Byambo Bikwabo bya mu Mutanchi wa Kupwila kwa Bwikalo ne Mwingilo
MAY 2-8
BYA BUNEME BIJI MU MAMBO A LESA | 1 SAMWELA 27-29
“Davida byo Alwanga Makondo”
it-1 41
Akishi
Pa bimye bibiji Davida po anyemenenga mfumu Saulo wayile na kufyama kwi Mfumu Akishi. Pa kimye kitanshi po anyemejile kwi mfumu Akishi, bamumwenenga’mba mulwanyi. Onkao mambo, watendekele kwibepekezha kukonya kuba’mba epulushe. Kino kyalengejile mfumu Akishi kumulekako amba ayenga. (1Sa 21:10-15; Sl 34: tubyambo twa peulu; 56: tubyambo twa peulu) Ja bubiji Davida wayile na bashilikale banji 600 ne bisemi byabo. Akino kyalengejile mfumu Akishi kwibapa mpunzha kwakwikala ku Zikilagi. Byo papichile mwaka umo ne bañondo bana, mfumu Akishi waumvwine kuba’mba Davida ubena kulukuka mizhi ya mu Yudea. Pano bino Davida walukukilenga bena Geshula, bena Gilizi ne bena Amaleki. (1Sa 27:1-12) Na mambo a kino, mfumu Akishi watongwele Davida kwikala kapaso wanji kimye bena Filishitiya kyo banengezhezhenga nzhita ya kulukuka Mfumu Saulo. Kufikatu ne juba japeleleko jo bayilenga ku nkondo, mfumu Akishi popo aambijile Davida kubwela ku Zigilagi mambo babitumbafumu kechi bamuketekejile ne. (1Sa 28:2; 29:1-11) Davida byo aikele mfumu kimye kyo alwilenga na bena Gata, kyamweka mfumu Akishi kechi bamwipayile ne, mambo wajingako ne mu moba a bukalama bwa mfumu Solomone.—1Mf 2:39-41; monai GATA.
Anweba Bansongwalume, Mwafwainwa Kuba Byepi pa Kuba’mba Bantu Bemuketekele?
8 Langulukai pa lukatazho lukwabo lwapichilemo Davida. Byo bamutongwele kwikala mfumu, Davida wapembejile pa myaka yavula bingi pa kuba’mba ekale pa bufumu mu Yuda. (1 Sam. 16:13; 2 Sam. 2:3, 4) Ki ka kyamukwashishe kupembelela saka atekanya? Watele muchima pa kuba bintu byo akonsheshe kuba. Kimye kyo anyemejile mu ntanda ya bena Filishitiya, Davida waingijishe kino kimye kulwa na balwanyi ba bena Isalela. Kupichila mu kuba bino, wazhikijile mipaka ya nyaunda ya Yuda.—1 Sam. 27:1-12.
it-2 245 jifu. 6
Bubela
Nangwa kya kuba Baibolo wakanya kubepa bubela, bino kino kechi kibena kulumbulula’mba twafwainwa kusololanga bya bufyamfya ku bantu ne. Yesu Kilishitu witujimwineko amba: “Kange mupane kintu kyazhila ku bakabwa ne, nangwa kutayila bankumba mabwe a mangalite ne, pa kuba’mba babule kwibanyantaula ne kwimwalukila ne kwimutabaula.” (Mat 7:6) O ene mambo Yesu pa bimye bimo o akainanga kubuula bantu bishinka byonse, nangwa kukumbula mepuzho inge kya kuba kuba bino kwakonsheshe kwibaletelela. (Mat 15:1-6; 21:23-27; Yoa 7:3-10) Byobyo twafwainwa ne kumonanga byaubile Abalahama, Izaka, Lehaba ne Elisha byo babujile kubuula bantu babula kupopwela Yehoba bishinka byonse nangwa kwibabula byambo bya kwibaluwika.—Nt 12:10-19; kita 20; 26:1-10; Yos 2:1-6; Ya 2:25; 2Mf 6:11-23.
Kukeba Bishinka Bikwabo Byanema
Nanchi Bafwa Bakonsha Kukwasha Bantu Bomi Nyi?
Akilangulukaipo pa kino? Baibolo wamba’mba muntu umvwe wafwa “ubwela ku mushiji” kabiji “milanguluko yanji yonaika.” (Salamo 146:4) Bonse babiji ba Saulo ne Samwela bayukile’mba Yehoba washikwa kupwañana na besamba na bapashi. Kabiji Saulo patanshitu wakambizhe bonse kuleka kupopwela bapashi.—Bena Levi 19:31.
