PA 14 April 1989, natangijilenga kupwila mu muzhi wa Maumere pa jikuji ja Flores, kimye bakapokola kyo batwelele mu nzubo ne kunkwata ne bakwetu basatu.

Baota ba ku kaleya betukanjikizhenga kunemeka mbandela. Byo twakaine kuba bino, betupumine, kwitunyanta bibaka ne kwitwimika pa mute wazonga pa moba atanu. Twafwanga mashika bufuku byo twalaalanga panshi mu kaleya mwajinga ndochi, saka twakooka ne bilonda na kutanta. Muota watwajijile na kwitwambila’mba tusankilepo lwitabilo lwetu, bino twamukumbulanga’mba, “Tukafwilamotu kechi tukanemekapo mbandela ne.” Byonkatu byajinga bena Kilishitu kala, ne atweba twipaine ‘kumanama na mambo a bololoke.’—1 Pe. 3:14.

PA 19 January 1999, Bamozilemu ne bena Kilishitu batwajijile kwishikwa, kino kyalengejile kiwowo mu muzhi wajinga kwipi palepele makilomita asatu kufuma ko naikalanga. Luno lukatazho lwabayile bingi.a

Byo napokolwele kisemi kyami, natumijile foni basapwishi bakwabo kuba’mba ngyuke byo baji. Nebatundaikile namba kosai kabiji kange muye ku mapunzha atama ne. Kabiji bakulumpe mu kipwilo baiyanga na kukosesha balongo ne banyenga ne kwibatundaika kupwilanga pamo mu tumabumba tucheche.

Ofweshi wa musampi witwambijile’mba tubuule basapwishi baikalanga mu mapunzha atama kufumamo, ne atweba twabuujile bisemi byavula. Muntu umo wakaine kufumamo, bamwipayile ku jibumba ja bantu jazhingijile. Pakuba bantu bonse baumvwijile mikambizho yafumine ku ofweshi wa musampi bapulukile.