Yesu ne baana banji ba bwanga byo bafumine ku Yeliko, baikele moba asatu mu Betani. Pa Kimo pa Nisanyi 10, baimene lwendo lwa kuya ku Yelusalema. Yesu wafwile nzala. Onkao mambo, byo amwene kichi kya mukuyu, wayileko. Nanchi kino kichi kyapangile makuyu nyi?

Mwajinga mu ñondo wa Kisaka, makuyu saka akyangye kupanga ne, mambo aikalangako mu ñondo wa Kapyantoto. Pano bino, mabula saka asapuka kala mambo asapukile bukiji. Onkao mambo, Yesu wamwene’mba kichi byo kyasapuka mabula bukiji ne makuyu nao afwainwa kwikalako. Bino kechi wiataaineko ne. Mabula alengejile kichi kumweka nobe kiji na makuyu. Kepo Yesu ekifingile’mba: “Kafwako nangwa umo ukajako bipangwa kwi obewa myaka ne myaka ne.” (Mako 11:14) Ponkapotu kichi kyatatwile kuleela. Byaubile Yesu byayukanyikilwe juba jalondejilepo.

Yesu ne baana banji ba bwanga bafikile mu Yelusalema. Watwelele mu nzubo ya Lesa yonka yo apikichile mute juba jafumineko. Pa jije juba napo wiipikichile, byonka byo aubile myaka isatu yapichilepo kimye kya Kijiilo kya Lupitailo kya mu 30 C.E. (Yoano 2:14-16) Pa kikye kimye, Yesu wapangilemo “aba bapoteshenga ne bapotelenga bintu mu nzubo ya Lesa.” Kabiji wapinwine “matebulu a bapimpwilenga mali ne bipona bya bapoteshenga bankunda.” (Mako 11:15) Kabiji kechi waswishishepo muntu nangwa umo wasendele bintu kukilañenya mu kipango kya nzubo ya Lesa pa kuya ku lubaji lukwabo lwa muzhi ne.

Mambo ka Yesu o aubijile bino ku boba bapimpwilenga mali ne kupotesha banyama mu nzubo ya Lesa? Waambile’mba: “Nanchi kechi kyanembwa’mba: ‘Nzubo yami ikatelwa’mba nzubo ya milombelo ya bisaka byonse bya bantu’ nenyi? Pakuba anweba mwiyalula ke jiyengo ja tupondo.” (Mako 11:17) Kyalengejile’mba ebatele’mba batupondo ke mambo a kuba’mba batambulanga mali avula ku boba bapotanga kwi abo banyama bakulambula. Yesu wamwene buno busulu amba kuja bya lunkanankana ne bukapondo.

Bañanga bakatampe, banembeshi ne bakulumpe byo baumvwine byaubile Yesu, bakebele jibiji mashinda a kumwipayilamo. Pano bino, kibakatezhe. Kechi bataaine jishinda jawama ja kumwipayilamo ne, mambo bantu bonse baishilenga kwi aye na kumvwa byo afunjishenga.

Kununga pa Bayudea bakisemwa, bantu ba mu bisaka bikwabo baalukile ke Bayudea baishile ku Kijiilo kya Lupitailo. Pa bano baalukile ke Bayudea pajinga ne Bangiliki baishile na kupopwela Lesa pa kijiilo. Bayile kwi Filipa, kampe bamukasulukijile na mambo a jizhina janji ja Kingiliki, ne kumulomba’mba bakeba kumona Yesu. Filipa wazhinaukilenga, onkao mambo, wayile kwi Andeleo na kumwipuzha. Bano bonse babiji bayile na kwipuzha Yesu wakijinga pa nzubo ya Lesa.

Yesu wayukile’mba kwashalatu moba acheche kuba’mba afwe, onkao mambo, kechi wakebelenga kutumbalala nangwa kulumbulwila bantu byonse byo bakebelanga ne. Wakumbwile bano batumwa babiji kwingijisha kishimpi amba: “Kimye kyafika kya kuba’mba Mwana muntu atumbijikwe. Kinetu nemwambila namba, umvwe lukunwa wa wichi waponena panshi ne kufwa ne, wikalatu lukunwa umo; pakuba umvwe wafwa, upanga bipangwa byavula.”—Yoano 12:23, 24.