Akilangulukaipo bulongo. Umvwe Samwela muntu wakishinka wakijinga na bumi mu bumupashi, nanchi wakonsheshe kulala muzhilo wa Lesa ne kwingijila pamo na wisamba na bapashi amba amonañane ne Saulo nyi? Yehoba wakaine kwamba ne Saulo. Nanchi Lesa wa Bulume Bonse bakonsheshe kumukanjikizha kwisamba ne Saulo kupichila mu kwingijisha Samwela wafwa nyi? Ine. Kyamwekeshatu patoka kuba’mba uno “Samwela” kechi wajinga yewa ngauzhi wa kishinka wa Lesa ne. Wajinga mupashi watama, ndemona wibepekezhenga kwikala Samwela wafwile.
MAY 9-15
BYA BUNEME BIJI MU MAMBO A LESA | 1 SAMWELA 30-31
“Kosainga na Mambo a Bukwasho bwa Yehoba Lesa Wenu”
w06 8/1 28 jifu. 12
Akamwai Yehoba—Ikalai na Lusekelo!
12 Moyo wa kwakamwa Yehoba kechi wamulengejiletu Davida kubula kuba bintu byatama ne. Wamulengejile kuba bintu mu jishinda jawama bulongo nangwa kya kuba wapichilenga mu makatazho. Pa mwaka umo ne bañondo bana, Davida ne bantu banji banyemene Saulo ne kuya na kwikala ku Zikilagi mu ntanda ya bena Filishitiya. (1 Samwela 27:5-7) Kimye banabalume kyo bafuminepo, balwanyi babo bena Amaleki basokele muzhi ne kusenda bakazhi babo bonse, baana, ne banyama. Byo babwelele ne kumona byamwekele, Davida ne bantu banji bajijile. Bantu ba kwa Davida bazhingijile bingi na bulanda kabiji baambañenenga amba bamwase mabwe. Nangwa kya kuba wapichilenga mu bya malwa, Davida kechi wapungijile ne. (Byambo bya Mana 24:10) Moyo wa kwakamwa Lesa wamulengejile kwalulukila kwi Yehoba kabiji “wikoseshe muchima wanji mwi Yehoba.” Davida ne bantu banji bebakwashishe kwi Lesa kabiji bashinjile bena Amaleki ne kwangata bintu byabo byonse.—1 Samwela 30:1-20.
Yehoba Witulama Kuba’mba Tukapuluke
14 Davida wapichile mu makatazho avula bingi. (1 Sam. 30:3-6) Byambo byo anembele na lutangijilo lwa mupashi bimwesha’mba Yehoba wayukile byo eumvwanga. (Tangai Salamo 34:18; 56:8.) Ne atweba Lesa wayuka byo tumvwa ku muchima. Inge muchima wetu ‘walajika’ nangwa ‘kulapila,’ Yehoba ufwenya kwipi ne atweba. Kino kishinka kitutekenesha bingi byonka byo kyatekeneshe Davida waimbile’mba: “Nkasekela ne kusangalala mu lusa lwenu; Mambo anweba mwamona kumanama kwami: Mwayuka byakatazha byamona muchima wami.” (Sala. 31:7) Yehoba kechi umonatu bya malwa byo tupitamo ne. Witukwasha kupichila mu kwitutekenesha ne kwitutundaika. Kupwila kwa bwina Kilishitu jo jishinda jimo jo obilamo bino.
Kukeba Bishinka Bikwabo Byanema
Bishinka Bikatampe Kufuma mu Buku wa Samwela Mutanshi
1 Samwela 30:23, 24. Uno mulanguluko uji mu Kubala 31:27, umwesha’mba Yehoba wanemeka bonse bengila mwingilo wa bunkwasho mu kipwilo. Onkao mambo, byonse byo tuba, nangwa ki ka, nangwa ki ka, twayayi tube “na muchima yense, nobe kwi Nkambo, kechi ku bantu ne.”—Kolose 3:23.
MAY 16-22
BYA BUNEME BIJI MU MAMBO A LESA | 2 SAMWELA 1-3
“Ñanyi Bintu byo Tufunjilako ku Lwimbo wa Bulanda Utelwa’mba Buta bwa Mukanda?”
w00 6/15 13 ¶9
Nemekainga Bemutangijila
9 Nanchi Davida waendangatu na bulanda na mambo a kumuyanjisha nyi? Ine. Walombele kwi Yehoba amba: “Bantu bakanama babena kukeba bumi bwami.” (Salamo 54:3) Wamusashijile Yehoba amba: “Anweba Lesa, mpokololai ku balwanyi bami . . . Banabalume bakosa bandukuka anweba Yehoba, kechi kiji bino na mambo a kuba’mba nasatuka nangwa nalenga mambo ne. Nangwa kya kuba kechi nalenga mambo ne, beya lubilo saka benengezha kuba’mba bandukuke. Imanai byo nemwita ne kunta muchima.” (Salamo 59:1-4) Nanchi ne anweba kino kya kimumwekelapo kala nyi? Kampe kafwako kyatama kyo mwaubile boba bemutangijila ne, bino batwajijile kwimukatazha. Davida kechi walekele kunemeka Saulo ne. Saulo byo afwile, Davida kechi wasekejile ne. Pakuba wanembele lwimbo wa bulanda. Wanembele’mba: “Saulo ne Yonafwanyi, bajinga na butemwe kabiji bawamine michima mu bwikalo bwabo . . . Banyemanga kukila bampungu, bakosele kukila mabokwe. Anweba banabakazhi bena Isalela, mujilai Saulo.” (2 Samwela 1:23, 24) Davida wanemekele bingi Saulo, mushingwa wa Yehoba, nangwa kya kuba wamwikezhe bufinda.
