Bena Bino Bipikichala: Jipa 4, Kipungu 4: Courtesy Canada Wide; jipa 44 panshi ne nteeta: Neue Berliner Illustrierte; jipa 84 panshi ne nteeta: Courtesy Canada Wide

Uno buku kechi wa kupotesha ne. Ke wa kwingijisha mu mwingilo wa kufunjisha bantu Baibolo mwaya ntanda yonse utundaikwa na bupe.

Inge mukeba kupanako mali, ingijishai keyala wa donate.jw.org.

Baibolo ye twaingijisha muno ke Baibolo wa Binembelo bya Ntanda Ipya bya Kingiliki bya Bwina Kilishitu kanatu po bamwesha ungi. Paji kinembelo inge panembwa NW, kibena kulumbulula kuba’mba abyo byambo byatuntululwa kufuma mu Baibolo wa New World Translation of the Holy Scriptures.

March 2023 Printing

Kikaonde (bt-KD)

Kwi Anweba Musapwishi wa Bufumu:

Fwanyikizhai kuba’mba mwi mutumwa waimana pa Mutumba wa Olebeta. Yesu waiya ko muji. Aku saka akyangye kuya mwiulu, waamba’mba: “Mukatambula bulume kimye mupashi wazhila kyo akemwikijila kabiji mukekala batumonyi bami mu Yelusalema, mu Yudea ne mu Samaliya monse, ne monse mwapela ntanda.” (Byu. 1:8) Mwakonsha kuba byepi?

Kampe mwakonsha kuchina na mambo a kubaya kwa mwingilo. Mwakonsha kulanguluka’mba, ‘Pano nga atweba baana ba bwanga twakepa bibye, twakonsha kushimuna byepi “monse mwapela ntanda”?’ Mwakonsha kuvuluka lujimuno Yesu lo aambilepo bufuku saka akyangye kufwa ne, lwa kuba’mba: “Muzha kechi wakila nkambo yanji ne. Umvwe bampachile amiwa, ne anweba bakemupata; inge balamine byambo byami, bakalama ne byenu. Pakuba bakemuba bino bintu na mambo a jizhina jami, mambo abo kechi bayuka awa wantumine ne.” (Yoa. 15:20, 21) Pa kulanguluka pa bino byambo, mwakonsha kwishikisha anwe bene amba, ‘Nakonsha kushimuna byepi bulongo kimye kyo mbena kupita mu meseko ne lumanamo lwa uno mutundu?’

Ne lelo jino, tushikisha mepuzho a uno mutundu. Byo tuji Bakamonyi ba kwa Yehoba, ne atweba tuji na mwingilo wa kushimuna bulongo “monse mwapela ntanda,” ku “bantu ba mu bisaka byonse.” (Mat. 28:19, 20) Twakonsha kumwingila byepi uno mwingilo, kikatakata na mambo a meseko aambijilwe jimo?

Mu Byubilo bya Batumwa muji jishimikila jaamba pa batumwa ne bena Kilishitu bakwabo bajingako mu myaka kitota kitanshi C.E., byo baingijile mwingilo wabo na bukwasho bwa Yehoba. Uno buku ye mubena kutanga bamunengezha kwimukwasha kupesa pesa jino jishimikila ne kwimulengela kulanguluka pa bintu byamwekele byanembwamo. Musakukumya bingi pa kutana bintu byavula byaambiwamo byaubiwe ku bakalume ba Lesa ba mu myaka kitota kitanshi byo bipasha na bibena kubiwa ku bantu banji lelo jino. Musakumona’mba kuno kwipasha kechi kwavwangamotu mwingilo ye twingila ne, bino kwavwangamo ne byo twakwatankana kwingila uno mwingilo. Kulanguluka pa kuno kwipasha kujipo kusakukosesha lwitabilo lwetu lwa kuba’mba Yehoba Lesa watwajijila kutangijila lubaji lwa jibumba janji pano pa ntanda.

