Kuwamishako Busendwe Bwetu bwa Kusapwila—Kuleka Kufunjisha Bantu Baibolo Babula Kuyilako Palutwe

ENE MAMBO O KWANEMENA: Bantu bafwainwa kwita pa jizhina ja Yehoba pa kuba’mba bakapuluke. (Lo 10:13, 14) Pano bino, kechi bonse baswa kufunda Baibolo balondela mizhilo ya Yehoba ne. Twibikako bingi kwingijisha kimye kyetu bulongo mu mwingilo pa kuba’mba tukwashe bantu bakeba kupimpula byubilo byabo ne kutokesha Yehoba ku muchima. Inge muntu ye tufunjisha Baibolo kechi ubena kuyilako palutwe ne, twafwainwa kuleka kumufunjisha ne kukebako bantu bakwabo Yehoba bo abena kukoka kuba’mba beye mu jibumba janji. (Yoa 6:44) Bino pa kupitapo kimye, inge uno muntu wapimpula byubilo byanji ne kumwesha amba uji na ‘muchima wa kishinka wa kukeba bumi bwa myaka ne myaka,’ twafwainwa kutendeka kumufunjisha Baibolo jikwabo.—By 13:48.

BYA KUBA:

• Sanchilai ye mubena kufunjisha Baibolo pa byo afuukulapo kukeba kuyukisha bulongo bukine.—1Ti 2:4

• Mulumbulwilainga ene mambo o kyanemena kwingijisha byo abena kufunda.—Luk 6:46-49

• Isambai nanji kishimpi kya kwa Yesu kya njimi wakushilenga nkunwa ne kumwipuzha bintu bibena kumulengela kubula kwingijisha byo abena kufunda.—Mat 13:18-23

• Mulumbulwilai bulongo ene mambo o mubena kulekela kumufunjisha

• Mubulai kuba’mba mukapichilangapo na kumumonapo kabiji mutundaikai kuba’mba mukatendeka kumufunjisha Baibolo jikwabo inge wapimpula byubilo byanji

TAMBAI VIDYO, APA BINO MUKUMBULE ANO MEPUZHO:

• Ñanyi bintu byo mwafunjilako ku mwisambo byamwesha kuba’mba muntu wafunjilenga Baibolo kechi wayijilengako palutwe ne?

• Musapwishi wakwashishe byepi ye afunjishenga Baibolo kupimpula byubilo byanji?

• Musapwishi waubile byepi pa kuba’mba akwashe ye afunjishanga Baibolo kuyuka’mba wakonsha kutendeka kumufunjisha Baibolo jikwabo?