Kwisolola Bene Na Bene, Kiyukilo Kya Moba Atama!
8 Mu Baibolo mwatongolwa bantu bavula bakishinka. Twayai twisambe pa bantu babiji, tumone byo twakonsha kufunjilako kwi abo. Tusa kutendekelapo kwisamba pa muntu wajinga wa kishinka kwi Davida. Yonafwanyi mubeji wa Mfumu Saulo wafwainwe kuswana bufumu bwa bena Isalela, pano bino kechi ye wibujile ne. Yehoba wasajile Davida amba ye ukekala mfumu wa bena Isalela. Yonafwanyi wanemekele bingi lutangijilo lwa Yehoba. Kechi wamumvwijile Davida kichima ne, muchima wanji “wakwatankene pamo na muchima wa kwa Davida” kabiji waikele wakishinka kwi Davida. Yonafwanyi wamupele Davida kivwalo kyanji kya nkondo, mpoko, buta bwa mukanda, ne mukwato wanji pamo, kino kyamwesheshe amba wamupele munema wa bufumu. (1 Sam. 18:1-4) Yonafwanyi ‘wakoseshanga muchima wa kwa Davida’ wabikanga ne bumi bwanji mu kizumba pa kwimenako Davida ku meso a Saulo. Yonafwanyi waambijile Davida amba: “Obewa ukekala ke mfumu wa bena Isalela; kabiji amiwa nkekala ke wa bubiji kwi obewa.” (1 Sam. 20:30-34; 23:16, 17) O ene mambo Yonafwanyi byo afwile, Davida wajijile mabingo ne kusolola byo amutemenwe mu lwimbo wa bulanda.—2 Sam. 1:17, 26.
Kukeba Bishinka Bikwabo Byanema
it-1 369 jifu. ¶2
Mulongo
Kyambo kya “Mulongo” bekingijisha ne ku bantu bakwatankana kwingila mwingilo umo. Nabiji Hilama mfumu wa Tila watelele mfumu Solomone amba mulongo wami. Kechi wamutelele bino na mambo a kuba’mba bonse bajinga bamfumu ne. Bino ke na mambo a kuba’mba baletelenga mapulanga ne bikwabotu bya kwingijisha ku nzubo ya Lesa. (1Mf 9:13; 5:1-12) “Talai! Byo kyawamapo ne byo kitutokela ku muchima balongo kwikala pamo saka bakwatankana!” Byanembele Davida byalumbulwilenga’mba kechi twafwainwa kukwatankanatu ne kwikala mu mutende na balongo bo twasemwa nabo ne. (Sl 133:1) Butemwe ne bulunda bo bwalengejile Davida kutela Yonafwanyi amba mulongo wami, kechi kusemwa mu kisemi kimo ne. (2Sa 1:26) Bantu baji na byubilo bipasha nangwa byatama nabo bakonsha kwibatela’mba balongo.—Man 18:9.
MAY 23-29
BYA BUNEME BIJI MU MAMBO A LESA | 2 SAMWELA 4-6
“Chinuzhukainga Kufichisha Yehoba ku Muchima”
w05 7/1 ji. 9
Bishinka Bikatampe Kufuma mu Buku wa Bubiji wa Samwela
2 Samwela 6:1-7. Nangwa kya kuba Davida wajinga na mulanguluko wawama wa kuvilula jikwachi, byo akebele’mba ejisendele pa ñola wazhilulwilwe mukambizho wa Lesa kabiji kechi wijisendele ne. (Kulupuka 25:13, 14; Kubala 4:15, 19; 7:7-9) Kabiji nangwa Uza wakwachile jikwachi kuchina’mba ja kapona, kino nakyo kimweshatu patoka’mba nangwa milanguluko ijitu bulongo kechi ipimpula bikeba Lesa ne.
w05 2/1 27 jifu. 20
Yehoba Kimye Kyonse Uba Bintu Byaoloka
20 Mwafwainwa kuvuluka kuba’mba Uza wakonsha wayukile mizhilo. Jikwachi jaimenangako Yehoba. Muzhilo walumbulwile kuba’mba bantu babujile kuswishiwa kechi bafwainwe kukwatako ne, mambo muntu yense walala uno muzhilo wafwainwe kufwa. (Kubala 4:18-20; 7:89) Onkao mambo, kutuntulula kyokya kintu kyazhila, wajinga mwingilo wanema bingi. Uza wafwainwa wajinga mwina Levi (nangwa kya kuba kechi wajinga ñanga ne), wakonsha wayukile uno Muzhilo. Kabiji, myaka imo kunyuma Jikwachi jalaminwe mu nzubo ya bashanji. (1 Samwela 6:20–7:1) Jajinga monka pepi nobe myaka 70, poso ne kimye Davida kyo afuukwile kwijifumyamo. Onkao mambo, kufumatu ku bwanyike, Uza wakonsha wayukile mizhilo ya pa mambo a Jikwachi.