Twaketekela ne kulomba’mba kupesa pesa kwenu buku wa Byubilo kukakosesha luketekelo lwenu lwa kuba’mba Yehoba ukemukwasha ne kuba’mba bulume bwa mupashi wanji wazhila bukemukosesha. Mwane kine mutundaikwe kutwajijila “kushimuna bulongo” mambo a Bufumu bwa Lesa ne kukwasha bakwenu kwenda mu jishinda ja ku lupulukilo.​—Byu. 28:23; 1 Timo. 4:16.

1-6. Shimikizhaipo byamwekele bimwesha kuba’mba Bakamonyi ba kwa Yehoba basapwila mu mashinda apusana pusana.

REBECCA, Kamonyi wa kwa Yehoba wakyanyike mu kyalo kya Ghana, wamonanga sukulu po afunjilajinga’mba yo nyaunda yanji ya kusapwilamo. Kimye kyonse wasendanga mabuku alumbulula Baibolo mu kyola kyanji. Pa kimye kya kukokoloka, wasapwilanga ku bakwabo baana basukulu. Rebecca watendekele kufunjisha Baibolo bakwabo baana basukulu bavula.

² Pa jikuji ja Madagascar, ku musela wa Africa, bapainiya babiji baendanga kimye kyonse mu mute makilomita 25 kuya ku muzhi uji kwalepa na ko bekela. Bafunjisha Baibolo bantu bavula bakeba kufunda bukine.

³ Pa kuba’mba baye na kusapwila bantu bekela ku mukuzho wa mukola wa Paraguay ne wa Paraná, Bakamonyi ba mu Paraguay pamo na Bakamonyi bakwabo kufuma mu byalo 15 bafiikile bwato bwa kusenda bantu 12. Kupichila mu kwingijisha buno bwato, basapwishi ba mukoyo ba Bufumu, basampanya mambo awama mu mapunzha mubula kufikafika bantu.

⁴ Ku Kabeta ka ku Buyeke, Bakamonyi mu Alaska basapwilanga bakañenda beya mu kimye kya kisalo. Bakañenda kufuma mu byalo byapusana pusana byo baiyanga na mato kimye kyo kutwa kyuya, Bakamonyi ba mu kino kyalo bayanga ku kiito na tubipabi po babikanga mabuku alumbulula Baibolo a mu milaka yapusana pusana. Mu kyonka kino kyalo, Bakamonyi baingijishe ndeke kuya mu mizhi iji kwalepa. Kino kyalengejile mambo awama kusapwilwa mu mizhi ya Aleut, Athabascan, Tsimshian, ne Tlingit.

⁵ Larry wikala mu Texas, U.S.A., wajinga na nyaunda yo asapwilamo. Ino nyaunda mwajinga mazubo mo balaminanga bakolwakolwa kabiji naye mo mo aikalanga. Larry waingilanga bingi na mukoyo nangwa kya kuba waendelanga pa kakinga ka bantu balemana na mambo a mapuso o atainwemo. Wabulakonga bakwabo mambo a Bufumu ne luketekelo lwanji lwa mu Baibolo lwa kuba’mba, juba jimo mu bukalama bwa Bufumu bwa Lesa, ukekalatu bulongo byonka byo ajinga kala.​—Isa. 35:5, 6.

⁶ Pa kuba’mba batanwe ku kubuñana kwajingako mu muzhi wa Myanmar uji ku kabeta ka ku buyuke, jibumba ja Bakamonyi jaendele mu bwato moba asatu kufuma ku muzhi wa Mandalay. Na mambo a kukebesha kusapwila mambo awama, basendele mabuku alumbulula Baibolo a kushila bantu mo bayijilenga. Mu yense muzhi mukatampe nangwa mucheche mwaimenenga buno bwato, jino jibumba ja basapwishi ba mukoyo baikijilenga mu bwato ne kuya bukiji bukiji mu ino mizhi na kushila bantu mabuku. Pa kubwela, batainenga bakanjila bantu bakwabo kabiji bano basapwishi ba Bufumu batatwilenga kusapwila bobo bakanjila katataka.