Lukunwa wa wichi wakepa bingi. Bino, umvwe bamubyala mu mushiji ne “kufwa,” umena kabiji mu kuya kwa kimye ukoma ne kupanga wichi. Kyo kimotu, Yesu naye wajinga muntu walumbuluka. Bino byo aikele wa kishinka kwi Lesa kufika ne ku lufu, ye bakengijisha pa kupana bumi bwa myaka ne myaka ku bantu ba kishinka baji na muchima wa kwipana byonka byo ajinga. Onkao mambo, Yesu waambile’mba: “Awa watemwa bumi bwanji ukebonauna, pakuba awa washikwa bumi bwanji pano pa ntanda ukebulama ne kwikala na bumi bwa myaka ne myaka.”—Yoano 12:25.

Yesu kechi walangulukilengatu pe aye mwine ne, mambo waambile’mba: “Umvwe muntu ukeba kuñingijila amiwa, andondelenga, kabiji akwa ko nkekala ne wa mwingilo wami ko ko akekala. Kabiji umvwe muntu ukeba kuñingijila, Batata bakamunemeka.” (Yoano 12:26) Ino ke mfweto ikatampe bingi! Aba banemekwa kwi Shanji bakekala pamo ne Kilishitu mu Bufumu.

Yesu byo alangulukilenga pa lumanamo ne lufu lwatama lwamupembelejilenga, waambile’mba: “Pano muchima wami wankatazha bingi, nanchi nsakwamba’mba ka? Tata, mpulushai ku kino kimye.” Bino Yesu kechi wakebelenga kuchinuzhuka kuba kyaswa muchima wa Lesa ne. Wanungilepo’mba: “Pano bino, kino kyo kyo naishila ku kino kimye.” (Yoano 12:27) Yesu waswile lunengezho lwa Lesa lonse kuvwangakotu ne lufu lwa bukitapisho.

Kimye kyo ajinga pa nzubo ya Lesa pa Kimo, pa Nisanyi 10, Yesu waambile pa lufu lwanji lo ajinga pepi kufwa. Na mambo a kuba’mba watele bingi muchima pa bikekala jizhina ja Lesa, Yesu waambile’mba: “Tata tumbijikai jizhina jenu.” Ponkapo jiwi jafumine mwiulu amba: “Amiwa ne jitumbijika kabiji nkejitumbijika jibiji.”—Yoano 12:27, 28.

Bantu baimene kipikipi bakankamenetu. Bamo balangulukilenga’mba baumvwa kululuma kwa mvula. Bakwabo baambilenga’mba: “Malaika waamba nanji.” (Yoano 12:29) Bino Yehoba ye waambile. Kabiji kino kechi kyo kyajinga kimye kitanshi jiwi ja Lesa kumvwanyika na kwamba pe Yesu ne.

Myaka isatu ne kichika yapichilepo kimye Yesu kyo abatizhiwe, Yoano Mubatizhi waumvwine Lesa saka amba pe Yesu amba: “Uno ye Mwanami ye natemwa, mo mmwena lusekelo.” Kabiji panyuma ya Kijiilo kya Lupitailo mu 32 C.E., Yesu waalukile saka aji na ba Yakoba, Yoano ne Petelo. Bano banabalume basatu baumvwine Lesa saka amba’mba: “Uno ye Mwanami ye natemwa, mo mmwena lusekelo. Mumvwinai.” (Mateo 3:17; 17:5) Pano pa kikye kimye, Yehoba waambile mu jishinda ja kuba’mba bantu bonse bomvwe.

Yesu waambile’mba: “Jino jiwi jaumvwanyika kechi na mambo a amiwa ne, bino na mambo a anweba.” (Yoano 12:30) Kyajinga kishiino kyamwesheshe’mba Yesu kine Mwana Lesa kabiji ye Mesiasa walayilwe.