w05 2/1 27 jifu. 21
Yehoba Kimye Kyonse Uba Bintu Byaoloka
21 Byonka byo kyaambiwapo kala, Yehoba utalatala mu michima. Mambo a kuba Byambo byanji byaamba pa “kupusa” ko apushile Uza, Yehoba wakonsha wamwenemo byubilo byatama mwi aye byabula kusololwa mu kushinkamika mu jishimikila. Abya kwitota ko kwalengejile Uza kuvulama mizhilo nyi? (Byambo bya Mana 11:2) Nanchi kwendesha Jikwachi patoka ajo jalamine kisemi kyanji ko kwamulengejile kwilundumika nyi? (Byambo bya Mana 8:13) Abya Uza wabujile luketekelo pa kulanguluka’mba kuboko kwa Yehoba kwaipipa kwa kukankalwa kuzhikijila kintu kyazhila kyamwimenangako nyi? Kechi mambo na kyonse kyamwekele ne, twakonsha kuketekela kuba’mba Yehoba kyo aubile kyajinga kyaoloka. Wakonsha wamwene kyajinga mu muchima wa kwa Uza kyalengejile kumuchibila mambo ponkapotu.—Byambo bya Mana 21:2.
Kukeba Bishinka Bikwabo Byanema
w96 4/1 29 jifu. 1
Twikainga Yehoba Kisendwa Kyenu
Davida naye bafwainwe kumupamo mambo pa kino kyamwekele. Byo aubile bimwesha kuba’mba nangwatu boba baji na bulunda bwawama ne Yehoba bakonsha kuba byatama inge babena kupita mu makatazho. Pa kimye kitanshi Davida wazhingijile. Kabiji palutwe kacheche waumvwine bingi moyo. (2 Samwela 6:8, 9) Kino kintu kyabikile Davida mu lweseko nangwa kya kuba wajinga na bulunda bwakosa ne Yehoba. Pa kino kimye kyamweka Davida kechi watwikile Yehoba kisendwa kyanji ne. Mambo kechi walondejile mikambizho ya Yehoba ne. Nanchi ne atweba kino kyakonsha kwitumwekela nyi? Nanchi twakonsha kupamo Yehoba mambo inge tubena kupita mu makatazho o twiletela atweba bene na mambo a kubula kulondela mikambizho nyi?—Byambo bya Maana 19:3.
MAY 30–JUNE 5
BYA BUNEME BIJI MU MAMBO A LESA | 2 SAMWELA 7-8
“Lulayañano Yehoba lo Alayañene ne Davida”
“Bufumu Bobe Bukakosatu Po”
Yehoba watemenwe bingi na byakebele kuba Davida. Pa kukumbula kwipana kwa kwa Davida kwesakana na bungauzhi, Lesa walayañene lulayañano ne Davida kuba’mba ukafumya muntu mu kisemi kya kwa Davida kwikala mfumu ukalamanga myaka ne myaka. Natana wabujile Davida uno mulaye wa Lesa wa kuba’mba: “Kisaka kyobe ne bufumu bobe bikakosatu po kikupu; ne jitanda jobe jikekalanga myaka ne myaka.” (Kyepelo 16) Ñanyi ukekala Nswanyi wa myaka wa lulayañano, ukalamanga myaka ne myaka?—Salamo 89:20, 29, 34-36.
‘Bufumu Bobe Bukakosatu Po’
Yesu mwina Nazala wafumine mu kisaka kya kwa Davida. Pa kubijika kusemwa kwa kwa Yesu, malaika waambile’mba: “Nkambo Lesa ukamupa jitanda ja bufumu ja shanji Davida: aye ukekala mfumu mu kisaka kya kwa Yakoba myaka yonsetu; ne bufumu bwanji kechi bukapwa ne.” (Luka 1:32, 33) Ko kuba’mba, lulayañano lwa kwa Davida, Yesu Kilishitu ye wilufikizhe. Onkao mambo, ulama kechi na kyaswa muchima wa bantu ne, poso na mulaye wa Lesa ye amupa wa kulama myaka ne myaka. Twayai tuketekele kuba’mba milaye ya Lesa ya kine.—Isaya 55:10, 11.