7. Mu ñanyi mashinda bapopweshi ba Yehoba mo bashimwina pa Bufumu bwa Lesa, kabiji ñanyi kikonkwanyi kyo baji nakyo?

⁷ Byonkatu biji bano balongo ne banyenga bo twisambapo, bapopweshi ba Yehoba ba mukoyo mwaya ntanda yonse babena “kushimuna bulongo mambo a Bufumu bwa Lesa.” (Byu. 28:23) Besamba na bantu ku nzubo ku nzubo, mu mikwakwa, kwibanembela makalata ne kwisamba nabo kwingijisha foni. Kimye kyo benda mu masakya, kimye kyo baji mu mapunzha mukokolokela bantu nangwa kyo babena kukokoloka ku nkito, bakebapo tubimye twa kushimwinamo bukine bwaamba pa Bufumu bwa Lesa. Mashinda a kusapwilamo akonsha kupusana, pano bino tujitu na kikonkwanyi kimo kya kusapwila mambo awama konse kwakonsha kutanwa bantu.​—Mat. 10:11.

8, 9. (a) Mambo ka kuyilako palutwe kwa mwingilo wa kusapwila Bufumu o kwaikela kya kukumya? (b) Ñanyi bwipuzho bwanema bo twafwainwa kwipuzha, kabiji twafwainwa kuba byepi pa kuba’mba tutaane mukumbu?

⁸ Anweba mubena kutanga uno buku, nanchi muji pa basapwishi ba Bufumu babena kwingila mu byalo kukila pa 235 nyi? Umvwe byo ibyo, ko kuba’mba ne anweba mubena kulengela uno mwingilo wa kusapwila Bufumu kuyilako palutwe! Bintu byaingijiwa mu uno mwingilo pano pa ntanda ponse ke bya kukumya bingi. Nangwa kya kuba bapita mu makatazho akatampe kuvwangakotu ne kwibakanya ku makafulumende kabiji ne kwibamanyika, Bakamonyi ba kwa Yehoba babena kushimuna bulongo mambo a Bufumu bwa Lesa ku bantu ba mu bisaka byonse.

⁹ Bwipuzho bwanema kushikisha ke buno, Mambo ka makatazho kuvwangakotu ne lumanamo lutundaikwa na Satana o byakankelwa kulekesha mwingilo wa kusapwila mambo awama a Bufumu? Pa kuba’mba tukumbule buno bwipuzho, twafwainwa kwisamba pa byamwekele mu myaka kitota kitanshi. Mambo ne atweba Bakamonyi ba kwa Yehoba ba mu ano moba, twatwajijila kwingila mwingilo watatwile kala.

Mwingilo Mukatampe

10. Ñanyi mwingilo Yesu ye ateshesheko muchima, kabiji ñanyi kintu kyo ayukile pa uno mwingilo?

¹⁰ Yesu Kilishitu byo atatwile kipwilo kya bwina Kilishitu, watesheko muchima kusapwila mambo awama a Bufumu bwa Lesa; uno ye wajinga mwingilo wanji mu bwikalo bwanji bonse. Walumbulwile’mba: “Nafwainwa kusapwila mambo awama a Bufumu bwa Lesa ne ku mizhi ikwabo, mambo kino kyo kyo bantumijile.” (Luka 4:43) Yesu wayukile’mba watatwile mwingilo ye akonsheshe kubula kupwisha kumwingila bunke bwanji. Saka akyangye kufwa, waambijile jimo amba mambo a Bufumu akasapwilwa “mu bisaka byonse.” (Mako 13:10) Pano uno mwingilo wakonsheshe kwingijiwa byepi kabiji bañanyi bafwainwe kumwingila?

11. Ñanyi mwingilo mukatampe Yesu ye apele baana banji ba bwanga, kabiji wibakwasha byepi kwingila bulongo uno mwingilo?

¹¹ Yesu byo asangwilwe, wamwekele ku baana banji ba bwanga