiji Yesu wafingile banembeshi ne Bafaliseo ne kwibatela amba bakamfutumfutu. Waambile’mba: ‘Bo bashinkila bantu bibelo bya Bufumu bwa mwiulu.’ Wanungilepo amba: “Bo babena kwangata mazubo a banabakazhi bafwilwa ne kulepesha milombelo yabo.”

Yesu waambile’mba: “Malwa enu anweba bampofu.” Wazhachishe Bafaliseo mambo kechi banemekele bintu bya ku mupashi na mambo a byubilo byabo byo bamwesheshenga ne. Kyakumwenako, baambanga amba, ‘Umvwe muntu pa kuchipa keatongole nzubo ya Lesa kechi kyatama ne, bino wafwainwe kupana kyo achipa umvwe pa kuchipa keatongole ngolode ya ku nzubo ya Lesa.’ Byo batesheshe muchima pa ngolode ya ku nzubo ya Lesa kukila buneme bwa ku mupashi bwa yoya mpunzha ya kupopwelapo, basolwele byubilo byabo bya bumpofu.

Byonkatu byo aubile patanshi, Yesu wazhachishe Bafaliseo na mambo a kubula kuta muchima ku “bine byanema bya mu Mizhilo, ko kuba amba bololoke, lusa ne bukishinka,” bino batele bingi muchima mu kupana bya bujikumi bya bintu byabujile kunema.

Yesu watelele Bafaliseo amba “anweba bantangi bampofu, mwatemwa kususa tubyakolwa, pakuba ngamela mumumina!” Basusanga tubyakolwa kechi na mambo a kuba’mba tubilongolo ne, bino na mambo a kuba kechi kyaijilemo na kisho kya kwitokesha ne. Pano bino, kulengulula bintu byanema bya Mizhilo kwaesakene pamo na kumina ngamela, nyama wajinga wa muzhilo. Mateo 22:41–23:24; Mako 12:35-40; Luka 20:41-47; Bena Levi 11:4, 21-24.

▪ Mambo ka Bafaliseo o bazhindaminepo kimye Yesu kyo ebashikishe pa mambo a byambo byaambile Davida mu Salamo 110?

▪ Mambo ka Bafaliseo o balepeshanga tufuma mwajinga Binembelo ne minyumbwe ya ku bivwalo byabo?

▪ Yesu wafunjileko byepi baana banji ba bwanga?

▪ Ñanyi byubilo byabujile kuyilamo Bafaliseo byo bamweshanga, kabiji Yesu wibazhachishe byepi na mambo a kulengulula bintu byanema?

Kitango 110

Wapwishishe Mwingilo wa ku Nzubo ya Lesa

YESU wamwekele japelako mu nzubo ya Lesa. Wapwishishe mwingilo wanji wa pano pa ntanda kabiji kwashajiletu kumutotolwesha ne kumwipaya, kwaubiwe panyuma ya moba asatu. Bino watwajijile kukajipila banembeshi ne Bafaliseo.

Waambile bimye bisatu amba: “Malwa enu anweba Banembeshi ne Bafaliseo, bakamfutumfutu!” Patanshi wibafingile mambo baovwanga “pangye ya katomeno ne ya muchiba, bino mukachi mwayula lwiso ne kubula kwikanya.” Onkao mambo, wibakambizhe amba: “Patanshi akyovwa katomeno ne muchiba mukachi kuba amba pangye yako napo patoke.”

Wafingile banembeshi ne Bafaliseo mambo batamine michima kabiji befyanga kupichila mu kwimwesha nobe bapopwelanga Lesa kya kine. Wibambijile’mba: “Muji nobe bilende byo bashinga mpemba, bimweka pangye nobe byawama bino mukachi saka mwayula bikupa bya bantu bafwa ne bintu byonse byatama.”

Kepo bukamfutumfutu bwabo bwasolokele mambo bashimikilenga bilende bya bangauzhi ne kwibiwamisha kuba’mba bantu bebamone amba babena kwingila mingilo ya bukwasho. Bino byonka Yesu byo asolwele, abo bajinga “baana ba boba baipayile bangauzhi.” Kine, yense wakonsheshe kusolola bukamfutumfutu bwabo wibikile mu kizumba!

Yesu watwajijile kwamba byambo byakosa bya kwibazhachisha. Wibambijile’mba: “Anweba miloolo, baana ba bipiji, mukapuluka byepi lukabisho lwa Ngehena?” Ngehena kyajinga kimbo mo batayanga biswaswa kyajinga ku Yelusalema. Onkao mambo, Yesu waambilenga amba na mambo a kwikala na byubilo byatama, banembeshi ne Bafaliseo bakebonauna myaka ne myaka.