Kabiji bwikalo bwa kwa Yesu bwa bukishinka bwamwesheshe byafwainwa kwikala bantu, kabiji bwamwesheshe’mba Satana Diabola mfumu wa pano pa ntanda bafwainwa bamwipaya. Yesu waambile’mba: “Lesa ubena kwipazhachisha pano pa ntanda; pano mfumu wa pano pa ntanda bakamupangapo.” Lufu lwa kwa Yesu lwafwenyenyenga pepi kechi lwalumbulwilenga’mba bamushinda ne, bino lwamwesheshe’mba washinda. Mu ñanyi jishinda? Walumbulwile’mba: “Umvwe amiwa bakañimike pano pa ntanda, nkakokela bantu bapusana pusana ko nji.” (Yoano 12:31, 32) Na mambo a lufu lwanji lwa pa kichi, Yesu ukokela bantu kwi aye mwine kuba’mba bakekale na bumi bwa myaka ne myaka.

Bino jibumba byo jaumvwine byambo bya kwa Yesu bya kuba’mba “bakañimike,” jaambile’mba: “Twaumvwine mu Mizhilo kuba’mba Kilishitu ukekala myaka ne myaka; pano obewa ubena kwamba byepi kuba’mba Mwana muntu bakamwimika? Nanchi uno Mwana muntu ye ñanyi?” (Yoano 12:34) Nangwa kya kuba bantu bamwene biyukilo byavula kuvwangakotu ne kumvwa jiwi ja Lesa, kechi baitabijile amba Yesu Mwana muntu wa kine kabiji ye Mesiasa walayilwe ne.

Byonka byo aubile ne kimye kikwabo, Yesu waambile jibiji pe aye mwine amba ye “kyeya.” (Yoano 8:12; 9:5) Watundaikile jibumba amba: “Kyeya musakwikala nakyo mu kakimye kacheche. Endainga byo mukiji na kyeya pa kuba’mba mfishi ibule kwimushinda . . . Byo mukiji na kyeya, ikalai na lwitabilo mu kyeya, kuba’mba mwikale baana ba kyeya.” (Yoano 12:35, 36) Ponkapo Yesu wafumineko, mambo Nisanyi 10 kechi jo jajinga juba janji ja kufwa ne. Pa juba ja Kijiilo kya Lupitailo pa Nisanyi 14 po po ‘bamwimikile,’ ko kuba’mba kumukobeka pa kichi.—Ngalatiya 3:13.

Inge twalanguluka pa mwingilo waingijile Yesu, kimwekeshatu patoka’mba bungauzhi bwafikile kimye Bayudea kyo bakaine kumwitabila. Isaya waambijile jimo amba meso a bantu bakeapofula ne michima yabo ikakosa kuba’mba babule kubwela ne kwibabuka. (Isaya 6:10; Yoano 12:40) Kya kine, Bayudea bavula bakosele michima ne kukana kiyukilo kyamwesheshenga’mba Yesu ye yewa walayilwe kwikala Mupokolweshi kabiji jishinda ja bumi.

Nikodema, Yosefwa wa ku Alimatea, ne bantangi bakwabo “bamwitabijile” Yesu. Nanchi bano bantangi bamwesheshe’mba bamwitabila nyi, inyi bakankazhaminenga na mambo a kuchina kwibapanga mu nshinagoga nangwa na mambo a ‘kutemwa lukumo lufuma ku bantu’?—Yoano 12:42, 43.

Yesu walumbulwile kumwitabila byo kulumbulula’mba: “Awa wangitabila amiwa, kechi waitabilatu amiwa yenka ne, bino waitabila ne yewa wantumine; kabiji awa wammona, wamona ne yewa wantumine.” Bukine Lesa bo akambizhe Yesu kufunjisha kabiji Yesu bo afunjishenga bwanemene bingi kya kuba waambile’mba: “Yense undengulula amiwa ne kubula kutambula byambo byami, kuji ukamuzhachisha. Byambo byo naamba byo bikamuzhachisha mu juba jikapelako.”—Yoano 12:44, 45, 48.

Yesu wapezhezheko amba: “Kechi naamba milanguluko yami ne, bino Batata bantumine bo bankambizhe byo nafwainwa kubulañana ne kwamba. Kabiji nayuka namba mukambizho wabo bo bumi bwa myaka ne myaka.” (Yoano 12:49, 50) Yesu wayukile’mba katatakatu echile mashi anji kwikala kitapisho kya bantu bamwitabila.—Loma 5:8, 9.