Ikalai na Lwitabilo Lwakosa mu Bufumu
14 Akilangulukai Yehoba byo alayile Mfumu Davida wa bena Isalela ba kala kupichila mu lulayañano lwa Davida. (Tangai 2 Samwela 7:12, 16.) Yehoba walayañene luno lulayañano ne Davida kimye Davida kyo alaminenga mu Yelusalema, ne kumulaya’mba Mesiasa ukekala wa mu kisemi kyanji. (Luka 1:30-33) Onkao mambo, Yehoba walumbulwile jikwabo ndonda ya kisemi mukafuma mwana ne kulumbulula’mba awa ukaswana Davida ukekala “mwine” mwina jitanda ja Bufumu bwa Bumesiasa. (Ezi. 21:25-27) Bufumu bwa kwa Davida ‘bukekajikwa myaka ne myaka’ kupichila mwi Yesu. Kine, mwana wa kwa Davida ‘ukekalanga myaka yonse; ne jitanda janji jikekalanga nobe juba.’ (Sala. 89:34-37) Ee kine, bukalama bwa Bumesiasa kechi bukatama ne, kabiji bintu byo bukoba bikekala myaka ne myaka!
Kukeba Bishinka Bikwabo Byanema
it-2 206 jifu. 2
Moba a Kupelako
Bungauzhi bwa kwa Balamu. Bena Isalela byo bajinga pepi kutwela mu Ntanda ya Mulaye, Balamu popo abuujile Balaka mfumu wa bena Moabu amba: “Iyai nemubuuleko bano bantu byo bakooba ku bantu benu kulutwe. . . . Kabangabanga kakafuma mwi Yakoba, kabiji ndondo ikafuma mu Isalela. Kabiji aye ukalalaula kilungi kya kwa Moabu ne kulalaula mitwe ya baana ba kiwowo bonse.” (Ba 24:14-17) Mu kufika kutanshi kwa buno bungauzhi, mfumu Davida ye wajinga “kabangabanga” kashinjile bena Moabu. (2Sa 8:2) Onkao mambo, “mpelo ya moba” yo baambapo mu buno bungauzhi yatendekele kimye Davida kyo aikele mfumu. Davida byo aimenangako Yesu, aye Mfumu wa Bumesiasa, ko kuba’mba buno bungauzhi bukafika ne jikwabo kimye Yesu kyo akashinda balwanyi banji bonse.—Is 9:7; Sl 2:8, 9.
JUNE 6-12
BYA BUNEME BIJI MU MAMBO A LESA | 2 SAMWELA 9-10
“Davida Wamwesheshe Butemwe Bubula Kwaluka”
w06 6/15 14 jifu. 6
Mwakonsha Kwikala na Lusekelo
Davida wanembele’mba: “Ye mwine wa lusekelo awa ukwasha muyanji.” Kabiji wanungilepo amba: “Yehoba ukamupokolola mu juba ja bya malwa. Yehoba ukamuzhikijila ne kumulama na bumi.” (Salamo 41:1, 2) Bintu byawama Davida byo aubijile Mefibosheta, mwana wa mulume walemene wa mulunda nanji aye Yonafwanyi. Tufunjilako byavula kwi Davida pa byo twafwainwa kumonanga balanda.—2 Samwela 9:1-13.
w05 7/1 ji. 8
Bishinka Bikatampe Kufuma mu Buku wa Bubiji wa Samwela
2 Samwela 9:1, 6, 7. Davida wafikizhe mulaye wanji. Netuwa umvwe twalaya mulaye twafwainwa kumufikizha.
Bachinchikilenga ku Miba mu Mibiji Yabo
10 Byo papichile myaka, Mfumu Davida na mambo a kuba wamutemenwe bingi Yonafwanyi, wamubijile lusa Mefibosheta. Davida wamupele majimi onse ajinga a kwa Saulo ne kumubula Ziba kalume wa kwa Saulo amba ekale wa kumulamina uno mushiji. Kabiji Davida wamubujile Mefibosheta amba: “Ukajanga kajo ku tebulu wami kikupu.” (2 Samwela 9:6-10) Kwakubula nangwa kuzhinaukatune, lusa lwa kwa Davida lwamutekeneshe Mefibosheta ne kumukwasha kukepeshako binyenge bya bulema bwanji. Kino ke kyakumwenako kyawama bingi! Ne atweba twafwainwa kumwesha lusa ku boba babena kuyanda na mwiba mu mubiji.
Kukeba Bishinka Bikwabo Byanema
it-1 266
Bwevu
Kala bantu ba mu byalo byavula bya ku Musela, kuvwangakotu ne bena Isalela batemenwe bingi kulama myevu mambo yalengelanga mwanamulume kumupa mushingi. Mu mizhilo Lesa yo apele bena Isalela wibakainye kutenda “bimpolobela,” ko kuba’mba nsuki yakwatankana na myevu nangwa kutenda kunsa ya myevu. (Le 19:27; 21:5) Bebakainye kuba bino mambo byo byaubanga bantu ba mu bupopweshi bwa bubela.
JUNE 13-19
BYA BUNEME BIJI MU MAMBO A LESA | 2 SAMWELA 11-12
“Ikanyainga Inge Mwaikala na Milanguluko Yatama”
Mwakonsha Kufumamo mu Kakose ka kwa Diabola!