Pa mambo a boba bo akatuma kwikala bakumwimenako, Yesu waambile’mba: “Bamo mukebepaya ne kwi bapopa pa bichi, bakwabo mukebapuma mu mashinagoga enu ne kwibamanyika mu mizhi yenu, kuba amba mashi a bonse baoloka o baichijile pano pa ntanda e mushinkamane, kufumatu ku mashi a muntu waoloka aye Abela kufika ne ku mashi a kwa Zekaliya mwana Balakiya [watelwa’mba Yehoyada mu 2 Byambo bya Moba] yenka ye mwaipayijile pakachi ka nzubo yazhila ne kya kusokelapo. Kine nemwambila namba: Bino bintu byonse bikafikila kino kisemi.”

Na mambo a kuba Zekaliya wakajipijile bantangi ba bena Isalela, ‘abo bamumvwañenejile amba tumwipaye, ne kumwasa bamwashile mabwe monka mwayijile mukambizho wa mfumu, mu kipango kya nzubo ya Yehoba.’ Bino byonka byaambijile jimo Yesu, bena Isalela bamanyikilwe na mambo a kwichila mashi a bantu bonse baoloka. Kino kyamwekele panyuma ya kupitapo myaka 37, mu 70 C.E., kimye nzhita ya bena Loma kyo yaonawine Yelusalema kabiji Bayudea kukila pa milyonyi umo bafwile.

Yesu byo alangulukilenga pa kyokya kintu kyatama, waubile bingi bulanda. Waambile jibiji amba: “Anweba ba mu Yelusalema, mwipaya bangauzhi ne kwasa mabwe bo bemutumina! Nakebeshe bingi kukonkanya pamo baana benu, byonka kyaje byo afukamina twana twanji mu byapi! Bino anweba bantu kechi mwakebele kino ne. Talai, Lesa ukakana nzubo yenu.”

Kepo Yesu anungilepo amba: “Kechi mukammona kufuma luno ne, poso byo mukamba amba, ‘Watokwa awa wiya mu jizhina ja Yehoba!’” Aja juba jikekalako mu kimye kya kwikalapo kwa Kilishitu byo akeya mu Bufumu bwa mwiulu kabiji bantu bakamumona na meso a lwitabilo.

Yesu wayile pa mpunzha po akonsheshe kumona bilambwilo byajinga mu nzubo ya Lesa jibumba mo jatayilenga mali. Banonshi batayilengamo mali a muwayawaya avula. Kabiji mwanamukazhi wafwilwa mulanda waishile ne kutayamo tumali twa muwayawaya tubiji twakepesha.

Yesu waichile baana banji ba bwanga ne kwibambila amba: “Kine nemwambila namba, uno mwanamukazhi wafwilwa mulanda watayamo mali avula kukila bonse babena kutayamo mali mu bilambwilo.” Baana banji ba bwanga bafwainwa bakuminye bingi. Onkao mambo, Yesu walumbulwile amba: “Bonse batayamo o bafumya mu nsabo yabo, pakuba uno mwanamukazhi nangwa kya kuba mulanda, watayamo mali anji onse o ajinga nao.” Byo aambile bino, Yesu walupukilemo mu nzubo ya Lesa japelako.

Baana banji ba bwanga byo kuminye pa kubaya ne kuwama kwa nzubo ya Lesa, baambile’mba: “Mufunjishi, akitalai! mabwe, ne bishimikwa!” Kyashimunwa kuba’mba mabwe alepele mamita 11 kabiji mu bwipi kukila pa mamita 5 ne mu kimino kukila pa mamita asatu.

Yesu wakumbilwe amba: “Nanchi ubena kutala pa bino bishimikwa bikatampe nyi? Kafwako jibwe jikashala pa jibwe jikwabo jo bakabula kupalañanya ne.”

Panyuma ya kwamba bino bintu, Yesu ne baana banji ba bwanga baabukile Kinkunenke kya Kidelona ne kukanjila pa Mutumba wa Olebeta. Pa yewa mutumba batajilenga aya nzubo ya lukumo. Mateo 23:25–24:3; Mako 12:41–13:3; Luka 21:1-6; 2 Byambo bya Moba 24:20-22.

▪ Yesu waubile byepi kimye kyo ayile ku nzubo ya Lesa japelako?

▪ Bukamfutumfutu bwa banembeshi ne Bafaliseo bwasolokele byepi?

▪ “Lukabisho lwa Ngehena” lwatala mu ka?

▪ Mambo ka Yesu o aambijile’mba awa mwanamukazhi wabingwile avula kukila banonshi?