“Endainga Mu Lwitabilo Kechi Mu Kumona Na Meso Ne.”

Saka bakyangye kulukuka ne konauna muzhi wa Yelusalema, mutumwa Paulo wanembele’mba bena Kilishitu byo baji bashilikale bawama ba kwa Kilishitu, bafwainwa kuketekela meseko ne kubula kuta muchima ku bintu bya kisangajimbwe. (2 Ti 2:3, 4) Na mambo a lonaiko lubena kwiya pa bantu babula kupopwela Lesa, twafwainwa kwikala na lwitabilo lwakosa pa kuba’mba tute muchima pa bintu bya ku mupashi. (2 Ko 4:18; 5:7) Tambai vidyo wa kuba’mba ‘Walk by Faith, Not by Sight.’ (Yai pa jw.org, ne kuchinta panembwa’mba MABUKU> MAVIDYO.) Monai kuta muchima ku bintu bya ku mubiji byo kwalengejile Nahama ne Abitali kuponena mu kizumba. Panyuma ya bino, pitulukai mu mepuzho alondelapo.

(1) Ñanyi “kya bunya . . . kyaimana mwazhila” kyajingako mu kitota kya myaka kitanshi, kabiji bena Kilishitu baikelenga mu Yelusalema bafwainwe kuba ka? (Mat 24:15, 16) (2) Mambo ka kunyema kufuma mu muzhi o kyakebewenga kwikala na lwitabilo? (3) Ñanyi bintu byavwangilwemo pa kuba’mba banyeme? (4) Mambo ka Nahama ne Abitali kyo bakankazhamijilenga kunyema? (Mat 24:17, 18) (5) Ñanyi lweseko lukwabo lwapichilemo Lechela byo afuminenga mu Yelusalema? (Mat 10:34-37; Mak 10:29, 30) (6) Nga Etana wamwesheshe byepi kya kumwenako kyawama kya kwikala na lwitabilo ne kuketekela mwi Yehoba? (7) Ñanyi makatazho apichilemo bena Kilishitu mu Pela? (8) Nga lwitabilo lwa kwa Nahama ne Abitali lwayilenga byepi na kukoka? (9) Yehoba walamine byepi bena Kilishitu baikajilenga mu Pela? (Mat 6:33; 1 Ti 6:6-8) (10) Twakonsha kulondela byepi Abalahama ne Sala byo tubena kufwenya ku mpelo ya buno bwikalo? (Heb 11:8-10) (11) Nahama ne Abitali bashiinwe byepi amba bafwainwe kubwela ku Yelusalema, kabiji mambo ka ndangulukilo yabo kyo yatamijile? (Luka 21:21) (12) Bwikalo bwajinga byepi mu Yelusalema Nahama ne Abitali byo babwelele? (13) Mambo ka o twafwainwa kukosesha lwitabilo lwetu lonka luno, mpelo ya buno bwikalo saka ikyangye kufika?—Luka 17:31, 32; 21:34-36.

Kwenda mu lwitabilo kulumbulula (1) kuketekela mu lutangijilo lwa Yehoba, (2) kuleka aye kutangijila ngayo yetu, kabiji (3) kumwesha’mba twata muchima ku bintu bya ku mupashi kukila bya ku mubiji. Twayai tutwajijile kwenda mu lwitabilo ne kuketekela amba “pano pa ntanda pabena kupita ne bya kusakasaka bijipo, pakuba awa uba kyaswa muchima wa Lesa ukekala myaka ne myaka.”—1 Yoano 2:17.