10 Lwiso lwalengejile Mfumu Davida kulubako bintu byamupele Yehoba, kubikapo ne bunonshi, kutumbalala, ne kushinda balwanyi banji bavula bingi. Davida wasanchile kabiji waambile pa bintu byamupele Lesa amba: “Byavujisha kabiji bya kukankalwa kubala!” (Sala. 40:5) Bino pa kimye kimo, Davida waikele na lwiso kabiji wakebelenga bintu byavula kukila pa byamupele Yehoba. Nangwa kya kuba Davida wajinga na bakazhi bavula, bino watendekele kukeba kwikala na mwanamukazhi wasongwelwe ku muntu mukwabo nangwa kya kuba Yehoba waambile’mba kuba bino ke kintu kyatama bingi. Uno mwanamukazhi wajinga Batesheba, kabiji mwatawanji wajinga Uliya mwina Hiti. Davida walaajile ne Batesheba, kabiji waimichile. Kintu kyaubile Davida kyatama bingi, bino wanungilepo ne kikwabo kyakijilemo kutama. Waipayishe Uliya. (2 Sam. 11:2-15) Ñanyi kintu kyajinga mu milanguluko ya kwa Davida? Nanchi walangulukilenga’mba Yehoba kechi ubena kumona nenyi? Nangwa kya kuba Davida wajinga kalume wa Yehoba wa kishinka pa myaka yavula, bino kulutwe waikele na lwiso, kabiji lwiso lwamulengejile kumona malwa a kabotoka. Kyawaminekotu ke kya kuba’mba, mu kuya kwa kimye, Davida waswile mambo o alengele kabiji walapijile. Wasanchijile bingi Yehoba pa kumulekelako mambo!—2 Sam. 12:7-13.
Nekenenainga Yehoba, mambo ka kabiji mwakonsha kuba byepi bino?
15 Yehoba kechi watongwele Davida kwikalatu mutwe wa kisemi kyanji ne, bino ne kisaka kya Isalela kyonse. Davida byo ajinga mfumu, wajinga bingi na bulume. Pa bimye bimo, kechi waingijishanga bulume bwanji mu jishinda jawama ne, kabiji walengele ne mambo akatampe. (2 Sam. 11:14, 15) Pano bino, wanekenejile Yehoba kupichila mukuswa byo bamolweleko. Walombele kwi Yehoba ne kumubuula byonse byajinga ku muchima wanji. Kabiji wibikangako kukookela lujimuno lwa Yehoba. (Sala. 51:1-4) Kunungapo, wipelwile bingi kya kuba kechi waswangatu bya mololangako banabalumetu ne, bino ne banabakazhi. (1 Sam. 19:11, 12; 25:32, 33) Davida wafunjijileko ku bintu byo alubankanyanga kabiji watele muchima pa kwingijila Yehoba..
Funjishainga Jiwi Jenu ja mu Muchima na Mizhilo ne Mafunde a Lesa
7 Kechi twafwainwa kulala mizhilo ya Lesa ne kumona bya malwa bifumamo apa bino twafunjilako ne. Twakonsha kufunjilako ku byalubankenye bantu bamo banembwa mu Mambo a Lesa. Byambo bya Maana 1:5 byaamba’mba: “Muntu wa maana uteleka ne kufunjilapo bintu byavula.” Lesa witufunjisha ne kwitupa maana alumbuluka, kikatakata inge ketutange ne kulanguluka pa byamwekejile bantu bamo banembwa mu Baibolo. Akilangulukai pa bya malwa byapichilemo Mfumu Davida kimye kyo alajile mizhilo ya Yehoba ne kuba bukende ne Batesheba. (2 Sam. 12:7-14) Kimye kyo tubena kutanga jino jishimikila, twakonsha kwishikisha’mba: ‘Mfumu Davida wafwainwe kuba byepi pa kuba’mba achinuzhuke kuba bukende ne Betesheba ne kubula kupita mu makatazho o apichilemo? Umvwe kya kuba naesekwa mu jino jishinda, nanchi nakonsha kukana luno lweseko nyi? Abya nakonsha kunyema byonka byaubile Yosefwa nyi, inyi nakonsha kulenga mambo byonka byaubile Davida?’ (Nte. 39:11-15) Inge ketulanguluke pa byatama bifumamo mu bundengamambo, tukebikishako ‘kushikwa byatama.’
