BYAFWAINWA KWIKALA BENA KILISHITU
Koseshai Lwitabilo Lwenu mu Mambo a Lesa
Mambo a Lesa akonsha kupimpula bwikalo bwetu. (Heb 4:12) Nangwa byonkabyo, pa kuba’mba tumwenemo mu lutangijilo ne lujimuno lwa mu Baibolo, twafwainwa kushiinwa kuba’mba Baibolo ke “Mambo a Lesa.” (1Te 2:13) Pano twakonsha kukosesha byepi lwitabilo lwetu mu Baibolo?
Tangainga Baibolo pa juba pa juba. Inge mubena kutanga Baibolo, kebakebainga bishinka pa kuba’mba mushiinwe’mba Yehoba ye Nembi wa Baibolo. Nabiji kulanguluka pa byambo biji mu buku wa Byambo bya Maana ne kumona maana ajimo byo akonsha kwitukwasha mu bwikalo bwetu.—Man 13:20; 14:30.
Salai mutwe ne kukebelapo bishinka. Kebai bishinka bikemulengela kushiinwa’mba Baibolo wanembelwe na lutangijilo lwa Lesa. Mu buku wa Kukwasha Bakamonyi ba kwa Yehoba Kukebakeba Bishinka, mwakonsha kuya pa mutwe wa kuba’mba “Baibolo” apa bino mwaya paamba’mba “Kutangijilwa na Mupashi wa Lesa.” Kabiji mwakonsha kukosesha lwitabilo lwenu mu Baibolo kuba’mba bijimo kechi byapimpulwa ne kupichila mu kutanga byambo biji mu Bya Kulumbulula A3 mu Baibolo wa Binembelo bya Ntanda Ipya.
TAMBAI VIDYO WA KUBA’MBA ENE MAMBO O TWAIKELA NA LWITABILO MU . . . MAMBO A LESA, APA BINO MUKUMBULE ANO MEPUZHO:
Byambo biji pa lubumbulu lwa nzubo ya balesa ba bena Ijipita ku Kanaka bimwesha byepi kuba’mba Mambo a Lesa aamba bya kine?
Twayuka byepi kuba’mba byanembwa mu Baibolo kechi byapimpulwa ne?
Baibolo byo atwajijila kwikalako kufika ne lelo jino, kino kimwesha byepi kuba’mba Baibolo kine Mambo a Lesa?—Tangai Isaya 40:8