Kukeba Bishinka Bikwabo Byanema
it-1 590 ¶1
Davida
Yehoba wamwenenga byonse byamwekelenga, kabiji wasolwele mambo alengele Davida. Umvwe kya kuba Yehoba waswishishe mambo alengele Davida ne Betesheba kwiachiba ku bamitonyi byonka byaambile mizhilo ya Mosesa, Davida ne Betesheba inge bebepayile kabiji ne mwana ye bafwainwe kusema inge wafwijile pamo na inanji. (Mpi 5:18; 22:22) Yehoba wafuukwilepo kuchiba ano mambo aye mwine. Kino kyamwesheshe byo aubijile lusa Davida na mambo a lulayañano lwa Bufumu lo alayañene nanji. (2Sa 7:11-16) Davida bamubijile lusa mambo naye waubilanga bantu lusa. (1Sa 24:4-7; esakanyaiko Ya 2:13) Kabiji Lesa walekejileko Davida mambo o alengele mambo walapijile. (Sl 51:1-4) Nangwa byonkabyo mwafumine byatama. Yehoba waingijishe ngauzhi Natana kwamba’mba: “Nkakuletela bya malwa bikafuma monka mu nzubo yobe.”—2Sa 12:1-12.
JUNE 20-26
BYA BUNEME BIJI MU MAMBO A LESA | 2 SAMWELA 13-14
“Byubilo Byatama bya kwa Aminona Byamuletelejile”
it-1 32
Abisalomo
Lufu lwa kwa Aminona. Tamala nyenga ya kwa Abisalomo walambile bingi. Kino kyalengejile kumukomoka bingi kwi Aminona, kolojanji wa mu jivumo jikwabo. Juba jimo Aminona wabepele kukolwa ne kutuma ba kuya na kwita Tamala amba amunengezhezhepo kajo mu kibamba monka mo alajile. Byo aishile wamukwachile ne kumulaala kya kumukanjikizha. Panyuma ya kulaala nanji, Aminona wamushikilwe bingi Tamala ne kumupanga. Tamala watabwile munkukumba wawama wavwalanga baana ba bakazhi ba mfumu ba bisungu, ne kubika buto pa mutwe wanji. Byo asambakene kolojanji Abisalomo, aye wafikenejiletu wayuka’mba Aminona ye wamulenga mambo nyenga yanji. Mambo wayukile’mba wamukomokele bingi. Abisalomo waambijile nyenga yanji kuzhindama ne kulubakotu, kabiji wamutwajile ku nzubo yanji.—2Sa 13:1-20.
Fundai Kwikanya
11 Mu Baibolo muji mashimikila a kwitujimunako a bantu babulanga kwikanya kuba bulalelale. Kabiji Baibolo waamba ne pa bintu byatama bifumamo mu kubula kwikanya. Bonse babena kupita mu lukatazho nabiji lwapichilemo Kim, bafwainwa kulanguluka pa nsongwalume wabujile maana wanembwa mu Byambo bya Maana kitango 7. Kabiji langulukai ne pa byaubile Aminona ne byatama byafumine mu byubilo byanji. (2 Sam. 13:1, 2, 10-15, 28-32) Bansemi bakonsha kufunjisha baana babo kwikanya ne kuchinuzhuka kwifwalama na banabalume nangwa na banabakazhi kupichila mu kwisamba pa mashimikila a mu Baibolo atongolwa mu uno mutwe pa kupopwela kwa kisemi.
it-1 33 jifu. 1
Abisalomo
Papichile myaka ibiji kabiji kimye kya kutenda mikooko kyafikile. Abisalomo wanengezhezhe kijiilo ku Baela-hazola palepele makilomita nobe 22 ku buyeke musele wa Yelusalema. Waichile baana ba mfumu bonse kuvwangakotu ne Davida kuba’mba bakatanwe ku kijiilo. Bashanji byo bamusashijile Aminona mwananji mubeji kuba’mba kechi wafwainwa kuya na kutanwa ku kijiilo ne, Abisalomo wamukanjikizhe Aminona kuba’mba aye na kutanwa ku kijiilo, mu kifulo kya kwa Davida. (Man 10:18) Byo bajinga pa kijiilo, Aminona byo ‘asangalele na mambo a binyu,’ Abisalomo wakambizhe bamingilo banji kwipaya Aminona. Baana ba kwa Davida babiji babalume babwelelemo ku Yelusalema. Abisalomo ne bankambo yanji babalume bena Silya banyemejile mu bufumu bwa Geshula ku musela wa Kalunga ka Ngalilea. (2Sa 13:23-38) Kino byo kyamwekele, “mpoko” yaambilepo ngauzhi Natana yatwelele mu “nzubo” ya kwa Davida kabiji yaikelemo mu bumi bwanji bonse.—2Sa 12:10.
Kukeba Bishinka Bikwabo Byanema
g04 12/22 8-9
Kulamba Kwakilamo Kunema
Kupusanako na kino, akilangulukai pe Abisalomo, mwana umo pa baana ba kwa Davida. Waikele na byubilo byatama nangwa kya kuba walambile bingi. Baibolo waamba pe aye amba: “Mu bena Isalela bonse, kechi mwajingapo mwanamulume ye batakaikilenga walambile nobe Abisalomo ne. Kufumatu ku maulu anji kufika ne pa lumbwichi, kechi wajingapo na kabulema ne.” (2 Samwela 14:25) Pano bino kichima kyamulengejile kusatukila bashanji ne kukeba kwibatambula bufumu. Kabiji walaajile ne na bantombo ba bashanji. Kyafuminemo, Lesa wakambwile Abisalomo kabiji wafwile lufu lwatama bingi.—2 Samwela 15:10-14; 16:13-22; 17:14; 18:9, 15.
Nanchi mwamutemwa Abisalomo nyi? Ine kwalepeshatu, mambo wajinga na byubilo byatama bingi. Nangwa kya kuba walambile, bino wajinga na byubilo byatama nabiji bwitote ne kubula bukishinka kabiji kulamba kwanji kechi kwamuletelejilepo byawama ne. Nangwa byonkabyo, Baibolo waamba pa bantu bajinga na byubilo byawama bo babula kwambapo pa kulamba kwabo. Kyamweka byubilo byawama byo bajinga nabyo byo byanemene.
JUNE 27 JULY 3
BYA BUNEME BIJI MU MAMBO A LESA | 2 SAMWELA 15-17
“Bwitote Bwalengejile Abisalomo Kusatuka”
it-1 860
Ba Kutangilako Lubilo Kulutwe
Mu moba a kala, javula batumanga ba kutangilako kulutwe kalaki wa mfumu saka akyangye kufika pa kuba’mba banengezhe ne kutaya mbila kuba’mba mfumu ubena kwiya pa kuba’mba bantu benengezhe kumutambwila. (1Sa 8:11) Pa kuba’mba bebape mushingi saka bakyangye kufika ne kwibazhikijila ku balwanyi, Abisalomo ne Adoniya nabo banengezhezhe banabalume 50 ba kutangilako kulutwe yabo.—2Sa 15:1; 1Mf 1:5; monai BA KUTANGILAKO LUBILO KULUTWE.
Ingijilainga Lesa Upana Bwana Bwa Bene
5 Mu Baibolo muji byakumwenako byavula bingi bya bantu balengelanga bakwabo kuba byatama. Umo pa bano ke Abisalomo, mwana Mfumu Davida. Abisalomo wajinga mwanamulume wa buya. Nangwa byonkabyo, mu kuya kwa kimye, byonka biji Satana, Abisalomo waikele na lwiso, mambo watendekele kukumbwa jitanda ja bufumu bwa shanji, kintu kyo abujile lūsa lwa kwikala nakyo. Pa kuba’mba angate bufumu, Abisalomo wajimbaikile bena Isalela amba ukeba kwibakwasha ne kwibambila mu bujimuku amba mfumu kechi wibatele muchima ne. Byonkatu byaubile Diabola mu bujimi bwa Edena, Abisalomo walengejile bantu kulanguluka’mba wibata muchima kabiji wabepele bubela bwatama bingi pe bashanji.—2 Sam. 15:1-5.
it-1 1083-1084
Hebulona
Byo papichile myaka, mwana wa kwa Davida aye Abisalomo wabwelelemo ku Hebulona. Byo afikile, watendekele kulwisha kuba’mba afumye bashanji pa bufumu. (2Sa 15:7-10) Muzhi wa Hebulona ye wajinga muzhi mukatampe wa Yuda kabiji kyamweka mu uno muzhi momo asemekejilwe Abisalomo. Kino kyo kyalengejile Abisalomo kutendekela mu uno muzhi kutambula bufumu. Pa kupitapo kimye, munkana wa kwa Davida aye Lehoboma washimukulwile muzhi wa Hebulona. (2Mo 11:5-10) Bena Babilona byo baonawine muzhi wa Yuda, ne Bayudea bajinga mu buzha byo babwelele, bamo pa bano bayudea babwelele batendekele kwikala mu Hebulona (Kiliataalaba).—Neh 11:25.
Kukeba Bishinka Bikwabo Byanema
Nanchi Muji na Bishinka Nyi?
11 Nangwatu atweba pa muntu pa muntu bakwetu bakonsha kwituba nshiji na mambo a kuba’mba baumvwakotu bishinka bicheche pe atweba. Akilangulukai pa kyamwekejile Mfumu Davida ne Mefibosheta. Davida waubijile kifyele Mefibosheta ne kumubwezhezha mpunzha yonse ya ba nkambo yanji ba Saulo. (2 Sam. 9:6, 7) Pano bino, mu kuya kwa kimye, Davida watambwijile sawakya watama pe Mefibosheta. Kwa kubula ne kukeba bishinka byonse ne, Davida wafuukwilepo kwangata Mefibosheta bintu byanji byonse. (2 Sam. 16:1-4) Bino Davida byo esambile nanji, wamwene kuba’mba walubankenye kabiji wabwezhejile Mefibosheta bintu byanji. (2 Sam. 19:24-29) Davida wakonsheshe kuchinuzhuka kuba ino nshiji inge kya kuba watekenye ne kukeba bishinka, kechi kufikenatu kufuukula bintu na mambo a sawakya mwajingatu bishinka bicheche ne.